ភ្នំពេញៈ ជនសង្ស័យជាចោរប្លន់ម្នាក់ក្នុងចំណោមបក្ខពួក២នាក់ត្រូវនគរបាលខណ្ឌពោធិ៍សែនជ័យបន្តឃុំខ្លួននៅអធិការដ្ឋានខណ្ឌនៅឡើយ ដើម្បីសាកសួរនិងកសាងសំណុំរឿងបញ្ជូនទៅសាលាដំបូងភ្នំពេញ បន្ទាប់ពីបានធ្វើសកម្មភាពប្លន់ម៉ូតូហើយត្រូវពលរដ្ឋព្រួតគ្នាចាប់ កាលពីថ្ងៃសៅរ៍។
លោក វង សេរីវុធ អធិការរងនគរបាលខណ្ឌពោធិ៍សែនជ័យបានប្រាប់ឲ្យដឹងថា ជនសង្ស័យជាចោរប្លន់ម៉ូតូនោះសមត្ថកិច្ចបន្តឃុំខ្លួននៅអធិការខណ្ឌនៅឡើយដើម្បីសាកសួររកបក្ខពួក។ លោកបញ្ជាក់ថា៖«ជនសង្ស័យនឹងត្រូវបញ្ជូនទៅតុលាការមិនឲ្យហួសកំណត់ក្នុងនីតិវិធីឡើយ»។
លោក ផាន់ ភឿន នាយប៉ុស្តិ៍សង្កាត់កំបូលកាលពីម្សិលមិញប្រាប់ថា ករណីនេះកើតឡើងនៅភូមិតាសេក សង្កាត់កំបូល ខណ្ឌពោធិ៍សែនជ័យ រីឯជនសង្ស័យឈ្មោះ រស់ ធឿន ភេទប្រុសអាយុ២៣ឆ្នាំមុខរបរមិនប្រាកដ ស្នាក់នៅផ្ទះជួលនៅភូមិផ្សារកំបូល សង្កាត់កំបូល ស្រុកកំណើតនៅភូមិត្រពាំងពិការ ឃុំ-ស្រុករមាសហែក ខេត្តស្វាយរៀង។ ចំណែក ឯជនរងគ្រោះ ឈ្មោះ ផាន តុលា ភេទប្រុស អាយុ២៦ឆ្នាំ អ្នកបើកបររថយន្ត និងស្នាក់នៅផ្ទះជួល ក្នុងភូមិតានួន សង្កាត់កំបូលដែរ។
លោកប្រាប់ថា ជននេះបានលួចម៉ូតូម៉ាកហុងដា គុបសេ៩០ ពណ៌ទឹកប្រាក់ពាក់ស្លាកលេខកណ្ដាល1F-0486 ខណៈដែលម្ចាស់ម៉ូតូចាក់សោហើយដើរមើលបន្ទប់ជួល លុះម្ចាស់ដើរផុតបន្តិចក៏ត្រូវក្រុមចោរដែលមានបក្ខពួក២នាក់បញ្ឆេះម៉ូតូ។ ម្ចាស់ម៉ូតូរត់មកតាមក៏ត្រូវគ្នាវាម្នាក់ដកកាំភ្លើងខ្លីភ្ជង់និងជិះឌុបគ្នាចេញទៅ ប៉ុន្តែជនរងគ្រោះក៏ស្រែកចោរៗ ពេលនោះអ្នកជិតខាងនាំគ្នាយកម៉ូតូដេញតាមពួកវាភ័យក៏ជិះម៉ូតូធ្លាក់ជង្ហុកដួលត្រូវពលរដ្ឋចោមវាយឡើងទ្រមខ្លួន ខណៈដែលគ្នីគ្នាវាម្នាក់ទៀតរត់គេចខ្លួនបាត់។
លោកបន្តថា៖«ដោយសារតែកំហឹង ជនសង្ស័យត្រូវពលរដ្ឋវាយបែកក្បាលហូរឈាម ប៉ុន្តែមិនដឹងជាយកអ្វីវាយទេ ព្រោះសមត្ថកិច្ចទៅមិនទាន់ ខណៈសមត្ថកិច្ចទៅដល់និងបាននាំជនសង្ស័យទៅព្យាបាលនៅមន្ទីរពេទ្យ។
លោកមេធាវី គួយ ធុនណាបានពន្យល់ពីផ្លូវច្បាប់ទាក់ទងនឹងករណីនេះថា៖ «មិនថាជននោះជាចោរឬជាអ្វីទេ ប្រសិនបើមានការប្រើហិង្សាបែបនេះគឺខុសច្បាប់ប៉ុន្តែពលរដ្ឋអាចចាប់ជនប្រព្រឹត្តនោះប្រគល់ឲ្យនគរបាល»។
លោកបន្តថា ៖«ករណីនេះអាចត្រូវចោទពីបទមនុស្សឃាតឬពីបទបង្ករបួសស្នាម»។
លោក អំ សំអាត ទីប្រឹក្សាបច្ចេកទេសនៃសមាគមការពារសិទ្ធិមនុស្សលីកាដូយល់ឃើញថា ករណីប្រើហិង្សាក្រៅប្រព័ន្ធច្បាប់នេះភាគច្រើនកើតមានលើជនសង្ស័យហើយត្រូវមនុស្សជាក្រុមព្រួតគ្នាវាយឲ្យរបួសឬក៏ស្លាប់។ នេះបើតាមសមាគមលីកាដូធ្វើការ អង្កេតកន្លងមក។
កាលពីខែតុលាកន្លងទៅ ជនសង្ស័យម្នាក់ឈ្មោះ ឈា ឡៃហេង ភេទប្រុស អាយុ៤០ឆ្នាំ រស់នៅក្នុងភូមិ ត្រពាំងចារ ឃុំក្រឡា ស្រុកកំពង់សៀមខេត្តកំពង់ចាម ដែលធ្វើសកម្មភាពលួចឆក់ប្លន់អ្នកទៅបោះបាយបិណ្ឌ ត្រូវមហាជនវាយដល់ស្លាប់ នៅវាលស្រែ ក្បែរវត្តនៅក្នុងភូមិត្រពាំងត្មាត ឃុំស្រម៉ ស្រុកជើងព្រៃ។
កាលពីក្នុងអំឡុងខែកញ្ញា ក្រុមចោរប្លន់អ្នកលក់មាសដូរលុយនៅផ្សារជម្ពូវ័ន្ត ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ពីរនាក់ ក៏ត្រូវម្ចាស់ផ្ទះបាញ់ឲ្យរបួស និងត្រូវប្រជាជនព្រួតគ្នាវាយរហូតដល់ស្លាប់ដែរ ក្រោយពីធ្វើសកម្មភាពបានសម្រេចហើយនោះ៕
