The Phnom Penh Post Search

Search form




Logo of Phnom Penh Post newspaper Phnom Penh Post - ជន​សង្ស័យ​ជួញ​ដូរ​ថ្នាំ​ញៀន​ខ្មែរ-​ឡាវ​៤​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ




ជន​សង្ស័យ​ជួញ​ដូរ​ថ្នាំ​ញៀន​ខ្មែរ-​ឡាវ​៤​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ

ជន​សង្ស័យ​ជួញ​ដូរ​ថ្នាំ​ញៀន​ខ្មែរ-​ឡាវ​៤​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ

121225_09a
គំនរគ្រឿងញៀនដែលសមត្ថកិច្ចរឹបអូសបានហើយយកទៅដុតបំផ្លាញចោលកន្លងមក គឹមឡុង

ភ្នំពេញៈ ជន​សង្ស័យ​ជួញ​ដូរ​គ្រឿង​ញៀន ៤ នាក់ ពីរ​នាក់​ជា​ជន​ជាតិ​ខ្មែរ និង​ពីរ​នាក់​ទៀត ជា​ជន​ជាតិ​ឡាវ ដែល​ត្រូវ​សមត្ថកិច្ច​ចាប់​ខ្លួន កាល​ពី​ថ្ងៃ​អាទិត្យ ជា​មួយ​នឹង​គ្រឿង​ញៀន​ប្រមាណ​ជា ២ គីឡូ​ក្រាម នឹង​ត្រូវ​បញ្ជូន​ទៅ​តុលាការ នៅ​ថ្ងៃ​អង្គារ​នេះ។ នេះ​បើ​តាម​លោក ឧត្តម​សេនីយ៍ ខៀវ សាម៉ន ប្រធាន​នាយក​ដ្ឋាន​ប្រឆាំង​គ្រឿង​ញៀន​ក្រសួង​មហា​ផ្ទៃ បាន​ឲ្យ​ដឹង​កាល​ពី​ម្សិល​មិញ។

លោក ខៀវ សាម៉ន បានឲ្យដឹងថា ជន​សង្ស័យ​ជា​ជន​ជាតិ​ខ្មែរ ២​នាក់ មក​ពី​ខេត្ត​ស្ទឹង​ត្រែង និង​ជន​ជាតិ​ឡាវ ២ នាក់ ដែល​ត្រូវ​ចាប់​ខ្លួន ពាក់​ព័ន្ធ​នឹង​គ្រឿង​ញៀន​នោះ ត្រូវ​បាន​សមត្ថកិច្ច​ជំនាញ ស៊ើប​សួរ និង​កសាង​សំណុំ​រឿង ព្រម​ទាំង​ចោទ​ប្រកាន់​រួច​ហើយ។ លោក​ថ្លែង​ថា៖ «ជន​សង្ស័យ​យើង​កសាង​សំណុំ​រឿង និង​ចោទ​ប្រកាន់​ពួកគេ ពី​បទ​រក្សា​ទុក និង​ចែក​ចាយ​គ្រឿង​ញៀន»។ យើង​រឹប​អូស​បាន​ថ្នាំ​មេតំ​ហ្វេតាមីន​ជិត ២ គីឡូក្រាម បើ​គិត​ជា​ប្រាក់​រាប់​ម៉ឺន​ដុល្លារ​ដែល​ថ្នាំ​ញៀន​នេះ នាំ​ចូល​មក​ពី​ឡាវ។ ដូច្នេះ​វា​គ្រោះ​ថ្នាក់​ខ្លាំង​ណាស់​ប្រសិន​បើ​ចាប់​មិន​បាន»។

កាល​ពី​រសៀល​ថ្ងៃ​អាទិត្យ​កម្លាំង​ការិយា​ល័យ​មន្ទីរ​ប្រឆាំង​គ្រឿង​ញៀន​និង​ការិយា​ល័យ​អន្ដរា​គមន៍ របស់​ក្រសួង​មហា​ផ្ទៃ រួម​នឹង​ព្រះ​រាជ​អាជ្ញា សាលា​ដំបូង​រាជធានី បាន​ចុះ​បង្ក្រាប​ករណី​ជួញ​ដូរ​គ្រឿង​ញៀន នៅ​សណ្ឋាគារ Bolyna Palace បន្ទប់​លេខ ៥០៣ ស្ថិត​ក្នុង​សង្កាត់​ផ្សារ​ថ្មី​ទី​៣ ខណ្ឌ​ដូន​ពេញ ដោយ​បាន​ឃាត់​ខ្លួន​ជន​សង្ស័យ​២​នាក់ ជា​ជន​ជាតិ​ខ្មែរ និង ដក​ហូត​បាន​វត្ថុ​តាង គ្រឿង​ញៀន​ប្រភេទ​មេតំ​ហ្វេតា​មីន (WY) ចំនួន ១០ សុង ស្មើ​នឹង ២០.០០០ គ្រាប់។ ការ​ចុះ​បង្រ្កាប​មួយ​ទៀត ធ្វើ​ឡើង​នៅ​សង្កាត់​ជ្រោយ​ចង្វារ ដោយ​ឃាត់​ខ្លួន​ជន​សង្ស័យ ជា​ជន​ជាតិ​ឡាវ ២ នាក់ និង​រឹប​អូស​បាន​រថយន្ដ​១ គ្រឿង លិខិត​ឆ្លង​ដែន ២ និង​ទូរស័ព្ទ​ដៃ ២​គ្រឿង។ ជន​សង្ស័យ​ទាំង ៤ នាក់ មាន ១.ឈ្មោះ ណាត ថង ភេទ ប្រុស​អាយុ ២១ ឆ្នាំ ជន​ជាតិ​ខ្មែរ ២.ឈ្មោះ ណាត ស៊ុត ភេទប្រុស អាយុ ១៨ ឆ្នាំ ជន​ជាតិ​ខ្មែរ ៣.ឈ្មោះ AMPHON KOUMPHON ភេទ​ប្រុស អាយុ ៣០ ឆ្នាំ ជា​ជន​ជាតិ​ឡាវ និងទី ៤.ឈ្មោះ VONGPHIM KHAMBAY ភេទ​ប្រុស អាយុ ៥២ ឆ្នាំ ជនជាតិឡាវ៕

អត្ថបទគួរចាប់អារម្មណ៍