The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​បើកបរ​អាង​ស្លាក​លេខ និង​អំណាច​ផ្គើន​ច្បាប់​ចរាចរណ៍ ​ការ​មាន​ស្លាក​លេខ​តែ​មួយ​ប្រភេទ​នាំ​ឲ្យ​ការ​អនុវត្ត​ច្បាប់​ចរាចរណ៍​ប្រសើរ​ឡើង

អ្នក​បើកបរ​អាង​ស្លាក​លេខ និង​អំណាច​ផ្គើន​ច្បាប់​ចរាចរណ៍ ​ការ​មាន​ស្លាក​លេខ​តែ​មួយ​ប្រភេទ​នាំ​ឲ្យ​ការ​អនុវត្ត​ច្បាប់​ចរាចរណ៍​ប្រសើរ​ឡើង

មន្ត្រី​ប៉ូលិស ២ រូប​ដែល​មាន​ទំនាស់​គ្នា​រឿង​អនុវត្ត​ច្បាប់​ចរាចរណ៍​កន្លង​មក។
មន្ត្រី​ប៉ូលិស ២ រូប​ដែល​មាន​ទំនាស់​គ្នា​រឿង​អនុវត្ត​ច្បាប់​ចរាចរណ៍​កន្លង​មក។ រូបថត ហ្វេសប៊ុក

អ្នក​បើកបរ​អាង​ស្លាក​លេខ និង​អំណាច​ផ្គើន​ច្បាប់​ចរាចរណ៍ ​ការ​មាន​ស្លាក​លេខ​តែ​មួយ​ប្រភេទ​នាំ​ឲ្យ​ការ​អនុវត្ត​ច្បាប់​ចរាចរណ៍​ប្រសើរ​ឡើង

បើ​ទោះបី​ជា​ការ​ខំ​លេង​សៀក​ឆ្ពិន​ភ្នែក​របស់​​លោក ហ៊ុន សែន នាយក​រដ្ឋមន្ត្រី​ចំពោះ​ការ​បើក​ម៉ូតូ​មិន​ពាក់​មួក​សុវត្ថិភាព​នៅ​ខេត្ត​កោះកុង​រួច​ត្រូវ​ប៉ូលិស​ចរាចរណ៍​ផាក​ពិន័យ​ថ្មីៗ​នេះ​ហើយ​នៅ​សប្តាហ៍​បន្ទាប់​លោក​ចេញ​ទៅ​បង់​លុយ​ទៅ​តាម​កាល​​កំណត់​ដោយ​ជិះ​ម៉ូតូ​ពាក់​មួក​សុវត្ថិភាព​នៅ​រាជធានី​ភ្នំពេញ​​បង្ហាញ​ពី​ការ​លើក​​កម្ពស់​ការ​គោរព​ច្បាប់​​ចរាចរណ៍​​យ៉ាង​ណា​ក៏ដោយ ក៏​មិន​មាន​​ប្រសិទ្ធដែរ​ព្រោះ​ករណី​និទណ្ឌភាព​នៅ​តែ​មាន​ដោយសារ​លោក​ហក់​ចូលរួម​​អន្តរាគមន៍​រឿង​អយុត្តិធម៌​​មួយ​​ដោយ​ម្តង​ទៅ​មុខ​ម្តង​ថយ​ក្រោយ​ទៅ​លើ​មន្ត្រី​ប៉ូលិស​ចរាចរណ៍​ស័ក្តិ​ ១ និង​លោក​​ផ្កាយ​​ ៣​ អគ្គនាយក​រង​អន្តោប្រវេសន៍​។

ខ្ញុំ​បាន​តាមដាន​ពី​​ម៉ោង​ ២:៣០ ​ទៀប​ភ្លឺ​ឃើញ​​​ចេញ​ថា​ លោក​​​រៀបចំ​អនុក្រឹត្យ​ដក​ចេញ​ពី​តំណែង​លោក​ផ្កាយ​ ៣ ហើយ​មន្ត្រី​ប៉ូលិស​​ចរចរណ៍​ដែល​ត្រូវ​មេ​បញ្ឈរ​ជើង​នោះ​ក៏​ឲ្យ​មក​ចូល​ធ្វើការ​វិញ​។ ស្រាប់​តែ​ព្រឹក​ឡើង​លោក​​​​ចេញ​សារ​នៅ​តាម​ហេ្វសប៊ុក​លោក​ថា​​ បាន​ដាក់​តំណែង​នាយ​នគរបាល​ផ្កាយ​ ៣ ​វិញ​ហើយ​​បង្ហោះ​រូប​ចាប់​ដៃ​គ្នា​អ្នក​ទាំង​ ២ ដែល​មាន​ជម្លោះ​នឹង​គ្នា​នោះ​ហើយ​លោក​បាន​​បន្ត​ទៀត​ថា​លោក​​​សម្រាក​បាន​តែ​ ២ ម៉ោង​ទេ​ដោយសារ​តែ​រឿង​នេះ​។

ចំពោះ​​ករណី​នេះ​រឿង​អ្វី​ដែល​ត្រូវ​រំខាន​ដល់​លោក​បើ​ការ​ដោះស្រាយ​រឿង​កំប៉ិក​កំប៉ុក​ផាក​តាម​​ចិញ្ចើម​ថ្នល់​សោះ​? បើ​លោក​​ផ្កាយ​ ៣ ​បើកបរ​ខុស​ច្បាប់​ឆ្លង​ភ្លើង​ក្រហម​​ហើយ​ម៉េច​ក៏​មិន​បង់​ពិន័យ​​ដូច​លោក​ទៅ​វា​រួច​​គ្នា​បាត់​ទៅ​ហើយ​គ្មាន​អី​ដែល​ត្រូវ​ឈ្លោះ​គ្នា​ទេ​? ​នៅ​ចាំបាច់​សន្សំ​រឿង​ឲ្យ​កើត​ឡើង​ទាល់​តែ​មាន​ទំនាស់​គ្នា​ជាមួយ​មន្ត្រី​នគរបាល​តូចតាច​មិន​ចេះ​ខ្មាស​អ្នក​ធ្វើ​ដំណើរ​តាម​ផ្លូវ​។

នេះ​គឺ​ចង់​បង្ហាញ​សាច់ដុំ​ថា​ខ្លួន​មាន​​អំណាច​មេ​ប៉ូលិស​ ១ ​រូប​ដែរ​រឿង​អី​ប៉ូលិស​​តូចតាច​មិន​ស្គាល់​អញ​? ហ៊ាន​ផាក​អញ​? ​អ៊ីចឹង​ទូរស័ព្ទ​ប្រាប់​មេ​ឯង​ឲ្យ​បញ្ឈរ​ជើង​ឯង​ម្តង​មើល​កុំ​ឲ្យ​ពូកែ​មិន​ស្គាល់​អញ​។

ករណី​បែប​នេះ​មិនមែន​មាន​តែ​លោក​ផ្កាយ​ ៣ ​ម្នាក់​ហ្នឹង​ទេ​ដែល​បង្ហាញ​ពី​សាច់ដុំ​បែប​នេះ​មាន​មន្ត្រី​គ្រាក់ៗ​ជាច្រើន​ទៀត​តែងតែ​ធ្វើ​បែប​​នេះ​ដូច​តែ​គ្នា​ហ្នឹង​ឲ្យ​តែ​មាន​ប៉ូលិស​ចរាចរណ៍​ផាក​ជិះ​ខុស​ច្បាប់​គឺ​តែងតែ​រក​បញ្ហា​ទំនាស់​គ្នា​ទូរស័ព្ទ​ហៅ​គ្នីគ្នា​មក​ ឬ​ក៏​សម្លុត​មន្ត្រី​ប៉ូលិស​ចរាចរណ៍​តូចតាច។

មន្ត្រី​ធំៗ​ប្រើ​ពាក្យ​សុទ្ធតែ​ហៅ​មេហ្អែង​មក​ជួប​អញ​។ ពាក្យ​​ទាំង​នេះ​ឮ​នៅ​ពេល​អ្នកធំៗ​គេ​អួត​ដាក់​គ្នា​រឿង​អំណាច​​នៅ​កន្លែង​ផឹកស៊ី​សុទ្ធ​តែ​អាណា​មិន​ស្គាល់​អញ​​ បើ​ទោះបី​ជា​​លោក​នាយក​រដ្ឋមន្ត្រី​ប្រកាស​ឲ្យ​អំណាច​ទៅ​ប៉ូលិស​ចរាចរណ៍​បើ​ទោះបី​ជា​ផ្កាយ​លោក​ខែ​ក៏​គាត់​បក​ស័ក្តិ​ដែរ​។

តែ​ជាក់ស្តែង​​លោក​នា​យក​រដ្ឋ​មន្ត្រី​​ទៅ​វិញ​ទេ​បែរ​ទៅជា​ធ្វើ​​អន្តរាគមន៍​ឲ្យ​មាន​និទ្ទណ្ឌភាព​ដោយសារ​ការ​អនុវត្ត​ច្បាប់​​បែប​​លឹបលៗ និង​រេរា​ទៅ​តាម​សែ​ស្រឡាយ​ខាង​ណា​ធ្វើ​អន្តរគមន៍​ដែល​ធ្វើ​ប៉ះពាល់​ការ​អនុវត្ត​ច្បាប់​ចរាចរណ៍​មិន​មាន​ប្រសិទ្ធភាព​។

ការ​ដែល​អនុវត្ត​ច្បាប់​​បែប​លឹបលៗ​ទៅ​មុខ​ថយ​ក្រោយៗ​ដូច​ករណី​ផ្សេងៗ​ទៀត​ដែរ​លោក​ ហ៊ុន សែន ថា​តុលាការ និង​សមត្ថកិច្ច​នឹង​ចាប់​​លោក​ កឹម សុខា រឿង​កោះ​ហៅ​ទៅ​តុលាការ​មិន​ទៅ​តែ​​អត់​​ចាប់​ផង​បាន​ត្រឹម​តែ​លឹបលៗ និង​​ដៀល កឹម សុខា​ ថា​៖ «​អាគុក​» តែ​ប៉ុណ្ណឹង​។

ក្រៅពី​អំណាច​បុគ្គល​ដែល​មាន​ស្រប​ច្បាប់​យក​មក​គ្រប​ដណ្តប់​លើ​រឿង​អនុវត្ត​ច្បាប់​ចរាចរណ៍​ក៏​នៅ​មាន​អំណាច​មួយ​ទៀត​ដែល​មើល​ទៅ​ហាក់បី​ដូចជា​នៅ​តែ​ត្រួតត្រា​លើ​មន្ត្រី​ប៉ូលិស​ចរាចរណ៍​ដោយ​ប្រយោល​​ដែរ​។

បើ​គ្រាន់​តែ​ឃើញ​មាន​ឡាន​ស៊ីរ៉ែន​ស្លាក​លេខ​ខាង​លើ​មាន​ដាក់​ព្រឹទ្ធសភា សភា រាជរដ្ឋាភិបាល រវ (​រាជវាំង​) ប៉ូលិស​នាំ​គ្នា​ឆ្វាត់ឆ្វែង​ធ្វើ​ចរាចរណ៍​បណ្តោះ​ឲ្យ​ទៅ​ភ្លាម​បើ​ទោះបី​ជា​ពេល​ខ្លះ​ខ្ញុំ​ឃើញ​ផ្ទាល់​ភ្នែក​រថយន្ត​ទាំង​នោះ​បើក​ច្រាស​ផ្លូវ​ហួស​រនាំង​ចែក​ខាង​ក៏ដោយ។ នេះ​ដោយសារ​អំណាច​នៃ​ស្លាក​លេខ និង​ឡាន​ស៊ីរ៉ែន​។

ជាង​នេះ​ទៅ​ទៀត​ក្រៅ​ពី​ស្លាក​លេខ​​ស៊ីវិល «​ភ្នំពេញ ឬ​ក៏​ឈ្មោះ​ខេត្ត​» គឺ​មាន​ស្លាក​លេខ​ដែល​មើល​ទៅ​មាន​អំណាច​ធ្វើ​ឲ្យ​ប៉ូលិស​ចរាចរណ៍​លំបាក​ក្នុង​អនុវត្ត​ច្បាប់​ដែរ​ដោយសារ​​ខ្លះ​ចេញ​មក​ច្រងេង​ច្រងាង​ហេងស៊យ​វ៉ៃ​មន្ត្រី​ប៉ូលិស​ចរាចរណ៍​មុន​ទៀត​ហើយ​មើល​ទៅ​ស្លាក​លេខ​បែប​បង្ហាញ​សាច់ដុំ​មាន​ភាព​រញ៉េរញ៉ៃ​ពេញ​ផ្លូវ​ដូចជា នគរបាល ខេមរភូមិន្ទ រដ្ឋ រាជការ វត្ត PRESS, ONU, IO, NGO, AT, CD ហើយ​មាន​ខ្លះ​ទៀត​បាន​បង្ហាញ​​សាច់ដុំ​តាម​លេខ​ការ៉េ​ដោយ​មាន​​លេខ ៤ ខ្ទង់​ដូចៗ​គ្នា​ដែល​ទិញ​ក្នុង​តម្លៃ​ថ្លៃៗ​។

ស្លាក​លេខ​ទាំង​នេះ​គឺ​នៅ​ស្រុក​​ខ្មែរ​សុទ្ធតែ​លេង​អំណាច​ខ្លះ​ក្នុង​ការ​បើកបរ​​លើ​ផ្លូវ​សាធារណៈ ឬ​ក៏​ចុះ​ពី​លើ​រថយន្ត​ចង់​ឲ្យ​គេ​គោរព​កោត​ក្រែង​ដែល​នោះ​គឺជា​ការ​បង្ហាញ​ពី​ការ​បែងចែក​វណ្ណៈ​ឋានៈ​នៅ​​ក្នុង​សង្គម​ខ្មែរ​ផង​ដែរ​ ដែល​ចូលចិត្ត​ទាញ​ផលប្រយោជន៍​ពី​ការ​ប្រើ​ស្លាក​លេខ​ទាំង​នេះ​។ ការ​លេង​អំណាច​តាម​ស្លាក​លេខ​ទាំង​នេះ​គឺ​ខុស​ពី​ស្រុក​គេ​ដែល​មាន​តែ​ការ​បែងចែក​ប្រភេទ​តាម​ឡាន តូច ល្មម ធំ ដឹក​ទំនិញ ឬ ក៏​តាក់ស៊ី​ និង​ស្លាក​លេខ​សមត្ថកិច្ច​ជា​របស់​រដ្ឋ​ទេ​តែ​មិន​អាច​លេង​អំណាច​ដូច​នៅ​ស្រុក​ខ្មែរ​ឡើយ​ពោល​គឺ​គេ​អនុវត្ត​ច្បាប់​ចរាចរណ៍​​យ៉ាង​តឹងរ៉ឹង​។

បើ​នៅ​សហគមន៍​អឺរុប​គឺ​គេ​មាន​ស្លាក​តែ​មួយ​ឆ្លង​ប្រទេស​គ្នា​បាន​ដោយ​គ្រាន់​​ដាក់​សញ្ញា​ផ្កាយ​ទង់ជាតិ​សហគមន៍​អឺរ៉ុប និង​ឈ្មោះ​កាត់​ប្រទេស​របស់​គេ​គឺ​គ្រប់គ្រាន់​ហើយ​។

បញ្ហា​ស្លាក​លេខ​រញ៉េរញ៉ៃ​ទាំង​នេះ​គឺជា​​ជំងឺ​រ៉ាំរ៉ៃ និង​ជា​ឧបសគ្គ​នៃ​ការ​អនុវត្ត​ច្បាប់​ចរាចរណ៍​នៅ​​ស្រុក​ខ្មែរ​ខ្លះ​រហូត​ដល់​យក​​ស្លាក​លេខ​ឡាន​សមត្ថកិច្ច​ទៅ​​ដឹក​ឈើ​ខុស​ច្បាប់​ដឹក​គ្រឿង​​ញៀន​ដោយសារ​តែ​អំណាច​នេះ​ហើយ​។

ហេតុ​ដូច្នេះ​ហើយ​ស្លាក​លេខ​យានយន្ត​នៅ​ក្នុង​ស្រុក​គួរ​មាន​តែ​ស៊ីវិល​ ១ ​ប្រភេទ​បាន​ហើយ ហើយ​ប្រើ​ទាំងអស់​គ្នា​ទាំង​អ្នក​តូច​ទាំង​អ្នក​ធំ​ហើយ​បើ​ធ្វើ​នៅ​ភ្នំពេញ​ដាក់​ភ្នំពេញ​បើ​ធ្វើ​នៅ​ខេត្ត​ដាក់​ឈ្មោះ​ខេត្ត​នោះ​ដូច​ធម្មតា​ទៅ​ហើយ​តម្រូវ​ឲ្យ​បង់ពន្ធ​ទាំងអស់​គ្នា​ទាំង​ឡាន​ទាំង​ផ្លូវ​គ្មាន​ការ​លើកលែង​រីឯ​យានយន្ត​របស់​សមត្ថកិច្ច (​ ខ.ម​ និង ន.ប​) ​គឺ​ប្រើ​សម្រាប់​តែ​នៅ​កន្លែង​ធ្វើការ​ហើយ​ទុក​នៅ​កន្លែង​ធ្វើការ​ទៅ​កុំ​ឲ្យ​ប្រើ​ច្រឡំ​បល់​គ្នា​នោះ​។ រីឯ​ការ​ចូលរួម​អន្តរាគមន៍​ពី​អ្នក​ធំៗ ឬ​ក៏​ថ្នាក់​ដឹកនាំ​ណា​ក៏ដោយ​រឿង​ច្បាប់​ចរាចរណ៍​ក៏​គួរ​តែ​បញ្ឈប់​សូម្បី​តែ​​លោក​នាយក​រដ្ឋមន្ត្រី​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍