The Phnom Penh Post Search

Search form




Logo of Phnom Penh Post newspaper Phnom Penh Post - ឆក់​ខ្សែ​ក​ហើយ​បក​មក​សួរ​ម្ចាស់​វិញ​ត្រូវ​ពលរដ្ឋ​ចាប់​ប្រគល់​ឲ្យ​ប៉ូលិស




ឆក់​ខ្សែ​ក​ហើយ​បក​មក​សួរ​ម្ចាស់​វិញ​ត្រូវ​ពលរដ្ឋ​ចាប់​ប្រគល់​ឲ្យ​ប៉ូលិស

ឆក់​ខ្សែ​ក​ហើយ​បក​មក​សួរ​ម្ចាស់​វិញ​ត្រូវ​ពលរដ្ឋ​ចាប់​ប្រគល់​ឲ្យ​ប៉ូលិស

ភ្នំពេញៈ ក្រុម​ចោរ​ស្ទើរ​ភ្លើង​មួយ​ក្រុម មាន​គ្នា ៣ នាក់ ជិះ​ម៉ូតូ​សង់ ១២៥ មួយ​គ្រឿង ត្រូវ​បាន​ស្ត្រី​រង​គ្រោះ និង​អ្នក​ធ្វើ​ដំណើរ​តាម​ផ្លូវ ដេញ​ចាប់​ខ្លួន​បាន​ម្នាក់ កាល​ពី​យប់​ទៀប​ភ្លឺ​ថ្ងៃ​អាទិត្យ ខណៈ​ដែល​ក្រុម​ចោរ​ទាំង​នេះ បាន​ឆក់​យក​ខ្សែ​ក​ស្ត្រី​រង​គ្រោះ​បាន​សម្រេច​ហើយ ក៏​វិល​ត្រឡប់​មក​សួរ​ស្ត្រី​រង​គ្រោះ​វិញ​ថា តើ​ខ្សែក​នឹង​ពិត​ឬ​ក៏​ក្លែង​ក្លាយ ហើយ​ស្ត្រី​រង​គ្រោះ​បាន​ស្រែក​ឲ្យ​គេ​ជួយ។

លោក ផាន់ ណា នាយ​នគរបាល ប៉ុស្តិ៍​ស្រះ​ចក បាន​ឲ្យ​ដឹង​កាល​ពី​ម្សិល​មិញ​ថា ជន​សង្ស័យ ដែល​ឃាត់​ខ្លួន​បាន​ម្នាក់​នោះ ត្រូវ​បញ្ជូន​ទៅ​អធិការ​ដ្ឋាន​នគរបាល​ខណ្ឌ​ដូន​ពេញ​ហើយ បន្ទាប់​ពី​ធ្វើ​ការ​សាក​សួរ កាល​ពី​ម្សិល​មិញ តែ​លោក​សុំ​មិន​អាច​អធិប្បាយ​លម្អិត​ទេ។

មន្រ្តី​នគរបាល​ស្រះ​ចក​ម្នាក់ ដែល​សុំ​មិន​បញ្ចេញ​ឈ្មោះ បាន​ឲ្យ​ដឹង​ថា មុន​ពេល​កើត​ហេតុ ស្រ្តី​រង​គ្រោះ​ជា​ម្តាយ​មីង និង​ក្មួយ​ទាំង​បី​នាក់​កំពុង​ធ្វើ​ដំណើរ​តាម​មាត់​ទន្លេ សំដៅ​ទៅ​ផ្ទះ របស់​ខ្លួន នៅ​សង្កាត់​ទួល​សង្កែ។ ពេល​មក​ដល់​ម្តុំ​កំពង់​ផែ​ក្បែរ​ភោជនីយ​ដ្ឋាន​ទីតានិក ផ្លូវ​ព្រះ​ស៊ី​សុវត្ថិ​ក៏​ស្រាប់​តែ​មាន​បុរស​ម្នាក់ ក្នុង​ចំណោម ៣ នាក់ មក​គំរាម​ប្រុង​ឆក់​យក​ទូរស័ព្ទ ពី​ស្រ្តី​រង​គ្រោះ​ម្នាក់​ក្នុង​ចំណោម​៣​នាក់​នោះ ប៉ុន្តែ​ជន​សង្ស័យ ឃើញ​នារី​ម្នាក់​ទៀត ជា​ក្មួយ ពាក់​ខ្សែ​ក ដែល​ទំនង​ជា​មាន​តម្លៃ​ជាង​ក៏​ទៅ​ឆក់​យក​ខ្សែ​ក​របស់​ស្រ្តី​នោះ។

មន្រ្តី​រូប​នោះ​ឲ្យ​ដឹង​ទៀត​ថា ជន​សង្ស័យ​មាន​គ្នា​៣​នាក់ ជិះ​ម៉ូតូ ១ គ្រឿង​ធ្វើ​សកម្មភាព​ឆក់​បាន​សម្រេច។ តែ​ដោយ​សារ​ពួកគេ​មិន​ទុក​ចិត្ត​ថា ជា​ខ្សែក​ពិត​ឬ​កាឡៃ ក៏​នាំ​គ្នា​ជិះ​ម៉ូតូ​ត្រឡប់​មក​សួរ​ស្រ្តី​រង​គ្រោះ​វិញ​ថា ជា​ខ្សែក​កាឡៃ ឬ​ពិត? ដោយ​ស្រ្តី​ទាំង​បី​នាក់​មើល​ទៅ​ជន​សង្ស័យ​ទំនង​ជា​គ្មាន​អាវុធ​អ្វី​នោះ ក៏​នាំ​គ្នា​ស្រែក​ចោរៗ ផ្អើល​ដល់​ពលរដ្ឋ​រស់​នៅ​ក្បែរ​នោះ នាំ​គ្នា​ជិះ ម៉ូតូ​ដេញ​តាម​ស្ទាក់​ចាប់​បាន​ម្នាក់ និង​វាយ​បែក​ក្បាល​បែក​មាត់ ខណៈ​នគរបាល​ទៅ​ទាន់។

មន្រ្តី​នគរបាល​ប៉ុស្តិ៍​ស្រះ​ចក​ប្រាប់​ថា ជន​សង្ស័យ ដែល​ត្រូវ​បាន​ចាប់​ខ្លួន​នោះ មាន​ឈ្មោះ​ពិសិដ្ឋ អាយុ ១៩ ឆ្នាំ​មុខ​របរ​និង​ទី​កន្លែង​ស្នាក់​នៅ​មិន​ពិត​ប្រាកដ បាន​ជិះ​ម៉ូតូ​សេ ១២៥ ជា​មធ្យោបាយ​ធ្វើ​សកម្មភាព​ឆក់។

រីឯ​នារី​រង​គ្រោះ ឈ្មោះ គឹម ស្រីពៅ ​អាយុ​១៨​ឆ្នាំ មុខ​របរ​ជា​កម្មការិនី រោង​ចក្រ​កាត់​ដេរ មាន​ស្រុក​កំណើត​នៅ​ភូមិ​ក្រួស​ឃុំ​ក្រួស​ស្រុក​ស្វាយ​ជ្រុំ ខេត្ត​ស្វាយ​រៀង។ រីឯ​ខ្សែក​ដែល​ចោរ​ឆក់​យក​ទៅ​នោះ​មាន​តម្លៃ​ប្រមាណ​ជា​១០០​ដុល្លារ។

មន្រ្តី​នគរបាល ប្រាប់​តាម​រយៈ​ចម្លើយ​សារភាព របស់​ជន​សង្ស័យ​ថា ខ្សែក​ដែល​ឆក់​បាន​នោះ ត្រូវ​បាន​បក្ខ​ពួក​គេ ២ នាក់​ទៀត យក​ទៅ​បាត់​ហើយ៕

អត្ថបទគួរចាប់អារម្មណ៍