The Phnom Penh Post Search

Search form




Logo of Phnom Penh Post newspaper Phnom Penh Post - ចៅអធិការ​វាយ​ដំ​នេន​១​អង្គ​សុគត​មិន​ទាន់​ផ្សឹក​ទេ

ចៅអធិការ​វាយ​ដំ​នេន​១​អង្គ​សុគត​មិន​ទាន់​ផ្សឹក​ទេ

ចៅអធិការ​វាយ​ដំ​នេន​១​អង្គ​សុគត​មិន​ទាន់​ផ្សឹក​ទេ

កំពង់ចាមៈ ព្រះចៅ​អធិការ​វត្ត​ប៉ើស បន្ត​ឃុំ​ខ្លួន​នៅ​សាលា​គណ​ខេត្ត​កំពង់់ចាម ដើម្បី​រង់ចាំ​ការ​ស៊ើប​អង្កេត ចំណែក​ជន​សង្ស័យ​២នាក់​ទៀត​បាន​បញ្ជូន​ទៅ​សាលា​ដំបូង​ខេត្ត​ហើយ ពាក់ព័ន្ធ​ករណី​បង្ក​របួស​ស្នាម​លើ​លោក​នេន១​អង្គ ដែល​បណ្តាល​ឲ្យ​សុគត ក្នុង​មន្ទីរពេទ្យ​កាលពី​៨ខែ​មុន។

លោក ស្រី សុភ័ក្រ ប្រធាន​មន្ទីរ​ធម្មការ​ខេត្ត​កំពង់ចាម​បាន​ប្រាប់​ឲ្យ​ដឹង​ពី​ម្សិលមិញ​ថា៖​«ព្រះចៅអធិការ​អង្គ​នេះ មិន​ទាន់​ផ្សឹក​ទេ កំពុង​ធ្វើ​ការ​ស៊ើប​អង្កេត​និង​នៅ​អនុញ្ញាត​ឲ្យ​លោក​គង់​នៅ​សាលា​គណ​ខេត្ត»។

លោក ជឹម សេងហុង ស្នងការ​រង​នគរបាល​ខេត្ត បាន​ឲ្យ​ដឹង​ថា៖ «ជន​សង្ស័យ​ទាំង​២នាក់ ជា​អ្នក​ដាំ​បាយ​នៅ​ក្នុង​វត្ត ដែល​ជាប់​ពាក់ព័ន្ធ​ក្នុង​រឿង​នោះ បាន​បញ្ជូន​ទៅ​តុលាការ កាលពី​ថ្ងៃទី​២៣ ខែ​វិច្ឆិកា រួច​ហើយ»។

ព្រះចៅអធិការ​វត្ត​ប៉ើស ត្រូវ​អនុគណ​ស្រុក​ក្រូច​ឆ្មារ​នាំ​ខ្លួន​ទៅ​មន្ទីរ​ធម្មកា​ខេត្ត និង​មនុស្ស​២​នាក់​នាំ​ទៅ​ស្នងការ​ខេត្ត​នៅ​ព្រឹក​ថ្ងៃទី​២១ វិច្ឆិកា ពាក់ព័ន្ធ​ករណី​ធ្វើ​ទារុណកម្ម​ជ្រុល​ដៃ​លើ​លោក​នេន​១អង្គ ដែល​គង់​នៅ​វត្ត​ជាមួយ​រហូត​សុគត​ពី​៨​ខែ​មុន បន្ទាប់​ពី​ពេទ្យ​មិន​អាច​ជួយ​បាន។

លោក ជួន ណារិន មន្ត្រី​នគរបាល​ព្រហ្មទណ្ឌ ស្រុក​ក្រូច​ឆ្មារ បាន​ឲ្យ​ដឹង​ថា សមត្ថកិច្ច​បាន​ចុះ​ឃាត់​ខ្លួន​ជនសង្ស័យ​២​នាក់​នោះ​នាំ​ទៅ​ស្នងការ​ខេត្ត រីឯ​លោក​សង្ឃ​ជា​ចៅអធិការ​វត្ត​នោះ ត្រូវ​អនុគណ​ស្រុក​នាំ​ទៅ​មន្ទីរ​ធម្មការ​ខេត្ត។

ព្រះចៅអធិការ​វត្ត​ប៉ើស​នាម ស្រូយ គឹមហ៊ង ព្រះជន្ម​៤៨​ឆ្នាំ ឈ្មោះ យាន លាង ភេទ​ប្រុស អាយុ​៣៧​ឆ្នាំ ជា​អ្នក​ដាំ​បាយ​និង​ប្រពន្ធ បាន ប៊ុនរី អាយុ​៣៩​ឆ្នាំ នៅ​ភូមិ​ប៉ើស២ ឃុំ​ប៉ើស ស្រុក​ក្រូច​ឆ្មារ។  មន្ត្រី​នគរបាល​ស្រុក ប្រាប់​ថា ក្រោយ​នេន១​អង្គ​នេះ​សុគត នៅ​ថ្ងៃទី​២៣ ឧសភា ចៅអធិការ​វត្ត​ទូរស័ព្ទ​ទៅ​ប្រាប់​ញោម​លោក ឈ្មោះ ខៃ ជឹម ថា «លោក​កូន​បាន​ដោះ​ស្បង់​ចីវរ​ជិះ​កង់​ទៅ​តាម​ស្រី​បាត់​ហើយ​មិន​ដឹង​ដល់​ណា​មិន​បាច់​មក​តាម​រក​ទេ» ហើយ​បាន​ឃុបឃិត​សូក​លុយ​គ្រូ​ពេទ្យ​១ពាន់​ដុល្លារ ដើម្បី​យក​សព​ទៅ​កប់​ចោល​បំបាត់​តាង​ថែម​ទៀត។

លោក ជួន ណារិន ថ្លែងថា៖ «យើង​ចោទ​ជន​ទាំង​បី​ពីបទ​ហិង្សា​ដោយ​ចេតនា​បណ្តាល​ឲ្យ​មនុស្ស​ស្លាប់ បន្ទាប់​ពី​ញោម​លោក​នេន​រងគ្រោះ​បាន​ដាក់​ពាក្យ​បណ្តឹង​មក​អធិការ​ស្រុក»។

ចៅអធិការ​វត្ត ជនសង្ស័យ និង​ញោម​លោក​នេន​រងគ្រោះ មិន​អាច​ទាក់ទង​បាន​ទេ៕

អត្ថបទគួរចាប់អារម្មណ៍