The Phnom Penh Post Search

Search form

Logo of Phnom Penh Post newspaper Phnom Penh Post - ខឹង​ប្តី​ផឹក​ស៊ី​មិន​ឈប់​ចាក់​សាំង​ក្នុង​វង់​ឆេះ​របួស​ត្រូវ​តាម​ចាប់​ខ្លួន




ខឹង​ប្តី​ផឹក​ស៊ី​មិន​ឈប់​ចាក់​សាំង​ក្នុង​វង់​ឆេះ​របួស​ត្រូវ​តាម​ចាប់​ខ្លួន

ខឹង​ប្តី​ផឹក​ស៊ី​មិន​ឈប់​ចាក់​សាំង​ក្នុង​វង់​ឆេះ​របួស​ត្រូវ​តាម​ចាប់​ខ្លួន

សៀមរាបៈ ស្រ្តី​ម្នាក់​ដែល​ខឹង​ប្តី​មិន​ព្រម​ឈប់​ផឹក​ស៊ី ហើយ​បាន​យក​សាំង​ទៅ​ជះ​ក្នុង​វង់​ផឹក​ស៊ី​បណ្តាល​ឲ្យ​ឆាប​ឆេះ​រលាក​របួស​ធ្ងន់​ស្រាល​មនុស្ស​៣​នាក់ កាល​ពី​ថ្ងៃ​អង្គារ នៅ​ក្នុង​ក្រុង​សៀមរាប ត្រូវ​សមត្ថកិច្ច​នគរបាល​កំពុង​តែ​ស្វែង​រក​ចាប់​ខ្លួន។

លោកជឹង ម៉ារ៉ា​មន្ត្រី​នគរបាល​ព្រហ្ម​ទណ្ឌ​ក្រុង​សៀមរាប​បាន​ឲ្យ​ដឹង​ថា សមត្ថកិច្ច​កំពុង​តែ​ស្វែង​រក​ចាប់​ខ្លួន​ស្រ្តី​បង្ក​ហេតុ​ដើម្បី​នាំ​មក​សួរ​នាំ​ពី​ការ​ជះ​សាំង​ធ្វើ​ឲ្យ​ឆាប​ឆេះ​រលាក​មនុស្ស។

លោកថ្លែងថា៖ «ស្រ្តី​នោះ​ខឹង​នឹង​ប្តី ខណៈ​ប្តី​រួម​នឹង​មិត្ត​ភក្តិ​នាំ​គ្នា​ផឹក​ស៊ី​តាំង​ពី​ព្រលប់​ដល់​អ្រធាត្រ​ហើយ​មិន​ព្រម​ឈប់ ក៏​យក​សាំង​១ដប​ទៅ​ជះ​បណ្តាល​វង់​ធ្វើ​ឲ្យ​ឆាប​ឆេះ​របួស​ប្តី​និង​គូកន​២​នាក់​ហើយ​បាន​រត់​គេច​ខ្លួន​បាត់»។

នាយផ្នែក​ព្រហ្ម​ទណ្ឌ​រូប​នេះ​បាន រំឭក​តាម​សាក្សី​ថា អំពើ​ហិង្សា​នេះ​កើត​ឡើង​កាល​ពី​ទៀប​ភ្លឺ​ថ្ងៃ​ទី៤ ធ្នូ​និង​បង្ក​ដោយ​ស្រ្តី ខ្នរ ឃឹម អាយុ​២៥​ឆ្នាំ និង​មាន​ប្តី​ឈ្មោះ ឈួន ធី អាយុ​៣៤​ឆ្នាំ នៅ​ភូមិ​ព្រែក​ពោធិ ឃុំ​ក្របី​រៀល ស្រុក​ពួក ខេត្ត​សៀមរាប ដែល​បាន​មក​ស្នាក់​នៅ​ភូមិ​កសិកម្ម សង្កាត់​ស្រងែ ក្រុង​សៀមរាប​ប្រកប​របរ​ដាំ​ត្រសក់​លក់ រង​របួស​ធ្ងន់។ រីឯ​គូកន​២នាក់​មាន​ឈ្មោះ ប៉ុច ប៉ុន អាយុ​៣៤​ឆ្នាំ​និង ប៉ុច ប៉យ អាយុ ២៦ ឆ្នាំ​ដែល​ជា​បង​ប្អូន​បង្កើត​រង​របួស​ស្រាល។

លោកឲ្យដឹង​ថា មុន​កើត​ហេតុ​ប្តី​នឹង​មិត្ត​ភក្តិ​ប្រមាណ​ជា​៨នាក់​បាន​នាំ​គ្នា​ផឹក​ស្រា តាំង​ពី​ក្បាល​ព្រលប់​រហូត​ដល់​រំលង​អ្រធាត្រ ខ្នរ ឃឹម បាន​ព្យាយាម​ឃាត់​ប្តី​ឲ្យ​ឈប់​ផឹក ព្រោះ​ដល់​ម៉ោង​ដឹក​ត្រសក់​យក​ទៅ​ឲ្យ​ម៉ូយ​នៅ​ផ្សារ តែ​ប្តី​មិន​ឈប់​ក៏​មាន​ជម្លោះ​កើត​ឡើង។

លោកថា ដោយសារ​តែ​ឃាត់​មិន​ស្តាប់ ស្រ្តី​នោះ​ក៏​ផ្ទុះ​កំហឹង​ឡើង​ហើយ​កាន់​សាំង​១ដប​ដែល​ទិញ​បម្រុង​ទុក​ចាក់​ម៉ូតូ​ដើម្បី​ដឹក​ត្រសក់​យក​ទៅ​លក់​នៅ​ផ្សារ ទៅ​ចាក់​ជះ​លើ​វង់​ផឹក​ស៊ី​ដែល​មាន​ដុត​ចង្កៀង​ប្រេង​កាត​ផង​នោះ​ឲ្យ​ឆាប​ឆេះ​ថ្គោល​ឡើង ជា​ហេតុ​បណ្ដាល​ឲ្យ​អ្នក​នៅ​ក្នុង​វង់​ផឹក​ស៊ី​ទាំង​ប៉ុន្មាន​ប្រាស​យក​អាយុ​រៀង​ខ្លួន និង​បណ្តាល​ឲ្យ​ឆេះ​របួស​ធ្ងន់​ស្រាល​៣​នាក់ ក្នុង​នោះ​ប្តី​ស្រី​ដៃ​ដល់​ដែល​បញ្ជូន​ទៅ​មន្ទីរ​ពេទ្យ​មិន​ទាន់​ចេញ​នៅ​ឡើយ​ទេ។

លោក​ប្រាប់​ថា ករណី​នេះ​ខាង​ជន​រងគ្រោះ​មិន​បាន​ដាក់​ពាក្យ​បណ្តឹង​ទេ ប៉ុន្តែ​ដោយ​យោង​លើ​បទ​ល្មើស​ជាក់​ស្តែង​សមត្ថកិច្ច​នឹង​ធ្វើ​ការ​ឃាត់​ខ្លួន​ស្រ្តី​នោះ​មក​សាក​សួរ​សិន។​តែ​ស្ត្រី​បង្ក​ហេតុ​បាន​គេច​ខ្លួន​បាត់​ហើយ ហើយ​សមត្ថកិច្ច​កំពុង​តែ​តាម​ចាប់​ដើម្បី​ចាត់​វិធាន​ការ​តាម​ច្បាប់។

ជន​រងគ្រោះ​រលាក​ភ្លើង និង​បុរស​ជា​ប្តី​ជន​ដៃ​ដល់​មិន​អាច​ទាក់​ទង​សុំ​បំភ្លឺ​ករណី​នេះ​បាន​ទេ​កាល​ពី​ម្សិល​មិញ៕

អត្ថបទគួរចាប់អារម្មណ៍