The Phnom Penh Post Search

Search form




Logo of Phnom Penh Post newspaper Phnom Penh Post - ចាប់​អ្នក​ទោស​ហែក​គុក​ម្នាក់​បាន​វិញ​ក្នុង​៣នាក់




ចាប់​អ្នក​ទោស​ហែក​គុក​ម្នាក់​បាន​វិញ​ក្នុង​៣នាក់

ចាប់​អ្នក​ទោស​ហែក​គុក​ម្នាក់​បាន​វិញ​ក្នុង​៣នាក់

កំពង់ចាមៈ អ្នក​ទោស​ឧក្រិដ្ឋ​ម្នាក់ ក្នុង​ចំណោម​គូកន​៣​នាក់​ដែល​ហែក​គុក​រត់​កាល​ពី​យប់​ថ្ងៃ​ទី១ ខែ​តុលា ឆ្នាំ​មុន ត្រូវ​ចាប់​ខ្លួន​បាន​និង​បញ្ជូន​ទៅ​ពន្ធនាគារ​ខេត្ត​កំពង់​ចាម​វិញ​កាល​ពី​ថ្ងៃ​ទី​៥ មករា។

លោក ជឹម សេងហុង ស្នងការ​រង​នគរបាល​ខេត្ត​បាន​ឲ្យ​ដឹង​ថា សមត្ថកិច្ច​ចាប់​បាន​ជន​ឧក្រិដ្ឋ​ម្នាក់ ក្នុង​ចំណោម​៣​នាក់​បន្ទាប់​ពី​នគរបាល​ដាក់​កម្លាំង តាម​ដាន​និង​ផ្សព្វ​ផ្សាយ​រូប​ថត​ពួក​គេ​តាម​គោល​ដៅ​គ្រប់​ស្រុក​និង​ប៉ុស្តិ៍​នគរបាល​ក្នុង​ខេត្ត។

លោកឲ្យដឹងថា៖ «មុន​ចាប់​ខ្លួន​ជន​សង្ស័យ​បាន​ទៅ​រក​ទិញ​ថ្នាំ​ក្រពះ​នៅ​ម្តុំ​ផ្សារ​ស្ទឹង ហើយ​ក៏​ត្រូវ​កម្លាំង​បង្កប់​យើង​ព័ទ្ធ​ចាប់​តែ​ម្តង។ ជន​នេះ​ត្រូវ​បាន​តុលាការ​ខេត្ត​កាត់​ឲ្យ​ជាប់​គុក​ចំនួន ៣៥​ឆ្នាំ ពី​បទ​រំលោភ​សម្លាប់»។

លោក កែវ នរ៉ាភី អធិការរង​ស្រុក​ពញា​ក្រែក ប្រាប់​ពី​ម្សិល​មិញ​ថា ជន​សង្ស័យ ឌឿក តុង អាយុ​៣២​ឆ្នាំ រស់​នៅ​ភូមិ​ជាច ឃុំ​ជាច ស្រុក​តំបែរ ខេត្ត​កំពង់​ចាម ត្រូវ​នគរបាល​ស្រុក​ចាប់​បាន បន្ទាប់​ពី​ដាក់​កម្លាំង​តាម​ស្វែង​រក​រយៈ​ពេល​៣-៤​ថ្ងៃ​មុន​ចាប់​ខ្លួន។ លោក​ថា៖ «មុន​ចាប់​ខ្លួន​ជន​នេះ​នគរបាល​ទទួល​បាន​តម្រុយ​ពី​ប្រជា​ពលរដ្ឋ​រាយ​ការណ៍​ថា គេ​កំពុង​លាក់​ខ្លួន​និង​ចេញ​ចូល​នៅ​ម្ដុំ​ផ្សារ​ស្ទឹង​នោះ។

លោកបន្តថា ថ្ងៃ​ចាប់​ខ្លួន​អ្នក​ទោស​ឧក្រិដ្ឋ ឌឿក តុង នេះ​មាន​គ្នា៣​នាក់​កំពុង​ជិះ​ម៉ូតូ​១គ្រឿង​មក​ទិញ​ថ្នាំ​ពេទ្យ​នៅ​ម្តុំ​ផ្សារ​ស្ទឹង ដោយ​មាន​ពាក់​ម៉ាស់​បិទ​មុខ ហើយ​ត្រូវ​កម្លាំង​យើង ឃើញ​ធ្វើ​ការ​ឡោម​ព័ទ្ធ​ចាប់​បាន​តែ​ម្តង។

លោក​ឲ្យ​ដឹង​ថា បើ​តាម​ដីកា​របស់​តុលាការ​ជន​នេះ​ជាប់​ពាក់​ព័ន្ធ​នឹង​បទ​ល្មើស​ច្រើន​និង​ជា​មេ​ខ្លោង​ធំ​មួយ​ដែល​បាន​ដើរ​លួច​និង​ប្លន់​ស្ទើរ​គ្រប់​ស្រុក​ក្នុង​ខេត្ត​កំពង់​ចាម ហើយ​ក៏​ជា​ជន​ឧក្រិដ្ឋ​ជាប់​ចោទ​ពី​បទ​រំលោភ​សម្លាប់​ផង។

លោក​បន្ដ​ថា នគរបាល​ស្រុក​ពញា​ក្រែក បាន​រង្វាន់​លើក​ទឹក​ចិត្ដ​ចំនួន​២លាន​៥សែន​រៀល ពី​លោក​ផ្ទាល់ ពី​លោក​អគ្គនាយក​នៃ​អគ្គនាយក​ដ្ឋាន​ពន្ធនាគារ និង​ពី​ប្រធាន​ពន្ធនាគារ​ខេត្ដ​កំពង់​ចាម។

គួររំឭកថា នៅ​យប់​ថ្ងៃ​ទី១ ខែ​តុលា​ឆ្នាំ​មុន អ្នក​ទោស​៦​នាក់ បាន​អារ​ចម្រឹង​ដែក​រត់​ចេញ ពី​គុក​ខេត្ត ក្នុង​នោះ​៣​នាក់​ចាប់​បាន​មក​វិញ ឯ​៣​នាក់​ទៀត​បាន​រត់​បាត់ មាន​ឈ្មោះ ឡុង ប៊ុន​ផេង ត្រូវ​ឃុំ​១៥​ឆ្នាំ, លី ឡុង ត្រូវ​ជាប់​ទោស​៥៦​ឆ្នាំ និង ឌឿក តុង ត្រូវ​ជាប់​ឃុំ​៣៥​ឆ្នាំ៕

អត្ថបទគួរចាប់អារម្មណ៍