The Phnom Penh Post Search

Search form




Logo of Phnom Penh Post newspaper Phnom Penh Post - ក្រឡាប់​ឡាន​គ្រូ​សាកល​វិទ្យាល័យ​ស្វាយ​រៀង ស្លាប់​ម្នាក់ របួស​៥​នាក់




ក្រឡាប់​ឡាន​គ្រូ​សាកល​វិទ្យាល័យ​ស្វាយ​រៀង ស្លាប់​ម្នាក់ របួស​៥​នាក់

ក្រឡាប់​ឡាន​គ្រូ​សាកល​វិទ្យាល័យ​ស្វាយ​រៀង ស្លាប់​ម្នាក់ របួស​៥​នាក់

ស្វាយរៀងៈ គ្រូ​បង្រៀន​ម្នាក់​ស្លាប់​និង​គ្រូ ៥នាក់​ទៀត​រង​របួស​ក្នុង​គ្រោះ​ថ្នាក់​ផ្ទុះ​កង់​រថយន្ត​ក្រឡាប់​នៅ​ភូមិ​ព្រៃ​ទំនប់ ស្រុក​ស្វាយ​ជ្រំ ខេត្ត​ស្វាយ​រៀង កាល​ពី​ថ្ងៃ​ទី​២០​មករា​ខណៈ​ទើប​បើក​ចេញ​ពី​សាកល​វិទ្យា​ល័យ​ស្វាយ​រៀង​ឆ្ពោះ​មក​ភ្នំពេញ​បាន​បន្តិច។

លោក អ៊ុច សារ៉ន នាយ​នគរបាល​ចរាចរណ៍​ផ្លូវ​គោក​ខេត្ត​បាន​ឲ្យ​ដឹង​ថា រថយន្ត​ម៉ាក​ឡិច​ស៊ីស​300 ពាក់​ស្លាក កំពង់​ស្ពឺ 2A-9889 បាន​ផ្ទុះ​កង់​ក្រោយ​ផ្នែក​ខាង​ឆ្វេង រេ​ចង្កូត​ទប់ ហ្វ្រាំង​មិន​ជាប់​ក្រឡាប់​ធ្លាក់​ផ្លូវ ខ្ទាត​មនុស្ស​ចេញ​មក​ខាង​ក្រៅ ខណៈ​ល្បឿន​កំពុង​តែ​លឿន។ លោក​ថា អ្នក​ជិះ​ក្នុង​រថយន្ត​សុទ្ធ​តែ​ជា​គ្រូ​បង្រៀន​មក​ពី​ភ្នំពេញ ម្នាក់​បាន​ស្លាប់ និង​៥នាក់​ទៀត​បាន​រង​របួស។

លោក វ៉ាន់ សុផាន់ណា អធិការ​រង​នគរបាល​ស្រុក​ស្វាយជ្រំ​រំឭក​ថា គ្រោះ​ថ្នាក់​ចរាចណ៍​នេះ​កើត​ឡើង​នៅ​ម៉ោង​៥​កន្លះ ល្ងាច​ថ្ងៃ​ទី​២០ មករា នៅ​លើ​ផ្លូវ​ជាតិ​លេខ១ ក្នុង​ភូមិ​ព្រៃ​ទំនប់​ឃុំ​តា​សួស ស្រុក​ស្វាយ​ជ្រំ ខេត្ដ​ស្វាយ​រៀង។

លោក​ប្រាប់​ថា ជន​រងគ្រោះ​ដែល​ស្លាប់​ឈ្មោះ ស៊ុន សំអុល​ភេទ​ប្រុស អាយុ ៣៤ ឆ្នាំ ស្រុក​កំណើត​ក្នុង​ភូមិ-ឃុំ ទ្រា ស្រុក​ព្រះ​ស្ដេច ខេត្ត​ព្រៃវែង ជា​គ្រូ​បង្រៀន​នៅ​សាកល​វិទ្យា​ល័យ​ស្វាយ​រៀង បាន​បោក​ក្បាល​នឹង​កញ្ចក់​បែក​ធ្លាយ​ខួរ​ស្លាប់​ភ្លាម។ រីឯ​អ្នក​គ្រូ កន សារឿន អាយុ​៣២​ឆ្នាំ​បាន​រង​របួស​ធ្ងន់ លោក​គ្រូ ទេព ភារម អាយុ ៣៦ ឆ្នាំ លោក​គ្រូ លី រតនា អាយុ​៣៧​ឆ្នាំ ម្ចាស់​រថយន្ត លោក​គ្រូ​ឃុន សុភ័ណ​អាយុ​៣៧​ឆ្នាំ និង​លោក​គ្រូ ហេង វ៉ារ័ត្ន អាយុ​៣៦​ឆ្នាំ​ដែល​មាន​លំនៅ​ឯ​រាជធានី​ភ្នំពេញ​បាន​រង​របួស។ លោកថា ជន​រងគ្រោះ​ស្លាប់ សមត្ថកិច្ច​បាន​ប្រគល់​សាកសព​ទៅ​ក្រុម​គ្រួសារ​យក​ទៅ​ធ្វើ​បុណ្យ​ហើយ ចំណែក អ្នក​របួស​បាន​ឡើង​រថយន្ត​ឈ្នួល​មក​កាន់​មន្ទីរ​ពេទ្យ​រៀង​ខ្លួន។

លោក​អធិការ​រង​ឱ្យ​ដឹង​បន្ត​ថា​គ្រូ​បង្រៀន​ទាំង​៦​នាក់ ទៅ​បង្រៀន​នៅ​សាកល​វិទ្យាល័យ​ស្វាយ​រៀង លុះ​បង្រៀន​ចប់​ដល់​ចុង​សប្តាហ៍​ល្ងាច​ថ្ងៃ​សៅរ៍ ក៏នាំ​គ្នា​ជិះ​រថយន្ដ​ត្រឡប់​មក​រាជធានី​ភ្នំពេញ​វិញ។​តែ​ថ្ងៃ​កើត​ហេតុ ចេញ​មក​ទើប​តែ​បាន​ប្រមាណ​៨​គីឡូ​ម៉ែត្រ ស្រាប់​តែ​រថយន្ដ​បែក​កង់​ធ្វើ​ឱ្យ​រេ​ចង្កូត​ក្រឡាប់​៤-៥​ត្រឡប់ បណ្តាល​ឲ្យ​ស្លាប់​ម្នាក់​និង​របួស​៥​នាក់។

លោក សូ ចាន់ដារ៉ា ប្រធាន​រដ្ឋបាល​នៃ​សាកល​វិទ្យាល័យ​ស្វាយ​រៀង​ប្រាប់​ថា លោក​គ្រូ​អ្នក​គ្រូ​ទាំង​៦​នាក់​នោះ សុទ្ធ​តែ​គ្រូ​ក្រប​ខណ្ឌ​នៅ​សាកល​វិទ្យា​ល័យ​នេះ​បង្រៀន​ថ្នាក់​បរិញ្ញា​បត្រ​គ្រប់​គ្រង​ពាណិជ្ជកម្ម ហើយ​រាល់​ចុង​សប្តាហ៍​ពួក​គាត់​តែង​ទៅ​ផ្ទះ​ជា​ធម្មតា។

លោក អ៊ុច សារ៉ន បាន​បញ្ជាក់​ថា៖​«ប៉ូលិស​ចរាចរណ៍​ខេត្ត​បាន​ស្ទួច​រថយន្ត​ជួប​ឧប្បត្តិ​ហេតុ​មក​រក្សា​ទុក ដើម្បី​ពិនិត្យ​ស្រាវ​ជ្រាវ​ហើយ បើ​ទោះ​វា​ជា​គ្រោះ​ថ្នាក់​ចៃដន្យ​ក៏​ដោយ។ ករណី​នេះ​ប្រហែល​ជា​គ្មាន​សំណង​នោះ​ទេ ប៉ុន្តែ បើ​សិន​រថយន្ត ជា​រថយន្ត​ឈ្នួល​ធ្វើ​អាជីវកម្ម​វិញ ម្ចាស់​រថយន្ត​នឹង​ត្រូវ​ចេញ​សំណង​ឲ្យ​ជន​រងគ្រោះ តាម​ច្បាប់​កំណត់»៕

អត្ថបទគួរចាប់អារម្មណ៍