The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​កំពូល​សម្រេច​តម្កល់​ទោស​លោក​សែម​សុវណ្ណ​ដេត




តុលាការ​កំពូល​សម្រេច​តម្កល់​ទោស​លោក​សែម​សុវណ្ណ​ដេត

តុលាការ​កំពូល​សម្រេច​តម្កល់​ទោស​លោក​សែម​សុវណ្ណ​ដេត

ភ្នំពេញៈ តុលាការ​កំពូល​កាល​ពី​ម្សិល​មិញ​បាន​ប្រកាស​តម្កល់​សាល​ដីកា​តុលាការ ថ្នាក់​ក្រោម​ករណី​លោក សែម សុវណ្ណ​ដេត អតីត​នាយក​ប្រតិបត្តិ​វិទ្យុ​និង​ទូរទស្សន៍​អាស៊ី​អាគ្នេយ៍ ពី​បទ​ធ្វើ​ឲ្យ​ប៉ះ​ពាល់​សម្បត្តិ​សាធារណៈ​ទុក​ដដែល​ពាក់​ព័ន្ធ​នឹង​ការ​រានដី​ព្រៃ​អភិរក្ស​របស់​រដ្ឋ​នៅ​ខេត្ត​កំពត។

លោក សែម សុវណ្ណ​ដេត ត្រូវ​រដ្ឋបាល​ព្រៃឈើ​ប្តឹង​ទៅ​តុលាការ​ខេត្ត​កំពត ពី​បទ​រុក​រាន​ដី​ព្រៃ​អភិរក្ស​របស់​រដ្ឋ​នៅ​ភូមិ​ព្រៃ​ប៉ាយ ឃុំ​ត្រពាំង​ព្រាយ ស្រុក​ឈូក។

លោក ពត ផា​ណាល់ នាយ​រង​ខណ្ឌ​រដ្ឋបាល​ព្រៃឈើ​ខេត្ត​កំពត​ជា​ដើម​បណ្តឹង​រៀប​រាប់​ថា ​នៅ​ឆ្នាំ​២០០៥​ខាង​រដ្ឋបាល​ព្រៃ​ឈើ​បាន​ប្តឹង​លោក​ទៅ​សាលា​ដំបូង​ខេត្ត កំពត កាល​នោះ​តុលាការ​បាន​សម្រេច​ឲ្យ​លោក សែម សុវណ្ណ​ដេត​ជាប់​គុក​៨​ឆ្នាំ​និង​ពិន័យ​ប្រាក់​២០​លាន​រៀល តែ​លោក សុវណ្ណ​ដេត បាន​ប្តឹង​ទាស់​ទៅ​សាលា​ឧទ្ធរណ៍​រហូត​ប្តឹង​សារទុក្ខ​មក​ដល់​តុលាការ​កំពូល ព្រោះ​តែ​មិន​សុខ​ចិត្ត​នឹង​ការ​សម្រេច​របស់​តុលា​ការ​ថ្នាក់​ក្រោម​ទាំង​ពីរ​នេះ។

បន្ទាប់ពី​តុលាការ​កំពូល​បើក​ជំនុំ​ជម្រះ​ពី​ថ្ងៃទី២០ ខែ​មីនា នា ព្រឹក​ថ្ងៃ​ពុធ សាល​ដីកា​របស់​ចៅក្រម ឃឹម ប៉ុណ្ណ ប្រធាន​ក្រុម​ប្រឹក្សា​ជំនុំ​ជម្រះ​ប្រកាស​តម្កល់​សាល​ដីកា​សាលា​ឧទ្ធរណ៍​លើ​ករណី​លោក សែម សុ​វណ្ណ​ដេត ទុក​ជា​បាន​ការ។ តំណាង​ចៅក្រម​ឃឹម ប៉ុណ្ណ បាន​ប្រកាស​ថា៖​«ភ័ស្តុ​តាង​បញ្ជាក់​ថា​ជា​ដី​ព្រៃមាន​ដើម​ឈើ​ធំៗ សាលា​ឧទ្ធរណ៍​បាន​ចោទ​ពី​បទ​ធ្វើ​ឲ្យ​ប៉ះ​ពាល់​សម្បត្តិ​សាធារណៈ ដូច្នេះ​តុលាការ​កំពូល​បាន​សម្រេច​តម្កល់​សាល​ដីកា​នោះ​ទុក​ជា​បាន​ការ​ដដែល»។

ទាំងលោក សែម សុវណ្ណ​ដេត និង​មេធាវី លោក ហ៊ុយ ផារី ពី​ម្សិល​មិញ​អវត្តមាន ប៉ុន្តែ ក្នុង​សវនាការ​ពី​ថ្ងៃ​ទី២០​មីនា លោក ផាវី បាន​ស្នើ​តុលាការ​ពិចារណា​លើក​លែង​បទ​ចោទ​និង​សូម​ដោះ​លែង​កូន​ក្តី​ ឲ្យ​មាន​សេរីភាព​វិញ ​ព្រោះ​លិខិត​ទិញ​លក់​ដីនោះ​ត្រឹមត្រូវ​និង​ទទួល​ស្គាល់​ពី​អាជ្ញាធរ​មូល​ដ្ឋាន​រហូត​ដល់​ថ្នាក់​ខេត្ត។

តាមមន្ត្រីខណ្ឌរដ្ឋបាល​ព្រៃឈើ កំពត​ជា​ដើម​បណ្តឹង​ថា ដី​ព្រៃ​រដ្ឋ​នៅ​ភូមិ​ព្រៃ​ប៉ាយ ឃុំ​ត្រពាំង​ព្រាយ ស្រុក​ឈូក ទំហំ​១.០៦៣​ហិកតា អ្នក​ស្រុក​រុករាន​អស់​១៣៨​ហិកតា នៅ​ឆ្នាំ​២០០៤​លោក សុវណ្ណ​ដេត បាន​ប្រមូល​ទិញ​ដីនេះ​ហើយ​ឈូស​ឆាយ​បម្រុង​បង្កើត​ជា​ក្រុមហ៊ុន​នៅ​លើដី នោះ​ផង ក្នុង​ខែ​មីនា ឆ្នាំ​២០០៥។ តែ​ដោយ​ដីព្រៃ​នោះ​ជា​តំបន់​ត្រូវ​អភិរក្ស​និង​ជា​ជម្រក​សត្វព្រៃ និង​មួយ​ផ្នែក​ជា​ដី​សម្បទាន​សង្គមកិច្ច​រដ្ឋ ខាង​រដ្ឋបាល​ព្រៃឈើ​បាន​ចុះ​ទៅ​ហាម​ឲ្យ​ផ្អាក​សកម្ម​ភាព តែ​លោក សុវណ្ណ​ដេត បាន​ល្មើស​នឹង​បម្រាម​ដល់​ទៅ​៣​លើក រហូត​ទីស្តី​គណៈរដ្ឋ​មន្រ្តី​ឲ្យ​ក្រសួង​កសិកម្ម​បង្កើត​គណៈកម្មការ ចុះ​អង្កេត​និង​បង្គាប់​ឲ្យ​ផ្អាក​រុក​រាន រង់​ចាំ​តុលាការ​សម្រេច។

ពីប៉ុន្មាន​ឆ្នាំមុន​លោក សុវណ្ណ​ដេត ត្រូវ​សាលា​ដំបូង​ភ្នំពេញ​កាត់​ទោស​ដាក់​គុក​៣ឆ្នាំ​កន្លះ​និង​បង្គាប់ ប្រាក់​សង​ជំងឺ​ចិត្ត​ចំនួន​២៥​ម៉ឺន​ដុល្លារ ពាក់​ព័ន្ធ​នឹង​ការ​ចោទ​ពី​បទ​កិប​កេង​ប្រាក់​​នៅ​ស្ថានីយ​វិទ្យុ ទូរទស្សន៍​អាស៊ី​អាគ្នេយ៍៕

អត្ថបទគួរចាប់អារម្មណ៍