The Phnom Penh Post Search

Search form




Logo of Phnom Penh Post newspaper Phnom Penh Post - វីរបុរស​ប្រចាំ​ទសវត្សរ៍

វីរបុរស​ប្រចាំ​ទសវត្សរ៍

លោក​ ហ៊ុន សែន និង​លោក ​សម រង្ស៊ី​​ នាពេលកន្លង​មក។
លោក​ ហ៊ុន សែន និង​លោក ​សម រង្ស៊ី​​ នាពេលកន្លង​មក។ ហេង ជីវ័ន

វីរបុរស​ប្រចាំ​ទសវត្សរ៍

តាំង​ពី​អតីត​កាល ​ខ្មែរ​យើង​តែង​ពឹង​ពាក់​បរទេស​ដើម្បី​ដោះ​ស្រាយ​ជម្លោះ​ផ្ទៃ​ក្នុង ហើយ​ជា​រឿយៗ ​ពឹង​បរទេស​ដែល​នៅ​ជាប់​ព្រំ​ដែន​ម្ខាង វាយ​បរទេស​ជាប់​ព្រំ​ដែន​ម្ខាង​ទៀត​ដែល​បាន​ឈ្លាន​ពាន​។ ដំបូង​គ្រាន់​តែ​ជា​តម្រូវ​ការ​ពឹង​គេ​ព្រោះ​ខ្លួន​ទ័ល​គំនិត។ ពឹង​ម្ដង​បាន​ពឹង​ពីរ​ដង​បាន ក្លាយ​ជា​មានទម្លា​ប់​ចាំ​ពឹង​គេ​លែង​ប្រឹង​ពង្រឹង​ភាព​មាំ​ទាំ​ផ្ទាល់​ខ្លួន យូរៗ​ក៏ក្លាយ​ទៅ​ជា​ទម្លាប់​ពឹង​លើគេ​។ ទម្លាប់​ពឹង​លើ​គេ​ខុស​ពី​ទម្លាប់​ពឹង​គេ។

ពឹង​គេ​គឺ​ពឹង​គេជួយ មាន​ន័យ​ប្រហែល​សុំ​គេ​ជួយ គឺពឹង​ពាក់​ឲ្យ​គេ​ជួយ​ក្នុង​ន័យ​ថា​ ខ្លួន​មាន​កម្លាំង​ខ្លះ ហើយ​សុំ​កម្លាំង​គេ​ខ្លះ​បន្ថែម​។ ឯពឹង​លើគេ គឺផ្អែក​លើគេ ចាំគេធ្វើ​ឲ្យ​ទាំង​ស្រុង​លែង​ចេះ​ធ្វើ​ខ្លួន​ឯ​ង​។ ទម្លាប់​យូរៗ​វា​ក្លាយ​ជា​អត្ដច​រិត តែ​ពេល​និយាយ​ក្នុង​ក្រប​ខ័ណ្ឌ​ជាតិ អត្ដច​រិត​នោះ​គឺ​វប្បធម៌​។

ពេល​ឮថា​វប្បធម៌ ដំបូង​កូន​ខ្មែរ​ស្មាន​ថា​ល្អ​ប្រសើរ​ប្រពៃ​ណាស់ តែ​សិក្សា​យូរៗ​ទើប​ដឹង​ថា​ វប្បធម៌​នោះ គឺ​វប្បធម៌​ពឹង​លើ​បរទេស​សោះ​។ ឱ! ដូន​តាខ្មែរ​ខ្ញុំ​អើយ! វប្បធម៌ ពឹង​កម្លាំង​ក្រៅ​ខ្លួន​នេះ បាន​បន្ត​តាំ​ង​ពី​ដើម​រហូត​មក​ដល់​បច្ចុ​ប្បន្ន​នេះក៏នៅ​តែ​មិន​ទាន់​សាប​រលា​ប​នៅ​ឡើយ​ទេ​។ សួរ​ថា​តើ​ដំណែ​ល​បែបៗ​នេះ​ពួកយើង​ជា​មនុស្ស​ជំនាន់​នេះ គួរ​ទទួល​យក​មក​ដាក់​ខ្លួន​បន្ដ​ទៀត​ទេ?

បើ​កាល​ណាយើ​ងទ​ទួល​យក នោះ​វា​ស្មើ​នឹង​យើង​ត្រៀម​ផ្ទេរ​មរតក​នេះ បន្ដទៅកូន​ចៅ​យើង​ជំនាន់​ក្រោយ​បន្ដ​ទៀត​។ តើ​ដំណែល​បែបៗ​នេះ​ ខ្មែរ​ត្រូវ​ផ្ទេរ​បន្ដ​គ្នា​ប៉ុន្មាន​ជំនាន់​ទៅ​មុខ​ទៀត​ទៅ​?

ការ​ពឹង​កម្លាំង​ក្រៅ​ខ្លួន​របស់​ខ្មែរ​ដើម្បី​ដោះ​ស្រាយ​បញ្ហា​មាន​បីទម្រង់​។ ទីមួយ​គឺការ​ពឹង​ពាក់​កម្លាំង​អាវុធ ​របស់​ប្រទេស​ជិត​ខាង​ ខា​ង​កើត ដើម្បី​វាយប្រទេ​ស​ខាង​លិច ឬ​ផ្ទុយ​មក​វិញ​គឺ​ពឹង​ខាង​លិច​ ទៅ​វាយ​ខាង​កើត​វិញ ហើយ​ក្រោយ​ការ​ពឹង​គេម្ដង​ៗ បើ​ខ្មែរ​មិន​បាត់​ដី​ខេត្ដ​នេះ ក៏​ខ្មែរ​បាត់​ដី​ខេត្ដ​នោះ ថ្នូរ​នឹង​សង​គុណ​ដែល​ខ្លួន​បាន​សុំ​ពឹង​គេ​។ ទីពីរ​គឺ​ការ​ពឹង​ពាក់​កម្លាំង​យោធា​បរទេស​ ដើម្បី​ធ្វើ​រដ្ឋ​ប្រហារ ទម្លាក់​រដ្ឋាភិបាល​ដែល​កំពុង​កាន់​អំណាច និង​ទីបី​គឺ​ការ​ពឹង​កម្លាំង​បរទេស​ដើម្បី​ជួយ​ដោះ​ស្រាយ​វិបត្តិ​ផ្ទៃ​ក្នុង និង​ជួយ​អភិវឌ្ឍ​ប្រទេស​។

ដូន​តាខ្មែរ​មិន​មែន​មិន​ដឹង​ថា​បរទេស​ទាំង​ពីរ​នេះ​តែង​តែសម្លក់​សម្លឹង​លេ​ប​ទឹក​មាត់ រង់​ចាំ​តែ​ឱកាស​ន្អាលនឹង​លេប​ត្របាក់​ខ្មែរ​នោះ​ទេ ប៉ុន្ដែ​ដោយ​កើត​ទម្លាប់​ពឹង​លើ​គេ ទោះ​ដឹង​ថា​គេ​ជា​ក្រពើ​ជា​ខ្លា​ក៏នៅ​តែរត់​ទៅ​ពឹង​គេ​។ តើ​ការ​គ្មាន​ជម្រើស​បែប​នេះ មក​ពី​គេ​បង្ខំ​យើង ឬ​មក​ពី​កម្សោយ​របស់​យើង​ខ្លួន​ឯង?

រាល់​ការ​រំដោះ​ប្រទេស​ចេញ​ពី​របប​គ្រប់​គ្រង​មួយ ទៅ​បង្កើត​របប​គ្រប់​គ្រង​មួយ​ទៀត បាន​បង្កើត​ឲ្យ​មាន​វីរបុរ​ស​ប្រចាំ​របប​នោះ​ម្នាក់​ជា​ដរាប​។ ព្រះ​រាជ បូជ​នីយ​កិច្ច​ រំដោះ​ប្រទេស​ចេញ​ពី​អាណា​និគម​បារាំង បា​ន​​ធ្វើ​ឲ្យ​សម្តេច​ព្រះ​នរោត្ត​ម​សីហ​នុ ក្លាយ​ជា​វីរបុរស​ជាតិ​។ ការ​ធ្វើរ​ដ្ឋប្រ​ហារ​ទម្លាក់​សម្តេច សីហ​នុ​នា​ឆ្នាំ​១៩៧០ ដោយ​បាន​ទទួល​កម្លាំង​គាំទ្រ​ពី​សហ​រដ្ឋ​អាមេ​រិក ក៏​បាន​ធ្វើ​ឲ្យ​លោក​លន់ នល់ ក្លាយ​ជា​វីរបុរស​បាន​មួយ​រយៈដូច​ផ្លេក​បន្ទោរ។

ប៉ុល​ពត​ក៏​ក្លាយ​ជា​វីរបុរស​ដែល​រំដោះ​ខ្មែរ​ចេញ​ពី​របបលន់ នល់ ដោយ​ចុង​អាវុធ ​ហើយ​ការ​រំដោះ​ប្រទេស​ចេញ​ពីរបប​វាល​ពិឃាត​នា​ឆ្នាំ១៩៧៩ ក៏​បានធ្វើ​ឲ្យ​សម្តេច​ហ៊ុន សែន ក្រោម​ការ​ឧបត្ថម្ភ​ពី​កម្លាំង​យោធា​វៀត​ណាម ក្លាយ​ជា​វីរបុរស​ដែរ​។ មុន​បោះ​ឆ្នោត​ឆ្នាំ​២០១៣ និង​បន្ដ​មក​ដល់​មុន​ពួកគេ​ចូល​សភា គណ​បក្ស​សង្គ្រោះជាតិ​បាន​​បំពង​សំឡេង​គ្រប់​ទិស​ទី​លើ​ឆាក​អន្ដរ​ជាតិថា​ខ្មែរ​កំពុង​ទទួល​រង​នូវ​វិបត្តិ​ធ្ងន់​ធ្ងរ។

គេ​បាន​និង​កំពុង​ព្យា​យាម បញ្ចុះ​បញ្ចូល​បរទេសដើម្បី​ឲ្យ​បរទេ​ស​ទាំង​នោះ​វាយ​តម្លៃ​អំពី​ដំណើរ​ថយ​ក្រោយ​របស់​រដ្ឋាភិបាល​កម្ពុជា ពាក់​ព័ន្ធ​នឹង​ការ​អនុវត្ត​លទ្ធិ​ប្រជា​ធិបតេ​យ្យហើយ​គាប​​សង្កត់​រដ្ឋាភិបាល​ដែល​ដឹក​នាំ​ដោយ​គណ​បក្ស​ប្រជា​ជន ដើម្បី​ឲ្យ​ខ្លួន​អាច​ត​ថ្លៃ​ ការ​បែង​ចែក​អំណាច។ គេ​ចង់​ឲ្យ​បរទេស​ទាំង​នោះ​និយាយតាម​ខ្លួន​ថា​ខ្មែរ​កំពុង​តែ​ជួប​វិបត្តិ​ធ្ងន់​ធ្ងរ​ជាង​ពេល​ណាៗ​ទាំង​អស់ ហើយ​មាន​តែ​ខ្លួន​តែ​ប៉ុណ្ណោះ​ទើប​អាច​ដោះ​ស្រាយ​វិបត្តិ​ទាំង​នេះ​បាន ដើម្បី​បាន​ងារ​ជា​វីរ​បុរស​ជាតិ​ដែរ​។

គណ​បក្ស​ប្រឆាំង​ធ្លាប់​បាន​សន្យា​ជា​មួយ​ពល​រដ្ឋ ថា​ ក្រោម​ការ​ដឹក​នាំ​រប​ស់​គណ​បក្ស​សង្គ្រោះជាតិ ប្រទេស​ជាតិ​នឹង​ទទួល​បានការ​រីក​ចម្រើន​ដូច​សហរដ្ឋ​អាមេ​រិក​ដែរ ដោយ​សារ​តែ​ការ​ឧបត្ថម្ភ​គាំ​ទ្ររបស់​សហរដ្ឋ​អាមេរិក។ ការ​សន្យា​ដោយ​ការ​ពឹង​ផ្អែក​លើ​កម្លាំង​ក្រៅ​ខ្លួន​នេះ ជានយោ​បាយ​ប្រជាភិ​ថុតិ បន្ទាប​បន្ថោក​តែ​ប្រទេ​ស​ខ្លួន​ឯង និង​បោក​ប្រា​ស់​ពល​រដ្ឋ​ដើម្បី​ឲ្យ​ខ្លួន និង​បក្ខ​ពួក​បាន​បន្ត​ជីវិត​នយោ​បាយ។ នេះ​ជា​ការ​ធ្វើ​នយោ​បាយ​ដោយ​គ្មា​ន​ទស្សន​វិស័យគ្មាន​ទំនុក​ចិត្ត​​លើ​ខ្លួន​ឯង​។

ផ្អែក​លើ​ស្ថាន​ភាព​ប្រទេស​យើង​បច្ចុប្បន្ន ដោយ​ប្រៀប​ធៀប​ទៅ​នឹង​ស្ថាន​ភាព​នៅបណ្តា​ប្រទេស​មួយ​ចំនួន​ទៀត ដែល​កំពុង​តែ​ប្រឈម​នឹង​បញ្ហា​ទាំង​ស្ថាន​ភាព​នយោ​បាយ និង​ស្ថាន​ភាព​សេដ្ឋ​កិច្ច គឺ​ទាំង​សហគមន៍​អន្តរ​ជាតិ​ទាំ​ង អង្គការ​សហ​ប្រជា​ជាតិ​មិន​លូក​ដៃ​លើស​ពី​នេះ​នោះ​ទេ​។ មាន​ប្រទេស​មួយ​ចំនួន​បាន​បង្ហាញ​នូវ​ជំហរ​គាំទ្រ​រដ្ឋា​ភិបា​ល​បច្ចុប្បន្ន​នេះ​ថែម​ទៀត​ផង​។

ធៀប​នឹង​វិបត្ដិ​ប្រទេស​ដទៃ​ជាច្រើន​លើសក​ល​លោក ការ​សុំ​ពឹង​លើ​គេ​របស់​ខ្មែរ​អាច​រាប់​ថា ​ជា​ការ​រំខាន​គេ​ទៅ​វិញ​ទេ។​ តាម​ភាសាការ​ទូត បរទេ​ស​គេ មិន​អាច​និយាយ​បាន​ទេ​ថា​ធុ​ញ​​​ខ្មែរ!​ តែ​ក្នុង​ចិត្ដ​គេ​វិញ​គេ​សឹង​តែ​និយាយ​ថា“ខ្មែរ​អើយ! កុំពូ​កែ​តែ​ខាង​រំខាន​គេ ដោយ​សារ​តែ​ជម្លោះ​ផ្ទៃ​ក្នុង​ផ្ទាល់​ខ្លួន របស់​ពួក​អ្នក​ឯង​ខ្លាំង​ពេក ម្នាក់ៗ​មុខ​ឡើង​ចាស់ៗ​អស់​ហើយ ល្មម​រៀន​ចេះ​ដោះ​ស្រាយ​បញ្ហា​ខ្លួន​ឯង​ដោយ​ខ្លួន​ឯង​ខ្លះ​ទៅ!”។

គួរ​កត់​សម្គាល់​ផង​ដែរថា​កម្លាំង​ក្រៅ​ខ្លួន​ពី​បរទេស​អាច​គ្រា​ន់​តែ​ជួយ​ភាគីពឹង​ពាក់​ឲ្យ​អាច​ផ្តួល​រំលំរបប​គ្រប់​គ្រង​តែ​ប៉ុណ្ណោះ តែ​ការ​ពឹង​ពាក់​កម្លាំង​បរទេស​តាំង​ពីយូរ​លង់ណាស់​មក​ហើយ​នេះ បាន​បង្ក​ផល​វិបាក​ជា​ច្រើន​នៅ​ពេល​ភាគី​ទៅ​ពឹង​ពាក់​កម្លាំង​បរទេស ទទួល​បាន​ជោគ​ជ័យ​ តាម​បំណង​របស់​ខ្លួន តែ​ខ្មែរ​ត្រូវប្ដូរមក​វិញ​នូវ​ការ​បាត់​បង់​ទឹក​ដីជា​បន្ត​បន្ទាប់​។

បើ​ទោះ​បី​ជា​ការ​ពឹង​ពាក់​កម្លាំង​បរទេស​របស់​គណ​បក្ស​ប្រឆាំងអាច​នឹង​ទទួល​បា​ន​ជោគ​ជ័យ​ក៏ដោយ ក៏ក្រុម​នេះ​មិន​អាច​នាំព​លរដ្ឋ​ទៅ​ដល់​គោ​ល​​ដៅដែល​ខ្លួន​បាន​កំណត់​ដោ​យ​ស្រពេច​ស្រពិល ដូច​ជា​សន្យា​ថា​​ ធ្វើ​ស្រុក​សាន្ដ​ត្រាណ ស្រុក​រីក​ចម្រើន សង្គម​យុត្តិធម៌ បញ្ច​ប់​ការ​ឈ្លាន​ពាន​របស់​បរទេស​។ល។ នោះ​ដែរ ព្រោះ​មិន​ដឹង​ថា​ ម្ដេច​ទៅ​ហៅ​ថា​ ស្រុក​សាន្ដ​ត្រាណ? ប៉ុនណាទៅ​ស្រុក​រីក​ចម្រើន? តើ​ធ្វើ​ម្ដេច​ទើប​អាច​សម្រេច​បាន?

ក្រៅ​ពី​ប្រាប់​ប្រជា​ពលរដ្ឋ​ថា​ គេ​មាន​ឆន្ទៈ​ដោះ​ស្រាយតើ​ឯ​ណា​ទៅ​របៀ​ប​នៃ​ការ​ដោះ​ស្រាយ​បញ្ហា(គោ​ល​​នយោបាយ​យុទ្ធ​សាស្ដ្រ)? យើ​​ង​មិនបា​ន​​ឃើញ​​គណ​បក្ស​សង្គ្រោះ​ជាតិ មាន​គោល​​នយោ​បាយ​ជាក់​លាក់ គឺ​គេ​គ្មាន​ទស្ស​ន​វិស័យ​ក្នុង​ការ​ដោះ​ស្រាយ​បញ្ហា​នានា​ដែល​គេ​បាន​សន្យា​ឡើយ​។ តើ​មាន​អស់​លោក​ណា​ហ៊ាន​​ចេញ​មក​ធ្វើ​អនុមាន​រួម​ថា បន្ទាប់​ពី​អស់​លោក​ផ្លាស់​ប្តូរ​មេ​ដឹក​នាំ​នា​ពេលបច្ចុប្បន្ន​នេះ​ចេញ​ហើយស្ថាន​ភាព​ស្រុ​ក​ទេស​នឹង​មាន​ភាព​ល្អ​ប្រសើរ​ជាង​ពេល​បច្ចុប្ប​នេះ?​

ក្នុង​ករណី​ដែល​អស់​លោក​មិន​ដែល​នឹក​នាសោះ អំពី​រឿង​ផ្លាស់​ប្ដូ​រប្រព័ន្ធដឹក​នាំ​រដ្ឋ ពី​ប្រព័ន្ធ​ដែល​ប្រមូល​ផ្ដុំ​អំណាច មក​ជា​ប្រព័ន្ធ​បំបែក​អំណាច​? ទម្លាប់​ពឹង​កម្លាំង​ក្រៅ​ខ្លួន​នេះ ក៏ជា​ទម្លាប់​ដ៏​អាក្រក​់​របស់​ពល​រដ្ឋ​ទូទៅ​ដែរ​។ ពេល​ពល​រដ្ឋ​ចង់​បាន​សុខ​បាន​ចម្រើន​រក​ស៊ីមាន​បាន​ក្នុង​គ្រួសារ​ឯង ពល​រដ្ឋ​ក៏​អុជ​ធូប​បួង​សួង​បន់​ស្រន់​​ទេវតា ថ្វាយ​ផ្កា ថ្វាយ​ចេក​យាយ​ទេព ឲ្យ ខ្លួន​បាន​សុខ​ ហើយ​ចេញ​ពី​របង​ផ្ទះ ពេ​លចង់​បា​ន​ស្រុក​ទេស​រីក​ចម្រើន ពល​រដ្ឋ​ក៏ផ្ដេក​ផ្ដួល​ស្ទើរ​តែ​ទាំង​ស្រុង​ទៅ​លើ​រដ្ឋាភិបាល (រដ្ឋាភិបាល​ជា​ម៉ែ ជាឪរ​បស់​ប្រជា​ពល​រដ្ឋ) គឺ​ពឹង​តែ​លើ​អ្នក​នយោ​បាយ ឲ្យ​ជួយ​ពួក​គាត់​ឲ្យ​រស់​នៅ​បាន​សុខ។

ពល​រដ្ឋ​​ច្រើន​តែ​និយាយ​ថា «អ្ន​ក​នយោ​បាយ​ធ្វើ​អីធ្វើ​ទៅ ពលរដ្ឋ​សុំតែ​សុខ​ទេ​»។ តើ​បង​ប្អូន​មាន​ដឹង​ទេ​ថា មក​​ពី​បង​ប្អូន​មិន​ពឹង​កម្លាំង​ផ្ទាល់​​រ​បស់​​បង​ប្អូន​​ហើយ​​ចាំ​តែ​ពឹង​អ្នក​នយោ​បាយ​រក​សុខ​ឲ្យ​ហ្នឹង​ហើយ ដែល​ធ្វើ​ឲ្យ​បង​ប្អូន​មិន​ដែល​បាន​សុខ​នោះ​។ គឺ​គេ​មើល​ងាយ​ថា ​ពល​រដ្ឋ​ល្ងង់ ទោះ​បី​ជា​គេកុហក​ក៏​តាម​មិន​ទាន់​ក៏មិន​ដឹងថា ​គេកុហ​កហ្នឹងហើយ ទើបគេ​និយាយ​កុហក​​បង​ប្អូន​ ហើយ​មក​ពី​គេ​មើល​ងាយ​ថា​ ពល​រដ្ឋ​ល្ងង់ ពេល​ដឹង​ថា​គេកុហក​បោក​ប្រាស់​ហើយ តែ​ក៏គង់​តែ​គ្មាន​កម្លាំង​ទៅ​​ធ្វើ​អីគេ​កើតហ្នឹង​ហើយ​ ទើប​គេ​នៅ​តែ​បន្ដ​កុហក​បោក​ប្រាស់។

មាន​តែ​សត្វ​ទេ​ដែល​ត្រូវ​បាន​គេ​ដឹក ហើយ​អ្នក​នយោបាយ​​ទុច្ច​រិត​ដឹក​បង​ប្អូន​មិន​ឈប់ បង​ប្អូន​ដឹង​អត់​ថា​ គេ​​ឲ្យ​តម្លៃ​បង​ប្អូន​ថា​ជា​មនុស្ស ឬ​​ជា​សត្វ? តើ​គេ​មាន​មើល​ងាយ​​បង​ប្អូន​ទេ​ក្នុង​រឿង​នេះ​? ការ​ចូល​រួម​របស់​ពល​រដ្ឋ​ក្នុង​សកម្មភាព​សង្គម គឺ​ជា​ការ​ចាំ​បាច់។ ខ្មែរ​បាន​ចូល​រួម​យ៉ាង​សកម្ម​ក្នុង​សកម្ម​ភាព​នយោ​​បាយ ជា​យូរយា​រណាស់​មក​ហើយ ដូច​ជា​ការ​ចូល​រួម​តាម​ការ​​អំពាវ​នាវ​ចូល​ព្រៃ​ម៉ា​គី​ត​ស៊ូ​ទម្លាក់​របប​លន់ នល់​។

ការ​ចូល​រួម​វាយ​ផ្តួល​រំលំ​របប​ប៉ុល ពត។ ចលនា​តស៊ូ​ឲ្យ​មាន​ការ​ដក​កងទ័ព​វៀត​ណាម និង​ការ​បោះ​ឆ្នោត​គាំទ្រ​គណ​បក្ស​ហ៊ុន​ស៊ិន​ប៉ិច​ឆ្នាំ ១៩៩៣។ល។ ការ​ចូល​រួម​របស់​ពល​​រដ្ឋ​ដោយ​ការ​បូជា​ឈាម​ស្រស់​សាច់​ស្រស់​ក្នុងចលនា​ទាំង​នេះ​មិន​បាន​​ទៅ​​ដល់​គោល​ដៅ​ទេ ពី​ព្រោះ​បង​ប្អូន​គ្រាន់​តែ​ចូល​រួម​ដោយ​ការ​ចាញ់​បោក​អ្នក​នយោបាយ ដែល​​មិន​ពន្យល់​បង​ប្អូន​ឲ្យ​ស្គាល់អំ​ពី​បុព្វ​ហេតុ​នៃ​ការ​ចូល​រួម​ទាំង​នេះ​ឲ្យ​បាន​ច្បាស់​លាស់​។

មាន​​តែ​ការ​ធ្វើ​នយោ​បាយ​ដោយ​ប្រើ​ប្រាស់​សុច​រិត​ភាព និង​ទស្សន​វិស័យ​នៃ​ការ​ដោះស្រាយ​បញ្ហា​ជាតិ​ដើម្បី​ពន្យល់​ពល​រដ្ឋ​ឲ្យ​មាន​ការ​យល់​ដឹង​ច្បាស់​លាស់ អំពី​គោល​ដៅ​ដែល​ខ្លួន​ចង់​នាំ​ពល​រដ្ឋ​ទៅ អំពី​សារៈ​សំខាន់​នៃការ​ចូល​រួម​របស់​ពល​រដ្ឋ​ទេ ទើប​បង្កើត​ជា​ក្រុម​នយោ​បាយ​មួយ​ ដែល​ពលរដ្ឋ​អាច​ទុក​ចិត្ដ​ចូល​រួម​បាន​។ ការ​ធ្វើ​នយោ​បាយ​សុច​រិត គឺ​មិន​មែន​សំដៅ​រក​សន្លឹ​ក​ឆ្នោត​ពីពល​រដ្ឋ​នោះ​ទេ។

អ្នក​នយោ​បាយ​សុច​រិត​ត្រូវ​ធ្វើ​នយោ​បាយ​ដោយ​យក​ការ​ពន្យល់​​ជា​ការ​ចាប់​ផ្តើម ដើម្បី​​កែ​ផ្នត់​គំនិត​ពល​រដ្ឋ​ទៅ​លើ​គោលធំ​ៗ​ចំនួនបី។ ទីមួយ​គឺ​ពន្យល់​អំពី​សីលធម៌​សង្គម​។ សីលធម៌​ខ្ពស់​បំផុត​របស់​មនុ​ស្ស​គឺ​ការ​ទទួល​ខុស​ត្រូវ ទាំង​ចំពោះ​កាតព្វ​កិច្ច​ទាំង​មន​សិការ។ ទីពីរ​ត្រូវពន្យល់​ឲ្យ​មាន​ការ​ផ្លាស់​ប្តូរ​ផ្នត់​គំនិត​ពី​ការ​កាន់​ព្រះពុទ្ធ​សាសនា ដោយ​ប្រើ​ពិធី​បុណ្យ​សាសនា​សុំសេចក្តី​សុខ មក​ជា​ការ​បដិបត្តិ​ព្រះធម៌​ធ្វើ​ជា​មេរៀនជីវិត​។

លើស​ពី​នេះ​ទៀត​​អាច​ជួយ​ឲ្យ​ពលរ​ដ្ឋកាន់​តែ​មាន​សទ្ធា​ជ្រះ​ថ្លា ​ក្នុង​ការ​ចូល​រួម​សកម្មភាព​នយោ​បាយ​ដោយ​ប្រាស់​ចាក​ភាព​អាត្មា​និយម។ ទីបី​ត្រូវ​ពន្យល់​អំពី​ទស្សន​វិស័យ​នៃ​ការ​ធ្វើ​នយោ​បាយ​យ៉ាង​ច្បាស់​លាស់​ប្រាកដ​និយម និង​ងាយ​ស្រួល​ដែល​ពលរដ្ឋ​អាច​ពាល់​ត្រូវ​។ ជ័យ​ជម្នះ​ដែល​បាន​មក​ដោយ​ការ​ចូល​រួម​ដោយ​ការ​យល់​ដឹង និង​ការ​ទទួល​ខុស​ត្រូវ​បែប​នេះ គឺ​ជា​ជ័យ​ជម្នះ​ដែល​នឹង​​មិន​ត្រឡ​ប់​ថយ​ក្រោយ​ឡើយ ហើ​យ​នេះ​ក៏​ជា​ជ័យ​ជម្នះ​ដែល​អ្នក​ចូល​រួម​មាន​មោទន​ភាព ពីការ​បាន​ចូល​រួម​របស់​ខ្លួន​ថា​ នេះ​មិន​មែន​​ជា​ការ​ដើរ​តាម​ការ​អូស​ទាញ ឬ​ដឹក​នាំ​​របស់​អ្នកនយោ​បាយ និង​ច្បាស់​លាស់​ថា​ នេះ​ជា​ចលនា​ជួយ​សង្គ្រោះ​ពូជ​សា​សន៍​ខ្មែរ​ពិត​ប្រាកដ​។

វីរបុរ​ស​ខ្មែរ​ពិត​ប្រាកដ​ប្រចាំ​ទសវត្ស​រ៍​បន្ទាប់ មិន​មែន​ត្រឹម​តែជា​អ្នក​នយោ​បាយ​ប៉ុន្មាន​រូប​នោះ​ទេ តែ​គឺ​ពលរដ្ឋ​គ្រប់ៗ​រូប​ដែល​ងើប​ឡើង​ចូល​រួម​រំដោះ​ប្រទេស​ជាតិ ​ពីរបប​ដឹក​នាំ​បែប​អំណាច​ប្រមូ​ល​​ផ្តុំ មក​ជា​ការដឹក​នាំ​រដ្ឋ​ដោ​យ​ប្រព័ន្ធ​ពង្រាយ​អំណាច​ដែល​មា​ន​ពល​រដ្ឋ​ជា​ម្ចាស់​ពិត​ប្រាក​ដ​។ នេះ​គឺ​ជា​ការ​តស៊ូ ដែល​ពឹង​លើ​កម្លាំង​ខ្លួន​ឯង​ដោយ​ប្រើ​សុច​រិត​ភាព និង​ទស្សន​វិស័យ​នៃ​ការ​ដោះ​ស្រាយ​បញ្ហា​។

ធ្វើ​បែប​នេះ​​មិន​ត្រឹម​តែ​ដោះ​ស្រាយ​បញ្ហា​ចំពោះ​មុខ​របស់​ប្រទេស​យើង ដែល​កំពុង​តែ​ប្រឈម​នឹង​បញ្ហា នៃ​ការ​បាត់​ពូជ​សាសន៍​ប៉ុណ្ណោះ​​នោះ​ទេ លើស​ពី​នេះ​គឺ​ពួក​យើង​កំពុង​កាច់​បំបាក់​វប្បធម៌​ពឹង​លើ​ក​ម្លាំង​ក្រៅ​ខ្លួន​របស់​ខ្មែរ​តែម្ដង​។ ពួក​យើង​នឹង​មិនបន្សល់​នូវ​មរតក «ពឹង​លើ​គេ» ទៅ​ដល់​កូន​ចៅ​ជំនាន់​ក្រោយ​របស់​ពួក​យើង​បន្ដ​ទៀត​ទេ។ ការ​ចូល​រួម​ក្នុង​ចលនា​នេះ ​នឹង​ប្រែ​ក្លាយ​ប្រជា​ពល​រដ្ឋ​ខ្មែរ​គ្រប់ៗ​រូប​ឲ្យ​ក្លាយ​ជា​វីរបុរស​ក្នុង​ការ​ចូល​រួម​គិត រួម​ធ្វើ​ រួម​ទទួល​ខុស​ត្រូវ ក្នុង​ការ​កសាង​ និង​ការពា​រ​ជាតិ​មាតុភូ​មិយើ​ង​ទាំ​ង​អស់​គ្នា៕ ​

សុខ សាន្ត
អ៊ីមែលៈ camldp3@gmail.com

អត្ថបទគួរចាប់អារម្មណ៍