The Phnom Penh Post Search

Search form




Logo of Phnom Penh Post newspaper Phnom Penh Post - ចាប់​ស្ត្រី​មក​លួច​ទារក​នៅ​ពេទ្យ​បញ្ជូន​ទៅ​តុលាការ




ចាប់​ស្ត្រី​មក​លួច​ទារក​នៅ​ពេទ្យ​បញ្ជូន​ទៅ​តុលាការ

ចាប់​ស្ត្រី​មក​លួច​ទារក​នៅ​ពេទ្យ​បញ្ជូន​ទៅ​តុលាការ

131025_06
កូនដែលបាត់ក្នុងពេទ្យមានជ័យ ត្រូវបានប្រគល់ឲ្យម្តាយវិញ គឹម សារុំ

ភ្នំពេញៈ ស្រ្តី​ជាតិ វៀតណាម ម្នាក់​ដែល​បន្លំ​លួច​ទារក​ពី​មន្ទីរពេទ្យ​បង្អែក​ខណ្ឌ មាន​ជ័យ កាល ថ្ងៃ​ចន្ទ ត្រូវ​សមត្ថកិច្ច​បញ្ជូន​ទៅ​តុលាការ​ភ្នំពេញ​នៅ​ថ្ងៃ​សុក្រ​នេះ​បន្ទាប់​ពី​ឃាត់​ខ្លួន​បាន​ពេល​ជន​នេះ​ទៅ​ធ្វើ​សំបុត្រ​កំណើត​ទារក នោះ នៅ​សង្កាត់ ទឹកថ្លា ខណ្ឌ សែនសុខ កាល​ពី​ថ្ងៃ​ពុធ។

លោក គង់ សាម៉ន នាយ​ផ្នែក​ព្រហ្មទណ្ឌ ខណ្ឌ មាន​ជ័យ ឲ្យ​ដឹង​ថា ស្រ្តី​សង្ស័យ​មាន​ឈ្មោះ សុខ ចាន់ធី អាយុ ៣៧ ឆ្នាំ ស្នាក់នៅ​បន្ទប់​ជួល​ក្នុង​សង្កាត់ ទឹកថ្លា ខណ្ឌ សែន​សុខ ត្រូវ​សមត្ថកិច្ច​ឃាត់​ខ្លួន​សាក​សួរ​និង​ធ្វើ​កំណត់​ហេតុ​សារភាព​ពាក់​ព័ន្ធ​នឹង​បទ​ល្មើស​លួច​ទារក​នៅ​មន្ទីរពេទ្យ​បង្អែក មាន​ជ័យ​រួច​ហើយ។ លោក​ថា ជន​សង្ស័យ​នឹង​ត្រូវ​បញ្ជូន​ទៅ​សាលា​ដំបូង​រាជធានី​ភ្នំពេញ​នៅ​រសៀល​ថ្ងៃ​សុក្រ​នេះ។

លោក​ថា៖ «យើង​មិន​ទាន់​ចោទ​លើ​បទ​ល្មើស​អ្វី​ទេ​ព្រោះ​ក្នុង​ច្បាប់​ពុំ​មាន​បទ​លួច​មនុស្ស​ប៉ុន្តែ អាច​ចោទ​ពី​បទ​ពង្រត់​ឬ​អំពើ​ជួញ​ដូរ។ ប៉ុន្តែ​ការ​ចោទ​យ៉ាង​ណា​នោះ​អាស្រ័យ​លើ​តុលាការ​សម្រេច»។

លោក​បន្ត​ឲ្យ​ដឹង​ទៀត​ថា ស្រ្តី​រូប​នេះ​សារភាព​ប្រាប់​ប៉ូលិស​ថា គេ​លួច​ទារក​នេះ​ទៅ​មិន​មែន​យក​ទៅ​លក់​ដូរ​អី​ទេ គ្រាន់​តែ​ចង់​យក​ទៅ​ចិញ្ចឹម​ធ្វើ​ជា​កូន​ប៉ុណ្ណោះ។ លោក​បន្ត​ថា មូលហេតុ​ដែល​អាច​ឃាត់​ខ្លួន​ស្រ្តី​សង្ស័យ​បាន ដោយ​សារ​ពី​ថ្ងៃ ទី២៣ តុលា គាត់​បាន​យក​ទារក​ទៅ​ចុះ​សំបុត្រ​កំណើត​នៅ​សង្កាត់ ទឹកថ្លា ដោយ​ប្រាប់​មន្ត្រី​សង្កាត់​ថា ជា​កូន​បង្កើត តែ​នៅ​ពេល​សួរ​នាំ​ពី​ថ្ងៃ​ខែ​ឆ្នាំ​កំណើត ទីទើ មិន​ប្រាប់​ភ្លាម​ទើប​ធ្វើ​ឲ្យ​មន្រ្តី​សង្កាត់​សង្ស័យ ក៏​ឃាត់​នាំ​ខ្លួន​មក​ប្រគល់​ឲ្យ​សមត្ថកិច្ច​ខណ្ឌ មានជ័យ សួរ នាំ​ទើប​គេ​ឆ្លើយ​សារភាព។

ឈ្មោះ មិញ ជូ អាយុ ៤៤ ឆ្នាំ ប្តី​ស្រី​សង្ស័យ ជា​កម្មករ​សំណង់ ពេល​យក​បាយ​ទៅ​ឲ្យ​ប្រពន្ធ​នៅ​ខណ្ឌ មាន​ជ័យ ប្រាប់​ថា គាត់​មិន​បាន​រៀបការ​នឹង​គ្នា​ទេ តែ​បាន​ស្រឡាញ់​គ្នា​យូរ​ឆ្នាំ​ហើយ ប៉ុន្តែ​គ្មាន​កូន ទើប​ប្រពន្ធ​ខ្លាច​គាត់​រត់​ចោល​ក៏​ទៅ​បន្លំ​យក​កូន​គេ​បែប​នេះ។

គូវ ស្រីលក្ខណ៍ ជា​ម្តាយ​ទារក​បាន​រៀបរាប់​ថា កូន​តូច​របស់​នាង​ត្រូវ​សមត្ថកិច្ច​ខណ្ឌ មានជ័យ យក​មក​ប្រគល់​ឲ្យ​កាល​ពី​ព្រលប់​ថ្ងៃ​ពុធ បន្ទាប់​ពី​រក​ឃើញ​ក្នុង​ការ​ឃាត់​ខ្លួន​ស្រ្តី​វៀតណាម​នោះ​នៅ​សង្កាត់ ទឹកថ្លា ហើយ​កូន​នាង​មាន​សុខភាព​ល្អ​ទេ។

ស្រីលក្ខណ៍ និយាយ​ដោយ​ក្ដី​រំភើប​ថា៖ «ខ្ញុំ​រក​ពាក្យ​អ្វី​មក​និយាយ​មិន​បាន​ទេ ពេល​ដែល​បាន​ឃើញ​មុខ​កូន​វិញ។​ខ្ញុំ​អរគុណ​អ្នក​ដែល​បាន​ជួយ​ខ្ញុំ។ ខ្ញុំ​ដាក់​ឈ្មោះ​កូន​ប្រុស​ខ្ញុំ​ថា ពៅ សំណាង ព្រោះ​អី​កូន​ខ្ញុំ​មាន​សំណាង​ណាស់ ដែល​បាន​មក​ជួប​ពុក​ម៉ែ​វិញ»។

ទារក មាន​ទម្ងន់ ២,៣ គីឡូក្រាម​ត្រូវ​បាន​ស្រ្តី​សង្ស័យ​បន្លំ​ចូល​ក្នុង​បន្ទប់​នៃ​មន្ទីរពេទ្យ​បង្អែក មានជ័យ លួច​យក​កាល​ពី​ម៉ោង ៤ រសៀល​ថ្ងៃ​ចន្ទ​កន្លង​ទៅ ដោយ​ស្ត្រី វៀតណាម​រូប​នេះ​មក​ធ្វើ​ជា​រាក់ទាក់​សួរ​នាំ ហើយ​បាន​ឲ្យ​លុយ ២ ម៉ឺន​រៀល​ទៅ​បង​ប្រុស​ម្តាយ​ទារក​ឲ្យ​ទៅ​ទិញ​ស្រោម​ដៃ​ស្រោម​ជើង​ឲ្យ​ក្មេង ហើយ​គេ​ឆ្លៀត​ឱកាស​សុំ​ម្តាយ​យក​ទៅ​ងូត​ទឹក​ឲ្យ រួច​ក៏​បន្លំ​យក​គេច​ខ្លួន​បាត់​តែ​ម្តង៕

អត្ថបទគួរចាប់អារម្មណ៍