ភ្នំពេញៈ ជនសង្ស័យពាក់ព័ន្ធគ្រឿងញៀនម្នាក់ត្រូវនគរបាលខណ្ឌ៧មករា បន្តឃុំខ្លួនបន្ទាប់ពីចាប់និងរឹបអូសបានថ្នាំញៀន ជិត២០កញ្ចប់ និងវត្ថុតាងមួយចំនួន កាលពីថ្ងៃទី៣ ធ្នូ នៅក្នុងសង្កាត់មិត្តភាព ខណ្ឌ៧មករា។
លោក យិន សាន អធិការនគរបាលខណ្ឌ៧មករា បានឲ្យដឹងកាលពីម្សិលមិញថា ជនសង្ស័យពាក់ព័ន្ធនឹងគ្រឿងញៀន ម្នាក់នោះកំពុងតែឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដើម្បីសាកសួរ។ លោក បន្តថា ៖«យើងបានកសាងសំណុំរឿងនិងគ្រោងបញ្ជូនជនសង្ស័យទៅសាលាដំបូងរាជធានីភ្នំពេញ នៅពេលដែលសមត្ថកិច្ចជំនាញរៀបចំឯកសាររួចរាល់»។
សមត្ថកិច្ចនគរបាលខណ្ឌ ៧ មករា បានរំឭកថា ជនសង្ស័យឈ្មោះ ម៉ុន រិទ្ធី ភេទប្រុស អាយុ៣៣ឆ្នាំ ស្នាក់នៅផ្ទះលេខ៤០៤E3 ផ្លូវកម្ពុជាក្រោម សង្កាត់មិត្ដភាព ខណ្ឌ៧មករា ត្រូវសមត្ថកិច្ចឃាត់ខ្លួនកាលពីព្រឹកថ្ងៃទី៣ ខែធ្នូ នៅមុខវិទ្យាល័យបាក់ទូក និងដកហូតបានថ្នាំញៀនប្រភេទក្រាម ពណ៌សជាង២០កញ្ចប់មានធំមានតូច នៅក្នុងកាបូបស្ពាយជាប់នឹងខ្លួនគេ។ បន្ទាប់មកសមត្ថកិច្ចបាននាំជននេះទៅឆែកឆេរកន្លែងស្នាក់នៅក្នុងសង្កាត់មិត្ដភាព បានរកឃើញកាំភ្លើងខ្លី១ដើម ម៉ាកK-54 មានគ្រាប់ ដាវសាម៉ូរ៉ៃ១ដើម សម្លៀកបំពាក់ឈុតប៉ារ៉ាមួយចំនួន និង ទុសៀ ដែលមានបង់កាំភ្លើងAK ចំនួន៣មានគ្រាប់៦២គ្រាប់ បង់កាំភ្លើងអឹម១៦ គ្មានគ្រាប់និងថ្នាំញៀនខ្លះទៀត។
លោក នី ចរិយា ប្រធានផ្នែកស៊ើបអង្កេតសមាគមការពារសិទ្ធិមនុស្សអាដហុក ធ្លាប់លើកឡើងថាបញ្ហាគ្រឿងញៀនមាននៅកម្ពុជាកាលពី១០ឆ្នាំមុន ដោយសារតែអ្នកប្រព្រឹត្តបទល្មើសភាគច្រើនមិនបានទទួលទោសត្រឹមត្រូវ ហើយច្រើនតែរួចខ្លួន។
លោកបន្តថា៖«អ្នកដែលមានអំណាចបុណ្យស័ក្តិច្រើនតែជាអ្នកប្រព្រឹត្តបទល្មើសធំៗមិនទទួលទោសទណ្ឌទេ វាបានជះឥទ្ធិពលដល់សព្វថ្ងៃ រហូតធ្វើឲ្យអ្នកខ្លះយល់ថាឲ្យតែគេមានលុយ មានបុណ្យស័ក្តិគឺគេអាចគេចពីប្រព័ន្ធច្បាប់បានយ៉ាងងាយ»។ លោកថា ការនេះធ្វើឲ្យអ្នកប្រព្រឹត្តបទល្មើសគ្រឿងញៀនរៀបបណ្តាញរឹងមាំមានគ្នីគ្នាកាន់តែច្រើន ក្លាយជាកម្លាំងអាចតដៃសមត្ថកិច្ចបាន។
លោកបន្ថែមថា៖«ដោយមើលឃើញថា កម្ពុជាមានភាពធូររលុងផ្នែកប្រព័ន្ធយុត្តិធម៌នេះ បានធ្វើឲ្យឈ្មួញ ឬឧក្រិដ្ឋជនគ្រឿងញៀនទាំងជនកម្ពុជា ទាំងជនបរទេស ប្រើភាពចន្លោះប្រហោងនេះជ្រកកោននិងលាក់ខ្លួន ហេតុនេះទើបបញ្ហាគ្រឿងញៀនចេះតែកើតមានមិនចេះចប់»៕
