The Phnom Penh Post Search

Search form

Logo of Phnom Penh Post newspaper Phnom Penh Post - ចៅ​អធិការ​វត្ត​ប៉ើស​ជាប់​បណ្តឹង​បាត់​ពី​វត្ត




ចៅ​អធិការ​វត្ត​ប៉ើស​ជាប់​បណ្តឹង​បាត់​ពី​វត្ត

ចៅ​អធិការ​វត្ត​ប៉ើស​ជាប់​បណ្តឹង​បាត់​ពី​វត្ត

130307_10a
ចៅអធិការវត្តប៉ើសនាម ស្រូយ គីមហ៊ង កាលពីពេលកន្លងមក សហការី

កំពង់ចាមៈ ព្រះ​គ្រូចៅ​អធិ​ការ​វត្ត​ប៉ើស​២ ក្នុង​ស្រុក​ក្រូចឆ្មារ ដែល​ជាប់​បណ្តឹង​នៅ​សាលាដំបូង​ខេត្ត​កំពង់ចាម ពាក់​ព័ន្ធ​បទ​ចោទ​ថា​បាន​ធ្វើ​ទារុណកម្ម​លើនេន​១អង្គ​នៅ​ក្នុង​វត្ត រហូត​បាត់​ខ្លួន តាំង​តែ​ពី​ខែ​មេសា ​ឆ្នាំ​២០១២ ហើយ​ត្រូវ​ខាង​វិន័យ​ធរ​ខេត្ត​និមន្ត​ទៅ​គង់​នៅ​វត្ត​ជាមួយ មួយ​រយៈ និង​បាន​ចាត់​ឲ្យ​ទៅ​គ្រប់​គ្រង​វត្ត​វិញ ឥឡូវ​បាន​បាត់​ខ្លួន​ជិត​១០​ថ្ងៃ​មក​ហើយ ប៉ុន្តែ​ ខាង​វិន័យ​ធរ​ខេត្ត​អះអាង​ថា មិន​រត់​ទៅណា​ទេ។

លោក ស៊ុន ហេង នាយ​ប៉ុស្តិ៍​នគរបាល​ប៉ើស ២ បាន​ឲ្យដឹង​ថា​ចំពោះ​ចៅ​អធិការ​វត្ត​ប៉ើស២ ​រត់​គេច​ឬ​មិន​រត់​នោះ​លោក​មិន​ដឹង​ច្បាស់​ទេ គ្រាន់​តែ​ដឹង​ថា ចៅ​អធិការ​អង្គ​នេះ​មន្ត​ចេញ​ពី​វត្ត​តាំង​ពីថ្ងៃ​ទី២ មីនា មក​ម្ល៉េះ តែ​លោក​មិន​ដឹង​ថា លោក​និមន្ត​ទៅ​ណា​ទេ ព្រោះ​លោក​និមន្ត​តាម​ឡាន​ផ្ទាល់​របស់​លោក​ចេញ​បាត់​ទៅ។

ម្តាយមីង​នេន​បាត់​ខ្លួនអ្នក​ស្រីជ្រង់ គ្រុយ មាន​ការ​ងឿង​ឆ្ងល់​ពី ករណី​ចៅ​អធិការ​វត្ត ស្រួយ គឹម​ហ៊ង គេច​ខ្លួន​ព្រោះ​លិខិត​សម្តេច​សង្ឃ ទេព វង្ស បញ្ជូ​នទៅ​សាលា ខេត្ត​និង​សាលា​ដំបូង​ខេត្ត​ឲ្យ​ចាត់​វិធាន​ការ​លើ​លោក​ទេ ប៉ុន្តែ ​ហេតុ​អ្វី​បាន​ជា​ដឹង​ដល់​ចៅ​អធិការ​វត្ត​អង្គ​នេះ​រត់​គេច​បាត់។

អ្នកស្រីថា ករណីនេះ​អាជ្ញាធរ​ពាក់​ព័ន្ធ ត្រូវ​អន្តរាគមន៍​ស្វែង​រក​ចៅ​អធិការ​វត្តប៉ើស​មក​វិញ​ឲ្យ​មក​ទទួ​ល​ទោស តាម​ច្បាប់។

តាមលិខិត​បង្គាប់​ការ លេខ​០០២/១៣ ម.ស.រ ដែល​ភ្នំពេញ​ប៉ុស្តិ៍​ទទួល​បាន និង​មាន​ឡាយ​ព្រះ​ហស្ត​លេខា សម្តេច​ព្រះ​អគ្គ​មហា​សង្ឃ​រាជា​ធិបតី ទេព វង្ស ចុះថ្ងៃ​ទី៨ កុម្ភៈ ​ឆ្នាំ​២០១៣ មាន​​ប្រថាប់​ត្រា​សម្តេច​សង្ឃ​ផង​បាន​សុំដក ភិ​ក្ខុ ស្រូយ គឹម​ហ៊ង ព្រះ​គ្រូ​ចៅ​អធិការ​វត្ត​និ​គ្រោធារាម​ហៅ​វត្ត​ប៉ើស តាម​សេចក្តី​សម្រេច​លេខ​០០១/១៣ ម.ស.រ ចុះថ្ងៃ​៣១ ខែមករា ឆ្នាំ​២០១៣។ ក្នុង​លិខិត​បង្គាប់​ការ​នោះ បាន​សូមឲ្យ​លោក​ប្រធាន​តុលាការ​ខេត្ត​កំពង់ចាម រួម​ជាមួយ​ស្នង​ការ​នគរបាល​ខេត្ត​និមន្ត​សម្តេច​ឧត្តម​វង្សា មួង រ៉ា ជា​លេ​ខាធិការ​ដ្ឋាន​ថេរ​សភា​សង្ឃនៃ​ព្រះ​រាជា​ណាចក្រ​កម្ពុជា ទៅ​ប្រកាស​ដក ភិក្ខុនាម ​ស្រូយ គីម​ហ៊ង ចៅ​អធិការ​វត្ត​និគ្រោធា​រាម​ហៅ វត្ត​ប៉ើស ប្រគល់​ទៅ​ឲ្យ​តុលាការ​វិនិច្ឆ័យ​ទោស​តាម​សេចក្តី​សម្រេច​លេខ ​០០១ និង​របាយ​ការណ៍​កំណត់​ហេតុ​ជិត​១០០​ទំព័រ។

Content image - Phnom Penh Post

លិខិតជា​សេចក្តី​សម្រេច ០០១ /១៣ មសរ ចុះ​ថ្ងៃ​៣១ ខែ​មករា នោះ បាន​សម្រេច​យោង​ទៅ​លើ​របាយ​ការណ៍​កំណត់​ហេតុ​ជិត​១០០​ទំព័រ និង​ការ​សម្រេច​នៃ​កិច្ច​ប្រជុំ​វិសាមញ្ញ​របស់​ក្រុម​ជំនុំ​វិន័យ ធរសង្ឃ​ថ្ងៃ​ទី​៣១​មករា​នោះ ដែល​បាន​សម្រេច​ដក​ចៅ​អធិការ​វត្ត​ប៉ើស​នេះ ​បណ្តោះ​អាសន្ន ​ក្រោម​បទ​ចោទ​ត្រូវ​អាបត្តិ​បរា​ជិក តម្រូវ​ឲ្យ​លា​ចាក​សិក្ខាបទ ​និង​ប្រគល់​ខ្លួន​ឲ្យ​ទៅ​អាជ្ញាធរ​មាន​សមត្ថកិច្ច​ធ្វើ​ការ​វិនិច្ឆ័យ​ទោស។

ទាក់ទិននឹង​ការ​បាត់​ចៅ​អធិការ​ពី​វត្ត ព្រះ​វិន័យ​ធរសង្ឃ​ខេត្ត តេជ​គុណ យិត សុខា មាន​សង្ឃដី​កាល​ពី​ម្សិល​មិញ​ថា ចៅ​អធិការ​វត្ត​ប៉ើស​២ មិន​បាត់​ទៅ​ណា​ទេ គឺគង់​នៅក្នុង​វត្ត​ប៉ើស​ហ្នឹង លោក​មិន​បាន​គេច​វេះទេ ​តែ​ប៉ុន្មាន​ថ្ងៃ​នេះ លោក​និមន្ត​ទៅ​សូត្រមន្ត នៅ​ខេត្ត​កំពង់ចាម ទៅ​មកៗ​ទេ។

ព្រះ​តេជគុណ យិត សុខា បាន បញ្ជាក់ដែរ​ថា៖«ការ​ចោទ​ចៅអធិការ​ពាក់​ព័ន្ធ​នឹង​ការ​បាត់​ខ្លួន​កូន​ នេន នាម សុខ ហេង ព្រះ​ជន្ម​២១​វស្សា នោះ បើ​ជា​គ្រហស្ថ​វិញ គឺ​រួច​ខ្លួន​បាត់​ទៅ​ហើយ​វា​គ្មាន​ទោស​ពៃរ៍​ទេ ព្រោះ​គ្មាន​ភ័ស្តុ​តាង​អី»។

ព្រះ​អង្គ​បន្ត​ថា៖ «ពួក​អាប​ង្ខូច​ចេះ​តែ​បង្ខូច​ទេ ​ពួក​អា​ខូច​ហ្នឹង​ មិន​ទៅ​ណា​ទេ»។ ទាក់​ទិន​នឹង​លិខិត​បង្គាប់​ការលេខ​០០២ និង​សេចក្តី​សម្រេច​០០១​របស់​សម្តេច​ព្រះ​សង្ឃរាជ​ទេព វង្ស ព្រះ​វិន័យ​ធរ​ខេត្ត​អង្គ​នេះ​មាន​ថេរ​ដីកា​ថា មិន​មែន​លិខិត​ត្រឹម​ត្រូវ​ទេ​ ​ព្រោះ​អត់​មាន​ដាក់​មកសា​លា​មេ​គណ​ខេត្ត​​ ហើយ​អត់​មានត្រាពី​សម្តេច​ ទេ​ព វង្ស។ ព្រះ​អង្គ​បន្តថា៖ ​«លោក​ជា​សម្តេច​ព្រះសង្ឃ​រាជ​ប៉ុន​ណា​ណី ​ម៉េច​បាន​ឡាយ​ជា​ព្រះវិ​ន័យ​ធរទៅ​វិញ»។ ព្រះ​វិ​ន័យ​ធរអះ​អាង​ថា បាន​ទទួលលិខិត​នោះ​មួ​យ​ច្បាប់​ ដែល​បង្គាប់​ឲ្យ​ស​មត្ថ​កិច្ច​នគរ​បាល​និង​ខាង​ព្រះរាជ​អាជ្ញា​ដក​ចៅ អធិការ​វត្ត​ប៉ើស​ ធ្វើ​បែ​ប​នេះឲ្យ​ធ្វើ​កា​រអី​កើ​ត ហើយ​ថា ​ខាង​ព្រះ​រាជ​អាជ្ញា និង​ខាង​នគរបាល ក៏មិន​បាន​ធ្វើ​តាម​លិខិត​បង្គាប់​នោះ​ដែរ។

ជំនួយ​ការ​សម្តេច​ព្រះឧត្តម​វង្សា​មួង រ៉ា សុំ​មិន​បញ្ចេញ​ឈ្មោះ​បាន​អះអាង​ថា សេចក្តី​សម្រេច និង​លិខិត​បង្គាប់​របស់​សម្តេច​សង្ឃ​ពិត​ជា​លិខិត​ផ្លូវ​ការ និងថា វិ​ន័យ​ធរ​ខេត្ត​​មិន​យល់​នីតិ​វិធី​សង្ឃ។

គួរ​រំឭកថា បន្ទាប់​ពីបាត់​នេន​នាម សុ​ខ ហេង ពី​ខែ​មេសា ឆ្នាំ​២០១២​ ប៉ុន្មាន​ថ្ងៃ​ក្រោយ​មក​ចៅ​អធិការ​វត្ត​ប៉ើស​បាន​ទូរស័ព្ទ​ប្រាប់​ឪពុក ម្តាយ​នេន​នោះ​ថា​ លោក​កូន​​បាន​រត់​ទៅ​តាម​ស្រី​​បាត់​ ថែម​ទាំង​ខ្ចី​លុយ​គេនិ​ងយក​កង់​មួយ​ទៅ​ជា​មួយ​ផង​ តែ​ក្រោយ​មក​ខាង​ក្រុម​គ្រួសារ​នេន​សង្ស័យ​ថា កូនត្រូ​វ​ចៅ​អធិការ​ធ្វើ​ទារុណ​កម្ម​យក​ទៅ​ពេទ្យរួចសុគត​ និង​បាន​សូក​លុយ​ពេទ្យ ដុត​សព​បំបាត់​ភ័ស្តុតាង ជាដើម ក៏​មាន​រឿង​ក្តីក្តាំ​បន្ត​បន្ទាប់​ឡើង​ដល់​សាលា​ដំបូង​ខេត្ត​កំពង់ចាម កោះ​ហៅ​ និង​បើក​ការ​ស៊ើប​អង្កេត​លើ​លោក​ចៅ​អធិការ​មួយ​រយៈ ​តែក្រោ​យ​មក​ត្រូវ​តុលាការ​ឲ្យ​នៅក្រៅ​ឃុំ​រហូត​​ឲ្យ​ទៅ​គ្រប់​គ្រង​វត្ត​ នោះវិញ ​​​ហើយ​ក៏បាត់​ខ្លួន​ជិត​១០ថ្ងៃ​នេះ​ ធ្វើ​​ឲ្យគេ​សង្ស័យ​ថា មក​ពី​​ឃើ​ញ​លិខិត​បង្គ​ាប់​ការ​​របស់​សម្តេច​សង្ឃ​ ទេព​ វង្ស។

លោក ​ជឹម សេងហុង​ ស្នងការរង​ខេត្ត​កំពង់ចាម​កាល​ពី​ម្សិល​មិញ​ប្រាប់​ថា មិន​ទាន់​ឃើញ​លិខិត​របស់​សម្តេច​សង្ឃ ទេព វង្ស​ផ្ញើ​មក​ស្នង​ការ​ដ្ឋាន​ខេត្តទេ ខាង សាលា​ដំបូង​ខេត្ត​និង​សាលា​ខេត្ត​កំពងចាម​មិន​អាច​ទាក់​ទង​សុំ​ការ​បញ្ជាក់​​ពី​លិខិត​បង្គាប់​ការ​​នេះ​បាន​ទេ កាល​ពី​ម្សិលមិញ៕

អត្ថបទគួរចាប់អារម្មណ៍