The Phnom Penh Post Search

Search form




Logo of Phnom Penh Post newspaper Phnom Penh Post - ចោរ​ម្នាក់​ប្លន់​កាស៊ីណូ​ក្អម​សំណ​បាន​យ៉ាង​ស្រួល

ចោរ​ម្នាក់​ប្លន់​កាស៊ីណូ​ក្អម​សំណ​បាន​យ៉ាង​ស្រួល

ចោរ​ម្នាក់​ប្លន់​កាស៊ីណូ​ក្អម​សំណ​បាន​យ៉ាង​ស្រួល

121106_10
ទីតាំងកាស៊ីណូ ថ្មពេជ្រ នៅតំបន់ព្រំដែន ក្អមសំណ ក្នុងស្រុកលើកដែក ខេត្តកណ្តាល សហការី

កណ្តាលៈ កាស៊ីណូ​ថ្ម​ពេជ្រ នៅ​ជាប់​ព្រំដែន​វៀត​ណាម​នៅ​ក្នុង​ភូមិ​ក្អម​សំណ​ក្រោម ឃុំក្អម​សំណ ស្រុក​លើក​ដែក ខេត្ដ​កណ្ដាល ត្រូវ​សមត្ថកិច្ច​អះ​អាង​ថា ត្រូវ​ចោរ​ប្លន់​ប្រដាប់​អាវុធ​ម្នាក់​បន្លំ​ធ្វើ​ជា​ភ្ញៀវ​ចូល​ទៅ​បាញ់​ប្លន់​និង​វាយ​មេការ​ម្នាក់​ឲ្យ​រង​របួស និង​ប្រមូល​យក​បាន​ប្រាក់​ជាង​៦ពាន់​ដុល្លារ កាល​ពី​យប់​ម្សិល​មិញ។

លោក រស់ ចន្ថា អធិការ​នគរបាល​ស្រុក​លើក​ដែក​កាល​ពី​ម្សិល​មិញ​បាន​ប្រាប់​ថា តាម​ការ​បំភ្លឺ​ពី​បុគ្គលិក​បម្រើ​ការ​នៅ​ក្នុង​កាស៊ីណូ ថ្ម​ពេជ្រ​ដែល​មាន​អ្នក​គ្រប់​គ្រង​ឈ្មោះ សុង អ៊ុង ភេទ​ប្រុស អាយុ​៤៧​ឆ្នាំ ជន​ជាតិ​ខ្មែរ មាន​ទី​លំនៅ ក្នុង​សង្កាត់​ទំនប់​ទឹក ខណ្ឌ​ចំការ​មន រាជធានី​ភ្នំពេញ គឺ​នៅ​ម៉ោង​ប្រហែល​ជា​១រំលង​អ្រធ្រាត្រ ឆ្លង​ចូល​ថ្ងៃទី៥ ខែ​វិច្ឆិកា មាន​ជន​បន្លំ​ជា​ភ្ញៀវ​ម្នាក់ ប្រដាប់​ដោយ​អាវុធ​ខ្លី​មួយ​ដើម បាន​ចូល​ទៅ​ភ្ជង់​វាយ​បុគ្គលិក និង​បាញ់​គំរាម​មួយ​គ្រាប់ រួច​ប្លន់​យក​លុយ​នៅ​ក្នុង​កាស៊ីណូ រួច​ហើយ​គេច​ខ្លួន​បាត់​ដោយ​សុវត្ថិភាព។

លោក​ឲ្យ​ដឹង​ទៀត​ថា៖​«ចោរ​ប្លន់​ម្នាក់​នេះ ប្រមូល​យក​បាន​ប្រាក់​ជាង​៦ពាន់​ដុល្លារ ក្នុង​នោះ លុយ​ដុល្លារ​ជាង​៤ពាន់​ដុល្លារ​និង​លុយ​ដុង​វៀតណាម​គិត​ជា​ដុល្លារ ជាង​២ពាន់​ដុល្លារ​ថែម​ទៀត»។ លោក​ថា ជន​សង្ស័យ​ពាក់​អាវ​ពណ៌​ទឹក​ប៊ិច​ដៃ​វែង ពាក់​អាវ​កាក់​ពណ៌​ខ្មៅ​ពី​លើ ស្លៀក​ខោពណ៌​ខ្មៅ ពាក់​មួក​និង​ស្បែក​ជើង​ប៉ាតា​ពណ៌ស មុខ​ពាក់​ម៉ាស់​ជិត ក្នុង​ដៃ​មាន​កាន់​កាំភ្លើង​ខ្លី​១ដើម និង​កាំបិត​ផ្គាក់​មួយ ដើរ​ចូល​ក្នុង​កាស៊ីណូ​ធ្វើ​សកម្ម​ភាព​ភ្ជង់​បុគ្គលិក​និង​ភ្ញៀវ រួច​បាញ់​គំរាម​១គ្រាប់ មុន​នឹង​ធ្វើ​ការ​ប្រមូល​ប្លន់​យក​ប្រាក់។

លោក​ប្រាប់​បន្ត​ថា៖ «កម្លាំង​សមត្ថកិច្ច​ចម្រុះ​និង​កម្លាំង​ជំនាញ​កំពុង​តែ​ពិនិត្យ​និង​ស្រាវ​ជ្រាវ​មើល​តាម​កាមេរ៉ា​សុវត្ថិភាព​ដែល​បំពាក់​នៅ​ក្នុង​កាស៊ីណូ​នោះ​បាន​បង្ហាញ​រូបភាព​ជន​សង្ស័យ​មាន​អាយុ ប្រហែល​ជាង​២០​ទៅ​៣០ឆ្នាំ និង​មាន​ពាក់​ម៉ាស​បិទ​មុខ​ផង»។

លោក​បន្ត​ថា ៖ «តាម​រយៈ​កាមេរ៉ា​សុវត្ថិភាព​នេះ ជា​ជំហាន​ដំបូង​សមត្ថកិច្ច​បាន​ដាក់​ការ​សង្ស័យ​ទៅ​លើ​ករណី​ពីរ ទី១​យើង​ឆ្ងល់​ថា ធម្មតា​ច្បាប់​នៅ​ក្នុង​កាស៊ីណូ​ភ្ញៀវ​ដែល​ចូល​ទៅ​គឺ​មិន​ឲ្យ​ពាក់​អ្វី​បិទ​បាំង​មុខ​ទេ ចុះ​ហេតុ​អ្វីបាន​ជា​ចោរ បិទ​មុខ​ចូល​បាន។ មួយ​ទៀត ជន​សង្ស័យ​បិទ​មុខ​អាច​ខ្លាច​មាន​អ្នក​នៅ​ក្នុង​កាស៊ីណូ​នោះ​ស្គាល់ ប៉ុន្តែ​សមត្ថកិច្ច​នៅ​មិន​ទាន់​សន្និដ្ឋាន ជាក់​លាក់​ទៅ​លើ​អ្វី​មួយ​ពិត​ប្រាកដ​នៅ​ឡើយ តែ​តាម​រយៈ​កាមេរ៉ា​អាច​ជា​តម្រុយ​ធ្វើ​ការ​ស្រាវ​ជ្រាវ»។

លោក អ៊ាវ ចំរើន ស្នង​ការ​នគរបាល​ខេត្ត​កណ្តាល​ប្រាប់​កាល​ពី​ម្សិល​មិញ​ថា ជន​ល្មើស​ចោរ​ប្លន់​បាន​ប្រើ​កាំភ្លើង​ខ្លី​វាយ​ក្បាល​មេការ​ម្នាក់​ក្នុង​កាស៊ីណូ ហើយ​គំរាម​ប្លន់​យក​លុយ​នៅ​ក្នុង​កេស​នៅ​នឹង​តុ​ល្បែង ដែល​ករណី​នេះ​សមត្ថកិច្ច​ជំនាញ​កំពុង​តែ​ស្រាវ​ជ្រាវ​យ៉ាង​សកម្ម ដើម្បី​ស្វែង​រក​ចាប់​ខ្លួន​ជន​សង្ស័យ ខណៈ​តម្រុយ​នៃ​មុខ​សញ្ញា​បាន​ដឹង​ខ្លះៗ​ហើយ​នោះ។

កាល​ពី​ម្សិល​មិញ មិន​អាច​ស្វែង​រក​ការ​បំភ្លឺ​ណា​មួយ ពី​អ្នក​គ្រប់គ្រង​កាស៊ីណូ​ថ្ម​ពេជ្រ បានទេ៕

អត្ថបទគួរចាប់អារម្មណ៍