The Phnom Penh Post Search

Search form

Logo of Phnom Penh Post newspaper Phnom Penh Post - ខឹង​ផ្តាច់​កូន​មិន​បាន​ប៉ង​បាញ់​គូ​ដណ្តឹង​កូន​សម្លាប់ ត្រូវ​តាម​ចាប់​ខ្លួន




ខឹង​ផ្តាច់​កូន​មិន​បាន​ប៉ង​បាញ់​គូ​ដណ្តឹង​កូន​សម្លាប់ ត្រូវ​តាម​ចាប់​ខ្លួន

ខឹង​ផ្តាច់​កូន​មិន​បាន​ប៉ង​បាញ់​គូ​ដណ្តឹង​កូន​សម្លាប់ ត្រូវ​តាម​ចាប់​ខ្លួន

ពោធិ៍សាត់ៈ បុរស​ម្នាក់​ដែល​ប៉ង​បាញ់​សម្លាប់​គូ​ដណ្តឹង​កូន​ស្រី​នៅ​លើ​ផ្ទះ​ខណៈ​ដែល​នាង​បណ្តើរ​មក​ផ្ទះ កាល​ពី​ថ្ងៃ​ទី​៧ធ្នូ ព្រោះ​តែ​ខឹង​ផ្តាច់​ពាក្យ​វិញ​មិន​បាន​នោះ​ សមត្ថកិច្ច​នគរបាល​ស្រុក​ក្រគរ កំពុង​ស្វែង​រក​ចាប់​ខ្លួន។

លោក ប៊ិន វណ្ណា អធិការ​នគរបាល​ស្រុក​ក្រគរ​បាន​ឲ្យ​ដឹង​ថា សមត្ថកិច្ច​កំពុង​តាម​ចាប់​ខ្លួន​ជន​សង្ស័យ​ដែល​រត់​គេច​ខ្លួន ដោយ​សារ​តែ​ជន​នោះ​បាន​បាញ់​សម្លាប់​ជន​រង​គ្រោះ​ដែល​ជា​អនាគត​កូន​ប្រសា។ លោក​បន្ត​ថា៖ «ជន​រងគ្រោះ​ត្រូវ​គ្រូ​ពេទ្យ​ជួយ​សង្គ្រោះ​ជីវិត​ផុត​ពី​គ្រោះ​ថ្នាក់ បន្ទាប់​ពី​រងការ​បាញ់​ចំ​ក្រោម​ឆ្អឹង​ជំនីរ​ធ្លាយ​ពី​ម្ខាង​ទៅ​ម្ខាង​របួស​ធ្ងន់ ត្រូវ​បញ្ជូន​ទៅ​សង្គ្រោះ​ឯ​មន្ទីរ​ពេទ្យ​នៅ​រាជធានី ភ្នំពេញ»។

លោក គង់ វណ្ណៈ នាយ​ប៉ុស្តិ៍​ឃុំ​ស្វាយ​ស​បាន​រំឭក​ឲ្យ​ដឹង​ថា ហេតុ​ការណ៍​បាញ់​ប្រហារ​នេះ​កើត​ឡើង​កាល​ពី​ព្រឹក​ថ្ងៃ​ទី៧ធ្នូ នៅ​ឃុំ​ត្នោត​ជុំ ស្រុក​ក្រគរ ខេត្ត​ពោធិ៍​សាត់ ខណៈ​ជន​រង​គ្រោះ​កំពុង​អង្គុយ​ជុំ​គ្នា​ជាមួយ​កូន​ស្រី​នៅ​លើ​ផ្ទះ។

លោក​បន្ត​ថា៖ «ឪពុក​ជា​ឃាតក​សង្ស័យ​មាន​កំហឹង​នឹង​យុវជន​ជា​គូ​ដណ្តឹង​កូន​ស្រី​និង​បាន​យក​កាំភ្លើង​អាកា​ស្វ័យ​បត់​បាញ់​១​គ្រាប់​ទៅ​ត្រូវ​ធ្លាយ​ពោះ ព្រោះ​តែ​ខឹង​នឹង​យុវជន​នេះ​នៅ​តែ​ល្បួង​ស្រឡាញ់​កូន​ស្រី​របស់​ខ្លួន​ដែល​គាត់​បាន​ផ្តាច់​តែ​ម្នាក់​ឯង»។

លោក​បន្ត​ថា តាម​សាច់​ញាតិ​ខាង​ប្រុស នៅ​មុន​​ថ្ងៃ​កើត​ហេតុ​កូន​ស្រី​បាន​សុំ​ម្តាយ​ទៅ​ដេក​នៅ​ផ្ទះ​ជី​ដូន​១យប់ ព្រឹក​ឡើង​នាង​បណ្តើរ​គូ​ដណ្តឹង​ទៅ​ផ្ទះ​ខាង​ប្រុស និង​នាំ​សាច់​ញាតិ​ខាង​ប្រុស​៩នាក់​មក​ផ្ទះ​នាង ដើម្បី​និយាយ​រឿង​រៀប​ការ។ តែ​ពេល​មក​ដល់​ផ្ទះ​ខាង​ស្រី ឪពុក​នាង​ក៏​បណ្តេញ​សាច់​ញាតិ​ខាង​ប្រុស​ទៅ​ផ្ទះ​វិញ និង​ប្រាប់​ថា ឲ្យ​ឈប់​មក​ទៅ គាត់​បាន​ផ្តាច់​ពាក្យ​វិញ​ហើយ។

លោក​ឲ្យដឹង​ថា ជន​រងគ្រោះ​សាម ទិត្យ អាយុ​២២​ឆ្នាំ​និង​សង្សារ​នាង ឆាន សុធី អាយុ​១៩​ឆ្នាំ រីឯ​ឪពុក​កូន​ស្រី​ដៃ​ដល់​ឈ្មោះ សាំង ឆុង អាយុ​៤៨ ឆ្នាំ។

លោក​នាយ​ប៉ុស្តិ៍​ប្រាប់​ថា ជន​រង​គ្រោះ​មិន​ព្រម​ទៅ​ផ្ទះ​វិញ​តាម​ការ​ដេញ​របស់​ឪពុក​ខាង​ស្រីទេ ​ខណៈ​សាច់​ញាតិ​ត្រឡប់​ទៅ​ផ្ទះ​វិញ ក៏​ជួន​ពេល​ដែល​ជន​សង្ស័យ​បាន​ទាញ​កាំភ្លើង​បាញ់​មក​លើ​រូបគេ ហើយ​ក៏​គេច​ខ្លួន​បាត់​ទៅ។

លោក​បន្ត​ទៀត​ថា រវាង​កូន​ស្រី​និង​កូន​ប្រុស ត្រូវ​បាន​ឪពុក​ម្តាយ​ទាំង​សង​ខាង​រៀប​ចំ​ភ្ជាប់​ពាក្យ​រួច​រាល់​ហើយ ប៉ុន្តែ មិន​ដឹង​យ៉ាង​ម៉េច ក៏​ស្រាប់​តែ​ឪពុក​ខាង​ស្រី​តែ​ម្នាក់​ឯង ប្រាប់​ខាង​ប្រុស​ថា​ផ្តាច់​ពាក្យ​វិញ តែ​ប្រពន្ធ​មិន​បាន​ដឹង​ទេ ប៉ុន្តែ​ក្មេង​ទាំង​២​នៅ​បន្ត​ស្រឡាញ់​គ្នា​ដូច​ធម្មតា។

អ្នកស្រី សាម សារ៉ាន ជាបង​ជីដូន​មួយ​ជន​រងគ្រោះ​បាន​ឲ្យ​ដឹង​ថា ពួកគេ​ទាំង​២​នាក់ បាន​ស្រឡាញ់​គ្នា​ជា​យូរ​ហើយ​ដោយ​មាន​ចាស់​ទុំ​ទាំង​សង​ខាង​រៀប​ចំ​ភ្ជាប់​ពាក្យ​ឲ្យ​ថែម​ទៀត ហើយ​ត្រូវ​ឪពុក​ម្នាក់​នេះ​បំបែក​វិញ​តែ​ពួកគេ​មិន​ព្រម​ទើប​កើត​រឿង​បែប​នេះ។

គាត់​បាន​បន្ត​ថា៖ «ប្អូន​ខ្ញុំ​រួច​ផុត​ពី​សេចក្តី​ស្លាប់​ហើយ ហើយ​កំពុង​ព្យាបាល​នៅ​មន្ទីរ​ពេទ្យ​កាល់​ម៉ែត តែ​ខ្ញុំ​ក៏​បាន​ដាក់​ពាក្យ​ប្តឹង​ទៅ​សមត្ថកិច្ច​រួច​ហើយ​ដែរ ដើម្បី​ឲ្យ​នគរបាល​ប៉ុស្តិ៍​ជួយ​រក​ខុស​ត្រូវ​ឲ្យ​តាម​ផ្លូវ​ច្បាប់»៕

អត្ថបទគួរចាប់អារម្មណ៍