The Phnom Penh Post Search

Search form




Logo of Phnom Penh Post newspaper Phnom Penh Post - ក្មេង​ក្នុង​គ្រួសារ​ក្រីក្រ នៅ​កោះ​ញែក​ពុល​ដំឡូង​មី​ស្លាប់​ម្នាក់




ក្មេង​ក្នុង​គ្រួសារ​ក្រីក្រ នៅ​កោះ​ញែក​ពុល​ដំឡូង​មី​ស្លាប់​ម្នាក់

ក្មេង​ក្នុង​គ្រួសារ​ក្រីក្រ នៅ​កោះ​ញែក​ពុល​ដំឡូង​មី​ស្លាប់​ម្នាក់

មណ្ឌលគិរីៈ ក្មេង​ប្រុស​ស្រី​២​នាក់​បងប្អូន​ក្នុង​គ្រួសារ​ក្រីក្រ​មួយ​រស់​នៅ​ក្នុង​ឃុំ​ស្រែ​សង្គម ខេត្ត​មណ្ឌល​គិរី បាន​ពុល​ដំឡូង​មី​ស្លាប់​ម្នាក់​និង​ម្នាក់​ទៀត​ត្រូវ​បាន​ពេទ្យ​ជួយ​សង្គ្រោះ​ទាន់ កាល​ពី​ថ្ងៃ​អាទិត្យ។

លោក យ៉ម ហ៊ុនអេង មេប៉ុស្តិ៍​នគរបាល​ឃុំស្រែ​សង្គម​បាន​ឲ្យ​ដឹង​ថា កុមារី តឿ លា អាយុ​១០​ឆ្នាំ​បាន​ពុល​ស្លាប់ និង​បង​ប្រុស​នាង តឿ វាសនា អាយុ​១៣​ឆ្នាំ ត្រូវ​គ្រូ​ពេទ្យ​ជួយ​សង្គ្រោះ​បាន​ទាន់​ពេល កាល​ពីថ្ងៃ​ទី ៤ វិច្ឆិកា បន្ទាប់​ពី​ក្មេង​ទាំងពីរ​នាក់​នាំ​គ្នា​ហូប​ដំឡូង​មី​ដែល​រើស​ពី​ជាយ​ព្រៃ​ខណៈ​ឃើញ​ជ្រូក​ព្រៃ​ឈ្មុស​ចោល។

លោកថា ក្មេង​រងគ្រោះ​មាន​បង​ប្អូន​៦នាក់ មាន​ម្តាយ​ឈ្មោះ ឈួយ សូ អាយុ​៤៥​ឆ្នាំ និង​ឪពុក​ឈ្មោះ ចេវ តឿ អាយុ​៤៩​ឆ្នាំ ជា​គ្រួសារ​ក្រីក្រ​ជួប​ភាព​អត់​ឃ្លាន រស់​នៅ​ក្នុង​ភូមិ​ចំរើន ឃុំ​ស្រែ​សង្គម ស្រុក​កោះ​ញែក។

លោក​បន្ត​ថា ការ​ពុល​រហូត​ដល់​ស្លាប់​កូន​នេះ គឺ​បណ្តាល​ពី​ឪពុក​ម្តាយ​មិន​យក​ចិត្ត​ទុក​ដាក់​នឹង​អាការ​កូន​ទាំង​២​នាក់ ដែល​បាន​ហូប​ដំឡូង​តាំង​ពី​រសៀល​ថ្ងៃ​ទី៣ វិច្ឆិកា រហូត​ដល់​រំលង​អ្រធាត្រ​ឆ្លង​ថ្ងៃ ទាល់​តែ​អ្នក​ជិត​ខាង​ឆោឡោ​ឃើញ​សភាព​កាន់​តែ​ធ្ងន់ធ្ងរ​មាន​បែក​ពពុះ​មាត់​លែង​ដឹង​ខ្លួន ទើប​នាំ​គ្នា​បញ្ជូន​ទៅ​មណ្ឌល​សុខភាព​ដើម្បី​រក​ការ​សង្គ្រោះ។

លោក​បញ្ជាក់​ថា៖​«កុមារី​ជា​ប្អូន​មិន​សម​នឹង​ស្លាប់​ទេ​ព្រោះ​គេ​ហូប​ដំឡូង​ជាង​១០​ម៉ោង​ទើប​ក្អួត​ចង្អោរ ប៉ុន្តែ ម្តាយ​ឪពុក​មិន​យក​ចិត្ត​ទុក​ដាក់ ព្រោះ​ពួកគេ​ក៏​ផឹក​ស្រា​ស្រវឹង​ដែរ»។

លោក​បាន​ប្រាប់​ថា មើម​ដំឡូង​ដែល​ក្មេង​រងគ្រោះ​ស្ងោរ​ហូប​នោះ​វាដុះ​នៅ​ជាយ​ព្រៃ​ដែល​គេ​ដាំ​ចោល មាន​មើម​ប៉ុនៗ​មេ​ជើង​ហើយ​ត្រូវ​សត្វ​ជ្រូក​ព្រៃ​ឈ្មុស​ចោល និង​ត្រូវ​ក្មេងៗ​ទាំង​ពីរ​នាក់​រើស​យក​មក​ស្ងោរ​ហូប។

លោក ម៉ៃ សាវុធ អធិការ​នគរបាល​ស្រុក​កោះ​ញែក​បាន​ប្រាប់​ឲ្យ​ដឹង​ដែរ​ថា គ្រួសារ​ក្មេង​រងគ្រោះ​ទាំង​២ ជា​គ្រួសារ​ក្រីក្រ​រស់នៅ​ខ្ទម​ចាំ​ចម្ការ​ឆ្ងាយ​ពី​ភូមិ។ លោក​ថា៖«បើ​កុំតែ​យឺត​ពេល​ពេក ម្ល៉េះ​គ្រូពេទ្យ​ជួយ​សង្គ្រោះ​ពួកគេ​ផុត​ពី​គ្រោះ​ថ្នាក់​ដល់​ជីវិត​បាន»។

លោកបន្ត​ថា ក្មេង​ប្រុស​ជា​បង​ត្រូវ​អ្នក​ភូមិ​នាំ​ទៅ​ពេទ្យ​ឯកជន​ក្នុង​ភូមិ​សង្គ្រោះ​ទាន់​ពេល​ឯក្មេង​ស្រី​ដោយ​អាការ​ធ្ងន់ធ្ងរ​ពេក ពេទ្យ​ឯកជន​មិន​ហ៊ាន​ទទួល​ព្យាបាល រួច​បញ្ជូន​បន្ត​ទៅ​មន្ទីរ​ពេទ្យ​បង្អែក​ស្រុក​កោះ​ញែក ក៏​ដាច់​ខ្យល់​ស្លាប់​តាម​ផ្លូវ»៕

អត្ថបទគួរចាប់អារម្មណ៍