ស្វាយរៀងៈយ៉ាងហោចមានកម្មកររោងចក្រ ៥៧នាក់ ក្នុងចំណោម៨០នាក់បានរងរបួសធ្ងន់និងស្រាលនៅក្នុងគ្រោះថ្នាក់ចរាចរណ៍ក្រឡាប់រថយន្តចំណុះ២តោនកន្លះ កាលពីព្រឹកថ្ងៃទី២១ វិច្ឆិកា នៅក្នុងស្រុកចន្ទ្រា ខេត្តស្វាយរៀង នឹងត្រូវដឹកទៅសង្គ្រោះនៅមន្ទីរពេទ្យបង្អែកស្រុកជីភូ។
កម្មការិនី គង់ ធូរេន អាយុ២៣ឆ្នាំ នៅភូមិដូនណយ ឃុំគគីរ ស្រុកចន្ទ្រា ធ្វើការនៅរោងចក្រផលិតស្បែកជើង ឡស៊ីកូមានទីតាំងក្នុងបរិវេណតំបន់សេដ្ឋកិច្ចពិសេសក្រុងបាវិត ដែលកំពុងព្យាបាលរបួសថ្លោះចង្កេះនៅមន្ទីរពេទ្យបង្អែកជីភូ ប្រាប់ថា ហេតុការណ៍កើតឡើងបន្ទាប់ពីរថយន្តបើកចេញប្រមាណ១០នាទី ដោយរេចុះរេឡើងរួចក៏ធ្លាក់ផ្លូវក្រឡាប់តែម្តង។ នាងប្រាប់ដែរថា៖ «ខ្ញុំត្រូវបោកនឹងជញ្ចាំងឡានទ្រមខ្លួន ព្រោះតែទ្រនឹងចំនួនមនុស្សរាប់សិបនាក់សង្កត់ពីលើ ឥឡូវថ្លោះចង្កេះមិនអាចកម្រើកបានទេ » ។
កម្មការិនី គង់ ចាន់ទ្រា អាយុ២០ឆ្នាំ ធ្វើការនៅរោងចក្រ ឡស៊ីកូនេះដែរ បានរងរបួសគ្រេចជើងបានប្រាប់ពីមន្ទីរពេទ្យជីភូមកថា រថយន្តដែលក្រឡាប់នោះមកពីដឹកក្រុមកម្មករចេញពីភូមិឈរបញ្ច្រៀតគ្នាខ្លាំងពេក ដល់តែរថយន្តរេចង្កូតចុះឡើង នាំឲ្យកម្មករជិះលើឡានជ្រួលឡើង ឡានក៏ក្រឡាប់ធ្លាក់ផ្លូវតែម្តង។ នាងចាន់ទ្រា ប្រាប់ថា៖ «នេះសំណាងល្អ បើរថយន្តក្រឡាប់លើផ្លូវវិញ នឹងត្រូវរថយន្តកិនស្លាប់មិនដឹងជាប៉ុន្មាននាក់ទេ ព្រោះមានរថយន្តឆ្លងកាត់ទៅមកច្រើន »។
លោក សូ ស៊ីថន អធិការនគរបាលស្រុកចន្ទ្រាបានប្រាប់ដែរថា រថយន្តបង្កហេតុពាក់ស្លាកលេខ ភ្នំពេញ 3A-0119 បើកបរដោយឈ្មោះ អ៊ុង យានជួប អាយុ២៣ឆ្នាំនៅភូមិដូនណយ ឃុំព្រៃគគីរ ស្រុកចន្ទ្រា ខេត្តស្វាយរៀង បានផ្ទុកកម្មកររោងចក្រធ្វើស្បែកជើងទាំងអស់៨០នាក់ ហើយបើកមិនទាន់ចេញផុតពីភូមិផង ក៏ស្រាប់តែដាច់ចង្កូតធ្លាក់ផ្លូវ ទាញក្រឡាប់តែម្តង ។
លោកបន្តឲ្យដឹងថា៖ «គ្រោះថ្នាក់នេះដោយសារតែម្ចាស់ឡានធ្វេសប្រហែសបានយកខ្សែគោទៅចងនឹងរ៉ូទីល(ដែកទប់កង់ខាងក្រោម)ចង្កូត ហើយខ្សែនោះដាច់ចង្កូតបញ្ជាលែងបានក៏ក្រឡាប់តែម្តង»។
លោកបន្តទៀតថា កម្មករ១៥នាក់របួសធ្ងន់ មានបាក់ឆ្អឹងដងកាំបិតម្នាក់ ក្រៅពីនោះថ្លោះគ្រេចនិងជាង៤០នាក់ទៀតរលាត់ដៃជើងព្រោះសង្កត់ជាន់លើគ្នា ត្រូវបញ្ជូនទៅមន្ទីរពេទ្យជីភូទាំងអស់។ រីឯម្ចាស់ឡានរត់គេចខ្លួនបាត់ភ្លាមៗនោះ។
លោក ប្រាក់ សម្បត្តិ ប្រធានមន្ទីរពេទ្យបង្អែកជីភូបានប្រាប់ឲ្យដឹងថា កម្មករទាំងនោះភាគច្រើនរងរបួសស្រាលៗទេ ប៉ុន្តែ មានជាង១០នាក់ដែរ ខ្លះបោកក្បាលនិងសង្កត់ជាន់លើគ្នា បណ្តាលឲ្យចុកទ្រូង ឈឺក្បាល វិលមុខត្រូវនៅសម្រាកព្យាបាល ប៉ុន្តែថ្ងៃព្រហស្បតិ៍នេះ ពួកគេចេញទៅវិញអស់ហើយ។
លោកបន្តថា៖ «ចំពោះថ្លៃព្យាបាល គឺខាងបេឡាជាតិធានារ៉ាប់រងសន្តិសុខសង្គមជាអ្នករ៉ាប់រងទាំងអស់»។ លោកប្រាប់ដែរថា បុគ្គលិករដ្ឋបាលរោងចក្រដែលចុះទៅមើលកម្មករប្រាប់ថា ពួកគេធ្វើការនៅក្នុង ៧រោងចក្រ រួមមាន ឃីងម៉ាឃើ ឌីឃីអ៊ីង ស៊ីកូ កៅវ៉េ ស្មាធិច ស៊ីខេន និងរោងចក្រអង្គរព្រីន។
លោក ស ម៉ូរ៉ា ប្រធានសហជីពកម្មករចំណីអាហារនិងសេវាកម្ម កម្ពុជាកត់សម្គាល់ឃើញថា កម្មកររងគ្រោះនឹង ត្រូវតែខាងថៅកែជាអ្នកទទួលខុសត្រូវ ក្នុងការចេញថ្លៃព្យាបាល ព្រោះពួកគេបានរងគ្រោះពេលធ្វើដំណើរទៅធ្វើការ៕
