The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​មហា​ផ្ទៃ​ចុះ​អង្កេត​ករណី​ស្ត្រី​បារាំង​ស្លាប់​នៅ​កំពត




ក្រសួង​មហា​ផ្ទៃ​ចុះ​អង្កេត​ករណី​ស្ត្រី​បារាំង​ស្លាប់​នៅ​កំពត

ក្រសួង​មហា​ផ្ទៃ​ចុះ​អង្កេត​ករណី​ស្ត្រី​បារាំង​ស្លាប់​នៅ​កំពត

កំពតៈ សពស្រ្តី​ទេសចរ​ជាតិ​បារាំង​ដែល​គេ​ប្រទះ​ឃើញ​ស្លាប់​អណ្តែត​ទឹក​កាល​ពី ថ្ងៃ​អាទិត្យ​ទាំង​អាក្រាត​កាយ​ហើយ​សមត្ថកិច្ច​សង្ស័យ​ថា អាច​ជា​ករណី​ឃាតកម្ម​នោះ ត្រូវ​ក្រសួង​មហាផ្ទៃ​បញ្ជូន ផ្នែក​ជំនាញ​នៃ​នាយក​ដ្ឋាន​ព្រហ្មទណ្ឌ​កម្រិត​ធ្ងន់ និង​នគរបាល​ជំនាញ​ខេត្ត​កំពត ចុះ​ទៅ​ស្រាវ​ជ្រាវ​កាល​ពី​ម្សិល​មិញ។

លោក អ៊ិន បូរ៉ា ប្រធាន​នាយកដ្ឋាន​ព្រហ្ម​ទណ្ឌ​ក្រសួង​មហា​ផ្ទៃ​ឲ្យ​ដឹង​ពី​ម្សិល​មិញ​ថា ករណី​ស្រ្តី​ជាតិ​បារាំង​ស្លាប់​នៅ​ខេត្ត​កំពត​នោះ​លោក​បង្កើត គណៈកម្មការ​មួយ​ដើម្បី​ស្រាវជ្រាវ​ស៊ើប​អង្កេត​ដោយ​មួយ​ផ្នែក​ទៅ​មន្ទីរ​ពេទ្យ​កាល់ម៉ែត​ទី​តម្កល់​សព​ស្រ្តី​បារាំង ដើម្បី​ធ្វើ​កោសល្យវិច័យ​និង​មួយ​ផ្នែក​ទៀត​ចុះទៅ​ខេត្ត​កំពត​ស្រាវជ្រាវ​រក​ទី​តាំង​ស្លាប់​របស់​ស្រ្តី​រង​គ្រោះ។

លោកបន្តថា៖​«ខ្ញុំ​មិន​អាច​ប្រាប់​ពី​លទ្ធផល​នៃ​ការ​ស៊ើប​អង្កេត​នេះ​បាន​ទេ​ខណៈ​កម្លាំង​យើង​កំពុង​ធ្វើការ​នៅឡើយ»។

លោក អ៊ិន ជីវ៉ា ស្នង​ការ​រង​ខេត្ត​កំពត​ថ្លែង​ថា ដោយ​មាន​អន្តរាគមន៍​ពី​កម្លាំង​ខាង​នាយក​ដ្ឋាន​ព្រហ្មទណ្ឌ​ក្រសួង​ផង​នោះ កម្លាំង​នគរបាល​យើង​បាន​ប្រញាប់​ប្រញាល់​បើក​ការ​អង្កេត​បន្ទាន់ នៅ​ទីតាំង​សង្ស័យ​ថា ជា​កន្លែង​កើត​ហេតុ។

លោកប្រាប់​ថា យើង​បាន​បែង​ចែក​កម្លាំង​ជា​៤​មុខ​ព្រួញ​ដើម្បី​រុករក​ទីតាំង​ដែល​សង្ស័យ​នៅ​តាម​មាត់​ព្រែក​ដែល​សព​អណ្តែត។

លោកបន្ត​ថា៖ «ទឹក​ព្រែក ជា​ដៃ​សមុទ្រ ជោរ​នាច​បែប​នេះ យើង​ពិបាក​កំណត់​ទីតាំង​ណាស់ មិន​ដឹង​ថា​សព​ស្រ្តី​រងគ្រោះ​អណ្តែត​ចេញ​មក​ពី​ប្រភព​ណា​ទេ»។

លោក ស្នងការ​រង​ឲ្យ​ដឹង​ថា សព​ស្រ្តី​ជាតិ​បារាំង​ដែល​តម្កល់​នៅ​មន្ទីរ​ពេទ្យ​កាល់​ម៉ែត​នៅ​ភ្នំពេញ ខាង​ជំនាញ ក៏​បាន​ធ្វើ​កោសល្យ​វិច័យ​ដំណាល​គ្នា​ដែរ តែ​ទោះជា​យ៉ាង​ណា​សមត្ថកិច្ច​ដាក់​ការ​សង្ស័យ​ទៅលើ​ឃាតកម្មដែរ បន្ទាប់​ពី​រក​ឃើញ​សាកសព​ពីថ្ងៃ​អាទិត្យ។

បើតាម​សមត្ថកិច្ចចុះ​ពិនិត្យ​ថា ​សាកសព​មាន​ស្នាម​រយះ​លលាដ៍​ក្បាល​ធ្លាយ​ចេញ​ខួរ​និង​សន្និដ្ឋាន​ថាជា​ ករណី​ឃាតកម្ម បន្ទាប់​ពី​ឃើញ​អណ្តែត​នៅ​ចំណុច​ព្រែក​កំពង់​បាយ ភូមិ​តាអង់ សង្កាត់​ត្រើយ​កោះ ​ក្រុង​កំពត។

ស្រ្តីរងគ្រោះឈ្មោះ Ophelie ជា​ទេសចរ​ជន​ជាតិ​បារាំង ត្រូវ​គេប្រទះ​ឃើញ​ស្លាប់​អណ្តែត​ទឹក​ព្រែក នៅ​ក្នុង​ក្រុង​កំពត​នេះ កាល​ពី​ថ្ងៃ​អាទិត្យ។ Ophelie និង​មិត្តភក្តិ​នាង​បាន​ចូល​ស្នាក់​នៅផ្ទះ​សំណាក់ Les Manguiers នៅ​ក្រុង​កំពត ពី​ថ្ងៃ​ទី៤​កុម្ភៈ ក្នុង​ឋានៈ​ជា​ភ្ញៀវ​ទេសចរ និង​ត្រូវ​ចាក​ចេញ​វិញ នៅ​ថ្ងៃអាទិត្យ។​

អ្នកស្រី ទូច សំភា​អ្នក​គ្រប់​គ្រង​ផ្ទះ​សំណាក់​ប្រាប់​ថា នៅ​ល្ងាច​ថ្ងៃ​សៅរ៍​ម៉ោង​ប្រមាណ​ជិត​៥​ល្ងាច​នាង Ophelie អាយុ​២៥​ឆ្នាំ​បាន​យក​កង់​មួយ​ជិះ​ចេញ​ទៅតែ​ម្នាក់​ឯង​បាត់​រហូត។ មិត្តភក្តិ​នាង​និង​បុគ្គលិក​ផ្ទះ​សំណាក់​បាន​រាយការណ៍​ទៅប៉ូលិស ពី​ការ​បាត់​ខ្លួន​នាង​នៅ​ម៉ោង​៩​ព្រឹក​ថ្ងៃ​អាទិត្យ​ហើយ​បាន​នាំ​គ្នា​ដើរ ​រក​ពេញ​ក្រុង​និងជិះ​ទូក​ស្វែង​រក​ផង ទាល់​តែ​គេ​ប្រ​ទះ​ឃើញ​សាក​សព៕

អត្ថបទគួរចាប់អារម្មណ៍