The Phnom Penh Post Search

Search form




Logo of Phnom Penh Post newspaper Phnom Penh Post - កាស៊ីណូ​មួយ​នៅ​ប៉ោយ​ប៉ែត​ចង​បដា​ជា​ភាសាថៃ​និង​ចិន​អបអរ​ចូល​ឆ្នាំ​ចិន




កាស៊ីណូ​មួយ​នៅ​ប៉ោយ​ប៉ែត​ចង​បដា​ជា​ភាសាថៃ​និង​ចិន​អបអរ​ចូល​ឆ្នាំ​ចិន

កាស៊ីណូ​មួយ​នៅ​ប៉ោយ​ប៉ែត​ចង​បដា​ជា​ភាសាថៃ​និង​ចិន​អបអរ​ចូល​ឆ្នាំ​ចិន

130206 10
បដាជាអក្សរថៃនិងចិន ដែលម្ចាស់កាស៊ីណូស្តារវីហ្គាស់ ចងលើផ្លូវក្នុងក្រុងប៉ោយប៉ែត សហការី

ប៉ោយប៉ែតៈ សាលា​ក្រុង​ប៉ោយ​ប៉ែត​ខេត្ត​បន្ទាយ​មាន​ជ័យ​កាល​ពី​ថ្ងៃទី​៤ ខែ​កុម្ភៈ បាន​បញ្ជា​ឲ្យ​ម្ចាស់​កាស៊ីណូ​ស្តារវីហ្គាស់​នៅ​ក្រុង​នេះ​ស្រាយ​បដា ដែល​ចង​លម្អ​ផ្លូវ​ចូល​នៅ​មុខ​កាស៊ីណូ​ចេញ ដោយសារ​តែ​នៅ​លើ​ផ្ទាំង​បដា​ទាំង​នោះ​គេ​សរសេរ​អក្សរ​ថៃ​និង​អក្សរ​ចិន​ធំៗ សម្រាប់​អបអរ​បុណ្យ​ចូល​ឆ្នាំ​ចិន​ខាង​មុខ។

លោក ង៉ោ ម៉េង​ជ្រួន អភិបាល​ក្រុង​ប៉ោយ​ប៉ែត​បាន​ប្រាប់​ពីម្សិល​មិញ​ថា បដា​មាន​ន័យ​ថា​អបអរ​សាទរ​បុណ្យ​ចូល​​ឆ្នាំ​ចិន មាន​សរសេរ​ជា​អក្សរ​ថៃ​និង​អក្សរ​ចិន​ធំៗ​ចង​នៅ​ផ្លូវ​សាធារណៈ​នៅ ពី​មុខ​សណ្ឋាគារ​ស្តារវី​ហ្គាស់ ក្នុង​ក្រុង​ប៉ោយ​ប៉ែត​នោះ ម្ចាស់​សណ្ឋាគារ​ចង​មិន​បាន​ទេ ព្រោះ​មិន​បង្ហាញ​ពី​អត្តសញ្ញាណ​ជាតិ។

លោក បញ្ជាក់ថា៖ «បដា​ជា​អក្សរថៃ​និង​អក្សរ​ចិន​ដែល​ចង​នៅ​លើ​ផ្លូវ​ជាតិ​ក្នុង​ក្រុង ខ្ញុំ​បាន​បញ្ជា​ឲ្យ​ម្ចាស់​កាស៊ីណូ​នោះ​រុះរើ​ចេញ​ហើយ​កាល​ពី​ថ្ងៃទី៤ ខែកុម្ភៈ»

លោក អ៊ុក កែវ​រតនៈ មន្រ្តី​នាំ​ពាក្យ​សាលា​ខេត្ត​​ប្រាប់​ឲ្យ​ដឹង​ថា​ករណី​ប្រើ​អក្សរ​បរទេស មិន​ប្រើ​អក្សរ​ខ្មែរ​បែប​នេះ​វា​ពិត​ជា​ខុស​ឆ្គង​ហើយ ហើយ​ប្រសិន​បើ​គេ​ចង់​សរសេរ​ស្លាក​បដា​នោះ​គួរ​តែ​សរសេរ​ជា​៣​ភាសា គឺ​អក្សរ​ខ្មែរ​នៅ​ពី​លើ​អក្សរ​ថៃ​និង​អក្សរ​ចិន​ប្រហែល​អាច​ប្រើ​ជា​ការ បាន។

លោកបន្ត​ថា បើ​ជា​ជនបរ​ទេស​គេ​នៅ​ស្រុក​យើង​ត្រូវ​គោរព​ច្បាប់​ស្រុក​យើង ដូច្នេះ​បើ​តាំង​បង្ហាញ​ស្លាក​អ្វី គេ​គួរតែ​សរសេរ​អក្សរ​ខ្មែរ​ពី​លើ​បន្ទាប់​មក​ទើប​សរសេរ​អក្សរ​បរទេស​ខាង​ក្រោម​ទើប​ត្រូវ។

បុគ្គលិកគ្រប់​គ្រង​ម្នាក់​នៅ​កាស៊ីណូ​ស្តារ​វីហ្គាស់​ម្នាក់​បាន​ឲ្យ​ដឹង​ថា កាស៊ីណូ​ស្តារវីហ្គាស់​មាន​ថៅកែ​ជា​សញ្ជាតិ​ថៃ​និង​មាន​ភ្ញៀវ​ជា​ជន​ជាតិ​ថៃ​ឆ្លង​ពី​ប្រទេស​ថៃ​ចូល​ទៅ​លេង​ល្បែង​ច្រើន​ក្នុង​មួយ​ថ្ងៃៗ​ទំនង ជា​ម្ចាស់​កាស៊ីណូ​នេះ ចង់​ទាក់​ទាញ​ភ្ញៀវ​ហើយ ទើប​គាត់​ធ្វើបែបនេះ។

លោក ស៊ី សារួន ប្រធាន​មន្ទីរ​វប្បធម៌​ខេត្ត​បន្ទាយ​មាន​ជ័យ​ថ្លែង​ថា បើ​តាម​ច្បាប់​របស់​ក្រសួង​ស្តីពី​ការ​ផ្សព្វ​ផ្សាយ​លើ​បដា​ឬ​ស្លាក​សញ្ញា​ត្រូវ​ឲ្យ​សរសេរ​អក្សរ​ខ្មែរ​ពី​លើធំៗ ទើប​អាច​សរសេរ​ជា​ភាសា​បរទេស​តូចៗ​ពី​ក្រោម។ តែ​បដា​ជា​ភាសាថៃ​និង ភាសាចិន​ហើយ​គ្មាន​ភាសាខ្មែរ យក​មក​ចង​លើ​ផ្លូវ​សាធារណៈ​គឺ​ខុស​ហើយ។​លោក​ថា ខាង​មន្ទីរ​វប្បធ៌ម​ខេត្ត​មិន​អនុញ្ញាត​ឲ្យ​ធ្វើ​បែប​នេះ​ទេ។​ថៅកែ​កាស៊ី​ណូ​នេះ​មិន​អាច​ទាក់​ទង​បាន​ទេ ពី​ម្សិល​មិញ៕

អត្ថបទគួរចាប់អារម្មណ៍