The Phnom Penh Post Search

Search form




Logo of Phnom Penh Post newspaper Phnom Penh Post - ករណី​សម្លាប់​បង​ប្អូន​ពីរ​នាក់​ក្នុង​ខ្ទម​ចាំ​ចម្ការ ជា​រឿង​គំនុំ




ករណី​សម្លាប់​បង​ប្អូន​ពីរ​នាក់​ក្នុង​ខ្ទម​ចាំ​ចម្ការ ជា​រឿង​គំនុំ

ករណី​សម្លាប់​បង​ប្អូន​ពីរ​នាក់​ក្នុង​ខ្ទម​ចាំ​ចម្ការ ជា​រឿង​គំនុំ

សៀមរាបៈ ជន​រង​គ្រោះ​ជា​បង​ប្អូន​បង្កើត​ពីរ​នាក់ ដែល​ត្រូវ​គេ​សម្លាប់ សមត្ថកិច្ច​បាន​សង្ស័យ​ថា ជា​រឿង​គំនុំ ព្រោះ​មាន​ស្នាម​កាប់​និង​ឆក់​ស្លាប់​ក្នុង​ខ្ទម​ចាំច​ម្ការ​នៅ ចម្ងាយ​ជិត​២០​គីឡូម៉ែត្រ​ពី​ភូមិ​កាល​ពី​ថ្ងៃ​ទី​១៣​កុម្ភៈ នៅ​ក្នុង​ឃុំ​អន្លង់​សំណ ស្រុក​ជីក្រែង។

លោក ណុល រុង នាយ​រង​នគរបាល​ព្រហ្ម​ទណ្ឌ​ខេត្ត​ឲ្យ​ដឹង​ថា ជន​រង​គ្រោះ​ជា​បង​ប្អូន​បង្កើត​មាន​ឈ្មោះ ឈាង ​សុខ អាយុ៣១​ឆ្នាំ និង​ប្អូន​ស្រី​ឈ្មោះ​ឈាង សុខ​ជា អាយុ​១៨​ឆ្នាំ រស់​នៅ​ក្នុង​ភូមិ​ចែក​ខ្សាច់​ក្រោម ឃុំ​អន្លង់​សំណ ស្រុក​ជី​ក្រែង ​ខេត្ត​សៀមរាប ត្រូវ​គេ​សម្លាប់​នៅ​ក្នុង​ភូមិ​ត្រពាំង​ដងរែក ឃុំ អន្លង់​សំណ ស្រុក​ជីក្រែង។

លោកថា តាម​ការ​ពិនិត្យ​ស្លាក​ស្នាម ​សាកសព​គឺ​មាន​ស្នាម​កាប់​នឹង​កាំបិត​ជា​ច្រើន​កន្លែង​លើ​ដង​ខ្លួន ស្នាម​ភ្លើង​ឆេះ​និង​មាន​ស្នាម​អារ​ក​ថែម​ទៀត​ផង។

លោកថ្លែងថា៖​«ខ្ញុំមិ​ន​ទាន់​អាច​បំភ្លឺ​បាន​ទេ​ពាក់​ព័ន្ធ​រឿង​នេះ​ព្រោះ​ស្ថិត​ក្នុង​ភាព​អាថ៌​កំបាំង​នៅ​ឡើយ ដោយ​ត្រូវ​រង់​ចាំ​ស៊ើប​អង្កេត​ឲ្យ​បាន​ល្អិត​ល្អន់​សិន»។​

លោក សុខ សុធា​វុធ អធិការ​រង​នគរបាល​ស្រុក​ជីក្រែង​បាន​ឲ្យ​ដឹង​ពី​ម្សិល​មិញ​ថា ជន​រង​គ្រោះ​ទាំង​ពីរ​នាក់​បង​ប្អូន​ចុះ​ទៅ​ធ្វើ​ចម្ការ​ហើយ​អ្នក​នេសាទ​ប្រទះ​ឃើញ​ដេក​ស្លាប់​លើ​ខ្ទម​ចាំ​ចម្ការ​របស់​ខ្លួន​កាល​ពី​ថ្ងៃ​ទី​១៣ កុម្ភៈ ក៏​បាន​រាយការណ៍​មក​សមត្ថកិច្ច​រហូត​ខាង​​ព្រហ្ម​ទណ្ឌ​ខេត្ត​ចុះ​ទៅ​ដល់​ចំណុច​កើត​ហេតុ​ពី​ម្សិលមិញ។

លោក អធិការ​រង​បន្ត​ទៀត​ថា ជុំវិញ​អំពើ​ឃាតកម្ម​នេះ​សមត្ថកិច្ច​នៅ​មិន​ទាន់​ដឹង​ច្បាស់​ថា ពាក់​ព័ន្ធ​នឹង​អ្វី​ឲ្យ​ប្រាកដ​ទេ ជំហាន​ដំបូង​គ្រាន់​តែ​ពិនិត្យ​ស្លាក​ស្នាម​លើ​សាកសព​សិន ព្រោះ​ជន​រងគ្រោះ ត្រូវ​គេ​សម្លាប់​យ៉ាង​សាហាវ។

លោកបញ្ជាក់ថា៖ «សាកសព មាន​ស្នាម​កាប់​ទាំង​ជើង ដងខ្លួន មាន​ស្នាម​ឆេះ​ខ្លោច និង​មាន​ស្នាម​អារ​ក​អ្នក​ទាំង​ពីរ​ទៀត​ផង»។

លោកបន្ត​ថា នៅ​ភូមិ​សាស្រ្ត​ដែល​ជន​រងគ្រោះ​ត្រូវ​គេ​សម្លាប់​ជា​តំបន់​នៅ​ឆ្ងាយ​ដាច់ ​ស្រយាល​ពី​ភូមិ​ជិត​២០​គីឡូម៉ែត្រ ហើយ​អ្នក​ភូមិ​តិច​តួច​ចុះ​ទៅ​ធ្វើ​ចម្ការ និង​នេសាទ​ត្រី​នៅទី​នោះ​ទើប​មិន​មាន​នរណា​ដឹង​ភ្លាមៗ។

លោកប្រាប់​ថា តាម​ការ​ស៊ើប​សួរ​ក្រុម​គ្រួសារ​ជនរ​ងគ្រោះ​ប្រាប់​ថា ទាំង​ពីរ​នាក់​បង​ប្អូន​បាន​នាំ​គ្នា​ចេញ​ពី​ផ្ទះ​ទៅ​ស្នាក់​នៅ​ធ្វើ​ចម្ការ​ហើយ​ក៏​មិន​ដែល​ឮ​ពួកគេ​ប្រាប់​ថា មាន​ទំនាស់​ជាមួយ​នរណា​ដែរ​រហូត​ដល់​ថ្ងៃ​គេ​សម្លាប់​នេះ។

លោក អធិការ​រង​អះអាង​ថា ផ្អែក​តាម​ការ​ពិនិត្យ​លើ​ស្លាក​ស្នាម សមត្ថកិច្ច​សន្និដ្ឋាន​ថា បើ​ជន​រងគ្រោះ​មាន​ទំនាស់​នោះ មាន​តែ​ទំនាស់​ជាមួយ​នឹង​អ្នក​នេសាទ​ត្រី ព្រោះ​នៅ​ទីនោះ​មាន​តែ​ពួកគេ​ធ្វើ​ចម្ការ​និង​អ្នក​ចុះ​ទៅ​នេសាទ​ត្រី ទេ ប៉ុន្តែ​សព​អាច​ត្រូវ​ជន​សង្ស័យ​ឆក់​ដោយ​ប្រដាប់​ឆក់​ត្រីផង​ដែរ។

លោកអធិការ​រងប្រាប់​ដែរ​ថា​ជនល្មើស​សង្ស័យ អាច​មាន​គ្នា​ចាប់ពី​២នាក់​ទៅ​៤​នាក់ ដោយ​សារថា នៅ​កន្លែង​កើត​ហេតុ​ជន​ល្មើស​បាន​បន្សល់​ទុក​មាន ដំបង​ច្រវាក់ ដែល​ជន​ដៃ​ដល់​ទាំង​នោះ​បាន​ប្រើ​ប្រាស់​ក្នុង​ពេល​ធ្វើ​សកម្មភាព​មក​លើ​ជន​រងគ្រោះ៕

អត្ថបទគួរចាប់អារម្មណ៍