The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ម្នាក់​ធ្លាក់​ចូល​កង់​ឡាន​កិន​ស្លាប់​នៅ​ស្ពាន​ព្រះ​មុនី​វង្ស




កម្មករ​ម្នាក់​ធ្លាក់​ចូល​កង់​ឡាន​កិន​ស្លាប់​នៅ​ស្ពាន​ព្រះ​មុនី​វង្ស

កម្មករ​ម្នាក់​ធ្លាក់​ចូល​កង់​ឡាន​កិន​ស្លាប់​នៅ​ស្ពាន​ព្រះ​មុនី​វង្ស

ភ្នំពេញៈ បុរស​ម្នាក់​ជា​កម្មករ​លី​សែង​អំបិល​ត្រូវ​រថយន្ត​កិន​បែក​ក្បាល ស្លាប់​ភ្លាម ខណៈ​បាន​ធ្លាក់​ពី​លើ​រថយន្ត​ដែល​ដឹក​ការុង​អំបិល ពេល​ឆ្លង​ស្ពាន​ព្រះ​មុនីវង្ស​ចាស់ ហើយ​រអិល​ធ្លាក់​ចូល​ទៅ​ក្រោម​កង់​រថយន្ត កាល​ពី​ថ្ងៃទី​២៦ ខែកុម្ភៈ។

រថយន្ត​បង្ក​និងអ្នក​បើកបរ​ត្រូវ​សមត្ថកិច្ច​បញ្ជូន​ទៅ​ការិយា​ល័យ​នគរ​បាល​ចរាចរណ៍​ផ្លូវ​គោក​រាជធានី​ភ្នំពេញ។

លោក ប៉ែន ថុន នាយ​រង​ការិយាល័យ​ចរាចរណ៍​ផ្លូវ​គោក​រាជធានី​ភ្នំពេញ​ឲ្យ​ដឹង​ថា​ គ្រោះ​ថ្នាក់​ចរាចរណ៍​រថយន្ត​ដឹក​អំបិល​ដែល​កម្មករ​ធ្លាក់​ហើយ​ត្រូវ​កិន​ ស្លាប់​នោះ ​ក្រោយ​កើត​ហេតុ​ ខាង​សមត្ថកិច្ច​លោក​បាន​យក​ទៅ​រក្សា​ទុក​នៅ​ការិយា​ល័យ​ហើយ​។​

លោកបានឲ្យដឹង​បន្ត​ថា ហេតុការណ៍​ដែល​បង្ក​ឲ្យ​មាន​គ្រោះ​ថ្នាក់​នោះ ​បើ​តាម​ការ​សួរ​នាំ​របស់​សមត្ថកិច្ច​ សា​ក្សី​នៅ​កន្លែង​កើត​ហេតុ​ដែល​បាន​ឃើញ​ថា ​គ្រោះ​ថ្នាក់​នេះ ​ដោយ​សារ​តែ​ជន​រងគ្រោះ​មិន​បាន​ប្រុង​ប្រយ័ត្ន ព្រោះ​ពួកគេ​ប្រ​ឡែង​គ្នា​ ហើយ​ក៏​ធ្លាក់​ទាំង​ការុង​អំបិល​និង​មនុស្ស​មក​ក្រោម គ្នីគ្នា​លើ​ឡាន​បាន​ស្ទុះមក​ជួយ​​ដែរ​តែ​ចាប់​មិន​បាន។

លោក​ថ្លែង​ ថា​៖​ «ដោយ​​ការ​ពិចារណា​រក​ហេតុ​ផល​ និង​គិតឲ្យ​ភាព​យុត្តិ​ធ៌មទៅ ​ខ្ញុំ​បាន​ស្នើ​ទៅ​តំណាង​អយ្យកា​រ អំពី​ការ​មិន​ចោទ​ប្រកាន់​ឃាត់​ខ្លួន​ដល់​អ្នក​បើកបរ​រូបនេះ ព្រោះមិ​​ន​មែន​ជា​កំហុសរ​បស់​គាត់​ទេ យើង​ធ្លាក់​ដោយ​ខ្លួន​ឯង​ ប៉ុន្តែ ខ្ញុំ​បាន​រក្សា​ទុក​រថយន្ត​ដែល​ពាក់​ស្លាក​លេខ​ភ្នំពេញ​ 3B-5560 ដើម្បី​ឲ្យ​ម្ចាស់​រថយន្ត​ជួយ​ប្រាក់​ខ្លះ ​ដល់​អ្នក​ស្លាប់​គ្រាន់​បាន​ធ្វើ​បុណ្យ​សព»។

មន្រ្តី​នគរបាល​ផ្នែក​សណ្តាប់​ធ្នាប់​ចរាចរណ៍​ខណ្ឌ​មាន​ជ័យ​បាន​ឲ្យ​ដឹង​ថា ​គ្រោះថ្នាក់​ចរាចរណ៍​ដែល​បាន​កើត​ឡើង​នៅព្រឹក​ថ្ងៃទី​២៦ ខែ​កុម្ភៈ នៅ​ត្រង់​ចំណុច​គល់​ស្ពាន​ព្រះ​មុនីវង្ស​បណ្តាល​ឲ្យ​កម្មករ​អំបិល​ម្នាក់​ត្រូវ​រថយន្ត​កិន​ខ្ទេច​ក្បាល​ស្លាប់​នោះ គឺ​កើត​ឡើង​ដោយ​សារ​តែ​ការ​ធ្វេស​ប្រហែស​របស់​ជន​រងគ្រោះ​ខ្លួន​ឯង​ពីព្រោះ​គេ​បាន​ជិះ​លើ​រថយន្ត​ដែល​មាន​ផ្ទុក​ការុង​អំបិល​ពេញ​ហើយ​នាំគ្នា​ប្រឡែង​គ្នា។

មន្រ្តីនគរបាល​ចរាចរខណ្ឌ​បន្ត​ឲ្យ​ដឹង​ថា ជន​រង​គ្រោះ​មាន​ឈ្មោះ រ៉េត អាយុ ៣២ ឆ្នាំ ជា​កម្មករ​លី​សែង​អំបិល រស់​នៅ​ភូមិ​តា​មួង ឃុំព្រៃកាំ ស្រុក​អង្គរបុរី​ខេត្ត​តាកែវ និងអ្នក​បើកបរ​រថយន្ត​ឈ្មោះ បៀម ដា អាយុ៣០​ឆ្នាំ​រស់​នៅ​ភូមិ​ព្រែក​កាំ​ភ្លើង​ ឃុំ​វិហារ​សួគ៌​ ស្រុក​ខ្សាច់​កណ្តាល​ ខេត្ត​កណ្តាល។ ពួកគេ​ទាំងពីរ​ធ្វើ​ជា​កម្មករ​ថៅកែ​អំបិល ឈ្មោះ អ៊ី ស្រី​មុំ អាយុ​២៨​ឆ្នាំ មាន​ទីតាំង​នៅ​សង្កាត់​ព្រែក​សំរោង ក្រុង​តាខ្មៅ ខេត្ត​កណ្តាល។

មន្រ្តីនគរបាល​ខណ្ឌថា​ក្រោយ​កើត​ហេតុ ខាង​សមត្ថកិច្ច​នគរបាល​ចរាចរ​ខណ្ឌ​បាន​ឃាត់​រថយន្ត​បង្ក និង​អ្នក​បើកបរ​រថយន្ដ​នាំ​យក​ទៅ​សាកសួរ​នៅ​​អធិការដ្ឋាន​នគរបាល​ខណ្ឌ​មួយ​រយៈ​ដែរ មុន​នឹង​​ប្រគល់​ឲ្យទៅ​ការិយាល័យ​ចរាចរណ៍​ផ្លូវ​គោក​រាជធានី​ភ្នំពេញ ចាត់​ការបន្ត៕

អត្ថបទគួរចាប់អារម្មណ៍