The Phnom Penh Post Search

Search form




Logo of Phnom Penh Post newspaper Phnom Penh Post - កំពូល​ដាក់​ទោស​ឈ្មួញ​ថ្នាំ​ញៀន​ពីរ​នាក់​ក្នុង​ម្នាក់ ៨​ឆ្នាំ




កំពូល​ដាក់​ទោស​ឈ្មួញ​ថ្នាំ​ញៀន​ពីរ​នាក់​ក្នុង​ម្នាក់ ៨​ឆ្នាំ

កំពូល​ដាក់​ទោស​ឈ្មួញ​ថ្នាំ​ញៀន​ពីរ​នាក់​ក្នុង​ម្នាក់ ៨​ឆ្នាំ

20140320_10b
ជនជាប់ចោទពីរនាក់ នៅតុលាការកំពូលម្សិលមិញ គឹម សារុំ

ភ្នំពេញៈ តុលាការ​កំពូល​កាល​ពី​ម្សិលមិញ បាន​បើក​សវនាការ​ជុំនុំ​ជម្រះ លើ​ជន​ជាប់​ចោទ ៣​នាក់ ដែល​ត្រូវ​បាន​តុលាការ​ថ្នាក់​ក្រោម​ផ្តន្ទាទោស​ឲ្យ​ជាប់​ពន្ធនាគារ​ក្នុង​ម្នាក់ៗ ៨​ឆ្នាំ និង​ពិន័យ​ជា​ប្រាក់​សរុប​ចំនួន ១៥ លាន​រៀល ក្រោម​ការ​ចោទ​ប្រកាន់​ពី​បទ​ជួញ​ដូរ​គ្រឿង​ញៀន ៧០០ ក្រាម។

លោក ស្រី ខៀវ សុខា ចៅក្រម​របាយ​ការណ៍​បាន​ថ្លែង​ថា តាម​កំណត់​ហេតុ​បាន​បញ្ជាក់​ថា ជន​ជាប់​ចោទ​ពាក់ព័ន្ធ​ការ​ជួញ​ដូរ​គ្រឿង​ញៀន​ឈ្មោះ សម្បត្តិ តូនី សុភ័ន្ត ហ៊រ និង គៀង ប៊ុណ្ណា ត្រូវ​បាន​នគរបាល​យុត្តិធម៌ ចាប់​ខ្លួន​នៅ​សួនច្បារ នាគ​បាញ់​ទឹក វិមាន​ឯករាជ្យ នៅ​ថ្ងៃ ទី​៤ ខែ​តុលា ឆ្នាំ​២០១០។

កាល​ពី​ថ្ងៃ ទី​២២ ខែ​មិថុនា ឆ្នាំ​២០១១ សាលា​ដំបូង​រាជធានី​បាន​សម្រេច​ផ្តន្ទាទោស​ក្នុង​ម្នាក់ៗ ៨​ឆ្នាំ និង​ពិន័យ​ប្រាក់ ១៥ លាន​រៀល។

សាលា​ឧទ្ធរណ៍​កាល​ពី​ថ្ងៃ ទី​២០ ខែ​មីនា ឆ្នាំ​២០១២ បាន​សម្រេច​តម្កល់​សាលក្រម​របស់​សាលា​ដំបូង។

សម្បត្តិ តូនី អាយុ ២៨​ឆ្នាំ បាន​ប្រាប់​សវនាការ​ថា មុន​ពេល​នគរបាល​ចាប់​ខ្លួន​លោក​បាន​ដើរ​លេង​ជាមួយ​សង្សារ​នៅ​សួនច្បារ នាគ​បាញ់​ទឹក វិមាន​ឯករាជ្យ ស្រាប់​តែ​មាន​នគរបាល​ប្រមាណ ៩​នាក់ កាន់​កាំភ្លើង​មក​ដេញ​ចាប់​លោក និង​មនុស្ស ២​នាក់ ទៀត​ហើយ​បាន​នាំ​ទៅ​សួរ​ចម្លើយ​នៅ​ក្រសួង មហាផ្ទៃ។ នៅ​ពេល​នាំ​ទៅ​ដល់​ក្រសួង មហាផ្ទៃ នគរបាល​បាន​សួរ​លោក​ថា មាន​លុយ​ឬ​អត់ ក្នុង​ន័យ​ថា បើ​មាន​លុយ​បង់​ឲ្យ​គេ គេ​ដោះលែង​វិញ។ ប៉ុន្តែ​លោក​គ្មាន​លុយ​បង់​ឲ្យ​ទេ។ នៅ​ពេល​បន្តិច​ក្រោយ​មក​ក៏​ឃើញ​នគរបាល​នាំ​មនុស្ស ២​នាក់ ទៅ​ទៀត។ «ខ្ញុំ​មិន​ស្គាល់​មនុស្ស ២​នាក់ នោះ​ទេ តែ​ប៉ូលិស​ប្រាប់​ខ្ញុំ​ថា ឲ្យ​ឆ្លើយ​ថា ស្គាល់​ទៅ​ដើម្បី​គេ​ដោះលែង ហើយ​គេ​ឲ្យ​ខ្ញុំ​ផ្តិត​មេដៃ។ នៅ​ពេល​បញ្ជូន​ទៅ​តុលាការ​លើក​ដំបូង​ប៉ូលិស​ក៏​បង្គាប់​ឲ្យ​ខ្ញុំ​ឆ្លើយ​ថា ស្គាល់​បុរស​ទាំង​ពីរ​នាក់​នោះ​ដែរ ព្រោះ​គេ​ថា ដើម្បី​ឲ្យ​តុលាការ​ជួយ​បន្ថយ​ទោស»។

ចំណែក គៀង ប៊ុណ្ណា ជន​ជាប់​ចោទ​ម្នាក់​ទៀត​ក៏​បាន​ឆ្លើយ​នៅ​ក្នុង​សវនាការ​ដែរ​ថា លោក​ជា​ពិធីករ​នៅ​ទូរទស្សន៍​ប៉ុស្តិ៍​លេខ ៩ ហើយ​ឈ្មោះ សុភ័ន្ត ហ៊រ ជា​មិត្ត​រួម​ការងារ​បាន​ទូរស័ព្ទ​ហៅ​ឲ្យ​ជូន​ទៅ​កន្លែង​មួយ ហើយ​ក៏​ត្រូវ​ប៉ូលិស​ចាប់​ខ្លួន​តែ​ម្តង ហើយ​លោក​ក៏​មិន​បាន​ស្គាល់​អ្នក​ផ្សេង​ទៀត​ដែរ។ «ពេល​ជំនុំ​ជម្រះ​ក្តី​ខ្ញុំ តុលាការ​មិន​បាន​យក​វត្ថុតាង​គ្រឿង​ញៀន​មក​បង្ហាញ​ទេ។ យុត្តិធម៌​មិន​ដឹង​ថា មាន​ឬ​អត់​ទេ ក្នុង​លោក​នេះ»។

លោក នូ ចន្ថា មេធាវី​ការពារ​ក្តី​ឲ្យ​ជន​ជាប់​ចោទ​ទាំង ២​នាក់ បាន​និយាយ​ថា ឆ្លង​តាម​របាយ​ការណ៍​និង​ស្តាប់​កូន​ក្តី​របស់​លោក​រៀបរាប់​ឃើញ​ថា កូន​ក្តី​របស់​លោក​បាន​ឆ្លើយ​បដិសេធ​គ្រប់​ដំណាក់កាល​ជំនុំ​ជម្រះ​និង​ដោយ​អវត្តមាន​ជន​ជាប់​ចោទ​ម្នាក់​ទៀត​ដែល​ជា​អ្នក​ប្រើ​ប្រាស់​ថ្នាំ​ញៀន ដូច្នេះ​ស្ថានភាព​ពិត​មិន​បាន​បង្ហាញ​ច្បាស់​ក្នុង​អង្គ​សវនាការ​ទេ។

លោក​មេធាវី​បន្ត​ថា ជន​ជាប់​ចោទ​ឈ្មោះ សុភ័ន្ត ហ៊រ បាន​ឆ្លើយ​មុខ​សមត្ថកិច្ច​ថា ខ្លួន​ប្រើ​ប្រាស់​ថ្នាំ​ញៀន និង​បាន​កាន់​កញ្ចប់​ពណ៌​ខ្មៅ ហើយ​បាន​ហៅ​កូន​ក្តី​របស់​លោក​ឈ្មោះ គៀង ប៊ុណ្ណា ចេញ​ពី​ក្នុង​ឡាន​រួច​សមត្ថកិច្ច​ចាប់​ខ្លួន​ទាំង ២​នាក់ តែ​ម្តង។ «ប៉ូលិស​បោក​បញ្ឆោត​យក​ចម្លើយ និង​បាន​បង្ខំ​ឲ្យ​កូន​ក្តី​ខ្ញុំ​ផ្តិត​មេដៃ។

រាល់​របាយ​ការណ៍​របស់​ប៉ូលិស​តុលាការ​យក​ជា​ការ ប៉ុន្តែ​មិន​ឃើញ​តុលាការ​យក​កំហុស​ប៉ូលិស​ម្តង​ណា​ទេ»។ លោក​មេធាវី​បាន​ស្នើ​ឲ្យ​តុលាការ​កំពូល​ពិចារណា និង​បង្វិល​សំណុំ​រឿង​នេះ​ទៅ​ឧទ្ធរណ៍​វិញ។ សាល​ដីកា​នេះ​នឹង​ត្រូវ​លើក​ទៅ​ប្រកាស​នៅ​ថ្ងៃ ទី​២៦ ខែ​មីនា៕

អត្ថបទគួរចាប់អារម្មណ៍