ក្រចេះ: ព្រះរាជអាជ្ញាខេត្ត ក្រចេះ បានចោទប្រកាន់ស្ត្រីខ្មែរ អ៊ិស្លាម ម្នាក់ ដែលជះទឹកអាស៊ីតទៅលើប្ដីពីបទហិង្សាដោយចេតនា និងបានបញ្ជូនទៅឃុំនៅពន្ធនាគារ កាលពីល្ងាចថ្ងៃសៅរ៍។
លោក ចាន់ សុផល្លា មន្ត្រីនគរបាលកម្រិតធ្ងន់ខេត្តបានឲ្យដឹងថា ជនសង្ស័យបានបញ្ជូនទៅតុលាការចោទប្រកាន់ពីថ្ងៃសៅរ៍ បន្ទាប់ពីបានជះទឹកអាស៊ីតដាក់ប្ដីនាង កាលពីព្រឹកថ្ងៃសុក្រនៅក្នុងឃុំ ស្នួល ស្រុក ស្នួល។
លោកបន្តថា៖ «នាងកំពុងជាប់ឃុំនៅពន្ធនាគារខេត្តដើម្បីស៊ើបអង្កេតបន្ថែមទៀត តែខ្ញុំមិនដឹងថា សវនាការករណីនេះនឹងចាប់ផ្ដើមនៅពេលណាទេ»។
ព្រះរាជអាជ្ញារងអម តុលាការខេត្ត លោក ហាក់ ហ៊ាន់ បានធ្វើការចោទស្រី្តជាជនសង្ស័យតាមមាត្រា ២២២ នៃក្រមព្រហ្មទណ្ឌ ដែលបានចែងថា «អំពើហិង្សាដែលប្រព្រឹត្តដោយសហព័ន្ធឬ អនីតិសង្វាសជន។ អំពើហិង្សាដោយចេតនា ត្រូវផ្តន្ទាទោសដាក់ពន្ធនាគាររយៈពេលពី ២ ឆ្នាំទៅ ៥ ឆ្នាំនិងពិន័យជាប្រាក់ពី ៤ លានទៅ ១០ លានរៀល»។
លោកបន្ថែមថា ជនរងគ្រោះត្រូវបញ្ជូនទៅព្យាបាលនៅមន្ទីរពេទ្យខេត្ត កំពង់ចាម និងបានធូរស្រាលហើយ ដោយសារតែវាមិនមែនជាអាស៊ីតខ្លាំង។
អធិការ នគរបាលស្រុក ស្នួល លោក ចាន់ សុគីម បានប្រាប់ថា ជនសង្ស័យឈ្មោះ លី សាណះ អាយុ ៣៨ ឆ្នាំបានទៅទិញទឹកអាស៊ីតនៅឯផ្សារ និងបានយកទៅជះលើប្ដីនាងដែលកំពុងផឹកស៊ីជាមួយបុរសបីនាក់ និងស្ត្រីម្នាក់ទៀតនៅកន្លែងកើតហេតុ។
លោក ចាន់ សុគីម ថ្លែងថា៖ «ជនសង្ស័យខឹងសម្បានឹងប្ដីរបស់ខ្លួនដែលផឹកស្រា និងកៀកកើយនឹងស្ត្រីម្នាក់ទៀត។ នាងបានហៅឲ្យត្រឡប់ទៅផ្ទះវិញជាច្រើនដង តែគាត់បានបដិសេធ និងបន្តផឹកស្រា បន្ទាប់មកនាងបានប្រើពាក្យសម្តីជេរប្រមាថដាក់ប្ដីរហូតមានទំនាស់គ្នា»។
លោក ចាន់ សុគីម បានថ្លែងថា បន្ទាប់ពីនាងទាស់នឹងប្ដីនាងនៅកន្លែងស៊ីផឹកហើយ នាងបានទៅផ្សារ ហើយត្រឡប់មកវិញដោយកាន់ដបទឹកសុទ្ធ ដែលមានទឹកអាស៊ីត ក្នុងនោះ រួចជះទៅលើមុខ និងខ្លួនជនរងគ្រោះបណ្ដាលឲ្យរបួស។
លោក សុគីម បញ្ជាក់ថា៖ «មនុស្សបីនាក់រងរបួសដោយទឹកអាស៊ីតនៅពេលនោះគឺ បុរសជាប្ដីនាង រួមទាំងបុរសម្នាក់ និងស្រ្តីម្នាក់ដែលអង្គុយនៅក្បែរជនរងគ្រោះ ប៉ុន្តែពួកគេរងរបួសស្រាលទេ។ យើងមិនទាន់បានជួបជនរងគ្រោះពីរនាក់ទៀតទេ ព្រោះគេបានចេញពីកន្លែងកើតហេតុភ្លាមៗបន្ទាប់ពីរងរបួស»។
លោកបន្តថា ជនសង្ស័យមានបំណងរត់គេចខ្លួនបន្ទាប់ពីនាងបានជះទឹកអាស៊ីតដាក់ប្ដី ប៉ុន្តែត្រូវនគរបាលតាមរកនិងចាប់ខ្លួនទៅសួរនាំ ហើយបញ្ជូនទៅស្នងការខេត្ត មុនពេលធ្វើការចោទនិងឃុំខ្លួន។ លោកបន្ថែមថា៖ «ប្ដីនាងមិនដាក់ពាក្យប្ដឹង ឬក៏សុំឲ្យធ្វើការផ្ដន្ទាទោសប្រពន្ធគាត់ទេ ប៉ុន្តែសមត្ថកិច្ចអនុវត្តទៅតាមផ្លូវច្បាប់»៕ PN
