The Phnom Penh Post Search

Search form




Logo of Phnom Penh Post newspaper Phnom Penh Post - ជាប់​គុក​មួយ​ជីវិត​រឿង​ដុត​ផ្ទះ​សម្លាប់​មួយ​គ្រួសារ

ជាប់​គុក​មួយ​ជីវិត​រឿង​ដុត​ផ្ទះ​សម្លាប់​មួយ​គ្រួសារ

ជាប់​គុក​មួយ​ជីវិត​រឿង​ដុត​ផ្ទះ​សម្លាប់​មួយ​គ្រួសារ

ប៉ៃលិន៖ តុលាការ​ខេត្ត​ប៉ៃលិន បាន​ប្រកាស​សាលក្រម​កាល​ពី​ម្សិលមិញ សម្រេច​កាត់​ទោស​បុរស​ជា​ជន​ដៃ​ដល់​ម្នាក់ ឲ្យ​ជាប់​ពន្ធនាគារ​មួយ​ជីវិត ពី​បទ​ដុត​ផ្ទះ​សម្លាប់​គ្រួសារ​មួយ​មាន​គ្នា​បី​នាក់ កាល​ពី​ខែ​វិច្ឆិកា​ឆ្នាំ​មុន។

លោក ម៉ក់ ផៀង ចៅក្រម​ជំនុំ​ជម្រះ​បាន​បញ្ជាក់​ប្រាប់​ចំពោះ​កាត់​ទោស​នេះ ប៉ុន្តែ​បាន​បដិសេធ​មិន​ផ្តល់​ព័ត៌មាន​លម្អិត​ឡើយ។

លោក ហេង សុខនាថ អនុប្រធាន​ពន្ធនាគារ​ខេត្ត​ប៉ៃលិន​បាន​ឲ្យ​ដឹង​ថា ឧក្រិដ្ឋ​ជន​ឈ្មោះ ឈុំ ចំណាន អាយុ ៣៣ ឆ្នាំ ត្រូវ​បាន​ផ្តន្ទា​ទោស ក្រោម​បទ​ចោទ​ប្រកាន់ ឃាតកម្ម​គិត​ទុក​ជា​មុន និង​ត្រូវ​បង្គាប់​ឲ្យ​បង់​សំណង ៧០​លាន​រៀល (ប្រហែល ១៧ ៥០០ ដុល្លារ​អាមេរិក) ទៅ​ឲ្យ​គ្រួសារ​ជន​រងគ្រោះ។

ជន​ជាប់​ចោទ​ឈ្មោះ ចំណាន​នេះ​ត្រូវ​បាន​ចោទ​ក្រោយ​ពី​បាន​សម្លាប់​ស្មៀន​ឃុំ​សាលា​ក្រៅ ឈ្មោះ ហេង រ៉ាវី អាយុ ២៥ឆ្នាំ និង​ប្រពន្ធ​ឈ្មោះ ធី ម៉ាលី អាយុ ២៤​ឆ្នាំ រួម​ទាំង​កូន​ស្រី​វ័យ ៦​ខែ​ផង​ដែរ។

យោង​តាម​របាយ​ការណ៍​សមត្ថកិច្ច​បាន​ឲ្យ​ដឹង​ថា ឧក្រិដ្ឋ​ជន​ឈុំ ចំណាន​បាន​ខឹង​ប្តី​ប្រពន្ធ​ពីរ​នាក់​ខាង​លើ មិន​ឲ្យ​គាត់​ខ្ចី​លុយ​ចំនួន ៣០ ដុល្លារ​អាមេរិក ហើយ​ក៏​លួច​ចូល​ទៅ​ផ្ទះ​ពួកគេ​នៅ​ពាក់​កណ្តាល​អាធ្រាត្រ ចាប់​ចង​ជន​រងគ្រោះ​ទាំង​ពីរ បន្ទាប់​មក​ក៏​ចាក់​សាំង​ដុត​ផ្ទះ​នោះ​តែ​ម្តង។ ជន​ជាប់​ចោទ​ត្រូវ​បាន​ចាប់​ខ្លួន បន្ទាប់​ពី​បាញ់​ត្រូវ​ជើង ខណៈ​ពេល​ព្យាយាម​រត់​គេច​ពី​សមត្ថកិច្ច។

លោក អាន សំអាត មេ​ឃុំ​សាលា​ក្រៅ បាន​សាទរ​នឹង​សេចក្តី​សម្រេច​នេះ​កាល​ពី​ម្សិលមិញ និង​បាន​និយាយថា​ការ​សម្លាប់​នេះ ជា​អំពើ «ឃោរឃៅ​ខ្លាំង​ណាស់»៕

អត្ថបទគួរចាប់អារម្មណ៍