កណ្តាលៈ ក្រុមមន្រ្តីសុខាភិបាលបាននិយាយ កាលពីថ្ងៃម្សិលមិញថា ក្មេងពីរនាក់បានកើតជំងឺផ្តាសាយបក្សី H5N1 ហើយបច្ចុប្បន្ននេះ កំពុងស្ថិតនៅក្រោមការព្យាបាលនៅឯមន្ទីរពេទ្យ គន្ធបុប្ផា នៅភ្នំពេញ និងខេត្ត សៀមរាប។
លោកវេជ្ជបណ្ឌិត សុខ ទូច ប្រធាន នាយកដ្ឋានគ្រប់គ្រងជំងឺឆ្លងនៅក្រសួងសុខាភិបាល បានប្រាប់កាសែតភ្នំពេញ ប៉ុស្តិ៍ ថា ក្មេងពីរនាក់ ត្រូវបានគេបញ្ជាក់ថាមានមេរោគ H5N1 នេះ គឺក្មេងប្រុសវ័យ ៤ ឆ្នាំម្នាក់នៅខេត្ត សៀមរាប និងក្មេងស្រីម្នាក់ទៀតវ័យ ៥ ឆ្នាំនៅខេត្ត កណ្តាល។ លោកបន្តថា ៖ «បច្ចុប្បន្ននេះ ពួកគេកំពុងសម្រាកព្យាបាលនៅមន្ទីរពេទ្យ គន្ធបុប្ជា ខេត្ត សៀមរាប និងនៅមន្ទីរពេទ្យភ្នំពេញ ហើយយើងនឹងចេញព័ត៌មាននេះនៅថ្ងៃស្អែក»។
លោក ទីន ពិសិទ្ធ អនុប្រធានមន្ទីរពេទ្យខេត្ត កណ្តាល បាននិយាយកាលពីថ្ងៃម្សិលមិញថា ក្មេងស្រីឈ្មោះ ហាក់ គឹមឡុង បានធ្លាក់ខ្លួនឈឺចាប់តាំងពីដើមខែនេះ ប៉ុន្តែម្តាយរបស់នាង បានព្យាបាលនាងនៅក្នុងភូមិ។ លោក បានថ្លែងបន្តថា៖ «មុនពេលបញ្ជូននាងទៅមន្ទីរពេទ្យ គន្ធបុប្ផា ម្តាយរបស់នាងបានព្យាបាលនាងជាមួយនឹងក្រុមគ្រូពេទ្យនៅមូលដ្ឋាន ប៉ុន្តែនាង មិនបានធូរទេ»។ លោក ទីន ពិសិទ្ធ បានថ្លែងថា ក្រុមមន្រ្តីសុខាភិបាលបានចុះទៅបូមឈាមអ្នកភូមិ ដែលបានប៉ះពាល់ក្មេងស្រីនោះដើម្បីធ្វើតេស្តក្រែងលោ ពួកគេ ឆ្លងមេរោគនេះ។
លោក ពិសិទ្ធ បានថ្លែងបន្តថា៖ «ក្រុមមន្រ្តីសុខាភិបាលបានបូមឈាមពីមនុស្សប្រមាណ ៣០ នាក់យកទៅពិនិត្យ»។ លោកបានបដិសេធមិនធ្វើអត្ថាធិប្បាយបន្ថែមទេ ហើយបានបង្វែរសំណួរនេះទៅលោកវេជ្ជបណ្ឌិត លី សុវណ្ណ អនុប្រធាននាយកដ្ឋានគ្រប់គ្រងជំងឺឆ្លង ដែលមិនអាចទាក់ទងបានកាលពីថ្ងៃម្សិលមិញ។
នេះជាករណីលើកទី ១៦ ហើយនៅឆ្នាំនេះ ហើយក្មេងទាំងពីរនាក់នេះ ជាមនុស្សទី៣៦ និង ៣៧ ដែលបានឆ្លងមេរោគ H5N1 នៅប្រទេសកម្ពុជា៕ NR
