The Phnom Penh Post Search

Search form

Logo of Phnom Penh Post newspaper Phnom Penh Post - កុមារ​ម្នាក់​របួស​ធ្ងន់​ព្រោះ​តែ​ដំកង់​ដង់​គ្រាប់​បេ​៤០ផ្ទុះ




កុមារ​ម្នាក់​របួស​ធ្ងន់​ព្រោះ​តែ​ដំកង់​ដង់​គ្រាប់​បេ​៤០ផ្ទុះ

កុមារ​ម្នាក់​របួស​ធ្ងន់​ព្រោះ​តែ​ដំកង់​ដង់​គ្រាប់​បេ​៤០ផ្ទុះ

130304_09
គ្រាប់មិនទាន់ផ្ទុះសល់ពីសម័យសង្គ្រាម ដែលសីុម៉ាក់ប្រមូលដោះបាន ម៉ៃ វីរៈ

ព្រះវិហារៈក្មេង​ស្រី​ជា​កូន​អ្នក​ភូមិ​ម្នាក់​បាន​រង​របួស​បែក​គ្រាប់​ភ្នែក​ម្ខាង និង​រង​អំបែង​គ្រាប់​សុស​ដើម​ទ្រូង​ខណៈ​ដែល​នាង​បាន​នាំ​ប្អូន​ស្រី២​នាក់ ​ទៀត​ដើរ​រើស​អេត​ចាយ​ក្នុង​ភូមិ ហើយ​រើស​គ្រាប់​បេ​៤០ មួយ​គ្រាប់​យក​មក​ដំ​ធ្វើ​ឲ្យ​ផ្ទុះ​កាល​ពី​រសៀល​ថ្ងៃ​ទី២ មីនានៅ​ឃុំ​យាង ស្រុក​ជាំ​ក្សាន្ត ខេត្ត​ព្រះ​វិហារ។ ភ្លាមៗ​នោះក្រុម​គ្រួសារ​ដឹក​ទៅ​សង្គ្រោះ​នៅ​មន្ទីរពេទ្យ​ខេត្ត​ព្រះ​វិហារ។

លោក ម៉ៃ ពុធ អធិការ​នគរបាល​រង​ស្រុក​ជាំក្សាន្ត​បាន​ឲ្យ​ដឹង​កាល​ពី​ម្សិលមិញ​ថា ក្មេង​ស្រី​រង​គ្រោះ​ឈ្មោះ ហេង​ស៊ី​នឿន អាយុ​៧ឆ្នាំ រស់​នៅ​ជាមួយ​ម្តាយ​ឈ្មោះ ​ឃុត ហឿត​ អាយុ​៤៥​ឆ្នាំ​នៅ​ភូមិ​រស្មី​ ឃុំ​យាង​ ស្រុក​ជាំក្សាន្ត​ខេត្ត​ព្រះវិហារ បាន​រង​របួស​បែក​គ្រាប់​ភ្នែក​ម្ខាង​និង​ត្រូវ​អំបែង​គ្រាប់​លើ​ដើម​ទ្រូង ជាច្រើន​កន្លែង។

លោក​ថ្លែង​ថា​ ក្មេង​ស្រី​រង​គ្រោះ​នៅថ្ងៃ​កើតហេតុ នៅ​ម៉ោង​ប្រមាណ​ជា​៣​រសៀល បាន​នាំ​ប្អូន​របស់​នាង​២​នាក់​ទៀត ដឹក​ដៃ​គ្នា​ដើរ​រើស​សំបក​កំប៉ុង​ស្រាបៀរ នៅ​ក្នុង​ភូមិ ហើយ​ឃើញ​គ្រាប់​បេ៤០​កប់​ដី​នៅ​ក្បែរ​គល់​ឈើ ដោយ​នឹក​ស្មាន​ថា ជា​កំប៉ុង​ក៏​រត់​ទៅ​រើស​យក​មក​ដំ ខណៈ​ប្អូន​នាង​២​នាក់​ទៀត​នៅ​ឆ្ងាយ​ពី​នាង​ហើយ​ក៏​ផ្ទុះ​កក្រើក​តែ​ម្តង។

លោកបញ្ជាក់​ដែរថា៖ «មិន​មែន​ជា​គ្រាប់​បេ​៤០​ទាំង​មូល​ទេ គឺ​គ្រាន់​តែ​ជា​កង់​ដង់​សម្រាប់​ដាក់​ក្នុង​គ្រាប់​បេ ប៉ុន្តែ​វា​អាច​ផ្ទុះ​បាន​នៅ​ពេល​ណា​រង​នូវ​​ការ​ប៉ះ​ទង្គិច​ឬដំ»។

លោកបន្ត​ឲ្យ​ដឹង​ថា ក្មេង​ស្រី​រងគ្រោះ​ជា​គ្រួសារ​ក្រីក្រ​និង​រងរបួស​ធ្ងន់​ត្រូវ​បាន​អ្នកភូមិ​និង​ម្តាយ​ប្រញាប់​ប្រញាល់​ដឹក​តាម​រ៉ឺម៉ក​ទៅ​សង្គ្រោះ​នៅ​មន្ទីរពេទ្យ​ខេត្ត​ព្រះវិហារ ចំណែក​ប្អូន​នាង​២​នាក់​ទៀត​មិន​រង​របួស​ទេ។

លោកឲ្យដឹង​បន្តថា តំបន់​ដែល​ក្មេង​ស្រី​រង​គ្រោះ​នោះ ​ជា​អតីត​តំបន់​ដែល​កង​ទ័ពជួរ​មុខ យក​ធ្វើ​ជា​ទី​តាំងឆ្លង​កាត់​ទៅ​សមរភូមិ​ប្រយុទ្ធ​ហើយ​គ្រាប់​បេ៤០​ដែល បង្ក​គ្រោះថ្នាក់​នោះ​ជា​សំណល់​ពី​សម័យ​សង្គ្រាម​ក្នុង​សម័យ​រដ្ឋ​កម្ពុជា និង​ឧទ្ទាម​ខ្មែរ​ក្រហម។

មិន​អាច​ទាក់​ទងស្វែងរកព័ត៌មាន​លម្អិត​ពី​មន្ទីរ​ពេទ្យ​ខេត្ត​ព្រះវិហារ​បាន​ទេ​កាល​ពី ម្សិលមិញ។ ម្តាយ​ក្មេង​រង​គ្រោះ​ក៏​មិន​អាច​ទាក់ទង​បាន​ដែរ។

គួររំឭកថា ពី​ខែកុម្ភៈ​ស្រ្តី​មេម៉ាយ សុខ សាវឿន អាយុ​៣៦​ឆ្នាំ មាន​កូន​ពីរ​នាក់ ជា​កម្មករ​ស៊ី​ឈ្នួល​ជម្រះ​ស្មៅ​កៅស៊ូ នៅ​ភូមិ​ជីវ៉ាត់ ឃុំ​ស្រែចារ ស្រុកស្នួល ​ខេត្ត​ក្រចេះ បាន​ជម្រះ​ស្មៅ​ប៉ះ​លើ​គ្រាប់​ផ្លោង​ធុន​៦០​មិលី្លម៉ែត្រ​ផ្ទុះ​ស្លាប់​ចោល កូន​យ៉ាង​អាណោច​អាធ័ម៕

អត្ថបទគួរចាប់អារម្មណ៍