The Phnom Penh Post Search

Search form




Logo of Phnom Penh Post newspaper Phnom Penh Post - ជន​រំលោភ​ហើយ​គំរាម​សម្លាប់​និង​បង្ហោះ​រូប​រួម​រ័ក​គ្នា ត្រូវ​បាន​ចាប់​ខ្លួន




ជន​រំលោភ​ហើយ​គំរាម​សម្លាប់​និង​បង្ហោះ​រូប​រួម​រ័ក​គ្នា ត្រូវ​បាន​ចាប់​ខ្លួន

ជន​រំលោភ​ហើយ​គំរាម​សម្លាប់​និង​បង្ហោះ​រូប​រួម​រ័ក​គ្នា ត្រូវ​បាន​ចាប់​ខ្លួន

ភ្នំពេញៈ ជន​សង្ស័យ​ម្នាក់​ត្រូវ​កម្លាំង​សមត្ថកិច្ច​ចាប់​ខ្លួន​និង​បញ្ជូន​ទៅ​តុលាការ​ព្រោះ​តែ​មិន​ព្រម​ចូល​ខ្លួន​ទៅ​បំភ្លឺ​តាម​ដីកា​បង្គាប់ ក្រោយ​ពី​នារី​ជា​អនីតិជន​ម្នាក់​ដាក់​បណ្តឹង​ចោទ​ថា បាន​ចាប់​រំលោភ​នាង​ក្នុង​ផ្ទះ​សំណាក់។

លោកស្រី ស៊ី វណ្ណី ព្រះ​រាជ​អាជ្ញារង​អម​សាលា​ដំបូង​ភ្នំពេញ បាន​ឲ្យ​ដឹង​កាល​ពី​ម្សិល​មិញ​ថា ជន​សង្ស័យ​ត្រូវ​សមត្ថកិច្ច​បញ្ជូន​មក​សាលា​ដំបូង​ភ្នំពេញ​ពី​ព្រឹក​ម្សិល​មិញ ប៉ុន្តែ​ដោយ​មិន​ទាន់​មាន​មេធាវី លោក​ស្រី​ក៏​អនុញ្ញាត​ឲ្យ​រក​មេធាវី​សិន។ លោក​ស្រី​បញ្ជាក់​ថា៖ «ខ្ញុំ​បាន​អនុញ្ញាត​ឲ្យ​ជន​សង្ស័យ​ចេញ​ទៅ​រក​មេធាវី​ដើម្បី​ការពារ​ខ្លួន ប៉ុន្តែ ឲ្យ​ពេល​តែ​មួយ​ល្ងាច​ម្សិល​មិញ​ទេ»។

តាម​ពាក្យ​បណ្តឹង​ជន​រងគ្រោះ​រៀប​រាប់​ថា ជន​សង្ស័យ ស៊ឹម តារា អាយុ​២៦​ឆ្នាំ កាល​ពី​អំឡុង​ដើម​ឆ្នាំ​២០១១​បាន​ស្គាល់​គ្នា​ជាមួយ​នារី​រង​គ្រោះ​ជា​អនីតិ​ជន តាម​រយៈ​បណ្ដាញ​ទំនាក់​ទំនង​សង្គម ហ្វេស​ប៊ុក ហើយ​ក៏​មាន​ទំនាក់​ទំនង​ស្នេហា​និង​បាន​ណាត់​គ្នា​ដើរ​លេង​ទៅ​ញ៉ាំ​អី​នៅ​ម្ដុំ​សន្ធរ​ម៉ុក​ញឹក​ញាប់។ ថ្ងៃ​មួយ​ស៊ឹម តារា បាន​ឲ្យ​នារី​រង​គ្រោះ​ផឹក​ភេសជ្ជៈ​កូកា​កូឡា បន្ទាប់​មក​ក៏​បបួល​នាង​ជិះ​ម៉ូតូ​ដើរ​លេង ហើយ​ដោយ​ដឹង​ថា នារី​រងគ្រោះ​មាន​អារម្មណ៍​មិន​នឹង​ហ្ន គេក៏​ដឹក​នាង​ចូល​ផ្ទះ​សំណាក់​យីហោ សារិកា ហើយ​ក៏​រំលោភ​នាង​នៅ​ទី​នោះ។ នៅ​ពេល​នាង​ដឹង​ខ្លួន ជន​សង្ស័យ​គំរាម កុំ​ឲ្យ​ប្រាប់​រឿង​នេះ​ដល់​អ្នក​ផ្សេង​និង​ក្រុម​គ្រួសារ បើ​មិន​ដូច្នេះ​ទេ គេ​នឹង​សម្លាប់​នាង ព្រម​ទាំង​ហែក​កេរ្ដិ៍​រឿង​នេះ​និង​បញ្ចេញ​រូប​ភាព​ដែល​ពួកគេ​ដេក​ជាមួយ​គ្នា ដោយ​បង្ហាញ​កាំភ្លើង​ជា​ការ​គំរាម​ផង មុន​នឹង​ជូន​នាង​ត្រឡប់​មក​ផ្ទះ​វិញ។

ក្រោយទៀត ឈ្មោះ ស៊ឹម តារា បាន​ហៅ​នាង​ដើរ​លេង ដើម្បី​បាន​ដេក​ជាមួយ​គ្នា​ទៀត​ជា​ច្រើន​ដង​និង​គំរាម​ថា បើ​មិន​មក​ទេ គេ​នឹង​បង្ហោះ​រូប​ភាព​ដែល​គេ​ថត​ពេល​រួមរ័ក​គ្នា​និង​ហែក​កេរ្ដិ៍​រឿង​នេះ។ រហូត​ដល់​ថ្ងៃ​ទី៣ ខែ​វិច្ឆិកា ឆ្នាំ​២០១១ ជន​សង្ស័យ​បាន​ទូរស័ព្ទ​ហៅ​នាង​ចេញ​ពី​ផ្ទះ​ទៀត ប៉ុន្ដែ នាង​បដិសេធ​ថា នាង​មាន​គូ​ដណ្ដឹង​ហើយ ហើយ​អង្វរ​ឲ្យ​ជន​សង្ស័យ​ឈប់​គំរាម​នាង តែ​គេ​នៅ​តែ​គំរាម​ថា នឹង​បង្ហោះ​រូប​ភាព​ដែល​ដេក​ជាមួយ​គ្នា​ឲ្យ​គូដណ្ដឹង​នាង​ឃើញ។ លុះ​មក​ដល់​ថ្ងៃ​ទី២១ ខែ​តុលា ឆ្នាំ​២០១២ ជន​សង្ស័យ​រូប​នេះ ក៏​បាន​បង្ហោះ​រូប​ភាព​ជា​ច្រើន បង្ហាញ​ពី​ទំនាក់​ទំនង​ពួកគេ​ទាំង ២នាក់ និង​បញ្ជូន​រូបភាព​ទាំង​នោះ​ទៅ​ឲ្យ​គូ​ដណ្ដឹង និង​ក្រុម​គ្រួសារ​ផង។ ដោយ​សារ​ទង្វើ​នេះ ទើប​នារី​រង​គ្រោះ​សម្រេច​ចិត្ដ​រក​មេធាវី​ដាក់​ពាក្យ​បណ្ដឹង​មក​សាលា​ដំបូង​រាជធានី​ភ្នំពេញ។

បន្ទាប់​ពី​បាន​ប្តឹង កាល​ពី​ម្សិលមិញ​សមត្ថកិច្ច​ក៏​បាន​ចាប់​ខ្លួន​ជន​សង្ស័យ នៅ​នឹង​ផ្ទះ​លេខ​៤០៥ នៅ​ភូមិ​បឹង​ឈូក សង្កាត់​ទឹក​ថ្លា ខណ្ឌ​សែន​សុខ ក្រោម​ដីកា​ចាប់​ខ្លួន​របស់​តំណាង​អយ្យការ៕

អត្ថបទគួរចាប់អារម្មណ៍