The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ម្នាក់​ត្រូវ​គេ​វាយ​សម្លាប់ ហើយ​អូស​យក​ទៅ​កប់​សង្ស័យ​រឿង​គំនុំ




កម្មករ​ម្នាក់​ត្រូវ​គេ​វាយ​សម្លាប់ ហើយ​អូស​យក​ទៅ​កប់​សង្ស័យ​រឿង​គំនុំ

កម្មករ​ម្នាក់​ត្រូវ​គេ​វាយ​សម្លាប់ ហើយ​អូស​យក​ទៅ​កប់​សង្ស័យ​រឿង​គំនុំ

130102_09c
សាកសពកម្មកររងគ្រោះយកចេញពីរណ្តៅដាក់លូ សហការី

កោះកុងៈ ជន​រង​គ្រោះ​ជា​កម្មករ​ម្នាក់ ត្រូវ​កម្មករ​គ្នា​ឯង​ព្រួត​គ្នា​វាយ​សម្លាប់​ហើយ​អូស​សព​យក​ទៅ​កប់​ក្នុង​រណ្តៅ​ជីក​ដាក់​លូ​បង្ហូរ​ទឹក​នៅ​ក្នុង​បរិវេណ​ការ​ដ្ឋាន​សួន​ច្បារ​ខេត្ត កាល​ពី​យប់​ម្សិល​មិញ​ក្នុង​ភូមិ​១ ក្រុង​ខេមរ​ភូមិន្ទ ទីរួម​ខេត្ត​កោះកុង។

លោក រស់ សុខខឿន ប្រធាន​មន្ទីរ​ស្រាវ​ជ្រាវ​កង​រាជ​អាវុធ​ហត្ថ​ខេត្ត​បាន​ឲ្យ​ដឹង​ពី​ម្សិល​មិញ​ថា ជន​រង​គ្រោះ​ត្រូវ​ជន​សង្ស័យ​ជា​ឃាតក​កាយ​ដី​កប់​នៅ​ក្នុង​ចង្អូរ​ដី​ជីក​ដាក់​លូ​កាល​ពី​យប់​ថ្ងៃ​អង្គារ។

លោក​បញ្ជាក់​ថា៖​«សព​ជន​រង​គ្រោះ​ត្រូវ​ឃាតក​វាយ​សម្លាប់​នឹង​វត្ថុ​រឹង ដោយ​មាន​ស្នាម​វាយ​ជាំ​ឈាម​លើ​ផ្ទៃ​មុខ​និង​ក្បាល​ហើយ​អូស​យក​ទៅ​ទម្លាក់​នៅ​ក្នុង​រណ្តៅ​ជីក​ដី​ដាក់​លូ​កប់​បំបិត​តាង»។

លោក​ឲ្យ​ដឹង​តាម​ការ​រៀប​រាប់​ពី​មេការ​ក្នុង​ការ​ដ្ឋាន​ថា ជន​រង​គ្រោះ​និង​ឃាតក គឺ​ជា​កម្មករ​ធ្វើ​ការ​ជាមួយ​គ្នា នៅ​ក្នុង​ការ​ដ្ឋាន​សួន​ច្បារ​ដែល​អាជ្ញាធរ​ខេត្ត​កោះ​កុង ទើប​អភិវឌ្ឍ​ថ្មី នៅ​ក្នុង​សង្កាត់​ស្មាច់​មាន​ជ័យ ក្រុង​ខេមរ​ភូមិន្ទ​ហើយ​ត្រូវ​មេ​ការ​ជួល​គេ​ឲ្យ​មក​ធ្វើ​ការ។

មុន​កើត​ហេតុ​រវាង​ជន​រង​គ្រោះ​និង​ឃាតក បាន​មក​ធ្វើ​ការ​ជីក​ដី​ជាមួយ​គ្នា ពេល​នោះ​ខាង​ក្រុម​ជន​ជា​ឃាតក​បាន​គ្រវែង​ដុំថ្ម​ទៅ​លើ​ជើង​ជន​រងគ្រោះ​ ជន​រង​គ្រោះ​ថា​ម៉េច​ក៏​ធ្វើ​បែប​នេះ ហើយ​ពួកគេ​ក៏​នាំ​គ្នា​ធ្វើ​ការ​ទៀត​ទៅ។

លោក​ប្រាប់​បន្ត​ថា ជន​រងគ្រោះ​ទំនង​មិន​បាន​ចាប់​អារម្មណ៍​អី​ទេ ដល់​ពេល​យប់ ពួកគេ​ក៏​នាំ​គ្នា​ទិញ​ស្រា​ផឹក​ជាមួយ​គ្នា​ហើយ​ប្រហែល​ជា​ត្រូវ​ស្រា​ស្រវឹង​ផង​នោះ​ក្រុម​ដៃ​ដល់​ក៏​និយាយ​រំឭក​គំនុំ​ពី​ថ្ងៃ ខឹង​នឹង​ការ​ស្តី​ឲ្យ​នោះ​ហើយ​ក៏ ព្រួត​គ្នា​វាយ​សម្លាប់​ទៅ​លើ​ជន​រងគ្រោះ​តែ​ម្តង។

លោករស់ សុខខឿន បន្ត​ឲ្យ​ដឹង​ថា លុះ​ព្រឹក​ឡើង​ពេល​កម្មករ​នាំ​គ្នា​ចុះ​ធ្វើ​ការ​ក៏​ស្រាប់​តែ​បាត់​ជន​រង​គ្រោះ​និង​ជន​សង្ស័យ​៣​នាក់​ដែល​ផឹក​ស៊ី​ជាមួយ​គ្នា​ពី​យប់។ មេ​ការ​ដ្ឋាន​ក៏​បាន​ទៅ​ប្តឹង​កង​រាជ​អាវុធ​ហត្ថ​ដែល​មាន​បន្ទាយ​នៅ​ក្បែរ​ការ​ដ្ឋាន​នោះ​ហើយ​នាំ​គ្នា​ដើរ​រក​ឃើញ​សព​ជន​រង​គ្រោះ​ត្រូវ​គេ​កប់​រាក់​ឃើញ​ដៃ​ជើង​ទើប​នាំ​គ្នា​កាយ​យក​ឡើង។

លោក​ប្រាប់​ថា៖ «បើ​តាម​ការ​បំភ្លឺ​ពី​មេ​ការ​និង​ការ​បាត់​ក្រុម​ជន​សង្ស័យ​មិន​មក​ធ្វើ​ការ​ដូច​សព្វ​ដង​យើង​សន្និដ្ឋាន​ថា ក្រុម​ជន​បាត់​ខ្លួន​ទាំង​៣​នាក់​ជា​អ្នក​វាយ​សម្លាប់​ជន​រង​គ្រោះ​ហើយ​រត់​គេច​ខ្លួន។

លោក​បញ្ជាក់​ថា៖​«យើង​កំពុង​តាម​ចាប់​ខ្លួន​ពួកគេ​ទាំង​៣​នាក់​នោះ​ហើយ និង​បាន​រាយ​កម្លាំង​និង​រាយ​ការណ៍​ទៅ​គ្រប់​ច្រក​ចេញ​ចូល​ខេត្ត​កោះ​កុង​ទាំង​អស់ អំពី​មុខ​សញ្ញា​ជន​សង្ស័យ​នោះ»។

លោកថា ជនរងគ្រោះឈ្មោះ ព្រំ សិលា អាយុ​៣០​ឆ្នាំ​មាន​ស្រុក​កំណើត​នៅ​ខេត្ត​ស្វាយ​រៀង ត្រូវ​សាច់​ញាតិ​ដឹក​យក​ទៅ​ធ្វើ​បុណ្យ​ហើយ។ មិន​អាច​ទាក់​ទង​មេ​ការ​ដើម្បី​បំភ្លឺ​បន្ថែម​ជុំវិញ​ឃាតកម្ម​នេះ​បាន​ទេ ពីម្សិលមិញ៕

អត្ថបទគួរចាប់អារម្មណ៍