The Phnom Penh Post Search

Search form




Logo of Phnom Penh Post newspaper Phnom Penh Post - ស្រុក​ខ្មែរ​សម្បូរ​ក្រសួង​ធ្វើការ​ទាក់ទិន​នឹង​ទឹក​ តែ​ហេតុអ្វី​ពលរដ្ឋ​នៅ​ខ្វះ?

ស្រុក​ខ្មែរ​សម្បូរ​ក្រសួង​ធ្វើការ​ទាក់ទិន​នឹង​ទឹក​ តែ​ហេតុអ្វី​ពលរដ្ឋ​នៅ​ខ្វះ?

សកម្មភាព​ចែក​ទឹក​ប្រើប្រាស់​ដល់​ប្រជាពលរដ្ឋ​នៅ​ក្នុង​ខេត្ត​សៀមរាប​កាលពី​ចុង​ខែ​មេសា​កន្លង​ទៅ។
សកម្មភាព​ចែក​ទឹក​ប្រើប្រាស់​ដល់​ប្រជាពលរដ្ឋ​នៅ​ក្នុង​ខេត្ត​សៀមរាប​កាលពី​ចុង​ខែ​មេសា​កន្លង​ទៅ។ រូបថត សហការី

ស្រុក​ខ្មែរ​សម្បូរ​ក្រសួង​ធ្វើការ​ទាក់ទិន​នឹង​ទឹក​ តែ​ហេតុអ្វី​ពលរដ្ឋ​នៅ​ខ្វះ?

បន្ទាប់ពី​ធនធាន​ធម្មជាតិ​ដូចជា​ព្រៃឈើ​សត្វ​ព្រៃ​ប្រព័ន្ធ​ស្តុក​ទឹក និង​រ៉ែ​ជាដើម​ត្រូវ​បាន​បំផ្លិច​បំផ្លាញ​យ៉ាង​អនាធិបតេយ្យ​មក​ឥឡូវ​ដល់​វេន​ធម្មជាតិ​បំផ្លាញ​វិញ​ម្តង​ដូចជា​របប​ទឹក​មាន​ការ​ប្រែប្រួល​ខ្លាំង​ត្រូវ​ទឹក​ជន់​ត្រូវ​គ្រោះ​រាំង​ស្ងួត​ត្រូវ​ខ្យល់​ព្យុះ​កួច​យក​ផ្ទះ​តែ​ម្តង ត្រូវ​រន្ទះ​បាញ់ ភ្លើង​ឆេះ​ព្រៃ សត្វ​ព្រៃ​សត្វ​ស្រុក​ត្រូវ​ស្លាប់​រដូក​រណែល ត្រី​ត្រូវ​ស្លាប់​អស់​ ៦៨ ​តោន​ថ្មីៗ​នេះ​ជាដើម​ហើយ​នាំ​គ្នា​ទម្លាក់​កំហុស​ទៅ​លើ​ការ​ប្រែប្រួល​អាកាសធាតុ​ទៅ​ចប់​ហើយ​។

ចាប់​តាំងពី​ចុង​ខែ​មេសា​កន្លង​មក​លោក​នាយក​រដ្ឋមន្ត្រី ហ៊ុន សែន ​បាន​ប្រកាស​អាសន្ន​ពី​ការ​កើន​ឡើង​កម្ដៅ​ និង​ទៅ​លើ​ការ​ខ្វះខាត​ទឹក​ហើយ​បាន​យក​អំណោយ​ទឹក​ជូន​ប្រជាពលរដ្ឋ​បាន​មួយ​ផ្នែក​តូច​ដែរ​តែ​លោក​មិន​ទម្លាក់​កំហុស​ទៅ​ស្ថាប័ន​ណា​មួយ​នោះ​ទេ​គ្រាន់តែ​ដៀមដាម​ដាក់​ឲ្យ​គណបក្ស​ដទៃ​ទៀត​ចូល​ដោះស្រាយ​បញ្ហា​គ្រោះ​រាំងស្ងួត​ខ្វះខាត​ទឹក​នេះ​ផង​។

ជាទូទៅ​លោក​នាយក​រដ្ឋមន្ត្រី​តែងតែ​មាន​ប្រសាសន៍​ថា​ឲ្យ​តែ​ឆ្នាំ​រោង​ទឹក​ធំ​លិច​រាល់​តែ​ដង​អ៊ីចឹង​តែ​នៅ​ពេល​ដែល​មាន​គ្រោះ​រាំងស្ងួត​ឆ្នាំ​នេះ​លោក​មិន​បាន​ទម្លាក់​កំហុស​ថា​មកពី​ឆ្នាំ​វក​រាំងស្ងួត​ខ្វះ​ទឹក​នោះ​ទេ​បើ​ទោះបី​ជា​លោក​លើក​ទឹក​ចិត្ត​ឲ្យ​រដ្ឋបាល​ថ្នាក់​ក្រោម​​ជាតិ​ជួយ​ជីក​ស្រះ ជីក​អណ្តូង​ក្ដី​ក៏​តំបន់​ខ្លះ​នៅ​តែ​មិន​មាន​ទឹក​ដដែល​។

បើ​យើង​មើល​ស្ថាប័ន​របស់​​រាជរដ្ឋាភិបាល​ដែល​ធ្វើការ​ជាមួយ​នឹង​ទឹក​ទាំង​ទីក្រុង ​និង​ទាំង​ជនបទ​វិញ​គឺ​មាន​ច្រើន​ដូចជា ក្រសួង​ធនធាន​ទឹក ក្រសួង​កសិកម្ម ក្រសួង​អភិវឌ្ឍន៍​ជនបទ ក្រសួង​បរិស្ថាន​ក្រសួង​ឧស្សាហកម្ម ក្រសួង​រៀបចំ​ដែនដី ក្រសួង​សាធារណការ និង​ក្រសួង​សុខាភិបាល​បើ​និយាយ​​ពី​ការ​បង្កើត​គណៈកម្មការ​រឿង​ទឹកស្អាត​ហ្នឹង​ក៏​សម្បូរ​ណាស់​ដែរ​ហើយ​​មាន​តាំងពី​កំណែទម្រង់​ដោះដូរ​រដ្ឋមន្ត្រី​ដើម្បី​ឲ្យ​ប្រសើរ​ឡើង​ទៀត​តែ​ហេតុ​អ្វី​បាន​ទឹក​នៅ​​តែ​ខ្វះ​ខាត និង​មាន​គ្រោះ​រាំង​ស្ងួត​? តើ​នេះ​វា​ជា​កំហុស​អ្នក​ណា​?

ជាក់ស្តែង​ស្រុក​ខ្មែរ​បើ​ផ្អែក​ទៅ​តាម​ទីតាំង​ភូមិសាស្ត្រ និង​ប្រព័ន្ធ​ស្រោចស្រព​ទឹក​មិន​គួរ​ណា​ខ្វះ​ទេ​យើង​មាន​ទឹក​ទន្លេ​មេគង្គ​មាន​អាង​ស្តុក​ទឹក​ទន្លេ​សាប​មាន​ទឹក​ស្ទឹង​ហូរ​មកពី​ភ្នំ​ខ្វាត់ខ្វែង​ហើយ​មាន​តាំង​ពី​ទំនប់​ទឹក​ធ្វើ​ជា​បឹង​សល់​ពី​ជំនាន់​ប៉ុលពត​ផង​តែ​ទំនប់​ទឹក និង​បឹង​ទាំង​នោះ​ខ្លះ​ត្រូវ​បាន​គេ​លុប​ចោល​ដោយសារ​ដី​ឡើង​​ថ្លៃ ឬ​ក៏​កាត់​ចូល​ក្នុង​ដីសម្បទាន​សេដ្ឋកិច្ច ឬ​ក៏​ទុក​ចោល​មិន​អើពើ​ទាល់​តែ​ខូចខាត​ទាំង​ស្រុង​ដូចជា​បឹងកក់ បឹង​ទំពុន បឹង​ជើងឯក បឹងត្របែក​ជាដើម​។

បើ​សូម្បី​​តែ​នៅ​តាម​វត្ត​អារាម សាលារៀន សុទ្ធតែ​រៀបចំ​ទឹក​ស្រះ និង​ទឹក​​អណ្តូង​ដែរ​គឺ​អនុវត្ត​ទៅ​តាម​វិស្វករ​ដូនតា​ដែល​សាងសង់​អង្គរវត្ត​ក៏​បាន​​រៀបចំ​ប្រព័ន្ធ​ទឹក​ជុំវិញ​ប្រាសាទ និង​នៅ​ក្បែរ​ដូច​អាង​បារាយណ៍​ទឹក​ថ្លា និង​ស្រះ​ស្រង់​ជាដើម​។

បញ្ហា​នេះ​​គ្រាន់​តែ​ស្ថាប័ន​ពាក់ព័ន្ធ​នាំ​ធ្វើ​ប្រឡាយ​ស្រោចស្រព​ពី​ប្រភព​ទឹក​ទាំង​នោះ​ដាក់​ចូល​អាង​ស្តុក​ទឹក​គ្រាន់​តែ​ការពារ​សម្រាប់​ខែ​ប្រាំង​ក៏​មិន​បាន​ផង​គឺ​ឃើញ​មាន​តែ​តិចតួច​ប៉ុណ្ណោះ​គឺ​ប្រឡាយ​ពី​ខេត្ត​ក្រចេះ​ទៅ​ខេត្ត​ស្ទឹងត្រែង​តែ​នៅ​​ពេល​ជួប​គ្រោះ​រាំងស្ងួត​នៅ​ទី​នោះ​ក៏​ស្ងួត​ចែស​តែ​ម្តង​ដោយ​រដ្ឋាភិបាល​បាន​ត្រឹម​តែ​ចែក​អំណោយ​យក​ប្រជាប្រិយភាព​ដដែលៗ​ពោល​គឺ​ការ​ខ្វះខាត​ទឹក​នេះ​ប្រៀប​​ដូចជា​គ្នា​ច្រើន​ស្ងោរ​អន្សម​ខ្លោច​អ៊ីចឹង​។

បើ​ប្រៀបធៀប​ជាមួយ​ប្រទេស​សិង្ហបុរី​ឥឡូវ​នេះ​គឺ​គេ​បាន​រៀបចំ​អាង​ស្តុក​ទឹក​ស្អាត​របស់​គេ​ប្រើ​ខ្លួន​ឯង​ហើយ​គេ​ព្យាយាម​ឈប់​ទិញ​ទឹក​ពី​ខេត្ត​ចូហ័រ​នៃ​ប្រទេស​ម៉ាឡេស៊ី​បើ​ទោះបី​ជា​កិច្ចសន្យា​លើក​ទី​ ២ ​ផ្តល់​ទឹក​រហូត​ដល់​ឆ្នាំ​ ២០៦១ ក៏ដោយ (http://www.pub.gov.sg)​។

បើ​រដ្ឋាភិបាល​មិន​បាន​រៀបចំ​ប្រព័ន្ធ​ស្តុក​ទឹក​គ្រប់គ្រាន់​នោះ​ទេ​នោះ​គឺ​ការ​ប្រើ​ទឹក​រំពឹង​ផ្អែក​ទាំង​ស្រុង​ទៅ​លើ​ប្រទេស​ចិន​ដែល​មាន​ទំនប់​វារីអគ្គិសនី​ដ៏ធំ​នៅ​ពី​លើ​ក្បាល​ទឹក​ពី​ហូរ​ពី​ប្រភព​ទីបេ​។

នៅ​ពេល​ដែល​មាន​ការ​ខ្វះខាត ឬ​ក៏​ជួប​គ្រោះ​រាំងស្ងួត​ដូច​សព្វ​ថ្ងៃ​នេះ​គឺ​ប្រជាពលរដ្ឋ​ធ្វើ​ស្រែ​មិន​បាន​រក​តែ​ទឹក​ប្រើប្រាស់​មិន​គ្រប់គ្រាន់​ខ្វះ​អនាម័យ​​គឺ​មាន​តែ​ធ្វើ​ចំណាក​ស្រុក​ទៅ​ក្រៅ​ប្រទេស​ដើម្បី​រក​ការងារ​ធ្វើ និង​ប្រឈម​ទៅ​នឹង​ការ​ជួញដូរ និង​ទាសករ​សម័យ​ទំនើប​។ ខណៈ​ដែល​នៅ​ជនបទ​កំពុង​ជួប​គ្រោះ​មហន្តរាយ​រាំង​ស្ងួត​ស្ទើរ​តែ​គ្រប់​កន្លែង​បែប​នេះ​បែរ​ជា​អ្នក​នៅ​រាជធានី​ភ្នំពេញ​មួយ​ចំនួន​ធំ​មិន​ត្រឹម​តែ​យក​ទឹក​ស្អាត​មក​ហូប និង​ប្រើប្រាស់​ប៉ុណ្ណោះ​ទេ​គឺ​ថែម​ទាំង​ទៅ​បាញ់​ទឹក​ស្រោច​ដើមឈើ និង​សួនផ្កា​ក្នុង​ផ្ទះ​វីឡា និង​ជុំវិញ​ផ្ទះ​ហូរហៀរ​រាប់​សិប​ម៉ែត្រ​គុប​ទៅ​វិញ​ដោយ​​មិន​បាន​សន្សំសំចៃ​ទឹក​នោះ​ទេ​។

តាមរយៈ​របាយការណ៍​កម្មវិធី​ពិនិត្យ​តាមដាន​ JMP ឆ្នាំ​ ២០១៤ ចំពោះ​ការ​ប្រើប្រាស់​ទឹកស្អាត​បាន​បង្ហាញ​ថា​ប្រជាពលរដ្ឋ​កម្ពុជា​ប្រមាណ ៤,៣ ​លាន​នាក់​នៅ​តែ​គ្មាន​ទឹក​ស្អាត​ប្រើប្រាស់​។

ប្រសិន​បើ​នៅ​តែ​ខ្វះខាត​ស្អាត និង​ជួប​ប្រទះ​គ្រោះ​រាំងស្ងួត​ដូច​នេះ​គឺ​កម្ពុជា​មិន​សម្រេច​គោលដៅ​ការ​ប្រើប្រាស់​ទឹកស្អាត​នៅ​ជនបទ​ទាំងអស់​គ្នា​ឆ្នាំ​ ២០២៥​ ដូច​នៅ​ក្នុង​ផែនការ​អភិវឌ្ឍន៍​ជា​យុទ្ធសាស្ត្រ​ជាតិ​​ឆ្នាំ​ ២០១៤-២០១៨ ​របស់​ខ្លួន និង​សម្រេច​គោលដៅ​អភិវឌ្ឍន៍​ប្រកប​ដោយ​​ចីរភាព​ជា​សកល​ (SDGs) ​ទី​ ៦ ដែល​ធានា​ការ​ទទួល​​បាន និង​ការ​គ្រប់គ្រង​ទឹកស្អាត និង​ភាព​អនាម័យ​ឲ្យ​មាន​និរន្តរភាព​ទាំងអស់​គ្នា​នោះ​ទេ​។

នេះ​គឺជា​ផលវិបាក​​ជាក់ស្តែង​មកពី​ការ​បំផ្លាញ​ធនធាន​ធម្មជាតិ​ជាពិសេស​ព្រៃឈើ​ដែល​កាប់​ក្នុង​ស្រុក​ខ្លួន​ឯង​មិន​អស់​ចិត្ត​នាំ​គ្នា​ទៅ​កាប់​ព្រៃឈើ​នៅ​ស្រុក​គេ​ជិត​ខាង​ទៀត​ដូច​កាលពី​សប្តាហ៍​ត្រូវ​តម្រួត​ថៃ​ចាប់​បាន​ពលរដ្ឋ​ខ្មែរ​ ២៩ ​នាក់​ដែល​ឆ្លង​ដែន​ខុស​ច្បាប់​ទៅ​កាប់​ព្រៃ​នៅ​ប្រទេស​ថៃ​នោះ​។ នេះ​ក៏​មក​ពី​ជួប​គ្រោះ​មហន្តរាយ​រាំង​ស្ងួត​រក​ស៊ី​មិន​បាន​នៅ​ស្រុក​ខ្លួន​ឯង​ហើយ​បាន​ជា​ធ្លាក់​ខ្លួន​ចាញ់​បោក​មេខ្យល់​គេ​ឲ្យ​កាប់​បំផ្លាញ​ព្រៃឈើ​នៅ​ប្រទេស​គេ​ដែល​ប្រឈម​ទៅ​នឹង​គ្រោះថ្នាក់​ខ្ពស់​។

សម្រាប់​អ្នក​នយោបាយ​គណបក្ស​ណា​ក៏​ដូចជា​គណបក្ស​ណា​ដែរ​នៅ​ពេល​ឃោសនា​រក​សំឡេង​ឆ្នោត​តែង​លើក​ឡើង​ពី​ការ​អភិវឌ្ឍ​វិស័យ​កសិកម្ម និង​កែទម្រង់​ប្រព័ន្ធ​ធារាសាស្ត្រ​ជូន​ប្រជាពលរដ្ឋ​តែ​ឥឡូវ​បក្ស​កាន់​អំណាច​ឈ្នះ​ឆ្នោត​មិន​ទាន់​ធ្វើ​អ្វី​ដែល​ស្រប​ទៅ​គោលនយោបាយ​របស់​ខ្លួន​នៅ​ឡើយ​ទេ​។

តើ​គួរ​កាត់​បន្ថយ​ក្រសួង​ដែល​ធ្វើការ​ជាមួយ​ទឹក​ឬ​? ដើម្បី​ការ​រៀបចំ​ប្រព័ន្ធ​ទឹកស្អាត​ជូន​ប្រជាពលរដ្ឋ​នោះ​បើ​ក្រសួង​ច្រើន​ហើយ និង​មាន​ជំនួយ​ពី​អន្តរជាតិ​ផង​ធ្វើការ​ទឹកស្អាត​នេះ​នៅ​តែ​ជួប​ខ្វះខាត​ទឹក​ដូច​នេះ​ទៀត​។

តើ​ការ​ខ្វះខាត​ទឹក​នេះ​មកពី​អ្នក​នយោបាយ​មិន​ទទួល​ការ​ផ្តល់​យោបល់​ពី​អ្នក​បច្ចេកទេស​បាន​ជា​ចេះ​តែ​ដុនដាប​ទៅ​? រីឯ​អ្នក​នៅ​ភ្នំពេញ​ដែល​សម្បូរ​លុយ​បង់​ទឹក​ក៏​គួរ​តែ​កាត់​បន្ថយ​ការ​ប្រើប្រាស់​ទឹក​ស្អាត​ណា​ដែល​មិន​ចាំបាច់​ផង​ព្រោះ​អ្នក​រងគ្រោះ​ពិតប្រាកដ​ពី​គ្រោះ​ធម្មជាតិ​នោះ​គឺ​ប្រជាពលរដ្ឋ​ក្រីក្រ និង​អ្នក​រស់នៅ​ជនបទ​នោះ​ដដែល​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍