The Phnom Penh Post Search

Search form




Logo of Phnom Penh Post newspaper Phnom Penh Post - ជនជាតិ​ចិន​១៧​នាក់​ត្រូវ​ចោទ​ពី​បទ​កំហែង​យក

ជនជាតិ​ចិន​១៧​នាក់​ត្រូវ​ចោទ​ពី​បទ​កំហែង​យក

ជនជាតិ​ចិន​១៧​នាក់​ត្រូវ​ចោទ​ពី​បទ​កំហែង​យក

121114_09b
ស្ត្រីជាតិចិនដីគោកពេលនាំចេញពីសាកសួរនៅតុលាការ ផា លីណា

ភ្នំពេញៈ ជនជាតិ​ចិន​តៃវ៉ាន់​ចំនួន​១៦​នាក់​និង​ស្រ្តី​ចិនដី​គោក​ម្នាក់ កាល​ពី​ថ្ងៃ​អង្គារ​ម្សិល​មិញ​ត្រូវ​សមត្ថកិច្ច​នាំ​ទៅ​តុលាការ​ធ្វើ​សាក​សួរ ហើយ​ត្រូវ​ព្រះ​រាជ​អាជ្ញារង​សាលា​ដំបូង​រាជធានី​ភ្នំពេញ សម្រេច​ចោទ​ប្រកាន់​ពី​បទ​កំហែង​យក។

លោក គឹម ឆេងប៊ុន ជា​ក្រឡា​បញ្ជី​របស់​លោក​ព្រះ​រាជ​អាជ្ញារង សៀង សុខ នៃ​សាលា​ដំបូង​រាជធានី​កាល​ពី​ម្សិល​មិញ​បាន​ប្រាប់​ឲ្យ​ដឹង​ថា ជន​ជាតិ​ចិន​តៃវ៉ាន់ រួម​នឹង​ស្ត្រី​ជនជាតិ​ចិន​ដី​គោក ទាំង​១៧​នាក់​នេះ ត្រូវ​ព្រះ​រាជ​អាជ្ញារង​ចោទ​ប្រកាន់​ពី​បទ​កំហែង​យក ហើយ​នឹង​បញ្ជូន​សំណុំ​រឿង​បន្ត​ទៅ​ចៅក្រម​ស៊ើប​សួរ​នៅ​ថ្ងៃ​ពុធ​នេះ។

គួររំឭកថា ជនជាតិ​ចិន​តៃវ៉ាន់​ទាំង​១៦​នាក់ និង​ស្រ្តី​ជន​ជាតិ​ចិន​ដីគោក​ម្នាក់​នេះ​ត្រូវ​សមត្ថកិច្ច​នគរបាល​នាយក​ដ្ឋាន​ចារកម្ម​នៃ​ក្រសួង​មហា​ផ្ទៃ​ឃាត់​ខ្លួន​នៅ​ក្នុង​ការ​ចុះ​បង្រ្កាប កាល​ពី​ថ្ងៃ​ទី៩ ខែ​វិច្ឆិកា ពាក់​ព័ន្ធ​នឹង​បទ​ល្មើស​ជំរិត​ទារ​ប្រាក់​តាម​ប្រព័ន្ធ​អ៊ីនធឺណិត នៅ​ក្នុង​ភូមិ​គ្រឹះ​លេខ​២៦៧៩​ស្ថិត​ក្នុង​ភូមិ​រោងចក្រ សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ។

វត្ថុតាង​ដែល​ពួកគេ​ប្រើ​ប្រាស់​សម្រាប់​ជា​មធ្យោបាយ​បោក​ប្រាស់​នោះ​ត្រូវ​បាន​សមត្ថកិច្ច​ដឹក​ទៅ​រក្សា​ទុក​នៅ​សាលា​ដំបូង​រាជធានី រួម​មាន ឧបករណ៍​បច្ចេក​វិជ្ជា​ទំនើប ប្រព័ន្ធ​អេឡិច​ត្រូនិក សម្រាប់​ជំរិតទារ​ប្រាក់​ឆ្លង​ដែន​ឬ​សម្រាប់​ឆែក​រក​លេខ​គណនី​ធនាគារ និង​អាសយដ្ឋាន​នៅ​ក្រៅ​ប្រទេស ដោយ​ភ្ជាប់​ស៊ើវើ​ពី​ទូរស័ព្ទ ចូល​ទៅ​កុំព្យួទ័រ​ហើយ​រាល់​ការ​និយាយ​ឆ្លើយ​ឆ្លង​ត្រូវ​ថត​ទុក​ទាំង​អស់។ វត្ថុ​តាង​ទាំង​នោះ មាន​ទូរស័ព្ទ​លើ​តុ​ចំនួន​៥៥​គ្រឿង កុំព្យួទ័រ​យួរ​ដៃ​ចំនួន ៧ គ្រឿង​(បោក​បែក ១ គ្រឿង)​ទូរស័ព្ទ​ដៃ​ចំនួន ៩​គ្រឿង និង​រថយន្ត​ឡិច​ស៊ីស​ពាក់​ស្លាក​លេខ ខ2-5031 មួយ​គ្រឿង រួម​ទាំង​ឧបករណ៍​ខាង​អេឡិច​ត្រូនិក​មួយ​ចំនួន​ទៀត។

ក្រុម​ជន​ជាប់​សង្ស័យ ជាតិ​ចិន​តៃវ៉ាន់​និង​ចិន​ដីគោក​ទាំង​១៧ នាក់​នោះ បន្ទាប់​ពី​ព្រះ​រាជអាជ្ញា សាក​សួរ​ចប់​និង​ធ្វើ​ការ​ចោទ​ប្រកាន់​ក៏​ត្រូវ​សមត្ថកិច្ច​នគរបាល​បញ្ជូន​ទៅ​ទុក​នៅ​ក្រសួង​មហា​ផ្ទៃ​វិញ ហើយ​ថ្ងៃ​ពុធ​នេះ​ខាង​ចៅក្រម​ស៊ើប​សួរ នឹង​បន្ត​នីតិវិធី​សាក​សួរ និង​សម្រេច​ថា​ត្រូវ​ដាក់​ឃុំ​នៅ​ពន្ធនាគារ ឬ​ក៏​ត្រូវ​ដោះ​លែង​វិញ៕

អត្ថបទគួរចាប់អារម្មណ៍