The Phnom Penh Post Search

Search form




Logo of Phnom Penh Post newspaper Phnom Penh Post - ខ្មែរ.អាមេរិក​ឆក់​កាបូប​គេ​ចាប់​បញ្ជូន​ទៅ​តុលាការ




ខ្មែរ.អាមេរិក​ឆក់​កាបូប​គេ​ចាប់​បញ្ជូន​ទៅ​តុលាការ

ខ្មែរ.អាមេរិក​ឆក់​កាបូប​គេ​ចាប់​បញ្ជូន​ទៅ​តុលាការ

ភ្នំពេញៈ ខ្មែរ-អាមេរិក​និង​គូកន​ម្នាក់​ត្រូវ​នគរបាល​ខណ្ឌ​ទួល​គោក​បញ្ជូន​ទៅ​តុលាការ​រាជធានី​បន្ទាប់​ពី​អ្នក​ទាំង​២​បាន​ធ្វើ​សកម្មភាព​ឆក់​កាបូប​លុយ​ពី​ស្រ្តី​ម្នាក់​មិន​បាន​សម្រេច​ហើយ​ត្រូវ​សមត្ថកិច្ច​ចាប់​ខ្លួន​បាន​កាល​ពី​ថ្ងៃ​អាទិត្យ។

លោក ហួត ចាន់យ៉ារ៉ាន់ អធិការ​នគរបាល​ខណ្ឌ​ទួល​គោក​បាន​ប្រាប់​ថា៖​«បុរស​អាណិក​ជន​និង​គូកន​ម្នាក់ នឹង​ត្រូវ​បញ្ជូន​ខ្លួន​ទៅ​តុលាការ​យ៉ាង​យូរ​នៅ​ថ្ងៃ​អង្គារ​នេះ​បន្ទាប់​ពី​រៀប​ចំ​ឯកសារ​រួច​រាល់»។

លោកបន្តថា៖«យើង​មិន​ដឹង​ថា នៅ​អាមេរិក​គេ​ជា​មនុស្ស​យ៉ាង​ម៉េច​ទេ គ្រាន់​តែ​ដឹង​ថា​ពួកគេ​ត្រូវ​អាជ្ញាធរ​អាមេរិក​ចាប់​បញ្ជូន​មក​ស្រុក​វិញ»។​លោក​បាន​រំឭក​ថា ជន​សង្ស័យ​ទាំង២​នាក់​ត្រូវ​សមត្ថកិច្ច​ចាប់​ខ្លួន​ពី​យប់​ថ្ងៃ​អាទិត្យ ពេល​ឆក់​កាបូប​លុយ​ពី​ស្ត្រី​ម្នាក់​មិន​បាន​សម្រេច​ដោយ​សារ​តែ​ម៉ូតូ​ប៉ះ​គ្នា​ដួល​នៅ​មុខ​ទីស្តី​ការ​ក្រសួង​ការងារ​លើ​ផ្លូវ​សហព័ន្ធ​រុស្ស៊ី ក្នុង​ភូមិ​១៦ សង្កាត់​ទឹក​ល្អក់​ទី១។

មន្រ្តីនគរបាល​ខណ្ឌ​បាន​ប្រាប់​ថា ជន​ជាប់​ចោទ​ទាំង​២នាក់​មាន​ឈ្មោះ ឈៀន សុខជា អាយុ​៣៤​ឆ្នាំ​មុខ​របរ​មិន​ពិត​ប្រាកដ​ស្នាក់​នៅ​ផ្ទះ​ជួល គ្មាន​លេខ នៅ​ក្នុង​សង្កាត់​ទួល​សង្កែ ខណ្ឌ​ឫស្សី​កែវ ជា​អ្នក​ធ្វើ​សកម្មភាព​ឆក់។ លោក​ថា ជន​សង្ស័យ​ជា​អាណិក​ជន​អាមេរិក​ធ្លាប់​ជាប់​គុក​នៅ​អាមេរិក​ជាង​១០​ឆ្នាំ​ពី​បទ​មនុស្ស​ឃាត​បាញ់​គេ​ឲ្យ​របួស។ រីឯ​គូកន​ម្នាក់​ទៀត ឈ្មោះ​អារី ហាលីម អាយុ​៣១​ឆ្នាំ ជា​ខ្មែរ​អ៊ិស្លាម មុខ​របរ​មិន​ពិត​ប្រាកដ ស្នាក់​នៅ​ផ្ទះ​លេខ​៣១ សង្កាត់​ស្រះ​ចក ខណ្ឌ​ដូន​ពេញ។​ឯស្ត្រី​រង​គ្រោះ​ឈ្មោះ លី រតនា អាយុ​៣១​ឆ្នាំ​ជា​បុគ្គលិក​ក្រុម​ហ៊ុន​ឯកជន ស្នាក់​នៅ​ផ្ទះ​សំណាក់​ពន្លឺ​ថ្មី ផ្លូវ​លេខ​១៧២ សង្កាត់​ផ្សារ​ថ្មី​ទី៣​ខណ្ឌ​ដូន​ពេញ រង​របួស​រលាត់​ដៃ​ជើង​ដោយ​ការ​ដួល​ម៉ូតូ​ពេល​ក្រុម​ល្មើស​ធ្វើ​សកម្មភាព ហើយ​មាន​ការ​ប្រទាញ​ប្រទង់​គ្នា​ផង។

មន្ត្រីប៉ូលិស​ខណ្ឌ​ឲ្យ​ដឹង​ថា នារី​រង​គ្រោះ​បាន​ជិះ​ម៉ូតូ​ម៉ាក​សង់​កូរ៉េ​ពណ៌​ក្រហម​ចេញ​ពី​ផ្ទះ​សំណាក់​ឆ្ពោះ​មក​ស្ពាន​អាកាស​៧​មករា មាន​ស្ពាយ​កាបូប​លុយ​១​ជាប់​ខ្លួន ក្នុង​នោះ​មាន​លុយ​៣​ដុល្លារ​និង​ទូរស័ព្ទ​២​គ្រឿង ជាមួយ​ឯកសារ​មួយ​ចំនួន។ មក​ដល់​មុខ​ក្រសួង​ការងារ ក៏​ត្រូវ​ជន​២​នាក់​ជិះ​ម៉ូតូ​ស៊ុយ​ហ្ស៊ុយ​គី​ស្មាស់​ពណ៌​ខ្មៅ​ពាក់​ស្លាក​លេខ​កំពង់​ចាម​1B7-090​មក​ក្បែរ​ឆក់​យក​កាបូប​លុយ​ធ្វើ​ឲ្យ​ដាច់​ខ្សែ​ម្ខាង​ដួល​ម៉ូតូ​ទាំង​ពីរ និង​មាន​អន្តរាគមន៍​ចាប់​ខ្លួន​ពួកគេ៕

អត្ថបទគួរចាប់អារម្មណ៍