The Phnom Penh Post Search

Search form




Logo of Phnom Penh Post newspaper Phnom Penh Post - ឈប់​បត់​ជើង​យប់​នៅ​ផ្លូវ​ម៉ៃដា​ត្រូវ​គេ​បាញ់​បី​គ្រាប់​ស្លាប់




ឈប់​បត់​ជើង​យប់​នៅ​ផ្លូវ​ម៉ៃដា​ត្រូវ​គេ​បាញ់​បី​គ្រាប់​ស្លាប់

ឈប់​បត់​ជើង​យប់​នៅ​ផ្លូវ​ម៉ៃដា​ត្រូវ​គេ​បាញ់​បី​គ្រាប់​ស្លាប់

ភ្នំពេញៈ ករណី​បាញ់​សម្លាប់​និស្សិត​ពេទ្យ​ម្នាក់​កាល​ពី​រំលង​អ្រធាត្រ​ឈាន​ចូល​ថ្ងៃ​ទី​២៤ មករា នៅ​បណ្តោយ​ផ្លូវ​ម៉ៃ​ដា ក្នុង​សង្កាត់​ទឹក​ថ្លា ខណ្ឌ​សែន​សុខ សមត្ថកិច្ច​នៅ​មិន​ទាន់​រក​ឃើញ​តម្រុយ​អី​នៅ​ឡើយ​ទេ។

លោក ម៉ក់ ហុង អធិការ​នគរបាល​ខណ្ឌ​បាន​ឲ្យ​ដឹង​ថា ករណី​បាញ់​សម្លាប់​នេះ​សមត្ថកិច្ច​មិន​ទាន់​សន្និដ្ឋាន​ថា ជា​ករណី​ប្លន់​ឬ​ជា​គំនុំ​ទេ។ លោក​បន្ត​ថា ៖ «យើង​កំពុង​បន្ត​ការ​ស្រាវ​ជ្រាវ​លើ​ករណី​នេះ​នៅ​ឡើយ»។

មន្រ្តី​នគរបាល​ប៉ុស្តិ៍​សង្កាត់​ទឹក​ថ្លា​ឲ្យ​ដឹង​ថា ជន​រង​គ្រោះ​ត្រូវ​ក្រុម​ជន​ដៃ​ដល់​បាញ់​ត្រូវ​ចំនួន​៣​គ្រាប់​ស្លាប់ នៅ​ម៉ោង​១២​និង​៤១​នាទី​រំលង​អ្រធាត្រ​ឆ្លង​ចូល​ថ្ងៃ​ទី​២៤ មករា មុន​កម្លាំង​សមត្ថកិច្ច​ចុះ​ទៅ​ដល់។

នគរបាល​ដែល​ចុះ​ដល់​កន្លែង​កើត​ហេតុ​ពិនិត្យ​ឃើញ​ថា ជន​រងគ្រោះ​ដេក​ស្លាប់​នៅ​ក្បែរ​ម៉ូតូ ដែល​អាច​សន្និដ្ឋាន​ថា ក្រុម​ជន​ដៃ​ដល់​អាច​មាន​គ្នា​២​នាក់ និង​ប្រើ​កាំភ្លើង​បាញ់​ប្លន់​នៅ​ពេល​ដែល​ជន​រង​គ្រោះ​ឈប់​ម៉ូតូ ដើម្បី​បត់​ជើង​តូច នៅ​ចំណុច​សាលា​ណ័រ​ប្រ៊ីត តាម​ដង​ផ្លូវ​២០០៤ ចំណុច​ភ្លើង​ស្តុប ក្នុង​ភូមិ​ស្វាយ​រលើង សង្កាត់​ទឹក​ថ្លា ខណ្ឌ​សែន​សុខ។

លោកថា សមត្ថកិច្ច​នៅ​មិន​ទាន់​ដាក់​ការ​សង្ស័យ​ប្រាកដ​ណា​មួយ​ទេ ព្រោះ​តាម​សាក្សី ជន​រងគ្រោះ​ព្យាយាម​តដៃ​ជាមួយ​ជន​ដៃ​ដល់ ហើយ​ក៏​ត្រូវ​ពួក​វា​ដក​កាំភ្លើង​ខ្លី​បាញ់​សំដៅ​ខណៈ​មាន​រថយន្ត​ឆ្លង​កាត់​កន្លែង​កើត​ហេតុ។ លោក​ប្រាប់​ដែរ​ថា ជន​រងគ្រោះ​បាន​រង​គ្រាប់​កាំភ្លើង​បី​គ្រាប់​ត្រូវ​ចង្កេះ ស្មា​និង​ភ្លៅ ស្លាប់​នឹង​កន្លែង រីឯ​ម៉ូតូ​ហុង​ដា​ឃ្លីក​ពណ៌​ត្រួយ​ចេក ជន​រងគ្រោះ ដួល​នៅ​កន្លែង​កើត​ហេតុ។

ឈ្មោះ តុង ឈុននី ភេទប្រុស អាយុ​២៣​ឆ្នាំ ជា​មិត្ត​ភក្តិ​ជន​រង​គ្រោះ និង​ជា​ម្ចាស់​ម៉ូតូ​ប្រាប់​សមត្ថកិច្ច​ថា ជន​រង​គ្រោះ គង់ ចាន់ធា ភេទ​ប្រុស អាយុ​២២​ឆ្នាំ ស្នាក់​នៅ​សង្កាត់​ទំនប់​ទឹក ខណ្ឌ​ចំការ​មន មុន​កើត​ហេតុ​រូប​គេ​និង​ជន​រងគ្រោះ​បាន​ទៅ​ច្រៀង​ខារ៉ា​អូខេ នៅ​ក្នុង​សង្កាត់​កាកាប តាម​ផ្លូវ​២០០៤ ច្រៀង​ចប់​ខ្វះ​លុយ​ឲ្យ​គេ​ទើប​ឲ្យ​ជន​រង​គ្រោះ​ជិះ​ម៉ូតូ​យក​ទូរស័ព្ទ​ម៉ាក​អាយ​ហ្វូន​ទៅ​បញ្ចាំ ក្នុង​ទឹក​ប្រាក់​៥០​ដុល្លារ ខ្លួន​ជា​ម្ចាស់​ម៉ូតូ​ចាំ​នៅ​ហាង​ខារ៉ា​អូខេ។ ឈុន​នី ថា តមក​ជន​រងគ្រោះ​បាន​តេ​ប្រាប់​ថា គេ​បញ្ចាំ​បាន​លុយ​ហើយ ហើយ​ពេល​ត្រឡប់​មក​វិញ​ឈប់​បត់​ជើង​តូច​តាម​ផ្លូវ ក៏​ជួប​រឿង​ហេតុ​ត្រូវ​គេ​បាញ់​ស្លាប់​នេះ​តែ​ម្តង៕

អត្ថបទគួរចាប់អារម្មណ៍