រតនគិរីៈ ជនសង្ស័យ២នាក់ពាក់ព័ន្ធនឹងអំពើឃាតកម្មលើយុវជនម្នាក់ បន្ទាប់ពីគេប្រទះឃើញសាកសពអណ្តែតទឹកជ្រោះកាលពីថ្ងៃទី៤ធ្នូ ដែលមានបែកមុខនិងបាក់ក នោះត្រូវនគរបាលក្រុងបានលុងបន្តឃុំខ្លួននៅឡើយ។
លោក តេង សាវុធ អធិការរងនគរបាលក្រុងបានលុងបានឲ្យដឹងថា សមត្ថកិច្ចក្រុងបន្តឃុំខ្លួនយុវជន២នាក់នៅឡើយពាក់ព័ន្ធនឹងឃាតកម្មលើយុវជនម្នាក់ក្រោយពីពួកគេនាំគ្នាទៅងូតទឹកជ្រោះកាលពីថ្ងៃទី២ ខែធ្នូ។
លោកបន្តឲ្យដឹងថា៖«មន្រ្តីជំនាញធ្វើកោសល្យវិច័យឃើញថា សាកសពមានសភាពបែកមុខនិងបាក់ក ប៉ុន្តែករណីនេះសមត្ថកិច្ចមិនទាន់សន្និដ្ឋានថា ជនរងគ្រោះត្រូវវាយដំដោយសារអ្វីទេ គ្រាន់តែឃាត់អ្នកទាំង២ទុកសិន។ ពួកគេមិនអាចបញ្ជាក់ឈ្មោះបានទេ ព្រោះនៅក្នុងដំណាក់កាលស៊ើបអង្កេតនិងបញ្ជូនសំណុំរឿងបន្តទៅតុលាការអស់ហើយ»។
លោកអធិការរងរំឭកថា ជនរងគ្រោះ លូន ឡៃ អាយុ១៩ឆ្នាំ នៅភូមិ២ សង្កាត់កាចាញក្រុងបាលុង ខេត្តរតនគិរី ជាកម្មករនៅរោងចក្រកៅស៊ូក្រែបនិងកែច្នៃដើមកៅស៊ូ ហើយមុនពេលកើតហេតុ ជនរងគ្រោះនិងយុវជនជាកម្មករដូចគ្នា២នាក់ទៀត បានបបួលគ្នាទៅផឹកស្រាថ្នាំ អស់១លីត្រ។
លោកបន្តដោយស្រង់តាមសម្តីជនសង្ស័យទាំង២ថា បន្ទាប់ពីផឹករួចពួកគេបាននាំគ្នាទៅងូតទឹកជ្រោះអូរកាចាញនៅប្រមាណ៧០០ម៉ែត្រពីរោងចក្រ ដែលពេលងូតនោះពួកគេងូតហែលនិងលោតទឹកលេងធម្មតា។
លោក បន្តថា បន្ទាប់ពីជនសង្ស័យងូតទឹកហើយក៏ឡើងមកលើគោកអង្គុយចាំជនរងគ្រោះ ព្រោះខោអាវគេនៅក្បែរនោះដែរ តែដោយចាំមិនឃើញក៏នាំគ្នាចូលធ្វើការទៅរីឯដំណឹងបាត់មិត្តភក្តិក៏ពួកគេមិនបានប្រាប់ទៅក្រុមគ្រួសារឲ្យដឹងដែរ ពេលល្ងាចទើបប្រាប់ហើយក៏ឆោឡោនាំគ្នាដើររក។ លោកថា សពជនរងគ្រោះ ត្រូវក្រុមគ្រួសារប្រទះឃើញអណ្តែតក្នុងទឹកជ្រោះនៅម៉ោង៩ព្រឹកថ្ងៃទី៤ធ្នូ ឡើងហើមមើលលែងស្គាល់ទៅហើយ។
លោកថា ៖ «ស្នាមបាក់ឆ្អឹងកនោះមិនដឹងថា ថាលោតទឹកត្រូវនឹងផ្ទាំងថ្មបាក់កឬមកពីមូលហេតុណាមួយច្បាស់លាស់នៅឡើយ»៕
