The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ដំណើរ​ត្រូវ​ហ៊ាន​ប្រាប់​អ្នក​បើកបរ​ឲ្យ​បន្ថយ​ល្បឿន

អ្នក​ដំណើរ​ត្រូវ​ហ៊ាន​ប្រាប់​អ្នក​បើកបរ​ឲ្យ​បន្ថយ​ល្បឿន

គ្រោះថ្នាក់​ចរាចរណ៍​តាម​ផ្លូវ​ជាតិ​លេខ ៥ ក្នុង​ស្រុក​មោងឫស្សី​កាលពី​សប្ដាហ៍​មុន។
គ្រោះថ្នាក់​ចរាចរណ៍​តាម​ផ្លូវ​ជាតិ​លេខ ៥ ក្នុង​ស្រុក​មោងឫស្សី​កាលពី​សប្ដាហ៍​មុន។ រូបថត ហ្វេសប៊ុក

អ្នក​ដំណើរ​ត្រូវ​ហ៊ាន​ប្រាប់​អ្នក​បើកបរ​ឲ្យ​បន្ថយ​ល្បឿន

ក្រៅ​ពី​ស្លាប់​ដោយសារ​សង្គ្រាម​ខ្មែរ​នៅ​តែ​ស្លាប់​ក្នុង​ករណី​មិន​គួរ​ត្រូវ​ស្លាប់​ជាច្រើន​រឿង​ផ្សេងៗ​គ្នា​ការ​ស្លាប់​ដោយសារ​រដ្ឋប្រហារ ដោយសារ​កាប់​ព្រៃ​ «​ក​៥» ការ​ជាន់មីន​ដោយសារ​នយោបាយ​ពេល​បោះឆ្នោត​ម្តងៗ ការ​ឆក់​ប្លន់ ឃាតកម្ម ការ​កាប់​ចាក់​គ្នា​របស់​ក្មេង​ទំនើង លង់​ទឹក ជាពិសេស​ការ​ស្លាប់​ដោយសារ​បញ្ហា​សុខភាព​សាធារណៈ​រួមមាន​ពុល​ចំណី​អាហារ អាហារ​មាន​សារធាតុ​គីមី​ច្រើន ផឹកស្រា ជក់បារី សេព​គ្រឿងញៀន ជំងឺ​ឆ្លង ជំងឺ​រ៉ាំរ៉ៃ មរណ​មាតា និង​ទារក និង​ការ​អត់​ឃ្លាន​ (​ចំណាក​ស្រុក​ស៊ី​ឈ្នួល​មុខរបរ​ប្រឈម​មុខ​​គ្រោះថ្នាក់​ខ្ពស់​) ​និង​គ្រោះថ្នាក់​ចរាចរណ៍​ជាដើម​។

សព្វ​ថ្ងៃនេះ​រាជរដ្ឋាភិបាល​ហាក់​ដូចជា​មាន​ក្តីបារម្ភ​ខ្លាំង​តែ​លើ​ការ​ស្លាប់​ដោយសារ​គ្រោះថ្នាក់​ចរាចរណ៍​ដែល​នៅ​មាន​អត្រា​ខ្ពស់​ជាង​អ្នក​ផ្ទុក​ជំងឺ​អេដស៍​គឺ​មាន​​អ្នក​ស្លាប់​ច្រើន​ជាង​ ៥ ​នាក់​ក្នុង​​ ១ ​​ថ្ងៃ​ដោយ​​​មិន​ទាន់​គិត​អ្នក​ពិការភាព និង​​អ្នក​របួស​ធ្វើការ​មិន​កើត​ផង។ នេះ​បើ​តាម​ការ​​ប៉ាន់​ប្រមាណ​ថ្មីៗ​នេះ​របស់​គណៈកម្មការ​ជាតិ​សុវត្ថិភាព​ចរាចរណ៍​ផ្លូវ​គោក​។ ​

ទិន្នន័យ​របស់​ស្ថាប័ន​​នេះ​​បង្ហាញ​ថា​មិន​មាន​ការ​ប្រែប្រួល​ចំនួន​អ្នក​ស្លាប់​ដោយសារ​គ្រោះថ្នាក់​ចរាចរណ៍​គួរ​ឲ្យ​កត់សម្គាល់​នោះ​ទេ​បើ​​ប្រៀបធៀប​នឹង​ឆមាស​ទី​ ១ ​នៃ​ឆ្នាំ​នេះ និង​ឆ្នាំ​ទៅ (១១០៨ ​នាក់​ទល់​ ១២២៩ ​នាក់​) មាន​ន័យ​ថា​ថយ​ចុះ​តែ​ ១០ ​ភាគរយ​ប៉ុណ្ណោះ និង​អត្រា​ស្លាប់​មាន​ ១០ ​នាក់​ក្នុង​យានយន្ត​ ១ ​ម៉ឺន​គ្រឿង​នៅ​ឆ្នាំ​ ២០១១ ធៀប​ទៅ​នឹង​ឆ្នាំ​ ២០១០ មាន​អ្នក​ស្លាប់​ ១១ ​នាក់​។

បើ​ប្រៀបធៀប​ជាមួយ​បណ្តា​ប្រទេស​អាស៊ាន​កម្ពុជា​នៅ​តែ​មាន​អត្រា​អ្នក​ស្លាប់​ដោយសារ​គ្រោះថ្នាក់​ចរាចរណ៍​​នេះ​ខ្ពស់​ជាង​គេ​ដដែល។ នេះ​បើ​តាម​គោល​នយោបាយ​ជាតិ​ស្តីពី​សុវត្ថិភាព​ចរាចរណ៍​ផ្លូវគោក​ឆ្នាំ​ ២០១៤​។

ទិន្នន័យ​មាន​ការ​ប្រែប្រួល​តិចតួច​បែប​នេះ​ធ្វើឲ្យ​ប៉ះពាល់​ដល់​ផែនការ​ទសវត្សរ៍​របស់​រាជរដ្ឋាភិបាល​ឆ្នាំ​ ២០១១ ​ដល់​ ២០២០ ក៏​ដូចជា​ការ​ឆ្លើយតប​ជា​សកល​ក្នុង​ការ​កាត់​បន្ថយ​ឲ្យ​បាន​នូវ​ការ​ស្លាប់ និង​គ្រោះថ្នាក់​ដោយសារ​ចរាចរណ៍​ផ្លូវគោក​ឲ្យ​បាន​ ៥០ ​ភាគរយ​នៅ​ដំណាច់​ឆ្នាំ​ ២០២០ ​ក្នុង​គោលដៅ​ទី​ ៣.៦ នៃ​គោលដៅ​អភិវឌ្ឍន៍​ប្រកប​ដោយ​និរន្តរភាព​របស់​ UN។

ជាក់ស្តែង​គ្រោះថ្នាក់​ដ៏រន្ធត់​មួយ​កាលពី​សប្តាហ៍​មុន​នៅ​លើ​កំណាត់​ផ្លូវ​ស្រុក​មោងឫស្សី ខេត្ត​បាត់ដំបង​រវាង​រថយន្ត​មីនីប៊ើស​បុក​ជាមួយ​រថយន្ត​ដឹក​ដី​មួយ​បណ្តាល​ឲ្យ​ស្លាប់​មនុស្ស​ភ្លាមៗ​ដល់​ទៅ​ ៩ ​នាក់ និង​អ្នក​របួស​ធ្ងន់​មួយ​ចំនួន​ទៀត​។ នៅឯ​ស្ពាន​អាកាស​ស្ទឹងមានជ័យ​រាជធានី​ភ្នំពេញ​រថយន្ត​ស្ទូច​ហ្វ្រាំង​មិន​ស៊ី​បាន​បុក​ម៉ូតូ​ខ្ចាត់ខ្ចាយ​ពេញ​ថ្នល់​មាន​អ្នក​របួស​ធ្ងន់​ស្រាស​ខណៈ​នៅ​ខេត្ត​កំពត​ឯណោះ​​រថយន្ត​ដឹកដី​ និង​ដឹក​ស៊ីម៉ងត៍​បុក​រថភ្លើង​ធ្លាក់​ផ្លូវ​ដែល​មិនមែន​ជា​រឿង​ចម្លែក​ទេ​។

បើ​មើល​រូបភាព​គ្រោះថ្នាក់​នៅ​ខេត្ត​បាត់ដំបង​ដែល​បង្ហោះ​តាម​បណ្តាញ​សង្គម​ហ្វេសប៊ុក​ឃើញ​រូប​គួរ​ឲ្យ​តក់ស្លុត​ដោយ​អ្នក​ស្លាប់​ត្រូវ​គេ​សែង​ដាក់​គរ​លើ​គ្នា​ក្នុង​ឡាន​ភីកអាប់​ដូច​សត្វ​ធាតុ។ ចុះ​ហេតុ​អ្វី​ក៏​មិន​រុំ​ឲ្យ​បាន​សមរម្យ​?

ឯណា​ទៅ​រថយន្ត​សាមុយ​សង្គ្រោះ​បន្ទាន់​? ឬ​ក៏​បន្ទាប់​ពី​រដ្ឋមន្ត្រី​ក្រសួង​សុខាភិបាល​ទើប​ប្រកាស​រថយន្ត​សង្គ្រោះ​បន្ទាន់​លែង​យក​លុយ​ពី​បងប្អូន​សព​ដូច​មុន​ទៀត​បាន​ជា​មិន​មាន​រថយន្ត​សង្គ្រោះ​បន្ទាន់​មក​ដឹក​សាកសព​?

ករណី​នេះ​កើតឡើង​នៅ​តំបន់​ស្រុក​មោង​នៅ​ក្បែរ​ទី​រួម​ខេត្ត​បាត់ដំបង​សោះ​រថយន្ត​សង្គ្រោះ​បន្ទាន់​ណា​ដែល​នៅ​ជិត​កន្លែង​គ្រោះថ្នាក់​ជាង​គេ​ត្រូវ​តែ​មក​ដល់​មុន​គេ​អាច​ចេញ​ពី​មន្ទីរពេទ្យ​បង្អែក​មោង និង​មណ្ឌល​សុខភាព​ណា​ដែល​មាន​រថយន្ត​ត្រូវ​បញ្ចេញ​ភ្លាមៗ​ហើយ​ខាង​មន្ទីរពេទ្យ​ខេត្ត​បាត់ដំបង​ក៏​ត្រូវ​តែ​បញ្ជូន​មក​ឆ្លើយតប​ឲ្យ​ទាន់​ពេលវេលា​ផង​ដែរ​មិនមែន​លើក​បោះ​ដាក់​កន្ទុយ​ឡាន​គរ​ជើង​គ្នា​នោះ​ទេ​មើល​ទៅ​អាក្រក់​មើល​ណាស់​សម័យ​នេះ​ទៅ​ហើយ​​។

ម្យ៉ាង​វិញ​ទៀត​ក្នុង​ចំណោម​អ្នក​ស្លាប់​ ៩ ​នាក់​មាន​យុវនិស្សិត​ស្រី​ឆ្នើម​ពូកែ​ម្នាក់​ផង​​ដែរ​ដែល​នេះ​ជា​ការ​សោកស្តាយ​ពី​ការ​បាត់បង់​ធនធាន​មនុស្ស​សំខាន់ៗ​ជា​ក្តីសង្ឃឹម​​របស់​ប្រទេសជាតិ​នា​ពេល​អនាគត​។

មក​ទល់​ពេល​នេះ​មិន​ទាន់​​មាន​ការ​សិក្សា​ស្រាវជ្រាវ​ជាក់លាក់​ដែល​អាច​គណនា​ជា​មធ្យម​ចំពោះ​ជនរងគ្រោះ​ស្លាប់​ដោយសារ​គ្រោះថ្នាក់​ចរាចរណ៍​ម្នាក់​​ថា តើ​មាន​ផលប៉ះពាល់​គ្រួសារ​គាត់​អស់​ប៉ុន្មាន​ក្នុង​ឆ្នាំ​នោះ​ទេ​បើ​គាត់​ជា​មេ​គ្រួសារ​​ទទួល​បន្ទុក​សេដ្ឋកិច្ច​ទាំង​ស្រុង​នោះ​តើ​ប៉ះពាល់​សមាជិក​គ្រួសារ​​គាត់​ដែល​ទទួល​ផល​ពី​គាត់​យ៉ាង​ដូចម្តេច​ខ្លះ​? ពោល​គឺ​ឃើញ​មាន​តែ​ការសិក្សា​ការ​ប៉ាន់​ប្រមាណ​ការ​​ខាតបង់​ដោយសារ​គ្រោះថ្នាក់​ចរាចរណ៍​ទូទាំង​​ប្រទេស​ប្រចាំ​ឆ្នាំ​ចំនួន​ ៣៣៧ ​លាន​​ដុល្លារ​ក្នុង​ ១ ​ឆ្នាំ (HIB, 2013)​។

តើ​វិធានការ​របស់​រដ្ឋមន្ត្រី​ក្រសួង​សាធារណការ​ និង​ដឹក​ជញ្ជូន​ថ្មី​ដែល​បាន​ព្រមាន​ថា​នឹង​ចាត់​វិធានការ​លើ​រថយន្ត​ត​ទ្រុង និង​កន្លែង​កែច្នៃ​ដោយ​ចាប់​អនុវត្ត​ពី​ថ្ងែ​​ ៩ ​កញ្ញា​ខាង​មុខ​នេះ​អាច​មាន​ប្រសិទ្ធភាព​កម្រិត​ណា​? ចំពោះ​សាលា​រាជធានី​ភ្នំពេញ​បើ​ទោះបី​ជា​ដាក់​បម្រាម​ឡាន​ធំៗ​មិន​ឲ្យ​ចូល​​ក្រុង​នៅ​មុន​ម៉ោង​ ៨ ​យប់​ក្ដី​តែ​គ្រោះថ្នាក់​ឡាន​ស្ទូច​ដែល​បុក​អ្នក​ដំណើរ​នៅ​ស្ពាន​អាកាស​ស្ទឹងមានជ័យ​នោះ​គឺ​នៅ​ពេល​ថ្ងៃ​ទេ​។ ចុះ​ហេតុអ្វី​បាន​នៅ​តែ​អនុញ្ញាត​ឲ្យ​រថយន្ត​ធំៗ​ទាំង​នោះ​ចូល​ក្រុង​បាន​ដដែល​? ហើយ​កាមេរ៉ា​ដែល​ដាក់​តាម​ភ្លើង​ស្តុប​ទុក​ធ្វើ​អ្វី​បាន​ជា​រថយន្ត​ធំៗ​ចូល​ស្រួល​ម្ល៉េះ? ពេល​ខ្លះ​មើល​ទៅ​កាប៊ីន​របស់​រថយន្ត​ធំៗ​ឃើញ​មាន​អ្នក​បើកបរ​តែ​ម្នាក់​គត់​ដោយ​មិន​មាន​អ្នក​បើក​ជំនួស​ទេ​ហើយ​ក្នុង​ករណី​អ្នក​បើកបរ​នោះ​មាន​អាការ​ធេងធោង ឬ​ក៏​ងុយ​ដេក​គឺជា​ការ​ប្រឈម​គ្រោះថ្នាក់​កាន់​តែ​ខ្លាំង​។

ដូច​នេះ​គឺ​ក្រុមហ៊ុន​តម្រូវ​ឲ្យ​មាន​មនុស្ស​ចេះ​បើកបរ​យ៉ាង​តិច​ ២ ​នាក់​ក្នុង​រថយន្ត​ធំៗ​។ បើ​រថយន្ត​ក្រុង​ឆ្លង​ខេត្ត​គឺ​សុទ្ធ​តែ​មាន​អ្នក​ជំនួស​រួច​ហើយ​តែ​អ្វី​ដែល​សំខាន់​គឺ​គាត់​នៅ​តែ​ព្រហើន​បើក​ហួស​ល្បឿន​បណ្តាល​ឲ្យ​មាន​គ្រោះថ្នាក់​។

តែ​ទោះបី​ជា​យ៉ាង​ណា​ថៅកែ​ក្រុមហ៊ុន​ខ្លះ​កំណត់​ល្បឿន​កុងទ័រ​រួច​ស្រេច​បើ​អ្នក​បើកបរ​ជាន់​ហួស​ល្បឿន​គឺ​ថៅកែ​ដឹង​នឹង​ស្តីបន្ទោស​ ឬ​ក៏​បញ្ឈប់​ពី​ការងារ​រីឯ​ក្រុមហ៊ុន​ខ្លះ​ទៀត​ការ​ត្រួត​ពិនិត្យ​អ្នក​បើកបរ​របស់​ពួកគេ​តាមរយៈ​ដាក់​ស្លាក​ឃ្លា​មួយ​ថា​៖ «​តើ​ការ​បើកបរ​របស់​ខ្ញុំ​យ៉ាង​ដូច​ម្តេច​ដែរ​?» ហើយ​ភ្ជាប់​លេខ​ទូរស័ព្ទ​ក្រុមហ៊ុន​តែ​ម្តង​។

ឥឡូវ​នេះ​កាន់តែ​ទំនើប​ទៀត​នោះ​មាន​ក្រុមហ៊ុន​រថយន្ត​​ប្រភេទ​ Express បាន​ដាក់​បង្ហាញ​ភាព​ជឿជាក់​ដល់​អតិថិជន​ដែល​ជា​អ្នក​ធ្វើ​ដំណើរ​នោះ​គឺ​មាន​ដូច​រថយន្ត​ទំនើប​ថ្មីៗ​អ្នក​បើកបរ​ទាំងអស់​ទទួល​វគ្គ​បណ្តុះ​បណ្តាល​ពី​ច្បាប់​ចរាចរណ៍​ផ្លូវគោក​ពី​មន្ត្រី​ប៉ូលិស​ផ្ទាល់​មាន​បង់​ធានារ៉ាប់រង​ជូន​ភ្ញៀវ​ មាន​កក់​កៅអី​អង្គុយ​តាម​អនឡាញ (Booking online with credit card) ​ជាដើម​។ នេះ​គឺជា​ការ​ទទួល​ខុសត្រូវ​របស់​ក្រុមហ៊ុន​រថយន្ត​អ្នក​បើកបរ​រីឯ​អ្នក​ធ្វើ​ដំណើរ​ក៏​មិន​ត្រូវ​ពឹង​ផ្អែក​ទាំង​ស្រុង​ទៅ​លើ​អ្នក​បើកបរ​តែ​ម្នាក់​ឯង​នោះ​ទេ​គឺ​ត្រូវ​ទទួល​ខុស​ត្រូវ​ខ្លួនឯង​ផង​ដែរ​មាន​ន័យ​ថា​ហ៊ាន​ប្រាប់​ទៅ​អ្នក​បើកបរ​ឲ្យ​បន្ថយ​ល្បឿន​ភ្លាមៗ​ប្រសិន​បើ​មើល​ទៅ​ឃើញ​គាត់​បើក​មាន​លក្ខណៈ​ហួស​ល្បឿន​ ឬ​ក៏​មាន​អាការ​ងុយ​ដេក​ធេងធោង​គឺ​ឲ្យ​ផ្លាស់ប្តូរ​អ្នក​បើកបរ​តែ​ម្តង​។

ការ​ធ្វើ​ដូច្នេះ​កុំ​ឲ្យ​មាន​សេចក្តី​ស្តាយ​ក្រោយ​ដោយសារ​តែ​គ្រោះថ្នាក់​ដល់​អាយុ​ជីវិត​តែ​មួយ​ប៉ប្រិច​ភ្នែក​សោះ​នោះ​។

ចំពោះ​ករណី​បុក​រវាង​រថភ្លើង និង​រថយន្ត​ធំៗ​គឺ​មាន​លក្ខណៈ​ដដែលៗ​ពេក​ហើយ​តើ​ពេល​ណា​បាន​ក្រសួង​សាធារណការ និង​ដឹក​ជញ្ជូន​សង់​ស្ពាន​ពី​លើ​កន្លែង​ដែល​រថភ្លើង​ឆ្លង​​កាត់​នោះ​? ឥឡូវ​ឃើញ​ស្ថាប័ន​នេះ​កំពុង​តែ​សាងសង់​ស្ពាន​ឆ្លង​ផ្លូវ​សម្រាប់​អ្នក​ថ្មើរ​ជើង​ (Over pass) ​នៅ​ម្តុំ​សាលារៀន​ជម្ពូវ័ន​ហើយ​គួរ​តែ​សង់​ស្ពាន​នេះ​នៅ​ទីប្រជុំជន​បន្ថែម​ទៀត​ដើម្បី​កាត់​បន្ថយ​ការ​កកស្ទះ​ និង​គ្រោះថ្នាក់​ចរាចរណ៍​ផង​ដែរ​។

សរុប​មក​វិញ​អ្វី​ដែល​ជា​បញ្ហា​ចម្បង​បង្ក​ឲ្យ​មាន​គ្រោះថ្នាក់​ដែរ​នោះ​គឺ​ឥរិយាបថ​​អ្នក​បើកបរ​ដែល​មាន​រថយន្ត​ធំ​ជាង​ ឬ​ក៏​គ្រឿង​យន្ត​ណា​ដែល​ធំ​ជាង​សូម្បី​រថភ្លើង​ក៏​មិន​ខ្លាច​ផង​បុក​ទាល់​តែ​ធ្លាក់​ផ្លូវ​គឺ​ហាក់បី​ដូចជា​មាន​អំណាច​ជាង​ដោយ​មិន​គិត​ពី​ច្បាប់​ផ្លូវ​ណា​ដែល​គេ​ផ្តល់​អាទិភាព​នោះ​ទេ​។

អ៊ីចឹង​ដើម្បី​កុំ​ឲ្យ​មនុស្ស​ចេះ​តែ​ស្លាប់​ដោយ​ចៃដន្យ​ឥត​ប្រយោជន៍​ច្រើន​គួរ​តែ​និយាយ​ប្រាប់​អ្នក​បើក​តៗ​គ្នា​បើ​ជួប​ករណី​អ្នក​បើកបរ​ខុស​ច្បាប់​ដូចជា​ផ្លូវ​ត្រូវ​ផ្តល់​អាទិភាព​ឲ្យ​គេ​មិន​ត្រូវ​វ៉ា​ទេ​បើ​ទោះ​ជា​មាន​រថយន្ត​យើង​ធំ​ជាង​គេ​ក៏ដោយ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍