ភ្នំពេញៈ ជនសង្ស័យ ២៨ នាក់ត្រូវបានកម្លាំងអាវុធហត្ថរាជធានីភ្នំពេញឃាត់ខ្លួនសួរនាំក្នុងករណីហិង្សាព្រួតវាយ និងប៉ងចាក់សម្លាប់យុវជនម្នាក់ឲ្យរបួសធ្ងន់កាលពីយប់ថ្ងៃពុធប៉ុន្តែរឿងពិតនៃហិង្សានេះគឺសមត្ថកិច្ចមិនទាន់អាចកំណត់បាននៅឡើយទេកាលពីម្សិលមិញនេះ។
តាមរបាយការណ៍នគរបាលខណ្ឌមានជ័យជនរងគ្រោះឈ្មោះ រ៉េត ថន ភេទប្រុស អាយុ ២៤ ឆ្នាំ ស្នាក់នៅផ្ទះជួលក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ ចំណែកក្រុមជនបង្កហេតុគឺជាកម្មករឃ្លាំងឥដ្ឋការ៉ូយីហោ «ស៊ីហ៊ូហ៊ុយ» ដែលមានម្ចាស់ជានាយទាហានថ្នាក់ឧត្តមសេនីយ៍។
ក្នុងរបាយការណ៍ដែលផ្អែកតាមការអះអាងពីសាក្សីថានៅយប់ថ្ងៃកើតហេតុម៉ោង ៩ និង ៣០ នាទីកម្មករទាំងនោះកំពុងផឹកស៊ី និងរាំលេងក្បែរផ្ទះជួលរបស់ជនរងគ្រោះក្រោយមកជនរងគ្រោះបានទៅវាយក្រុមកម្មករនោះទើបផ្ទុះហិង្សាព្រួតគ្នាវាយលើជនរងគ្រោះវិញដោយប្រើដាវស៊ាំមូរ៉ៃ និងដែកមុខស្រួចបណ្តាលឲ្យជនរងគ្រោះរបួសធ្ងន់ធ្ងរ និងត្រូវគេបញ្ជូនទៅមន្ទីរពេទ្យកាល់ម៉ែតដើម្បីព្យាបាល។
បើតាមលោក តេង ស៊ីណូ អធិការនគរបាលខណ្ឌមានជ័យថានៅយប់នោះអាជ្ញាធរបានចុះទៅកន្លែងកើតហេតុដើម្បីទប់ស្កាត់ហិង្សា និងឃាត់ខ្លួនក្រុមជនល្មើសតែពួកគេបានរត់ចូលក្នុងបន្ទប់ឃ្លាំងដាក់ទំនិញហើយបិទទ្វារមិនព្រមបើកឡើយក្រោយមកកងរាជអាវុធហត្ថរាជធានីភ្នំពេញប្រមាណ ៥០ នាក់បានចុះបង្ក្រាប និងឃាត់ជនសង្ស័យបាន ២៨ នាក់។
យ៉ាងណាក៏ដោយក្រោយសាកសួរអ្នកទាំង ២៨ នាក់នោះលេខាធិការនៃកងរាជអាវុធហត្ថរាជធានីភ្នំពេញលោក ឱ គឹមអាន បានឲ្យដឹងតាមចម្លើយសារភាពថាដំបូងឡើយកម្មករពីរនាក់ក្នុងចំណោមអ្នកទាំង ២៨ នាក់គឺត្រូវបានគ្នីគ្នារបស់ជនរងគ្រោះ ១០ នាក់ដេញកាប់ដោយកាំបិតបុ័ងតោបណ្តាលឲ្យរបួសក្បាល និងខ្លួនហើយក៏រត់ចូលទៅឃ្លាំងរកជំនួយក្រោយមកកម្មករ ១៦ នាក់បានទាញបំពង់ទីបកាំបិត និងឧបករណ៍ដែកផ្សេងទៀតចេញមកជួយវាយតបលើក្រុមជនរងគ្រោះវិញ។
លោកថា៖ «តាមការអះអាងរបស់ក្រុមជនសង្ស័យគឺពេលក្រុមរបស់ពួកគេវាយបកវិញក្រុមរបស់ជនរងគ្រោះបានរត់គេចបាត់អស់សល់តែជនរងគ្រោះម្នាក់ឯងប៉ុណ្ណោះ»។
លោក ឱ គឹមអាន បានឲ្យដឹងថាក្រោមការដឹកនាំសាកសួរពីលោកមេបញ្ជាការរងកងរាជអាវុធហត្ថរាជធានីភ្នំពេញលោក ខេន សុវណ្ណ ការសាកសួរម្សិលមិញនេះគឺសមត្ថកិច្ចនៅមិនទាន់អាចសន្និដ្ឋាននូវការពិតបាននៅឡើយទេ៕
