The Phnom Penh Post Search

Search form




Logo of Phnom Penh Post newspaper Phnom Penh Post - គ្រោះ​អគ្គិភ័យ​នៅ​ទួល​ទំពូង​កំពុង​ស្រាវ​ជ្រាវ




គ្រោះ​អគ្គិភ័យ​នៅ​ទួល​ទំពូង​កំពុង​ស្រាវ​ជ្រាវ

គ្រោះ​អគ្គិភ័យ​នៅ​ទួល​ទំពូង​កំពុង​ស្រាវ​ជ្រាវ

130121_10
សកម្មភាពពន្លត់អគ្គិភ័យនៅសង្កាត់ទួលទំពូង២ គឹម សារុំ

ភ្នំពេញៈ សមត្ថកិច្ច​នគរបាល​កំពុង​បន្ត​ការ​ស្រាវ​ជ្រាវ​រក​មូល​ហេតុ​និង​ទំហំ​ខូច​ខាត​ក្នុង​ហេតុ​ការណ៍​អគ្គិភ័យ​បំផ្លាញ​ផ្ទះ​១៣​ខ្នង​តែ​ប្រមាណ​ជា​១៥​នាទី​នៅ​សង្កាត់​ទួល​ទំពូង​២ ខណ្ឌ​ចំការ​មន​កាល​ពី​ថ្ងៃ​សៅរ៍។

សមត្ថកិច្ច​ចុះ​អន្តរាគមន៍ ប្រាប់ថា គ្រោះ​អគ្គិភ័យ​កាល​ពី​ម៉ោង១ រសៀល​ថ្ងៃ​ទី​១៩ ខែ​មករា នៅ​សង្កាត់​ទួល​ទំពូង​ទី២ ខណ្ឌ​ចំការ​មន​នោះ មាន​មនុស្ស​បី​នាក់​បាន​រង​របួស ក្នុង​នោះ បុរស​ម្នាក់​រង​របួស​ឆេះ​សក់​ក្បាល ពេល​ត្បុល​ចូល​យក​អីវ៉ាន់ និង​ស្រ្តី​២​នាក់​រង​របួស​ស្រាល ហើយ​នគរបាល​ក៏​បាន​ឃាត់​ខ្លួន​ចោរ​៣​នាក់ ដែល​បន្លំ​លួច​អីវ៉ាន់​ដែល​ម្ចាស់​ជញ្ជូន​ដាក់​ចិញ្ចើម​ថ្នល់​ផង​ដែរ។

លោក ជួន សុវណ្ណ ស្នងការ​នគរបាល​រាជធានី​ដែល​ចុះ​បញ្ជា​ផ្ទាល់​បាន​ឲ្យ​ដឹង​ថា ផ្ទះ​ចំនួន​១៣​ខ្នង ដែល​សង់​អំពី​ថ្ម​ក្រោម​ឈើ​លើ ត្រូវ​ភ្លើង​ឆេះ​អស់ ប៉ុន្តែ​មិន​មាន​អ្នក​រង​គ្រោះ​ដល់​ជីវិត​ទេ។

លោក​ប្រាប់​ថា៖ «គ្រាន់​តែ​រង​របួស​រលាក​តិច​តួច រីឯ​មូល​ហេតុ និង​ទំហំ​នៃ​ការ​ខូច​ខាត ក្នុង​គ្រោះ​អគ្គិភ័យ​នេះ​នៅ​មិន​ទាន់​ដឹង​នៅ​ឡើយ ដោយ​សមត្ថកិច្ច​កំពុង​ស្រាវ​ជ្រាវ​បន្ត»។ លោក​ថា៖ «យើង​ប្រើ​ប្រាស់​ក្រុម​ពន្លត់​អគិ្គភ័យ​នៃ​ស្នងការ​ដ្ឋាន​នគរបាល​រាជធានី​១៥​គ្រឿង​និង​រថយន្ត​មជ្ឈមណ្ឌល​កោះ​ពេជ្រ​៣​គ្រឿង ឲ្យ​ជួយ​អន្តរាគមន៍​ពន្លត់ ប៉ុន្តែ​ដោយ​សារ​ផ្ទះ​នៅ​តំបន់​នោះ​ធ្វើ​អំពី​ថ្ម​ក្រោម​ឈើ​លើ និង​មាន​ស្តុក​សម្ភារ​ធ្វើ​អំពី​ជ័រ ធ្វើ​ឲ្យ​ភ្លើង​ឆាប​ឆេះ​រាល​ដាល​យ៉ាង​ឆាប់​រហ័ស​ទៅ​ផ្ទះ​នៅ​ក្បែរៗ​នោះ»។

លោក នេត វន្ថា ប្រធាន​ការិយាល័យ​បង្ការ​និង​ពន្លត់​អគ្គិភ័យ​រាជធានី​បាន​ឲ្យ​ដឹង​ថា ក្នុង​ការ​អន្តរាគមន៍​ពន្លត់​អគ្គិភ័យ​នៅ​តាម​ផ្លូវ​លេខ​៤៣២​ក្នុង​សង្កាត់​ទួល​ទំពូង​២ ខណ្ឌ​ចំការ​មន សមត្ថកិច្ច​បាន​ប្រើ​រថយន្ត​ពន្លត់​អគ្គិភ័យ​សរុប​១៨​គ្រឿង ក្នុង​នោះ​៣គ្រឿង​ជា​របស់​មជ្ឈមណ្ឌល​កោះ​ពេជ្រ និង​ប្រើ​ប្រាស់​ទឹក​អស់​៣៦​ឡាន។

លោក​បញ្ជាក់​ថា ៖ «យើង​បាន​ប្រើ​ពេល​ពន្លត់​ជាង​មួយ​ម៉ោង​គឺ រហូត​ម៉ោង​ជាង​២​រសៀល ទើប​គ្រប់​គ្រង​ស្ថាន​ការណ៍​បាន» ។

លោក​ប្រាប់​ដែរ​ថា នៅ​ដើម​ឆ្នាំ​២០១៣​នេះ រាប់​ទាំង​ការ​ឆេះ​នៅ​ទួល​ទំពូង​នេះ​ផង គឺ​មាន​៩លើក​ហើយ ក្នុង​នោះ​បាន​ស្លាប់​មនុស្ស​២​នាក់​និង​របួស​៣នាក់ ប៉ុន្តែ​ចំនួន​នេះ​មិន​កើន​ជាង​ឆ្នាំ​មុន​ទេ។

លោក អ៊ុច សុខុន អធិការ​នគរបាល​ខណ្ឌ​ចំការមន បាន​ប្រាប់​ដែរ​ថា ត្រឹម​រសៀល​ថ្ងៃ​ទី​២០​មករា យើង​នៅ​មិន​ទាន់​អាច​ប៉ាន់​ពី​ទំហំ​នៃ​ការ​ខូច​ខាត​ទ្រព្យ​សម្បត្តិ​ថា អស់​ប៉ុន្មាន​បាន​នៅ​ឡើយ ខណៈ​សមត្ថកិច្ច​កំពុង​បន្ត​ការ​ស្រាវ​ជ្រាវ​រក​មូល​ហេតុ​ពិត៕

អត្ថបទគួរចាប់អារម្មណ៍