The Phnom Penh Post Search

Search form




Logo of Phnom Penh Post newspaper Phnom Penh Post - ក្រឡាប់​រថយន្ត​ឈ្នួល​នៅ​ស្ទឹងត្រែង​របួស​៣៥​នាក់




ក្រឡាប់​រថយន្ត​ឈ្នួល​នៅ​ស្ទឹងត្រែង​របួស​៣៥​នាក់

ក្រឡាប់​រថយន្ត​ឈ្នួល​នៅ​ស្ទឹងត្រែង​របួស​៣៥​នាក់

ស្ទឹងត្រែងៈ អ្នក​ដំណើរ និង​អ្នក​បើកបរ​រថយន្ត​៣​នាក់ របួស​ធ្ងន់​និង​៣២​នាក់​ទៀត​រង​របួស​ស្រាល​ក្នុង​គ្រោះថ្នាក់​ចរាចរណ៍ ផ្ទុះ​កង់​រថយន្ត​សាំយ៉ុង​ដែល​ផ្ទុក​មនុស្ស​ពេញ​និង​កំពុង​ពេញ​ល្បឿន​នៅ​លើ​ផ្លូវ​កោង​បណ្តាល​ឲ្យ​រេ​ចង្កូត​ក្រឡាប់​ធ្លាក់​ប្រឡាយ ក្នុង​ភូមិ​ច្រប់​ ឃុំក្បាល​រមាស​ក្នុង​ខេត្ត​ស្ទឹងត្រែង កាលពី​ថ្ងៃទី​២៧ ខែ​មករា កន្លង​ទៅ។

លោក ប៉េង សុវណ្ណ​រ័ត្ន អធិការ​រង​ស្រុក​សេសាន​បាន​ឲ្យ​ដឹង​ថា រថយន្ត​បង្ក​ម៉ាក​សាំយ៉ុង​គ្មាន​ស្លាក​លេខ ត្រូវ​ក្រឡាប់​ធ្លាក់​ផ្លូវ​ចូល​ទៅ​ក្នុង​ប្រឡាយ​ទឹក ខណៈ​អ្នក​បើកបរ​រថយន្ត​ដឹក​អ្នក​ដំណើរ​នោះ បើកបរ​ក្នុង​ល្បឿន​លឿន​នៅ​លើ​ផ្លូវ​កោង ហើយ​ផ្ទុះ​កង់​មិន​អាច​ទប់ ហ្វ្រាំង​ក្នុង​ស្ថានភាព​ប្រថុច​ញ៉ុច​នោះ។

លោក​បន្ត​ឲ្យ​ដឹង​ថា ​អ្នក​ជិះក្នុង​រថយន្ត​មាន​ទាំងអស់​៣៥​នាក់​ រួម​នឹង​ជន​ជាតិ​បារាំង​ម្នាក់​ផង​ ​ក្នុង​នោះ​មាន​ស្រី​១២​នាក់ បាន​រង​របួស​ទាំងអស់។ រថយន្ត​នោះ​បាន​ដឹក​អ្នក​ដំណើរ​ពីភ្នំ​ពេញ​ឆ្ពោះ​ទៅ​ខេត្ត​រតនគិរី​ ពេល​មក​ដល់​ចំណុច​កើត​ហេតុក្នុងភូមិ​ច្រប់​ ឃុំ​ក្បាល​រមាស ស្រុក​សេសាន ខេត្ដ​ស្ទឹងត្រែង ​នៅ​ម៉ោង​១២​កន្លះ​ថ្ងៃ​ត្រង់ ថ្ងៃ​ទី២៧ ខែ​មករា ក៏​បាន​ជួប​គ្រោះ​ថ្នាក់​ផ្ទុះ​កង់​ក្រឡាប់​តែ​ម្តង ហើយ​ដែល​ភ្លាមៗ​នោះ អ្នក​របួស​ធ្ងន់​៣នាក់​ត្រូវ​បញ្ជូន​ទៅ​សង្គ្រោះ​នៅ​មន្ទីរ​ពេទ្យ​ខេត្ត​ស្ទឹងត្រែង។

លោក​ប្រាប់​ថា៖​«គ្រោះថ្នាក់​ចរាចរណ៍​នេះ​ជា​ការ​ឆ្វេស​ប្រហែស​របស់​អ្នក​បើកបរ​ដោយ​បើក​ក្នុង​ល្បឿន​លឿន​នៅលើ​ផ្លូវ​កោង»។

លោក ​ណៅ ​វន្នី​ នាយរង​នគរបាល​ចរាចរ​ផ្លូវ​គោក​ខេត្ត​ថ្លែង​ថា រថយន្ត​បង្ក​បាន​ផ្ទុះ​កង់​ក្រោយ​ខាង​ស្តាំ ខណៈ​រថយន្ត​នោះ​មាន​ល្បឿន​លឿន ហើយ​ស្ថិត​ក្នុង​ស្ថានភាព​ផ្លូវ​កោង​ទៀត ទើប​បណ្តាល​ឲ្យ​ក្រឡាប់​ធ្លាក់​ពី​លើ​ថ្នល់​ចូល​ក្នុង​ប្រឡាយ​ទឹក និង​ខ្ទាត​មនុស្ស​​ចេញ​រដូក​រណែល​ពេញ​ដី។

លោក​ថ្លែង​បន្ត​ថា ក្នុង​ឧប្បត្តិ​ហេតុ​នោះ​មាន​បុរស​៣នាក់​រង​របួស​ធ្ងន់ ដោយ​ម្នាក់​ត្រូវ​រថយន្ត​សង្គ្រោះ​ស្នង​ការ​ខេត្ត​ស្ទឹងត្រែង ដឹក​ទៅ​សង្គ្រោះ​បន្ទាន់​នៅ​មន្ទីរ​ពេទ្យ​ខេត្ត និង​ម្នាក់​ទៀត​ត្រូវ​សាច់​ញាតិ​យក​រថយន្ត​ផ្ទាល់​ខ្លួន​ដឹក​មក​សង្គ្រោះ​ដែរ និង​អ្នក​របួស​ម្នាក់​ទៀត​ត្រូវ​គេ​បញ្ជូន​មក​ទីក្រុង​ភ្នំពេញ។

លោក ប្រាប់​ថា​៖​ «ខ្ញុំ​មិន​បាន​ឃើញ​ផ្ទាល់​ទេ តែ​គេ​ប្រាប់​ខ្ញុំ​ថា អ្នក​បើករ​រថយន្ត​បាន​រង​របួស​បាក់​ឆ្អឹង​ថ្គាម​ធ្ងន់ធ្ងរ ហើយ​ត្រូវ​គេ​បញ្ជូន​ទៅ​សង្គ្រោះ​បន្ទាន់​នៅ​ទី​ក្រុង​ភ្នំពេញ»។

លោក ឲ្យដឹង​បន្ត​ថា ក្រោយ​កើត​ហេតុ​លោក​បាន​ស្ទួច​រថយន្ត​បង្ក​ហេតុ យក​ទៅ​រក្សា​ទុក​នៅ​ការិយា​ល័យ​នគរបាល​ចរាចរណ៍​ផ្លូវ​គោក​ខេត្ត ដើម្បី​ដោះស្រាយ​តាម​ច្បាប់​ហើយ​ក្នុង​ករណី​គ្រោះ​ថ្នាក់​ចរាចរណ៍​បែប នេះ​បើ​តាម​ច្បាប់ ត្រូវ​ខាង​ម្ចាស់​រថយន្ត​ផ្តល់​សំណង​ដល់​អ្នក​រង​គ្រោះ​​ ប៉ុន្តែ​មិន​ដឹង​ថា​អាច​ជា​សំណង​ក្នុង​តម្លៃ​ណា​មួយ​ទេ គឺ​អាស្រ័យ​ភាគី​ទាំង​ពីរ​ចរចា​ស្រុះ​ស្រួល​គ្នា។

លោក​ប្រាប់​ឲ្យដឹងថា ​៖​«រថយន្ត​ផ្ទុក​មនុស្ស​លើស​ចំណុះ ហើយ​ជា​រថយន្ត​ចាស់​និង​បើក​បរ​ហួស​ល្បឿន​កំណត់​ទៀត នេះ​ជា​កំហុស​របស់​ម្ចាស់​រថយន្ត​»។

លោក ហាក់​ មេត្តា ប្រធាន​ការិយាល័យ​បច្ចេក​ទេស​នៃ​មន្ទីរ​ពេទ្យ​ខេត្ត​ស្ទឹងត្រែង បាន​ឲ្យ​ដឹង​ថា ​ភ្លាមៗ​នោះ​មាន​ជន​រង​គ្រោះ​២នាក់ ដឹក​មក​មន្ទីរ​ពេទ្យ​ មាន​ម្នាក់​បាក់​ឆ្អឹង​ថ្គាម​និង​ម្នាក់​ទៀត​បាក់​ឆ្អឹង​ដង​កាំបិត។ ប៉ុន្តែស្អែក​ឡើង​ត្រូវ​បាន​ក្រុម​គ្រួសារ​សុំ​យក​មក​ព្យាបាល​នៅ​រាជធានី​ភ្នំពេញ​អស់​ហើយ៕

អត្ថបទគួរចាប់អារម្មណ៍