បន្ទាយមានជ័យៈ នគរបាលប្រចាំច្រកព្រំដែនអន្តរជាតិប៉ោយប៉ែត ត្រូវពលរដ្ឋចោទថា បានទារលុយពីពួកគាត់ក្នុងម្នាក់៦០០បាត ប្រមាណ៦ម៉ឺនរៀល សម្រាប់អ្នកកាន់លិខិតឆ្លងដែនថ្មី ប៉ុន្តែ បើអ្នកកាន់លិខិតឆ្លងដែនធ្លាប់ចេញចូល គឺតម្រូវឲ្យបង់ត្រឹមតែ១ម៉ឺនរៀល ឬ ក៏១០០បាតប្រាក់ថៃ។
លោក សៅ មុន្នី អាយុ១៩ឆ្នាំ នៅភូមិជ្រៃគ្រហឹម ឃុំកំពង់ឫស្សី ស្រុកពារាំង ខេត្តព្រៃវែង និងសមាជិក៦នាក់បានប្រាប់កាលពីម្សិលមិញមុនពេលឆ្លងចូលទៅប្រទេសថៃ តាមច្រកអន្តរជាតិប៉ោយប៉ែតថា ពួកគាត់ត្រូវនគរបាលប្រចាំច្រកទ្វារអន្តរជាតិប៉ោយប៉ែតទារលុយក្នុងម្នាក់៦០០បាត បើទោះជាពួកគាត់មាន លិខិតឆ្លងដែនត្រឹមត្រូវហើយក៏ដោយ។
លោក សៅ មុន្នី ប្រាប់ទៀតថា ពួកគាត់សុំឆ្លងចូលទៅលេងបងប្អូននៅក្នុងប្រទេសថៃ ហើយបានធ្វើលិខិតឆ្លងដែនត្រឹមត្រូវ ប៉ុន្តែនៅពេលលោកបង្ហាញលិខិតឆ្លងដែនទៅនគរបាលពិនិត្យស្រាប់តែត្រូវគេទារឲ្យបង់ប្រាក់ថែម៦០០បាតទៀត។ គាត់ថា អ្នកចេញចូលតាមច្រកនោះប្រាប់គាត់ថា បើសិនជាធ្លាប់ចេញចូលគេយកតែ១ម៉ឺនរៀលទៅ១០០បាត។
លោកត្អូញប្រាប់ថា៖ «ទង្វើនេះហាក់មិនត្រឹមត្រូវទេ ព្រោះលិខិតឆ្លងដែននេះបញ្ជាក់ពីភាពស្របច្បាប់រួចទៅហើយ ហេតុអ្វីក៏មន្ត្រីនគរបាលទាំងនោះយកលុយពីពលរដ្ឋច្រើនយ៉ាងនេះទៀត»។
លោក រិន បូណា អាយុ២៥ឆ្នាំជាកម្មករស្របច្បាប់ក្នុងចំណោម១០នាក់ដែលឆ្លងដែនទៅធ្វើការនៅខេត្តស្រះកែវ ប្រទេសថៃ បានប្រាប់ដែរថា ពួកគេក៏ត្រូវនគរបាលច្រកទ្វារអន្តរជាតិប៉ោយប៉ែត យកលុយម្នាក់៤០០បាតដែរ បើទោះជាពួកគេធ្លាប់ចេញចូលញឹកញាប់ហើយក្តី។
លោក បូរី នៅភូមិគីឡូម៉ែត្រលេខ៤សង្កាត់ផ្សារកណ្តាល ក្រុងប៉ោយប៉ែត ជាអាជីវកលក់ខោអាវបានប្រាប់ឲ្យដឹងពីម្សិលមិញដែរថា ការទារលុយពីប្រជាពលរដ្ឋរបស់មន្ត្រីច្រកទ្វារអន្តរជាតិប៉ោយប៉ែតនេះ កើតមានជារឿយៗ ហើយបើអ្នកឆ្លងដែនណាប្លែកមុខគេទារលុយពី៦០០ទៅ១ពាន់បាតឯណោះ បើទោះជាមានលិខិតឆ្លងដែនត្រឹមត្រូវអី្វក៏ដោយ។
លោកបន្តថា៖ «តាមច្បាប់គេមិនឲ្យយកលុយទេ ប៉ុន្តែមន្ត្រីនគរបាលច្រកទ្វារចេះតែបង្កើតស្ថានភាពបែបនេះ រហូតដល់ភ្ញៀវបរទេសក៏គេយកលុយដែរ»។
លោកបញ្ជាក់ថា ការយកលុយនេះមានច្រើនសណ្ឋាន ក្នុងពេលប្រថាប់ត្រាចន្លោះពី១០០ទៅ៦០០បាត។ ចំពោះប័ណ្ណឆ្លងដែនដែលមានសុពលភាព៧ថ្ងៃដែលខាងថៃជាអ្នកចេញឲ្យប្រើប្រាស់ តែពេលចូលត្រូវខាងនគរបាលខ្មែរចេញប័ណ្ណតូចមួយបញ្ជាក់លើលិខិតនោះឲ្យពលរដ្ឋខេត្តបន្ទាយមានជ័យនិងខេត្តសៀមរាប ក៏ត្រូវមន្ត្រីនគរបាលច្រកទ្វារចេញឲ្យទាំងអស់ដែរ ទោះជាមកពីខេត្តណាក៏ដោយ ហើយទារយកក្នុងម្នាក់ៗ ពី២ទៅ៣ម៉ឺនរៀលឯណោះ។
លោក ស៊ុំ ចន្ទគា មន្ត្រីសម្របសម្រួលសមាគមអាដហុកប្រចាំខេត្តបន្ទាយមានជ័យបានប្រាប់ថា៖ «រឿងនេះមិនមែនជារឿងថ្មីទេ សូម្បីតែអ្នកអូសរទេះក៏ខាងមន្ត្រីច្រកទ្វារនេះ យកលុយដែរ។ វប្បធម៌បែបនេះនៅតែបន្តកើតមានដដែលៗ ប៉ុន្តែ មិនដឹងថា ខាងមន្ត្រីប្រឆាំងអំពើពុករលួយដឹងឬអត់ទេ? ហើយបើបែបនេះវាធ្វើឲ្យបាត់បង់សណ្តាប់ធ្នាប់កិត្តិយសជាតិខ្លាំងណាស់»។
ពាក់ព័ន្ធនឹងករណីនេះ ភ្នំពេញ ប៉ុស្តិ៍ មិនអាចសុំការបំភ្លឺពីលោក សៅ ប៊ុនរិទ្ធិ មន្ត្រីគ្រប់គ្រងច្រកទ្វារអន្តរជាតិប៉ោយប៉ែតបានទេ ពីម្សិលមិញដោយខ្សែទូរស័ព្ទលោកគ្មានអ្នកទទួល។
ប៉ុន្តែ លោក ខេង ស៊ុម ស្នងការនគរបាលខេត្តបន្ទាយមានជ័យ បានប្រាប់ឲ្យដឹងថា លោកបានដាក់បញ្ជាមិនឲ្យមន្ត្រីប្រចាំច្រកទ្វារយកលុយពីភ្ញៀវមិនថា បរទេស ឬជាជនជាតិខ្មែរទេ។ លោកប្រាប់ថា៖ «ចំពោះព័ត៌មានដែលថា មានមន្ត្រីច្រកទ្វារយកលុយពេលប្រថាប់ត្រា លើលិខិតឆ្លងដែននោះពីមុនមានមែនដោយសារតែភ្ញៀវខ្លះខ្ជិលតម្រង់ជួរហើយគាត់បានជូនសគុណទៅមន្ត្រីដើម្បីបានឆាប់ប៉ុន្តែឥឡូវនេះគ្មានទៀតទេ» ៕
