The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​ឃុំ​ខ្លួន​បុរស​ចាប់​ប្រពន្ធ​ចង​វាយ

តុលាការ​ឃុំ​ខ្លួន​បុរស​ចាប់​ប្រពន្ធ​ចង​វាយ

តុលាការ​ឃុំ​ខ្លួន​បុរស​ចាប់​ប្រពន្ធ​ចង​វាយ

កំពង់ធំៈ សាលា​ដំបូង ខេត្ត​កំពង់ធំ បាន​សម្រេច​ឃុំ​ខ្លួន​បុរស​ម្នាក់ ដែល​ចាប់​ប្រពន្ធ​ចង​វាយដំ និង​ប៉ុន​ប៉ង​ស្រោច​ទឹក​អាស៊ីត បណ្តាល​ឲ្យ​រង​របួស​ធ្ងន់​ដោយ​សារ​តែ​ភ្លើង​ប្រចណ្ឌ កាល​ពី​ថ្ងៃ​សៅរ៍​ក្រោម​ការ​ចោទ​ប្រកាន់​ពី​បទ​ប្រើ​អំពើ​ហិង្សា​ប្រព្រឹត្ត​ដោយ​សហព័ន្ធ ឬ​អនីតិ​សង្វាស។

កាល​ពី​យប់​ថ្ងៃ​ព្រហស្បតិ៍​សប្តាហ៍​មុន ជន​សង្ស័យ​ឈ្មោះ ប៉ាវ កុល អាយុ ៣៥ ឆ្នាំ បាន​បង្ក​ជម្លោះ​ក្នុង​គ្រួសារ​ហើយ​បាន​ចាប់​ប្រពន្ធ ឈ្មោះ ប្រាក់ ហាង អាយុ ២៤​ឆ្នាំ ចង និង​បាន​វាយ​ដំ​យ៉ាង​ដំណំ ថែម​ទាំង​មាន​បំណង​យក​ទឹក​អាស៊ីត​ស្រោច​លើ​ប្រពន្ធ បណ្តាល​ឲ្យ​រង​របួស​ជា​ទម្ងន់ ដោយ​សារ​តែ​ភ្លើង​ប្រចណ្ឌ​ជាមួយ​ប្រពន្ធ​ដោយ​ចោទ​ថា ប្រពន្ធ​បាន​លួច​ស្រឡាញ់​ជាមួយ​បុរស​ផ្សេង ខណៈ​ពេល​ដែល​ខ្លួន បាន​ចាក​ចេញ​ពី​នាង​ទៅ​មាន​ស្រី​ថ្មី ប្រហែល​ជា​មួយ​ឆ្នាំ​មក​ហើយ ហើយ​ទើប​តែ​ត្រឡប់​មក​ផ្ទះ​វិញ ដើម្បី​សុំ​ផ្សះ​ផ្សា​គ្នា។ ជម្លោះ​ហិង្សា​ក្នុង​គ្រួសារ​ប្តី​ប្រពន្ធ​ដែល​មាន​កូន​បី​នាក់​នេះ កើត​ឡើង នៅ​ក្នុ ​ឃុំ​សុចិត្រ ស្រុក​សណ្តាន់ ខេត្ត​កំពង់ធំ។

មេ​ប៉ុស្តិ៍​សុចិត្រ លោក ម៉ឺន ម៉ៃ បាន​ប្រាប់​កាសែត ភ្នំពេញ ប៉ុស្តិ៍ កាល​ពី​ម្សិល​មិញ​ថា ជន​បង្ក​បាន​ចាប់​ចង​ប្រពន្ធ​របស់​ខ្លួន ជាប់​នឹង​សសរ​ផ្ទះ ហើយ​បាន​យក​ដំបង​វាយ​លើ​ខ្លួន ចាប់​ពី​ចង្កេះ​ចុះ​ក្រោម​ដែល​ធ្វើ​ឲ្យ​មាន​ស្នាម​ជាំ​យ៉ាង​ខ្លាំង។

លោក​បាន​ថ្លែង​ថា៖ «មិន​ត្រឹម​តែ​វាយ​នឹង​ដំបង ធ្វើ​ឲ្យ​របួស​ពេញ​ខ្លួន​ប៉ុណ្ណោះ​ទេ បុរស​ជា​ប្តី​ក៏​បាន​យក​អាស៊ីត​ស្រោច​លើ​ខ្លួន​ស្រ្តី​ជា​ប្រពន្ធ​ផង​ដែរ តែ​នាង​ជា​ប្រពន្ធ​បាន​ព្យាយាម​រើ​បម្រាស់ ក៏​ធ្វើ​ឲ្យ​ប៉ះ​ដៃ​បុរស​ជា​ប្តី​កំពប់​អាស៊ីត​ស្រោច​មក​លើ​ចំ​ប្រដាប់​ភេទ​របស់​នាង​ឲ្យ​របួស ប៉ុន្តែ​សំណាង​ដែល​អាស៊ីត​នោះ​មិន​មែន​ជា​អាស៊ីត​ខ្លាំង​វា​គ្រាន់​តែ​ជា​អាស៊ីត​សម្រាប់​ចាក់​អាគុយ​តែ​ប៉ុណ្ណោះ»។ អំពើ​ហិង្សា​ក្នុង​គ្រួសារ​នេះ មិន​មាន​អ្នក​ជិត​ខាង​ណា​ចូល​ទៅ​ជួយ​អន្តរាគមន៍​ភ្លាមៗ​ទេ ដោយ​សារ​តែ​ផ្ទះ​នេះ​នៅ​ឆ្ងាយ​ដាច់​ពី​គេ។

ប៉ុន្តែ​នៅ​ពេល​ក្រោយ​មក ម្តាយ​មីង​របស់​ស្រ្តី​រង​គ្រោះ បាន​ឮ​សំឡេង​ស្រែក​ខ្លាំងៗ​ឲ្យ​ជួយ ទើប​គាត់​បាន​ទៅ​អឺត​មើល​ដោយ​ដំបូង​ស្មាន​តែ​មិន​មាន​អ្វី​ធ្ងន់​ធ្ងរ ព្រោះ​កាល​ពីរ​បី​ថ្ងៃ​មុន ពួក​គេ​ក៏​ធ្លាប់​ឈ្លោះ​គ្នា​បង្ក​អំពើ​ហិង្សា​ម្តង​រួច​មក​ហើយ​ដែរ។

លោក ម៉ឺន ម៉ៃ បាន​និយាយ​ទៀត​ថា៖ «ខុស​ពី​ការ​ស្មាន​របស់​ម្តាយ​មីង​ជន​រង​គ្រោះ ដោយ​សារ​ការ​ប្រើ​ហិង្សា​របស់​បុរស​ជា​ប្តី​បាន​ធ្វើ​ឲ្យ​ជន​រង​គ្រោះ​មាន​របួស​ជា​ទម្ងន់។ ពេល​នោះ​គាត់​បាន​ប្តឹង​មក​កាន់​សមត្ថកិច្ច ចុះ​ទៅ​ជួយ​អន្តរាគមន៍ និង​ចាប់​បាន​ជន​បង្ក​ហេតុ»។

ជន​ដៃ​ដល់​បាន​កាន់​ដំបង និង​ពូថៅ​ប្រុង​តប​ត​ជាមួយ​នឹង​សមត្ថកិច្ច​ដែល​ពេល​នោះ​ធ្វើ​ឲ្យ​សមត្ថកិច្ច​បាន​សម្រេច​បាញ់​មួយ​គ្រាប់​ឡើង​ទៅ​លើ ដើម្បី​បំបាក់​ស្មារតី​បុរស​នោះ ទើប​សមត្ថកិច្ច​អាច​ចាប់​បាន។

លោក​បញ្ជាក់​ថា៖ «ជន​រង​គ្រោះ ត្រូវ​បាន​បញ្ជូន​ទៅ​កាន់​មន្ទីរពេទ្យ​ឯកជន​ភ្លាមៗ ដោយ​សារ​រង​របួស​ធ្ងន់ធ្ងរ​ពេក។ នាង​នៅ​មាន​ការ​ឈឺ​ចាប់​នៅ​លើ​ប្រដាប់​ភេទ ពេល​ដែល​នាង​បត់​ជើង​តូច»។

លោក នួន គំនិត អធិការ​រង ស្រុក​សណ្តាន់ ទទួល​បន្ទុក​ផ្នែក​ព្រហ្មទណ្ឌ ក៏​បាន​ឲ្យ​ដឹង កាល​ពី​ថ្ងៃ​ម្សិល​មិញ​ដែរ​ថា លោក​បាន​បញ្ជូន​ជន​ដៃ​ដល់ ទៅ​កាន់​តុលាការ ដោយ​ចោទ​ពី​បទ អំពើ​ហិង្សា​ប្រព្រឹត្ត​ដោយ​សហព័ន្ធ​ឬ​អនីតិ​សង្វាស ដែល​តុលាការ​បាន​សម្រេច​ធ្វើ​ការ​ឃុំ​ខ្លួន​បុរស​រូប​នេះ​ជា​បណ្តោះ​អាសន្ន៕

អត្ថបទគួរចាប់អារម្មណ៍