The Phnom Penh Post Search

Search form

Logo of Phnom Penh Post newspaper Phnom Penh Post - ខ្មែរ​អាមេរិក​ម្នាក់​គប់​កញ្ចក់​ឡាន​គេ​ត្រូវ​ជាប់​ខ្នោះ




ខ្មែរ​អាមេរិក​ម្នាក់​គប់​កញ្ចក់​ឡាន​គេ​ត្រូវ​ជាប់​ខ្នោះ

ខ្មែរ​អាមេរិក​ម្នាក់​គប់​កញ្ចក់​ឡាន​គេ​ត្រូវ​ជាប់​ខ្នោះ

បាត់ដំបងៈ អាណិក​ជន​ខ្មែរ​-​អាមេរិកាំង ម្នាក់​ត្រូវ​សមត្ថកិច្ច​ឃាត់​ខ្លួន​បញ្ជូន​ទៅ​សាលា​ដំបូង​ខេត្ត​បាត់​ដំបង កាល​ពីម្សិ​ល​មិញ​បន្ទាប់​ពី​អាណិក​ជន​រូប​នោះ​គប់​ដុំ​ឥដ្ឋ​ទៅ​លើ​រថយន្ត គេ​កំពុង​ធ្វើ​ចរាចរណ៍ ដោយ​ចោទ​អ្នក​បើកបរ​ថា បាន​បើក​កៀរ​ខ្លួន​ខណៈ​កំពុង​ធ្វើ​ដំណើរ។

លោក ជេត វណ្ណនី ស្នងការ​រងនគរបាល​ខេត្ត​បាត់​ដំបង​បាន​ប្រាប់​ឲ្យ​ដឹង​ថា បុរស​ជា​អាណិក​ជន​ខ្មែរ​-អាមេរិ​កាំង​រូប​នោះ​ត្រូវ​បញ្ជូន​ទៅ​សាលា​ដំបូង ខេត្ត​បាត់​ដំបង​ហើយ​ពី​ម្សិល​មិញ ដោយសារ​តែ​ជន​សង្ស័យ​បាន​យក​ដុំ​ថ្ម​មួយ​ដុំធំ​គប់​ទៅ​លើ​កញ្ចក់​រថយន្ត អ្នក​ដំណើរ​កំពុង​ធ្វើ​ចរាចរណ៍។

នាយនគរបាល​ព្រហ្មទណ្ឌ​ខេត្តរូប​នេះ​បន្ត​ឲ្យ​ដឹង​ថា បុរស​ជា​អាណិក​ជន​ខ្មែរ-​អាមេរិក បង្ក​ហេតុ​កាល​យប់​ថ្ងៃ​ទី២៨ ខែ​មីនា នៅ​មុខ​សាកល​វិទ្យា​ល័យ​បញ្ញា​សាស្ត្រ សាខា​បាត់​ដំបង ស្ថិត​ក្នុង​ភូមិ​រំចេក​៤ សង្កាត់​រតនៈ ក្រុង-​ខេត្ត​បាត់​ដំបង។ ដោយ​បុរស​នោះ​បាន​យក​ដុំ​ឥដ្ឋ​មួយ​ដុំ​ធំ ទៅ​គប់​បែក​កញ្ចក់​ឡាន​គេ​ពេល​ដែល​គាត់​ត្រឡប់​មក​ពី​ស៊ី​ផឹក​វិញ ហើយ​ជិះ​ម៉ូតូ​ដួល ក៏​ចោទ​ថា ឡាន​បើក​កៀរ​និង​រក​រឿង​វាយ​សមត្ថកិច្ច​ទៀត​ខណៈ​សមត្ថកិច្ច​ចុះ​ធ្វើ​អន្តរាគមន៍។

សមត្ថកិច្ច​នគរបាល​ខេត្ត​ឲ្យ​ដឹង​ថា ដំបូង​បុរស​អាណិក​ជន​ឈ្មោះ អ៊ុំ សារ៉ន បាន​ជិះ​ម៉ូតូ​តែ​ម្នាក់​ឯង​រេ​ពេញ​ផ្លូវ ពេល​ប៉ូលិស​ហៅ​ត្រួត​ពិនិត្យ​មិន​ព្រម​ឈប់​ទេ ហើយ​បើក​យ៉ាង​លឿន​ទៅ​ប៉ះ​រថយន្ត​ភីក​អាប់​ពណ៌ស ដួល។ ពេល​នោះ​ស្រាប់​តែ​ជន​បង្ក​រើស​យក​ដុំឥដ្ឋ​មួយ​ដុំធំ គប់​សំដៅ​កញ្ចក់​ឡាន​ខាង​អ្នក​បើកបរ​បែក​កញ្ចក់​តែ​ម្តង។

នគរបាលចរាចរណ៍ថា ពេល​សមត្ថកិច្ច​ចុះ​ទៅ​សួរ បុរស​នេះ​ក៏​ស្ទុះ​មក​វាយ​ប៉ូលិស​បីនាក់​ថែម​ទៀត ទើប​ប៉ូលិស​ប្រើ​សិទ្ធិ​ការពារ​ខ្លួន​ចាប់​ឃាត់​ខ្លួន​បញ្ជូន​ទៅ​ឲ្យ​នគរបាល​ព្រហ្ម​ទណ្ឌ​កម្រិត​ស្រាល បន្ទាប់​ពី​បាន​ពិនិត្យ​ជាតិ​អាកុល ឃើញ​កម្រិត​១,០៨។

សមត្ថកិច្ចប្រាប់ដែរ​ថា ជន​សង្ស័យ​ឈ្មោះ អ៊ុំ សារ៉ន អាយុ​២៥​ឆ្នាំ មាន​ចរិត​មិន​ល្អ ត្រូវ​បាន​គេ​បញ្ជូន​មក​ស្រុក​ខែ្មរ​វិញ​ជាង​មួយ​ឆ្នាំ​ហើយ ស្នាក់​នៅ​ផ្ទះ​ជួល ក្នុង​ភូមិ​១៣​មករា សង្កាត់​ព្រែក​ព្រះ​ស្តេច ក្រុង​-​ខេត្ត​បាត់​ដំបង។

គួររំឭកថា អាណិក​ជនអាមេរិក​មិន​សុទ្ធ​តែ​ជា​មនុស្ស​ថ្លៃថ្នូរ ថ្វី​បើ​គេរស់​នៅ​ប្រទេស​ជឿន​លឿន ដោយ​អាណិក​ជន​ខ្មែរ​-អាមេរិក​មក​ស្រុក​ខ្មែរ​ខ្លះ​ញៀន​ថ្នាំ ញៀន​ល្បែង រហូត​ប្រព្រឹត្ត​បទ​ល្មើស​ក៏​មាន​ដែរ។ កាល​ពី​ចុង​ឆ្នាំ​មុន សមត្ថកិច្ច​នគរបាល​ខណ្ឌ​ទួល​គោក​ឃាត់​ខ្លួន​បុរស​អាណិក​ជន​ខ្មែរ​និង​គូកន​ ម្នាក់ រួច​បាន​បញ្ជូន​ខ្លួន​ទៅ​តុលាការ​ពី​បទ​ឆក់​កាបូប​លុយ​ពី​ស្ត្រី​ម្នាក់​មិន​បាន​សម្រេច​ដោយ​សារ​តែ​ម៉ូតូ​ប៉ះ​គ្នា​ដួល​នៅ​មុខ​ទីស្តី​ការ​ក្រសួង​ការងារ ក្នុង​ភូមិ​១៦​សង្កាត់​ទឹក​ល្អក់​ទី១៕

អត្ថបទគួរចាប់អារម្មណ៍