The Phnom Penh Post Search

Search form

Logo of Phnom Penh Post newspaper Phnom Penh Post - ក្មេង​ឃ្វាល​គោ​នាំ​គ្នា​រើស​ប៉ឺតប៉ោង​រសាត់​ពី​ទឹក​ដី​ថៃ នៅ​គោក​មន ផ្ទុះ​របួស​២​នាក់




ក្មេង​ឃ្វាល​គោ​នាំ​គ្នា​រើស​ប៉ឺតប៉ោង​រសាត់​ពី​ទឹក​ដី​ថៃ នៅ​គោក​មន ផ្ទុះ​របួស​២​នាក់

ក្មេង​ឃ្វាល​គោ​នាំ​គ្នា​រើស​ប៉ឺតប៉ោង​រសាត់​ពី​ទឹក​ដី​ថៃ នៅ​គោក​មន ផ្ទុះ​របួស​២​នាក់

130312_10
ប៉ឺតប៉ោង ដែលរសាត់មកពីទឹកដីថៃ ក្មេងៗនៅគោកមន រើសលេងផ្ទុះរបួស២នាក់(រូបតូច) ន ប.ជ ក

ឧត្តរមានជ័យៈ ក្មេង​ប្រុស​២​នាក់​ក្នុង​ចំណោម​៣​នាក់​ បាន​ឆេះ​រលាក​រោល​ពេញ​ខ្លួន ដោយសារ​តែ​បាន​រើស​ប៉ឺតប៉ោង​បង្ហោះ​មក​ពី​ស្រុក​ថៃ ពេល​ទៅ​ឃ្វាល​គោ​នៅ​វាល​ស្រែ កាល​ពីថ្ងៃ​សៅរ៍ នៅ​ភូមិ​ព្រៃវែង ​ស្រុក​បន្ទាយ​អម្ពិល ខេត្ត​ឧត្តរ​មាន​ជ័យ។

លោក ឃុល ភិន អធិការ​រង​នគរបាល​ស្រុក​បន្ទាយ​អម្ពិល​ឲ្យ​ដឹង​ពី​ម្សិល​មិញ​ថា ក្មេង​ប្រុស​២​នាក់​ក្នុង​គ្នីគ្នា​៣​នាក់​បាន​រងរបួស​រលាក​រោល​ពេញ​ខ្លួន ក្បាល​និង​ជើង ពេល​ពួកគេ​នាំគ្នា​ដណ្តើម​ប៉ឺតប៉ោង​ដែល​ហោះ​ធ្លាក់​មក​ពី​ដី ប្រមាណ​ជិត​មួយ​រយ​ប៉ឺតប៉ោង​ហើយ​ក៏​ផ្ទុះ​ចេញ​ជាផ្កា​ភ្លើង។

លោក ថ្លែងថា៖ «ខ្ញុំ​មិន​ទាន់​ដឹងថា ក្នុង​ប៉ឺតប៉ោង​នោះ​មាន​ផ្ទុក​សារ​ធាតុ​អ្វី​ទេ ​ទើប​បណ្តាល​ឲ្យ​ក្មេងៗ​រលាក​ខ្លោច​និង​របក​ស្បែក​កំពុង​ទទួល​ការ​ព្យាបាល នៅ​មន្ទីរ​ពេទ្យ​បង្អែក​ខេត្ត​បែប​នេះ»។

លោកប្រាប់ថា ក្មេង​ប្រុស​រងគ្រោះ​មានឈ្មោះ ថេត ​សាប់ អាយុ​១២ឆ្នាំ ម្នាក់​ទៀត​ឈ្មោះ យ៉ាក់​សំរិទ្ធ អាយុ​១០ឆ្នាំ ពួកគេ​រស់​នៅ​ភូមិ​ព្រៃវែង ឃុំ​គោក​មន ​ស្រុក​បន្ទាយ​អម្ពិល។

ឪពុកម្តាយដែលនាំ​កូន​ទៅ​មន្ទីរ​ពេទ្យ​បង្អែក​បាន​និយាយ​ថា មុន​ពេល​កើត​ហេតុ​ពេល​រសៀល​ម៉ោង៣ ក្មេងៗ​បាន​ឃ្វាល​គោ​នៅ​វាល​ស្រែ​ហើយ​បាន​ឃើញ​ប៉ឺតប៉ោង​២​ចង្កោម​រសាត់​តាម​ខ្យល់​ហោះ​ពី​ទិស​ប្រទេស​​ថៃ​មក​ពួកគេ​ទាំង​៣នាក់​​បាន​រត់​តាម​រហូត​ប៉ឺតប៉ោង​នោះធ្លាក់​មក​ក្រោម​ទើរ​នៅ​ចុង​ឈើ ក៏​នាំ​គ្នា​ឡើង​យក។

តាម​សម្តី​ឪម៉ែ​ប្រាប់​ប៉ូលិស​​ថា ពេ​ល​ពួកគេ​យក​ប៉ឺត​ប៉ោង​ដល់​ដី​ឃើញ​មាន​ប៉ឺតប៉ោង​មួយ​ចង្កោម​មាន​ជិត​១០០ ប៉ឺត​ប៉ោង ហើយ​មួយ​ចង្កោម​ទៀត​តិច​ជាង​ ដោយ​មាន​ចង​ផ្ទាំង​ក្រណាត់​ជាប​ដា​ពណ៌​ទឹកប៊ិក ទំហំ​០,៨០​ម៉ែត្រ​គុណនឹង​២​ម៉ែត្រ​សរសេរ​ជា​អក្សរ​ថៃ ​ថា​យើង​រួម​គ្នាកម្ចាត់​គ្រឿង​ញៀន...។ ក្មេងៗ​រង​គ្រោះ​បាន​ដណ្តើម​គ្នា​យក​ប៉ឺតប៉ោង​នោះ ស្រាប់​តែ​ប៉ឺត​ប៉ោង​បែក​បន្ត​ៗ​គ្នា​និងមាន​ចេញ​ជា​ផ្កា​ភ្លើង​បណ្តាល​ឲ្យ ក្មេង​២នាក់​របួស​ដៃ ផ្ទៃ​មុខ​ដង​ខ្លួន​និង​ជើង ​រីឯ​ម្នាក់​ទៀត​មិន​ត្រូវរបួស​ បាន​រត់​មក​ប្រាប់​ចាស់ៗ​ក្នុង​ភូមិ។

លោក ​អធិការឲ្យដឹង​ថា ក្រោយ​កើត​ហេតុ​សមត្ថកិច្ច​លោក​បាន​ចុះទៅ​ដល់​កន្លែង​និង​បាន​ប្រមូល​យក ប៉ឺតប៉ោង​នៅ​សេសសល់​មិន​ទាន់​ផ្ទុះ​មក​រក្សា​ទុក នៅ​អធិការ​ដ្ឋាន​ស្រុក​បន្ទាយ​អម្ពិល​ដើម្បី​ឲ្យ​ខាង​ជំនាញ​ពិនិត្យ​ស្រាវ​ជ្រាវ​បន្ត។ ព្រោះ​មូល​ហេតុ​ពិត​នៃ​ការ​ផ្ទុះ​នោះ ក៏​មិន​ដឹង​ថា ក្នុង​ប៉ឺត​ប៉ោង​មាន​ផ្ទុក​សារ​ធាតុ​អ្វីខ្លះទេ ហើយ​ប្រសិន​ជា​ប៉ឺតប៉ោង​ធម្មតា​ហេតុអី​ក៏​មាន​កម្លាំង​ផ្ទុះបែប​នេះ។ ចំពោះ​ផ្ទាំង​ក្រណាត់​ដែល​មាន​ចង​ភ្ជាប់​នឹង​ប៉ឺតប៉ោង​២ចង្កោម​នោះ ទំនង​ជា​គេធ្វើ​កម្មវិធី​អ្វី​មួយ​នៅក្នុង​ស្រុក​ថៃ​ហើយ​ចង​ភ្ជាប់​នឹង​ប៉ឺតប៉ោង​បង្ហោះ ក៏​រសាត់​មក​ដី​ខ្មែរ។

លោកប្រាប់ថា ក្មេង​រងគ្រោះ​ទាំង២នាក់ កំពុង​នៅ​ព្យាបាល​ក្នុង​មន្ទីរពេទ្យ​បង្អែក​ខេត្ត​នៅ​ឡើយ​ ប៉ុន្តែ ស្ថាន​ភាព​របួស​មិន​ធ្ងន់ធ្ងរ​ដល់​ពិការ​ទេ ប៉ុន្តែថា វា​ជា​ហេតុការណ៍​កម្រ​នឹង​ជួប​ណាស់៕

អត្ថបទគួរចាប់អារម្មណ៍