The Phnom Penh Post Search

Search form




Logo of Phnom Penh Post newspaper Phnom Penh Post - វគ្គ​ទី៤ ឆ្មា​និង​កណ្តុរ​ត្រូវ​គ្នា​វិញៈ ២០១៨​ គឺ​ជា​ការ​ប្រកួត​គ្នា​ដ៏​ស្រួច​ស្រាល់

វគ្គ​ទី៤ ឆ្មា​និង​កណ្តុរ​ត្រូវ​គ្នា​វិញៈ ២០១៨​ គឺ​ជា​ការ​ប្រកួត​គ្នា​ដ៏​ស្រួច​ស្រាល់

វគ្គ​ឆ្មា​និង​កណ្តុរ​ចាប់​ដៃ​គ្នា​បន្ទាប់​ពី​ខាំ​​គ្នា​នៅ​ក្នុង​រឿង​ TOM&JERRY។ រូបថត ដកស្រង់ចេញពីវេបសាយ Catoonnetwork
វគ្គ​ឆ្មា​និង​កណ្តុរ​ចាប់​ដៃ​គ្នា​បន្ទាប់​ពី​ខាំ​​គ្នា​នៅ​ក្នុង​រឿង​ TOM&JERRY។ រូបថត ដកស្រង់ចេញពីវេបសាយ Catoonnetwork

វគ្គ​ទី៤ ឆ្មា​និង​កណ្តុរ​ត្រូវ​គ្នា​វិញៈ ២០១៨​ គឺ​ជា​ការ​ប្រកួត​គ្នា​ដ៏​ស្រួច​ស្រាល់

«ទៅហើយ​មកវិញ ​ទៅហើយ​មក​វិញ ដោយ​សារ​តែបង...!​» គឺជា​សំនៀង​ដើម​​របស់​លោក​ស្រី ហួយ មាស។​ តែ​បទ​នេះ ក៏​ជាទី​ពេញ​និយម​របស់​អ្នក​នយោបាយ​នៅ​ស្រុកខ្មែរ​សព្វ​ថ្ងៃ​នេះ​ដែរ ដែល​មាន​លក្ខណៈ​ញៀន​នឹង​នយោបាយ ដែល​បាន​សន្យា​ថា លា​ឈប់​​ធ្វើ​ហើយ​រឿង​នយោបាយ​នោះ។

គ្រាន់​តែ​របៀប​នៃ​ការ​ញៀន មាន​លក្ខណៈ​ខុសគ្នា​ អ្នក​ខ្លះ​គេ​បណ្តេញ​ចេញ​ពី​បក្ស​មួយ​ទៅ​បង្កើត​បក្ស​មួយ​ទៀត​ ខ្លះទៀត​ឆ្អែត​ចិត្ត​ពីបក្ស​មួយ​រត់​ទៅ​បក្ស​មួយ​ទៀត មួយ​ហើយ​មួយ​ទៀត មិន​ចេះចប់​មិនចេះ​ហើយ ​រីឯខ្លះ​យក​មូលដ្ឋាន​គ្រឹះចេញ​ពី​អង្គការ​ក្រៅ​រដ្ឋាភិបាល មក​ធ្វើ​ជា​បក្ស​នយោបាយ​ក៏​មាន អ្នក​ខ្លះ​ខឹងចិត្ត​បក្ស​ណា​គេ​មិន​ពេញ​ចិត្ត​នឹង​ទស្សនៈ​របស់​ខ្លួន​ក៏​បង្កើត​បក្ស​ខ្លួន​ឯង​មើល​យ៉ាង​ម៉េច​ទៅ​វិញ?

ខ្លះទៀត​គេ​ឲ្យ​លុយ​ធ្វើ​គណបក្ស​ដើម្បី​បំបែក​សំឡេង​បក្ស​ផ្សេងៗ​ទៀត​ក៏​មាន​ គឺឲ្យ​តែ​គេ​នៅ​ប្រើ​ការ​បាន គេ​នៅតែ​ប្រើ​អ៊ីចឹង​​ហើយ​ការ​បង្កើត​គណបក្ស​សឹង​តែ​ជា​មុខ​របរ​រក​ស៊ី​ជា​ទី​ពេញ​និយម​នៅ​ស្រុក​ ខ្មែរ នា​ពេល​បច្ចុប្បន្ន​ទៅ​ហើយ អ្នក​ដែល​ធ្លាប់​ដូរ​គណបក្ស​​នោះ​មាន​ដូច​ជា៖ លោក សម រង្ស៊ី លោក កឹម សុខា លោក គង់ គាំ លោក ប៉ុល ហំម លោកស្រី មូរ សុខហ៊ួរ លោក កែវ រ៉េមី លោក ផៃ ស៊ីផាន តែ​សម្រាប់​ព្រះអង្គម្ចាស់ នរោត្តម​រណឫទ្ធិ វិញ គ្រាន់​តែ​មាន​បន្ទូល​ថា ឈប់​ធ្វើ​នយោបាយ​នោះ រាប់​ភ្លេច​ទៅ​ហើយ​ ឥឡូវ​បក្ស​ ហ៊្វុនស៊ិនប៉ិច​ យាង​ព្រះអង្គ​​មក​ធ្វើ​ជា​​មេបក្ស​​ដដែល ​ដើម្បី​បង្រួប​បង្រួម​​បក្ស​ឡើងវិញ​កាល​ពី​សប្តាហ៍​កន្លង​ទៅ​នេះ ​ដែលក​ន្លង​មក​លោក​នាយក​រដ្ឋមន្ត្រី​ ហ៊ុន សែន​ធ្លាប់​បាន​អះអាង​ថា លោក​ជា​អ្នក​បំបែក​គណបក្ស​នេះ​ដោយ​ប្រើ​យុទ្ធសាស្ត្រ ឌីហ្វីត (DEFID)។

រីឯ​លោក កែម ឡី ដែល​គេ​និយម​ហៅថា បណ្ឌិត​លាក់​និក្ខេបបទ ជា​អ្នក​ស្រាវជ្រាវ​សង្គម​ តែ​និយាយ​តែ​ពីរឿង​នយោបាយ​នៅ​ពេល​បាន​ក្បាល​មេក្រូ​ម្តងៗ បន្ទាប់​ពី​បាន​សាង​កេរ្តិ៍ឈ្មោះ​ល្បី​តាម​រយៈសារ​ព័ត៌មាន​មក កាលពី​ខែ​មុន​នេះ លោក​ក៏​ចាប់​ផ្តើម​រៀបចំ​ផែនការ​ធ្វើ​នយោបាយ​នឹងគេ​ដែរ ក្រែង​​បាន​លាភ​សក្ការៈ​នឹង​គេ ដោយ​សាកល្បង​ចេញ​ពី​បណ្តាញ​ «ខ្មែរ​ដើម្បី​ខ្មែរ!» គឺ​យក​ស្ទីល​តាមលោក​ ចូកូ វីដូដូ​ (Joko Widodo)​ ប្រធានាធិប​តី​ប្រទេស​ ឥណ្ឌូណេស៊ី​ ដែល​ទើប​តែ​ឡើង​​កាន់​អំណាច​ថ្មីៗ​ តាម​រយៈ​ការ​អភិវឌ្ឍ​​របស់​​លោក​ ចេញពី​អភិបាល​​ក្រុង​សូឡូ ​បន្ទាប់​មក​ធ្វើជា​អភិបាល​រដ្ឋធានី​ហ្សាការតា មុន​នឹង​ក្លាយ​ជា​ប្រធានាធិបតី​នោះ។

ទាំង​នេះ​វាជា​សិទ្ធិរបស់​បុគ្គលម្នាក់ៗ ក្នុង​ការ​ធ្វើ​នយោបាយ ឬក៏​ការ​បង្កើត​បក្សទេ តែ​ពេល​ខ្លះ​ធ្វើឲ្យ​អ្នក​បោះឆ្នោត​ចង់​​ពុល​​ម្តងៗ​។

តើ​ការ​លើក​ឡើង​មតិ​ដែល​ថា​ ការ​បង្រួប​បង្រួម​គណបក្ស​ ហ៊្វុនស៊ិនប៉ិច ​ដែល​សឹងតែ​បាត់​ឈ្មោះ​ក្នុង​ឆាក​នយោបាយ​ទៅ​ហើយ និង​បក្សថ្មី​​ដែល​នឹង​បង្កើត «ខ្មែរដើម្បីខ្មែរ!» មក​បំបែក​សំឡេង​គណបក្ស​ធំៗ​ទាំង​ ២ ​គឺ​បក្សប្រជាជន និង​បក្ស​សង្គ្រោះ​ជាតិ​សម្រាប់​ការ​បោះ​ឆ្នោត​ឆ្នាំ​ ២០១៨ មែន​ដែរ​ឬទេ?

ចាប់​តាំង​ពី​ការ​ប្រកាស​លទ្ធផល​នៃ​ការ​បោះឆ្នោត​តាំងពី​ថ្ងៃ ២៨ កក្កដា ឆ្នាំ ២០១៣ កន្លង​មក​ និង​បន្ទាប់ពី​វគ្គ ឆ្មា និង​ កណ្តុរ (Tom & Jerry) ​ត្រូវ​គ្នា​វិញ​មក​ កាល​ពី​ខែ កក្កដា ឆ្នាំ​ទៅ ​ព្រោះ​ខ្វះ​គ្នា​លេង​អត់​ល្អមើល គឺ​គណបក្ស​ទាំងពីរ បក្ស​ប្រជាជន និង​បក្ស​សង្គ្រោះ​ជាតិ មិន​សូវ​បាន​គិត​គូរ​បញ្ហា​ដោះ​ស្រាយ​ទុក្ខ​សោក​របស់​ប្រជាពលរដ្ឋ​ប៉ុន្មាន​ទេ គឺ​កំពុង​តែ​គិត​គូរ​រឿង​ទំនាស់​ផល​ប្រយោជន៍​របស់​បក្ស​ជាប់​ឆ្នោត​ទាំង ២ ច្រើន​ជាង ​ហើយ​កំណែ​ទម្រង់​ស៊ី​ជម្រៅ​របស់​បក្ស​កាន់​អំណាច​ក៏​មិន​ឃើញ​អ្វី​ចេញ​ជា​ដុំ​កំភួន​ដែរ លទ្ធផល​នៅ​តែ​គ្មាន​ដំណោះ​ស្រាយ​ជាក់​លាក់​ដដែល ដូចជា ការ​កាប់​បំផ្លាញ​ព្រៃឈើ​នៅ​តែ​បន្ត​ទប់​លែង​ជាប់ ទំនាស់​ដីធ្លី​នៅ​តែ​ជា​ចំណុច​ក្តៅ​ដដែល កាល​ពី​ខែ​មុន​មាន​ចេញ​ផ្ទុះ​ការ​រីក​រាល​ដាល​មេរោគ​អេដស៍ នៅ​ភូមិ​រកា​ខេត្ត​បាត់ដំបង​ទៀត សុទ្ធ​តែ​បញ្ហា​មិន​យក​ចិត្ត​ទុក​ដាក់។

ជាង​នេះ​ទៅ​ទៀត មិនទាន់​ដល់​ឆ្នាំ ២០១៨ ពេល​បោះ​ឆ្នោត​ស្រួល​បួល​ផង ក៏​ចាប់​ផ្តើម​ចេញ​ក្បួន​ចាស់​ដដែល​ៗ​របៀប​បំបែក​គណបក្ស ឬ ក៏​សំឡេង​គណបក្ស​ធំៗ​គ្នា​រៀងៗ​ខ្លួន​ទៀត​ហើយ មាន​តាំង​ពីការ​ចាប់​ផ្តើម​បង្កើត​គណបក្ស​ថ្មី «ខ្មែរ​ដើម្បី​ខ្មែរ» មាន​តាំង​ពី​ឲ្យ​ស្ត្រី​ម្នាក់​ឡូឡា​រឿង​មេបក្ស​សង្គ្រោះ​ជាតិ​ខ្លួន​ឯង​ថា បាន​ពុក​រលួយ​ទឹក​ប្រាក់ ៤០ លាន​ដុល្លារ ហើយ​មាន​តាំងពី​ការ​យាង​ព្រះ​អង្គម្ចាស់ រណឫទ្ធិ មក​ធ្វើ​ជា​ប្រធាន​គណ​បក្ស ​ហ៊្វុនស៊ិនប៉ិច ​ឡើង​វិញ ​ស្នៀត​ទាំង​នេះ ​ត្រូវគេ​មើល​ឃើញ​ថា គឺ​ជា​ស្នៀត​របស់​គណបក្ស​ប្រជាជន ដែល​មិន​ទាន់​ធ្វើឲ្យ​មាន​ការ​ប្រែ​ប្រួល​​អ្វីជា​ធំដុំ​នៅ​ឡើយ​ទេ។

រីឯ​ស្នៀត​បំបែក​របស់​គណបក្ស ​សង្គ្រោះ​ជាតិ វិញ​គឺ​ប្រមូល​ទាំង​អស់​ឲ្យតែ​មាន​មន្ត្រី​ជាន់​ខ្ពស់​ណា​ក៏ដោយ​ឲ្យ​តែ​ចង់​ចេញ​ពី​គណបក្ស​ប្រជាជន​មុន ឬ​ក៏​ក្រោយ​ការ​បោះ​ឆ្នោត​ក៏ដោយ។ អ៊ីចឹង​ហើយ​បាន​ជាការ​ជាប់​គាំង​ផ្នែក​នយោបាយ បន្ទាប់​ពី​ការ​ប្រកាស​លទ្ធផល​ការ​បោះ​ឆ្នោត កាល​ពី​ខែ កក្កដា ឆ្នាំ ២០១៣ កន្លង​មក ខណៈ​ដែល​មេៗ បក្ស​ប្រជាជន កំពុង​តែ​ឈឺក្បាល​វិល​មុខរក​ដំណោះ​ស្រាយ​ភាព​ទាល់ច្រក​មិន​ចេញ​ផង ​រីឯ ​រដ្ឋមន្ត្រី​ខ្លះ និង​មន្ត្រី​ជាន់​ខ្ពស់​មួយ​ចំនួន​នៅ​ចូល​ក្លិប ខារ៉ា​អូខេ​ច្រៀង​លេង​យ៉ាង​សប្បាយ​ធ្វើ​ព្រងើយ​មិន​ខ្វល់​អ្វី​ទាំង​អស់ បើបក្ស​ចាញ់​ឆ្នោត​ឆ្នាំ ២០១៨ មិន​មាន​តំណែង​ក្នុង​ជួរ​រដ្ឋាភិបាល​ នាំគ្នា​ចុះចូល​ជាមួយ​បក្ស​ប្រឆាំង​ទៅដាក់​ផុក (លុយ) ខ្លះទៅ បាន​តំណែង​ដដែល អ៊ីចឹង​បក្ស​ប្រជាជន អាច​កាន់​តែ​យ៉ាប់​យ៉ឺន​ទៅៗ​វិញ។

ហេតុដូចនេះ​ហើយ ​បានជា​គណ​​បក្ស​ប្រជាជន​ប្រឹង​លេង​ល្បែង​មុន​ដល់​ការ​បោះ​ឆ្នោត​ឆ្នាំ​២០១៨​ តាម​​របៀប​ចាស់ ឬ​ក៏​របៀបថ្មី​ណា​មួយ​ទៀត​ព្រោះ​ខ្លាច​​បាត់​កៅអី​បន្ថែម​ទៀត​។

ទោះយ៉ាង​ណា​ក៏ដោយ ​បក្ស​សង្គ្រោះ​ជាតិ​ក៏នៅ​មាន​បញ្ហា​ប្រឈម​មុខ​ក្នុង​បក្ស​ដូចគ្នា គឺ​ជា ​​គោល​ការណ៍​ប្រធាន​បក្ស​កាន់​បាន​តែ ​២ ​អាណត្តិ​នោះ​ទេ ប្រសិន​បើ​បក្ស​មិន​ឈ្នះ​ការ​បោះឆ្នោត​ឆ្នាំ ២០១៨​ នោះ​ទេ គឺ​លោក សម រង្ស៊ី​មិន​អាច​ឈរ​​ឈ្មោះ​ធ្វើជា​ប្រធាន​បក្ស​ទៀត​បាន​ឡើយ និង​អស់ឱកាស​ឈរ​ឈ្មោះ​ធ្វើ​ជា​នាយក​រដ្ឋមន្ត្រី​ទៀត​ផង ព្រោះ​លោក កឹម សុខា​មិន​សុខចិត្ត​ទេ ឬក៏​បក្ស​ធ្វើ​សមាជ​ឲ្យ​លោក កឹម សុខា ធ្វើ​ជា​ប្រធាន តែ​ដាក់​​បេក្ខជន​លោក ​សម រង្ស៊ី ឈរ​ឈ្មោះ​ ធ្វើជា​នាយករដ្ឋ​មន្ត្រី​ ដូច​គណ​បក្ស​ប្រជាជន​ ក៏​លោក ​កឹម សុខា​​នៅ​តែមិន​​សុខចិត្ត​ដែរ​ ព្រោះ​គាត់​ប៉ង​ធ្វើជា​នាយក​រដ្ឋ​មន្ត្រី​យូរ​មក​ហើយ​ដែរ។

សួរ​ថា​ តើ លោកស​ម រង្ស៊ី សុខ​ចិត្ត​នៅ​ពីក្រោម​លោក កឹម សុខា ឬទេ? គឺលោក ​សម រង្ស៊ី​ មិន​អាច​ទៅ​រួចទេ។ អ៊ីចឹង​មានតែ ​លោក សម រង្ស៊ី ​ត្រឡប់​មក​គណបក្ស សម រង្ស៊ី​ វិញ​ដើម្បី​តាំង​ខ្លួន​ធ្វើជា​មេបក្ស? ចំណុច​នេះ ​ហ៊ានតែ​ចេញ​គឺ​ត្រឹម​តែ​បាន​ដូច​ដើម​វិញ​ទេ គឺមាន​តែ​ថយ​ទៅរក​ភាពរ​លំ​រលាយ។ ​អ៊ីចឹង​ហើយឆ្នាំ​ ២០១៨ ខាង​មុខនេះ​ បក្ស​សង្គ្រោះ​ជាតិ​ត្រូវ​តែ​ត្រៀម​ប្តូរ​ផ្តាច់​ហាក់បី​ដូច​ជា ទឹក​ផ្តាច់​ព្រ័ត្រ​ផងដែរ។ ហ្នឹង​ហើយ​បាន​ជា​គេ​ថា រឿង​ល្បែង​នយោបាយ​​ចេះលេង​អី​តែ​ឯង? គេ​ក៏លេង​បាន​ដូច​គ្នាដែរ​ ឲ្យតែ​មាន​ឱកាស​ក្រឡា​ស៊ីមាន​ដូចគ្នា​ទេ ដូច​តុក្កតា​ឆ្មា និង​កណ្ដុរ​ អ៊ីចឹង មើល​ទៅ​ឃើញ​ថា ឆ្មា​ធំ​ជាង​ត្រូវ​តែ​ឈ្នះ​វ៉ៃ​លេង​បាន​​ដូច​រាល់​ដង​ តែ​ដល់​ពេល​ដេញ​ចាប់​កណ្តុរ ​កណ្តុរ​ដាក់អន្ទាក់​ចូល​ទ្រុង​ខ្លា​ឲ្យ​ខ្លា​ក្របួច​វ៉ៃលេង​ក្នុង​ទ្រុង​ក៏មាន។

តែ​សម្រាប់​រឿង​នយោបាយ​ស្រុកខ្មែរ បើ​នៅ​តែ​យក​ល្បែង​ឆ្មា និង​កណ្តុរ​មក​លេង​ដដែល​ជា​ដដែល គឺនៅ​តែ​ដាក់​អន្ទាក់គ្នា​ទៅវិញ​ទៅមក​គឺ​នៅ​លេងវិល​វល់​តែ​ប៉ុណ្ណឹង​បានតែ​ល្អ​មើល ​តែ​មិន​បាន​ធ្វើ​ឲ្យ​ប្រទេស​ជាតិ​អភិវឌ្ឍ​ទៅ​មុខ​បាន​លឿន​នោះ​ទេ​ព្រោះ​ម្នាក់ៗ​គិត​តែ​ពង្រឹង​បក្ស​ខ្លួន​ឯង​ច្រើន​ពេក។

រីឯ​បក្សតូចៗ​វិញ ខំប្រឹង​បង្កើត​មក​គ្រាន់តែ​បំបែក​សំឡេង ឬក៏​គ្រាន់តែ​កំដរ​ទូគេទេ មេបក្ស​នីមួយៗ​ខំកោក​កាកៗ ដាក់​សារ​ព័ត៌មាន​ឲ្យគេ​ឃើញ ឲ្យ​គេឮ ឲ្យ​គេ​ស្គាល់​ទៅ ក្រែង​បក្សធំៗ​អាណិត​ឲ្យ​ចូល​ជាមួយ​នឹង​គេ​ទៅ​ក្រែង​គេ​ឲ្យ​ថ្នាក់​ដឹក​នាំ​បក្ស ៤ ទៅ ៥ នាក់​ហ្នឹង​បាន​តំណែង​ខ្លះ​នៅ​ក្នុង​រដ្ឋាភិបាល​នៅ​ពេល​គេ​បាន​អំណាច។ គោល​ដៅ​នៃ​ការ​បង្កើត​បក្ស​ថ្មី ឬ ​ក៏ការ​បង្រួប​បង្រួម​បក្ស​ឡើង​វិញ​ដដែលៗ​ គឺអ៊ីចឹង​ ហេតុដូច​នេះ​ហើយ ​រឿង​នយោបាយ​ស្រុក​ខ្មែរ​ត្រូវ​បាន​គេមើល​ឃើញថា​ សម្បូរ​តែ​អ្នក​នយោបាយ តែជា​ប្រទេស​មួយ​មិន​មាន​វីរបុរស​របស់​ខ្លួន​ពិត​ប្រាកដ​នៅ​ក្នុង​រជ្ជកាល​ថ្មីនេះ ​ខុសពី​ប្រទេស​ជិត​ខាង​យើង បើ​គេ​និយាយ​ពីប្រទេស​ វៀតណាម គឺ​គេនឹក​ដល់​សព​លោក​ ហូ ជីមិញ​របស់​គេភ្លាម​ បើ​និយាយ​ពី​ប្រទេស​សិង្ហបុរី​គឺ​គេ​លើក​លោក លី ក្វាន់យូ​ភ្លាម។

សរុប​មក​វិញ​ អ្នក​នយោ​បាយ​សព្វថ្ងៃ​នេះគិត​គូររឿង​ផល​ប្រយោជន៍​ផ្ទាល់​ខ្លួន និង​បក្ស​របស់​ខ្លួនជា​ជាង​ដោះ​ស្រាយ​បញ្ហា​ប្រទេស​ជាតិ ដែល​ជា​ហេតុ​ធ្វើ​ឲ្យអ្នក​បោះ​ឆ្នោត​មួយ​ចំនួន​បាត់បង់​ជំនឿ​លើ​អ្នក​នយោ​បាយ​ដែល​ភាគ​ច្រើន​មិន​បាន​ធ្វើអ្វី​ដូច​ខ្លួន​បាន​សន្យា​មុន​ការ​បោះឆ្នោត៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

អត្ថបទគួរចាប់អារម្មណ៍