The Phnom Penh Post Search

Search form

Logo of Phnom Penh Post newspaper Phnom Penh Post - ជ្រូក​ព្រៃ​ជិត​៦០​គីឡូ បុក​មនុស្ស​របួស អ្នក​ភូមិ​សម្លាប់​យក​សាច់




ជ្រូក​ព្រៃ​ជិត​៦០​គីឡូ បុក​មនុស្ស​របួស អ្នក​ភូមិ​សម្លាប់​យក​សាច់

ជ្រូក​ព្រៃ​ជិត​៦០​គីឡូ បុក​មនុស្ស​របួស អ្នក​ភូមិ​សម្លាប់​យក​សាច់

បន្ទាយមានជ័យៈ សត្វ​ជ្រូក​ព្រៃ​មួយ​ក្បាល​ទម្ងន់​ប្រមាណ​ជា​៦០​គីឡូក្រាម ត្រូវ​អ្នក​ភូមិ​នាំ​គ្នា​ព័ទ្ធ​វាយ​សម្លាប់​យក​សាច់​ចែក​គ្នា បន្ទាប់​ពី​បោល​ចេញ​ពីព្រៃ​មក​បុក​បុរស​ម្នាក់​របួស រួច​បោល​ចូល​វត្ត នៅ​ក្នុង​ភូមិ​ពន្សាយ ស្រុក​ស្វាយ​ចេក ខេត្ត​បន្ទាយ​មាន​ជ័យ ពីថ្ងៃ​ទី២​៧ មីនា។

លោក ហ៊ិន សារុន អធិកា​រង​ស្រុក​ស្វាយ​ចេក​ឲ្យ​ដឹង​ថា បុរស​ម្នាក់​អាយុ​៣០​ឆ្នាំ ជា​កម្មករ​បើក​អេស្កាវ៉ា​ទ័រ ត្រូវ​ជ្រូក​ព្រៃ​ដេញ​បុក​នឹង​ខ្នាយ​ត្រូវ​របួស​ជើង​ពេល​ដើរ​ទៅ​ងូត​ទឹក​ក្នុង​វត្ត ហើយ​បាន​ជួប​ជ្រូកព្រៃ​មួយ​ក្បាល​នេះ​ដោយ​ចៃដន្យ​ហើយ​ក៏​ផ្អើល​ដល់​អ្នក​ភូមិ​កេណ្ឌ​គ្នា​មក​ជាង​៣០​នាក់ ដេញ​ជ្រូក​ព្រៃ​នោះ​រហូត​វា​ហត់​ទើប​វាយ​សម្លាប់​បាន។

លោក​បញ្ជាក់ថា តាមពិត​ទៅ​សត្វ​ជ្រូក​ព្រៃនោះ វង្វេង​ព្រៃ​ដែល​នៅ​ចម្ងាយ​ពី​ភូមិ​ប្រមាណ​ជា​៥០០​ម៉ែត្រ មិន​ដឹង​ទៅ​ណា​ក៏​បោល​ចូល​ភូមិ​និង​ត្រូវ​អ្នក​ភូមិ​ព្រួត​គ្នា​វាយ​ស្លាប់​ពន្លះ​យក​សាច់​ចែក​គ្នា សូម្បី​តែ​ប៉ូលិស​នៅ​ក្បែរ​នោះ ទៅ​មិន​ទាន់​ផង។

គួររំឭកថា កាល​ពី​ខែ​កញ្ញា​ឆ្នាំមុន នាយ​នគរ​បាល​វរ​ការ​ពារ​ព្រំដែន​លេខ ១០៥​ម្នាក់​ នៅ​តំបន់​មុំ​បី ស្រុក​ជាំ​ក្សាន្ត​ ខេត្ត​ព្រះ​វិហារ​ ក៏​ត្រូវ​មេជ្រូក​ព្រៃ​ប​ណ្តើរ​កូន​មួយ​ក្បាល​វាយ​ប្រហារ​​ឲ្យ​រង​របួស ធ្ងន់​ដាច់​ក្រលៀន ធ្លាយ​ពោះ ត្រូវ​ដឹក​ទៅ​សង្គ្រោះ​ផង​ដែរ ​ហើយ​កាល​ពី​ខែ​ឧសភា ​ឆ្នាំ​២០១២ បុរស​ម្នាក់​រស់​នៅ​ភូមិ​ថ្មី សង្កាត់​ទួល​ល្វា ក្រុង-​ខេត្ត​ប៉ៃ​លិន ក៏​ត្រូវ​ជ្រូក​ព្រៃ​​ឈ្មោល​មួយ​ក្បាល​មាន​ទម្ងន់​​ជាង​​១០០​គីឡូក្រាម មាន​កម្ពស់​ជាង​​១​ម៉ែត្រ​ បុក​ខ្វេះ​បណ្តាល​ឱ្យ​រង​របួស​ធ្ងន់​ ​បែក​ចង្កា បាក់​ធ្មេញ​និង​រយះ​សាច់​ដៃបី​ដុំ ហើយ​ត្រូវ​ក្រុម​គ្រួសារ​​ដឹក​ទៅ​សង្គ្រោះ​នៅ​មន្ទីរ​ពេទ្យ​បង្អែក​ខេត្ត​ និង​​ត្រូវ​​គ្រូ​ពេទ្យ​ដេរ​ចំនួន​ជាង​៧០​ថ្នេរ​ទៀត​ផង៕

អត្ថបទគួរចាប់អារម្មណ៍