The Phnom Penh Post Search

Search form




Logo of Phnom Penh Post newspaper Phnom Penh Post - តាម​ចាប់​ខ្លួន​ក្រុម​ចោរ​ប្លន់ ថៅកែ​ទិញ​ស្រូវ​យក​បាន​ប្រាក់​២០​លាន.៛

តាម​ចាប់​ខ្លួន​ក្រុម​ចោរ​ប្លន់ ថៅកែ​ទិញ​ស្រូវ​យក​បាន​ប្រាក់​២០​លាន.៛

តាម​ចាប់​ខ្លួន​ក្រុម​ចោរ​ប្លន់ ថៅកែ​ទិញ​ស្រូវ​យក​បាន​ប្រាក់​២០​លាន.៛

បាត់ដំបងៈ នគរបាល​នៅ​តែ​បន្ត​ស្វែង​រក​ចាប់​ខ្លួន​ក្រុម​ចោរ​ប្លន់​ប្រដាប់​អាវុធ​៣​នាក់ ក្នុង​ករណី​បាញ់​ប្លន់​ថៅកែ​ដើរ​ទិញ​ស្រូវ​ទាំង​យប់ ខណៈ​អ្នក​ភូមិ​កំពុង​ចោម​រោម​ថ្លឹង​ស្រូវ​លក់​និង​យក​បាន​លុយ​២០​លាន​រៀល ក្នុង​ឃុំ​ព្រៃ​ត្រឡាច ខេត្ត​បាត់​ដំបង កាល​ពី​ថ្ងៃ​សុក្រ។

លោក ស៊ា ធី អធិការ​ស្រុក​រុក្ខគិរី​បាន​ប្រាប់​ពី​ម្សិល​មិញ​ថា ក្រុម​ចោរ​ប្លន់​ប្រដាប់​អាវុធ​មាន​គ្នា​៣​នាក់ ប្រើ​អាវុធ​អាកា​ស្វាយ​បត់​មួយ​ដើម​និង​កាំភ្លើង​ខ្លី​K-54 ចំនួន ១​ដើម​ដែល​បាន​ប្លន់​បាញ់​គំរាម​ដណ្តើម​យក​ថង់​លុយ​ថៅកែ​ទិញ​ស្រូវ​បាន​២០​លាន​រៀល​នោះ សមត្ថកិច្ច​កំពុង​តែ​តាម​ចាប់​ខ្លួន ខណៈ​ដែល​មុខ​សញ្ញា​សង្ស័យ​កំណត់​បាន​ហើយ​នោះ។

លោក​បន្ត​ថា៖ «ក្រុម​ចោរ​ប្លន់​នេះ​ជា​មុខ​សញ្ញា​ចាស់​ធ្លាប់​ធ្វើ​សកម្ម​ភាព​បាញ់​ប្លន់​នៅ​ខេត្ត​ពោធិ៍​សាត់​ក្នុង​ខែ​មុន ខណៈ​អ្នក​ភូមិ​កំពុង​ថ្លឹង​ស្រូវ​លក់​ដូច​គ្នា» ។

លោក​ឲ្យ​ដឹង​ថា ហេតុការណ៍​នេះ​កើត​ឡើង​នៅ​ម៉ោង​ជាង​៩​យប់ នៅ​ភូមិ​ព្រៃ​ខ្លូត​ឃុំ​ព្រៃ​ត្រឡាច ស្រុក​រុក្ខគិរី ខេត្ត​បាត់​ដំបង​ដែល​មុន​ហេតុ​ការណ៍​ពលរដ្ឋ​ប្រមាណ​ជា​២០​នាក់​បាន​នៅ​ជុំ​គ្នា​ថ្លឹង​ស្រូវ​ដោយ​មាន​ថៅកែ​ម្នាក់​នៅ​ក្នុង​នោះ​ផង។ ខណៈ​នោះ​ក្រុម​ចោរ​៣​នាក់​ជិះ​ម៉ូតូ​សង់​ស៊េរី​០១១​មក​ឈប់​រួច​ដេញ​និង​បាញ់​គំរាម​ភ្ជុច​ដី​ចំនួន​៦គ្រាប់​យ៉ាង​តក់​ក្រហល់​តែ​ម្តង។

លោក​បន្ត​ថា ថៅកែ​ស្រូវ ឡឹង ប្រុស ​អាយុ ៤១ឆ្នាំ នៅ​ភូមិ​គោក​ត្រប់ ស្រុក​ថ្ម​គោល បាន​ទាញ​ថង់​ប្រាក់​បម្រុង​រត់​គេច​ខ្លួន តែ​ត្រូវ​បក្ខ​ពួក​ចោរ​ម្នាក់​ស្លៀក​ខោ​ខ្មៅ​អាវ​យឺត ខ្មៅ ដៃ​កាន់​អាវុធ K 54 ដេញ​ដណ្តើម​យក​បាន​ថង់​លុយ​នោះ​ហើយ​នាំ​គ្នា​ជិះ​ម៉ូតូ​គេច​ចេញ​ទៅ ដោយ​មិន​មាន​នរណា​ម្នាក់​គ្រោះ​ថ្នាក់​ឡើយ។ លោក​បន្ត​ថា ក្រុម​ចោរ​ពុំ​មាន​ពាក់​ម៉ាស់​បិទ​មុខ​អី​ទេ ហើយ​ក្រុម​ចោរ​ទាំង​នេះ​តាម​ដាន​ដឹង​មុន​ទើប​ធ្វើ​សកម្ម​ភាព​ប្លន់​តែ​ម្ដង៕

អត្ថបទគួរចាប់អារម្មណ៍