The Phnom Penh Post Search

Search form

Logo of Phnom Penh Post newspaper Phnom Penh Post - ជន​សង្ស័យ​ពី​បទ​ប្លន់​៧​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ




ជន​សង្ស័យ​ពី​បទ​ប្លន់​៧​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ

ជន​សង្ស័យ​ពី​បទ​ប្លន់​៧​នាក់​ត្រូវ​បញ្ជូន​ទៅ​តុលាការ​ថ្ងៃ​នេះ

ភ្នំពេញៈ ជន​សង្ស័យ​ពី​បទ​ប្លន់ ចំនួន​៧នាក់ នឹង​ត្រូវ​នគរបាល​បញ្ជូន​ទៅ​តុលា​ការ នៅ​ថ្ងៃ​ពុធ​នេះ បន្ទាប់​ពី​ឡោម​ព័ទ្ធ​ចាប់​បាន​ទាំង​ក្រុម ដោយ​មាន​ការ​បាញ់​តដៃ​ជាមួយ​សមត្ថកិច្ច កាល​ពី​ថ្ងៃចន្ទ។

លោក អ៊ិន បូរ៉ា ប្រធាន​នាយក​ដ្ឋាន​ព្រហ្ម​ទណ្ឌ​ក្រសួង​មហា​ផ្ទៃ ឲ្យ​ដឹង​ថា ជ​នសង្ស័យ​ដែល​សមត្ថកិច្ច​ឡោម​ព័ទ្ធ​ចាប់​បាន​ទាំង​ក្រុម កាល​ពីថ្ងៃ​ចន្ទ នៅ​ក្នុង​ខណ្ឌ​ទួល​គោក ខាង​ជំនាញ​បាន​សាក​សួរ​និង​សម្រេច​ចោទ​ប្រកាន់​ពួកគេ​ហើយ។

លោកបន្តថា​៖«ក្រោយ​ពី​បញ្ច​ប់ការ​សាក​សួរ​ និង​ស្រាវ​ជ្រាវ យើង​សម្រេច​ចោទ​ប្រកាន់​ពួក​គេ ពី​បទ​ប្លន់​ប្រដាប់​អាវុធ»។

បើតាមមន្រ្តី​នគរបាល​ខណ្ឌ​ទួលគោក ក្នុង​ប្រតិបត្តិ​ការ ​កាល​ពី​ល្ងាច​ថ្ងៃចន្ទ នៅ​ចំណុច​ផ្លូវ​លេខ ៥៦៨ កែង​ផ្លូវ​៣១៧​ស្ថិត​ក្នុង​ក្រុម ១៦ ភូមិ​៤ សង្កាត់​បឹងកក់​២ មាន​ការ​បាញ់​ត​គ្នា​ប្រមាណ​ជា ៦​-៧ គ្រាប់ រវាង​ក្រុម​ជន​សង្ស័យ និង​ក្រុម​សមត្ថកិច្ច។ ជន​សង្ស័យ​ទាំង ៧នាក់​នោះ មាន​ឈ្មោះ អែល ហ៊ីម អាយុ ៣០​ឆ្នាំ នួន ស៊ី​ថា អាយុ​៣៤ ឆ្នាំ យ៉ា រ៉ា​វី អា​យុ ២៣ ឆ្នាំ កូ វណ្ណា អា​យុ ២១ ឆ្នាំ ទាំង​ ៤ នាក់ ស្នាក់​នៅ​ភូមិ​ព្រែក​តា​ពៅ ឃុំ​ដើម​មៀន ក្រុង​តា​ខ្មៅ ខេត្ត​កណ្តាល។ ចំណែក​ពីរ​នាក់​ទៀត មាន​ឈ្មោះ ជា សុ​វណ្ណា​រ៉ាក់ អាយុ ២២ ឆ្នាំ និង​សុខ សាវ​ឌី ទាំង​ពីរ​នាក់ ស្នាក់​នៅ​ផ្ទះ​ជួល ក្នុង​ភូមិ​ទួល​សង្កែ សង្កាត់​ទួល​សង្កែ និង​ម្នាក់​ទៀត​ឈ្មោះ កែវ បូរី អា​យុ ២៥ ឆ្នាំ ស្នាក់​នៅ​អង្គ​ការ​ក្រៅ​រដ្ឋាភិបាល​មួយ ក្នុង​ភូមិ​ដើម​ចន្ទន៍ សង្កាត់​ច្បារ​អំពៅ​២។

សមត្ថ​កិច្ចរឹប​អូស​បាន​កាំភ្លើងខ្លីម៉ាក​កា​៥៤ មួយ​ដើម និង​ម៉ូតូ​ចំនួន​២គ្រឿង​ម៉ាក​មីអូ និង​ម៉ាក​ឃ្លីក​ពណ៌ខ្មៅ។

រឿងដាច់​ដោយ​ឡែក​មួយ​ទៀត កាល​ពី​រសៀល​ម៉ោង​១ ម្សិល​មិញ ក្រុម​ចោរ​ប្លន់​ប្រដាប់​អាវុធ​ចំនួន​៣នាក់​បាន​ជិះ​ម៉ូតូ​១ គ្រឿង ម៉ាក​អាយ​ខន ធ្វើ​សកម្មភាព​ប្លន់ ម៉ូតូ​ម៉ាក​ស្គូពី​ពណ៌ស មួយ​គ្រឿង​យក​ទៅ​បាត់ នៅ​ចំណុច​ផ្លូវ​បេតុង​បុរី​ណៃ សុវណ្ណ ស្ថិត​ក្នុង​ភូមិ​ទួល​សង្កែ សង្កាត់​ទួល​សង្កែ។

មន្រ្តីនគរបាល​ខណ្ឌ​ឫស្សីកែវ បដិសេធ​មិន​ប្រាប់​ឈ្មោះ បាន​ឲ្យ​ដឹង​ថា ស្រ្តី​រង​គ្រោះ​ជា​ម្ចាស់​ម៉ូតូ​ឈ្មោះ​ហុក ស្រីអូន អាយុ ២៥ ឆ្នាំ មាន​លំនៅ​ក្នុង​ក្រុង​ព្រះ​សីហនុ។ មុន​ពេល​កើត​ហេតុ​ នារី ​រង​គ្រោះ​បាន​ជិះ​ម៉ូតូ​ម៉ាក​ស្គូពី ឌុប​ប្អូន​ទៅ​សាលា​លុះ​ត្រឡប់​មក​ដល់​ចំណុច​កើត​ហេតុ ស្រាប់​តែ​មាន​ចោរ​៣​នាក់​ជិះ​ម៉ូតូ​មួយ​គ្រឿង​ម៉ាក អាយ​ខន ពណ៌​ផ្កា​ឈូក ធ្វើសកម្ម​ភាព​ប្លន់ ដោយ​ប្រវាយ​ប្រតប់​ជាមួយ​នារី​រងគ្រោះ​ យក​បាន​កាបូប និង​ខ្សែ.ក ខណៈ​នោះ​ឪពុក​មា​នាង​ឃើញ​ចេញ​មក​ជួយ ក៏​ត្រូវ​ក្រុម​ចោរ​ដក​កាំភ្លើង​ បាញ់ ២ គ្រាប់ តែ​មិន​បណ្តាល​ឱ្យ​ត្រូវ​ជន​រង​គ្រោះ​នោះ​ទេ។ បើ​តាម​មន្រ្តីនគរ​បាល​បន្ទាប់​ពី​រត់​គេច​ខ្លួន​រួច​ពី​កន្លែង​កើត​ហេតុ ក្រុម​ចោរ​បាន​យក​ម៉ូតូ​ដែល​ប្លន់​បាន ទៅ​លាក់​ទុក ​នៅ​ផ្ទះ​ជួល​ តាម​ផ្លូវ​រទេះ​ភ្លើង ក្នុង​ភូមិ​ទួល​សង្កែ ​ហើយ​ត្រូវបាន​សមត្ថកិច្ច​ឃាត់​ខ្លួន​ជន​សង្ស័យ​ចំនួន ៦ នាក់ និង​កំពុង​បន្ត​ឡោម​ព័ទ្ធ​ចាប់​គូកន​ថែម​ទៀត៕

អត្ថបទគួរចាប់អារម្មណ៍