The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​កោះ​ហៅ​អតីត​និពន្ធ​នាយក​កាសែត​វិទ្យា​សាស្ត្រ​ខ្មែរ​ចូល​បំភ្លឺ




តុលាការ​កោះ​ហៅ​អតីត​និពន្ធ​នាយក​កាសែត​វិទ្យា​សាស្ត្រ​ខ្មែរ​ចូល​បំភ្លឺ

តុលាការ​កោះ​ហៅ​អតីត​និពន្ធ​នាយក​កាសែត​វិទ្យា​សាស្ត្រ​ខ្មែរ​ចូល​បំភ្លឺ

ភ្នំពេញៈ សាលា​ដំបូង​រាជធានី បាន​កោះ​ហៅ​អតីត​និពន្ធ​នាយក​កាសែត​វិទ្យា​សាស្រ្ត​ខែ្មរ​ឲ្យ​ចូល​ទៅ​បំភ្លឺ​នៅ​ថ្ងៃ​ទី​៣០ ខែ​មករា​ខាង​មុខ ពាក់​ព័ន្ធ​ទៅ​នឹង​បណ្តឹង​របស់​ម្ចាស់​កាសែត​ជា​តំណាង​រាស្រ្ត​គណបក្ស​ប្រជាជន​កម្ពុជា​មួយ​រូប​ដែល​ចោទ​ពី​បទ​រំលោភ​លើ​សេចក្តី​ទុក​ចិត្ត ការ​ក្លែង​បន្លំ និង​បទ​ក្លែង​ត្រា។

លោក ឈា វ៉ារី អតីត​និពន្ធ​នាយក និង​ជា​ចុង​ចោទ​បាន​ប្រាប់​ថា លោក​មិន​មាន​កំហុស​ដូច​ការ​ចោទ​នោះ​ទេ។ ប៉ុន្តែ​ការ​ប្តឹង​នោះ គឺជា​ការ​គាប​សង្កត់​និង​បំភាន់​សាធារណ​មតិ ដើម្បី​ទម្លាក់​កំហុស​លើ​រូប​លោក ខណៈ​មជ្ឈ​មណ្ឌល​ព័ត៌មាន​វិទ្យា​សាស្រ្ត​ខ្មែរ ប្រឈម​នឹង​កង្វះ​ថវិកា​ក្នុង​ការ​ចេញ​ផ្សាយ​រហូត​បញ្ឈប់​ការ​ចេញ​ផ្សាយ​កាសែត​នេះ​ជា​ច្រើន​ខែ​មក​នោះ។

លោក​បញ្ជាក់​ថា៖​«ខ្ញុំ​មិន​បាន​ធ្វើ​អ្វី​ខុស​និង​ក្បត់​មនសិការ​ខ្លួន​ឯង ក្នុង​នាម​ជា​និពន្ធ​នាយក​ទេ គឺ​កិច្ចការ​ទាំង​អស់​មុន​នឹង​សម្រេច ខ្ញុំ​តែង​តែ​ឆ្លង​សុំ​យោ​បល់​ទៅ​ថ្នាក់​លើ​ទាំង​អស់»។

លោក​លើក​ឡើង​ថា មជ្ឈ​មណ្ឌល​ព័ត៌មាន​វិទ្យា​សាស្រ្ត​ខ្មែរ​ចាប់​បើក​នៅ​ថ្ងៃ​ទី​១៨ ខែ​កុម្ភៈ ឆ្នាំ​២០១១។ អង្គភាព​នេះ​ក៏​បាន​សហការ​ជាមួយ​ទស្សនា​វដ្តី​ខ្មែរ​អប្សរា​ក្នុង​ការ​ស្វែង​រក​ផលិត​ផល​ចុះ​ផ្សាយ​ក្នុង​កាសែត និង​មាន​ការ​ចុះ​ហត្ថលេខា​ព្រម​លើ​តម្លៃ​ផ្សាយ​ពាណិជ្ជ​កម្ម​ជាមួយ​គ្នា​ផង។ ប៉ុន្តែ ដោយ​ខាង​ភាគី​ទស្សនា​វដ្តី​មិន​អាច​ដំណើរ​ការ​កិច្ច​សហការ​បន្ត ក៏​ធ្វើ​ពាក្យ​ស្នើ​សុំ​ផ្អាក​ការ​សហការ​គ្នា​នោះ​វិញ។

លោកថ្លែងថា ពេល​នោះ​លោក ជា ចំរើន ជា​ម្ចាស់​កាសែត​នេះ​បាន​ស៊ីញ៉េ​យល់​ព្រម ហើយ​ខាង​ទស្សនា​វដ្តី​បាន​ផ្ទេរ​សិទ្ធិ​មក​អ្នក​គ្រប់​គ្រង​ម្នាក់​ទៀត​ឲ្យ​គ្រប់​គ្រង​បន្ត នោះ​គេ​មាន​ត្រា​មួយ​ទៀត ជា​ត្រា​ពាណិជ្ជកម្ម ដែល​គេ​អះអាង​ថា បាន​សុំ​យោបល់​ពី​ថ្នាក់​លើ​របស់​អង្គភាព​ហើយ​ដែរ ដោយ​តារាង​តម្លៃ​ទាំង​អស់​បាន​រក្សា​ទុក​ដដែល។

លោក​ថា៖«ត្រា​នេះ​ហើយ​ដែល​គេ​ចោទ​ខ្ញុំ​ថា ​ធ្វើ​ត្រា​ក្លែង​ក្លាយ ប៉ុន្តែ​ក្នុង​របៀប​ការ​ងារ​ស៊ីញ៉េ​លើ​ឯកសារ​ដឹង​ឮ​គឺ​ខ្ញុំ​តែង​តែ​ឆ្លង​កាត់​ថ្នាក់​លើ​ទាំង​អស់»។

លោក បូ រិន្ទ ជា​និពន្ធ​នាយក​រង​កាសែត​វិទ្យា​សាស្រ្ត​ខ្មែរ​ឲ្យ​ដឹង​ថា លោក​មិន​បាន ដឹង​បញ្ហា​នេះ​ទេ ព្រោះ​លោក​ជា​ក្រុម​ផលិត​ព័ត៌មាន ហើយ​ការ​ផ្អាក​កាសែត​ប្រហែល​មិន​ពាក់​ព័ន្ធ​នឹង​ការ​ក្ស័យ​ទុន​ទេ។

មជ្ឈមណ្ឌលព័ត៌មាន​វិទ្យា​សាស្រ្ត​ខ្មែរ​មាន​បុគ្គលិក​សរុប​៣៤​នាក់ រួម​ទាំង​ភ្នាក់​ងារ​តាម​ខេត្ត​ផង ហើយ​បាន​ផ្អាក​បោះ​ពុម្ព​ផ្សាយ​ក្នុង​ខែ​កញ្ញា ឆ្នាំ​២០១២ ធ្វើ​ឲ្យ​បុគ្គលិក​មួយ​ចំនួន​ប្តឹង​ទៅ​ក្លិប​អ្នក​កាសែត​ដើម្បី​សុំ​បើក​ប្រាក់​ខែ ក្រោយ​មក​នៅ​ថ្ងៃ​ទី៩ ខែ​មករា ឆ្នាំ​២០១៣ ក៏​មាន​ការ​តវ៉ា​ដោយ​ដុត​កង់​ឡាន​ទៀត​ផង។

កាល​ពី​ថ្ងៃ​ទី២៥ ខែ​មករា ក្លិប​អ្នក​កាសែត​កម្ពុជា​បាន​ចេញ​សេចក្តី​ថ្លែង​ការណ៍​សម្តែង​ការ​ព្រួយ​បារម្ភ ចំពោះ​សេរីភាព​និង​សុវត្ថិភាព​អ្នក​សារ​ព័ត៌មាន។ សេចក្តី​ថ្លែង​ការណ៍​នេះ គឺ​បន្ទាប់​ពី​ក្លិប​អ្នក​កាសែត​កម្ពុជា​ទទួល​បាន​ព័ត៌មាន​ថា លោក ឈា វ៉ារី​ជា​ស្ថាបនិក​ក្លិប​អ្នក​កាសែត​កម្ពុជា​និង​ជា​អតីត​និពន្ធ​នាយក​កាសែត​វិទ្យា​សាស្រ្ត​ខ្មែរ​ត្រូវ​បាន​លោក ជា ចំរើន ម្ចាស់​កាសែត​វិទ្យា​សាស្រ្ត​ខ្មែរ​និង​ជា​តំណាង​រាស្រ្ត​មក​ពី​គណបក្ស​ប្រជាជន​កម្ពុជា​ប្តឹង​ទៅ​តុលាការ​ពី​បទ​រំលោភ​លើ​សេចក្ដី​ទុក​ចិត្ត ការ​ក្លែង​បន្លំ​និង​បទ​ប្រើ​ប្រាស់​ត្រា​ក្លែង។

ក្នុង​នោះ​ដែរ ក្លិប​អ្នក​កាសែត​កម្ពុជា​អំពាវ​នាវ​ដល់​ស្ថាប័ន​តុលាការ​រក្សា​ភាព​ឯករាជ្យ ក្នុង​ដំណើរ​ការ​រឿង​ក្តី​នេះ ហើយ​ថា នឹង​បន្ត​តាម​ដាន​ដោយ​យក​ចិត្ត​ទុក​ដាក់​ចំពោះ​បណ្តឹង​ខាង​លើ​នេះ។

អ្នក​តំណាង​រាស្រ្ត ជា ចំរើន ជា​ដើម​បណ្តឹង​កាល​ពី​ម្សិល​មិញ​ឲ្យ​បុគ្គលិក​ប្រាប់​ថា​លោក​មិន​អាច​បំភ្លឺ​រឿង​នេះ​បាន​ទេ៕

អត្ថបទគួរចាប់អារម្មណ៍