The Phnom Penh Post Search

Search form

Logo of Phnom Penh Post newspaper Phnom Penh Post - ជន​ល្មើស​ពី​បទ​រំលោភ​បូក​សម្លាប់​ត្រូវ​ចាប់​ខ្លួន




ជន​ល្មើស​ពី​បទ​រំលោភ​បូក​សម្លាប់​ត្រូវ​ចាប់​ខ្លួន

ជន​ល្មើស​ពី​បទ​រំលោភ​បូក​សម្លាប់​ត្រូវ​ចាប់​ខ្លួន

កំពង់ធំៈ ជន​សង្ស័យទី៣​ម្នាក់​ក្នុង​ចំណោម​គូកន​ពីរ​នាក់ ត្រូវ​សមត្ថកិច្ច​នគរបាល​ខេត្ត​កំពង់ធំ​តាម​ចាប់​ខ្លួន​តាម​ដីកា​តុលាការ ដល់​ខេត្ត​កំពត និង​បញ្ជូន​ទៅ​ពន្ធនាគារ​ភ្លាមៗ កាល​ពីថ្ងៃ​ទី៥​មីនា ខណៈ​ជន​សង្ស័យ​ត្រូវ​ចូល​រោង​ការ​នៅ​ថ្ងៃទី​១០ មីនា បន្ទាប់​ពី​បាន​នាំ​គ្នីគ្នា ៣ នាក់ ធ្វើ​សកម្មភាព​រំលោភ​ទៅ​លើ​ស្រ្តីរង​គ្រោះ​នៅ​កណ្តាល​វាល​ស្រែ​ហើយ​ចង​ដៃ ជើង​សម្លាប់​ចោល កាល​ពី​ខែ​វិច្ឆិកា ឆ្នាំ​២០១២។

លោក ជា ពឿន មន្ត្រី​នគរបាល​ព្រហ្មទណ្ឌ​កម្រិត​ធ្ងន់​ខេត្ត​កំពង់ធំ​បាន​ឲ្យ​ដឹង​ពី ម្សិល​មិញ​ថា ជន​សង្ស័យ​ទី៣​ ដែល​ពាក់​ព័ន្ធ​នឹង​ករណី​រំលោភ​បូក​ហើយ​សម្លាប់​ស្រ្តី​រងគ្រោះ​ចោល​នៅ ស្រុក​បារាយណ៍​នោះ​ត្រូវ​បាន​ចាប់​ខ្លួន​និង​បញ្ជូន​ទៅ​ពន្ធនាគារ​ខេត្ត កំពង់ធំ​ហើយ​កាល​ពីថ្ងៃ​ទី៥ ខែ​មីនា។

លោក​ថ្លែង​ថា ជន​សង្ស័យ​ទី៣​ក្រោយ​ពី​ដឹង​ថា សមត្ថកិច្ច​ស្រាវជ្រាវ​ចាប់​បាន​គ្នីគ្នា​គេ​២នាក់​មក ក៏​បាន​គេច​ខ្លួន​ទៅ​នៅ​ខេត្ត​កំពត​ប៉ុន្តែ​សមត្ថកិច្ច​បាន​ស្រាវ​ជ្រាវ តាម​ចាប់​ខ្លួន​មក​វិញ ​ខណៈ​ដែល​ជន​នេះ​ត្រូវ​រៀប​ខ្លួន​ចូល​រោងការ​នៅ​ថ្ងៃ​ទី១០ ខែ​មីនា​ខាង​មុខ។

លោកបញ្ជាក់​ថា ៖ «សមត្ថកិច្ច​យើង​ចាប់​ខ្លួន​ជន​សង្ស័យ​ទាំង​៣​នាក់ ទៅ​តាម​ដីកា​ស្វែង​រក​ចាប់​ខ្លួន​របស់​សាលា​ដំបូង​ខេត្ត​កំពង់ធំ ដូច្នេះ​ពេល​យើង​ចាប់​បាន​ក៏​បញ្ជូន​ទៅ​ពន្ធនាគារ​តែ​ម្តង»។

លោក សួង ថេន​ អធិការ​ស្រុក​បារាយណ៍​រំឭក​ថា ជន​សង្ស័យ​ទាំង​៣​នាក់ កាល​ពី​ថ្ងៃទី ២៧ ​ខែ​វិច្ឆិកា ឆ្នាំ២០១២ បាន​នាំ​គ្នា​ចាប់​ស្រ្តី​រង​គ្រោះ​រំលោភ​នៅ​ក្នុង​ចម្ការ​ស្វាយ​ចន្ទី នៅភូមិ​បន្ទាយ​ចាស់ ឃុំ​ត្នោតជុំ ស្រុក​បារាយណ៍ ខេត្ត​កំពង់​ធំ។ ឯស្រ្តី​រង​គ្រោះ​ឈ្មោះ ឆុំ ស៊ាន់ អាយុ២៤​ឆ្នាំ នៅ​ភូមិ-​ឃុំ កើត​ហេតុ ត្រូវ​ជន​សង្ស័យ​ទាំង​៣នាក់​ ចាប់​រំលោភ​ពេល​នាង​ទៅ​ច្រូត​ស្រូវ ហើយ​ចង​ដៃ​ចង​ជើង​សម្លាប់​រួច​យក​ទៅ​ចោល​ក្នុង​ថ្លុក​ក្របី​ទាំង​អាក្រាត​កាយ ទើប​ពួកគេ​រត់​គេច​ខ្លួន​បាត់​អស់។

លោកបន្តថា ក្រោយ​ការ​ស៊ើប​អង្កេត និង​តាម​សាក្សី​ដែល​គាត់​ឡើង​ត្នោត​ក្បែរ​នោះ​ឃើញ​ហេតុការណ៍ និង​សាក្សី​ផ្ទាល់​មាត់​ពីរ​នាក់​បាន​ឃើញ​ពេល​ជន​សង្ស័យ​ធ្វើ​សកម្មភាព ទៅ​លើ​ស្រ្តី​រង​គ្រោះ​បាន​បំភ្លឺ សមត្ថកិច្ច​កំណត់​បាន​មុខ សញ្ញា​ជន​ល្មើស​សង្ស័យ​ទាំង​៣​នាក់ ​មាន​ឈ្មោះ តាំង ចន្នី ភេទ ប្រុស អាយុ១៧ ឆ្នាំ ត្រូវ​ឃាត់​ខ្លួន តាម​ដីកា​សាលា​ដំបូង​ខេត្ត​កំពង់ធំ នៅ​ថ្ងៃទី៤ ខែ​មករា ឆ្នាំ​២០១៣ នៅ​ក្នុង​ផ្ទះ​ជន​សង្ស័យ។ បន្ទាប់​មក​ឈាន​ទៅ​ឃាត់​ខ្លួន​ឃាតក​ឈ្មោះ លន់ ឈឺន ហៅ ខ្មៅ ភេទ​ប្រុស អាយុ​១៧ឆ្នាំ ​នៅ​ភូមិ​សំរោង ឃុំ​ចុង​ដូង ស្រុក​បារាយណ៍ ខេត្ត​កំពង់ធំ តាម​ដីកា​ចៅក្រម​ស៊ើប​សួរ​សាលា​ដំបូង​ខេត្ត​លោក សិត វណ្ណៈ រីឯ​ជនទី៣ ឈ្មោះ អោម ក្រឹម អាយុ១៧​ឆ្នាំ បាន​រត់​គេច​ទៅ​ខេត្ត​កំពត ចាប់​ខ្លួន​បាន​ថ្ងៃ​ទី៥ ខែ​មីនា ខណៈជ​ននេះ​សម្ងំ​លាក់​ខ្លួន​នៅ​ទីនោះ ហើយ​គ្រោង​នឹង​រៀបការ​នៅថ្ងៃ​ទី១០ ខែ​មីនា​ខាង​មុខ ដោយ​សមត្ថកិច្ច​តាម​ទៅ​ចាប់​ដល់​ខេត្ត​កំពតតែ​ម្តង៕

អត្ថបទគួរចាប់អារម្មណ៍