The Phnom Penh Post Search

Search form

Logo of Phnom Penh Post newspaper Phnom Penh Post - ក្លែង​ជា​កម្លាំង​ប្រដាប់​អាវុធ​ឆែក​យានយន្ត​ត្រូវ​បាន​ចាប់​ខ្លួន




ក្លែង​ជា​កម្លាំង​ប្រដាប់​អាវុធ​ឆែក​យានយន្ត​ត្រូវ​បាន​ចាប់​ខ្លួន

ក្លែង​ជា​កម្លាំង​ប្រដាប់​អាវុធ​ឆែក​យានយន្ត​ត្រូវ​បាន​ចាប់​ខ្លួន

បាត់ដំបងៈ ជន​សង្ស័យ​៧នាក់​ដែល​ក្លែង​បង្កើត​ជា​ក្រុម​សមត្ថកិច្ច​ចម្រុះ​និង ស្លៀកពាក់​ឯក​សណ្ឋាន​ជា​យោធា​នគរបាល និងជា​កង​រាជ​​អាវុធ​ហត្ថ​ដាក់​កុង​ត្រូល​ឆែក​ឆេរ​យាន​យន្ត​គ្រប់​ប្រភេទ នៅ​តាម​ផ្លូវ​លំ​ក្នុង​ភូមិ​ចុង​ពរ​ត្រង់​ចំណុច​ព្រំប្រទល់​ស្រុក​រុក្ខគិរី និង​ស្រុក​មោង​ឫស្សី​ហើយ​ប្លន់​បាន​ម៉ូតូ២​គ្រឿង​ត្រូវ​កម្លាំង​ចម្រុះ​ចុះ ព័ទ្ធ​ចាប់​បាន​កាល​ពី​ព្រឹក​ថ្ងៃទី​១២ មីនា។

លោក ឡាច ប្រុស នាយ​ការិយា​ល័យ​ព្រហ្មទណ្ឌ​ខេត្ត បាន​ឲ្យ​ដឹង​ថា​ជន​សង្ស័យ​៥នាក់​ដែល​បន្លំ​ខ្លួន​ធ្វើជា​សមត្ថកិច្ច​ប្លន់ ម៉ូតូ​ឥឡូវ​ត្រូវ​កម្លាំង​កងរាជ​អាវុធ​ហត្ថ​ស្រុក​រុក្ខគិរី និង​សមត្ថកិច្ច​​ស្រុក​មោង​ឫស្សី​ព័ទ្ធ​ចាប់​បាន​​និង​បញ្ជូន​ទៅ​ទី​បញ្ជា ការ​កងរាជ​អាវុធ​ហត្ថ​ខេត្ត​ហើយ ហើយ​២នាក់​ទៀត សមត្ថកិច្ច​ឡោម​ព័ទ្ធ​ចាប់​បាន​នៅ​ក្នុង​បឹង​ពី​រសៀល​ម្សិលមិញ។

លោកថ្លែង​ថា៖ «ក្នុង​ចំណោម​ជន​សង្ស័យ​ទាំង​៧នាក់​មាន​ម្នាក់​ជា​មេ​ខ្លោង​រត់​ពី​ខេត្ត បន្ទាយ​មាន​ជ័យ​មក​សម្ងំ​លាក់​ខ្លួន​ធ្វើ​សកម្មភាព​នៅបាត់ដំ​បង​ដោយ​ក្រុម​នេះ​ ដើរ​តួ​ធ្វើ​ជា​សមត្ថកិច្ច​កាន់​អាវុធ​និង​ដើរ​ប្លន់​ប្រជាពល​រដ្ឋ​នៅ​តាម​ជន​បទ»។

លោកបន្ថែមថា ជន​សង្ស័យ​នៅថ្ងៃ​ធ្វើ​សកម្មភាព​ប្លន់​មាន​គ្នា៤​នាក់​និង​ប្រើ​ប្រាស់​កាំភ្លើង​អាកា​មួយ​ដើម​ហើយ​ក្រោយ​ពី​ប្លន់​បាន​ម៉ូតូ២​គ្រឿង​ពី​ជន​រងគ្រោះ ក្រុម​ជន​សង្ស័យ​បាន​លក់​អស់​មួយ​គ្រឿង​នៅសល់​មួយ​គ្រឿង​សមត្ថកិច្ច​ដក ហូត​បាន។ ក្រុម​ជន​ទាំង​នេះ​មិន​មែន​ទើប​តែ​បង្ក​បទ​ល្មើស​តែ​ម្តង​នេះទេ​ព្រោះ​បើ​តាម​ចម្លើយ​សារភាព​ពួកគេ​ធ្លាប់​ធ្វើ​សកម្មភាព​៥-៦​លើក​រួច​មក​ហើយ។

លោក ស៊ីវ សុផល មេ​បញ្ជាការ​កង​រាជអាវុធ​ហត្ថ​ស្រុក​រុក្ខគិរី​ឲ្យ​ដឹង​ថា ជន​រងគ្រោះ​ឈ្មោះ ​ឌីម វឹង អាយុ ២៦​ឆ្នាំ រង​របួស​បែក​ក្បាល​ហើយ​ម៉ូតូ​ជន​រងគ្រោះ​ដែល​ក្រុម​ចោរប្លន់​យក​ទៅ ម៉ាក​ហុងដា សេ​១២៥ ពណ៌​ខ្មៅ ស៊េរី​ឆ្នាំ​២០១៣​គ្មាន​ស្លាក​លេខ។ ជន​រង​គ្រោះ​ម្នាក់​ទៀត ឈ្មោះ ជីម ដេត អាយុ ២២​ឆ្នាំ។ ម៉ូតូ​ដែល​ចោរប្លន់​យក​ទៅ ម៉ាក​ស្មាស់ រីវ៉ូ ស៊េរី​ឆ្នាំ​២០០៩ ពណ៌​ខ្មៅ។ លោក​ប្រាប់​តាម​សម្តី​ជន​រង​គ្រោះ​ថា​នៅ​ថ្ងៃ​កើត​ហេតុ​ពួកគេ​បាន​ជិះ​ម៉ូតូ ឆ្លង​កាត់ កន្លែង​កើត​ហេតុ​លុះ​ពេល​ជិះ​ទៅ​ដល់​ស្រាប់​តែ​ឃើញ​ក្រុម​មនុស្ស ៤​នាក់ ក្នុង​នោះ​បីនាក់​ស្លៀកពាក់​ជា​ប៉ូលិស និង​ម្នាក់​ស្លៀកពាក់​ជា​ប៉េអឹម ដោយ​ពាក់មួក​សុវត្ថិភាព និង​ពាក់​ម៉ាស​បិទ​មុខ​ផង​និង​បាន​ស្ទុះ​ទៅ​ស្ទាក់​ម៉ូតូ​ទាំង​ពីរ​គ្រឿង​ឲ្យ​ ឈប់ ដោយ​លើក​កាំភ្លើង​អាកា​​ភ្ជង់​មករក​ដើមទ្រូង និង​គំរាម​ឲ្យ​ជន​រងគ្រោះ​ប្រគល់​ម៉ូតូ​ឲ្យ។

ប៉ុន្តែត្រូវជនរងគ្រោះប្រកែកមិនឲ្យតែត្រូវ​បក្ខពួកម្នាក់​នៃ​ក្រុមនោះបាន​ វាយ​មួយ​ស្វ័យ​កាំភ្លើង ត្រូវ​ក្បាល​បែក​ហូរឈាម​។ បន្ទាប់មក​ពួក​ចោរ​បាន​យក​ខ្សែ​អង្រឹង មក​ចង​ដៃ​ចងជើង​ជនរងគ្រោះ​ទាំង​ពីរ​នាក់ តែ​សំណាង​ល្អ​ត្រូវ​អ្នក​ដំណើរ​​ប្រទះ​ឃើញ​ជួយ​ស្រាយ​ចំណង និង​ទៅ​ប្តឹង​សមត្ថកិច្ច។

ក្នុង​ចំណោម​ជន​សង្ស័យ​ទាំង​៧​នាក់​ដែល​ត្រូវបាន​ចាប់​ខ្លួននោះ​​ មាន​២​នាក់​ជាស្ត្រី​៕

អត្ថបទគួរចាប់អារម្មណ៍