កំពង់ឆ្នាំងៈ អ្នកជាប់សង្ស័យ៤នាក់ក្នុងចំណោម៥នាក់ពាក់ព័ន្ធករណីបោកគ្រាប់បែកចូលក្នុងផ្ទះអតីតប្រធានមន្ទីរសង្គមកិច្ចនិង អតីតយុទ្ធជនខេត្តកំពង់ឆ្នាំងកាលពីខែកញ្ញាត្រូវបានសាលាដំបូងខេត្តកំពង់ឆ្នាំងសម្រេចដោះលែងភ្លាមៗវិញបន្ទាប់ពីកោះហៅមកសាកសួរកាលពីរសៀលថ្ងៃទី២១វិច្ឆិកា។
លោក ញូង ចន្ធី ចៅក្រមស៊ើបសួរសាលាដំបូងតុលាការខេត្តកំពង់ឆ្នាំងកាលពីម្សិលមិញបានឲ្យដឹងថាអ្នកជាប់សង្ស័យពាក់ព័ន្ធនឹងករណីបោកគ្រាប់បែកចូលក្នុងផ្ទះលោកអតីតប្រធានមន្ទីរសង្គមកិច្ចនិងអតីតយុទ្ធជនខេត្តកំពង់ឆ្នាំងគ្រាន់តែធ្វើការស៊ើបសួរហើយក៏មិនត្រូវបានដាក់ទោសនរណាម្នាក់ឲ្យជាប់ឃុំទេ ។
ការដោះលែងនេះត្រូវបានលោកចៅក្រម ញូង ចន្ទី បំភ្លឺប្រាប់ភ្នំពេញ ប៉ុស្តិ៍ កាលពីម្សិលមិញថា អ្នកទាំង៤នាក់ដែលបានកោះហៅមកសាកសួរ នៅរសៀលថ្ងៃ ទី២១ ខែវិច្ឆិកាដោយសង្ស័យថា ជាប់ពាក់ព័ន្ធករណីបោកគ្រាប់បែកកាលពីខែកញ្ញានោះមិនឃើញមានសញ្ញាណាមួយជាមូលដ្ឋានច្បាស់លាស់ទេបន្ទាប់ពីស្តាប់ចម្លើយនិងស្រាវជ្រាវកន្លងមក ។
លោកប្រាប់ឲ្យដឹងថា៖ «អ្នកទាំង៤នាក់ដែលបានកោះហៅសាកសួរនោះខ្ញុំបានអនុញ្ញាតឲ្យពួកគាត់ត្រឡប់ទៅផ្ទះវិញហើយប៉ុន្តែស្ថិតនៅក្រោមការស៊ើបអង្កេតបឋម» ។
ជុំវិញរឿងរ៉ាវគប់គ្រាប់បែកនេះ កាលពីម្សិលមិញមិនអាចស្វែងរកការបំភ្លឺណាមួយពីលោក ចូ វណ្ណា អតីតប្រធានមន្ទីរសង្គមកិច្ច និងអតីតយុវជនដែលចូលនិវត្តន៍នោះបានទេ ។ ប៉ុន្តែសាច់ញាតិរបស់ជនសង្ស័យម្នាក់ក្នុងចំណោម៥នាក់ដែលសមត្ថកិច្ចដាក់ការសង្ស័យជាប់ពាក់ព័ន្ធនឹងករណីបោកគ្រាប់បែកហើយដែលត្រូវតុលាការកោះហៅសាកសួរ និងដោះលែងក្រោមការស៊ើបអង្កេតនោះបានប្រាប់ដោយមិនឲ្យបញ្ចេញឈ្មោះថាគាត់មិនដឹងថាករណីនោះជារឿងគំនុំឬយ៉ាងណាទេកន្លងមក។
ប៉ុន្តែអតីតលោកប្រធានមន្ទីរសង្គមកិច្ចរូបនោះធ្លាប់ត្រូវបានបុគ្គលិកក្នុងមន្ទីរនាំគ្នាផ្តិតមេដៃសុំឲ្យថ្នាក់លើដកចេញពីតំណែងម្តងហើយ។
សាច់ញាតិរបស់ជនសង្ស័យរូបនោះបន្តថា ក្រោយមកទៀតត្រូវគេចោទលោកអតីតប្រធានមន្ទីរនោះថា បានធ្វើឲ្យបាត់ប្រាក់ខែរបស់អតីតយុទ្ធជននិងបានដកបុគ្គលិករបស់ខ្លួនចំនួន២នាក់ដោយម្នាក់ឲ្យផ្លាស់ទៅក្រសួងសង្គមកិច្ចនិងម្នាក់ទៀតឲ្យផ្លាស់ទៅធ្វើការនៅការិយាល័យសង្គមកិច្ចស្រុកជលគិរីខេត្តកំពង់ឆ្នាំង។
គួររម្លឹកថា នៅផ្ទះរបស់លោកចូ វណ្ណា អតីតប្រធានមន្ទីរសង្គមកិច្ចនិងអតីតយុទ្ធជនត្រូវបានជនមិនស្គាល់មុខគប់គ្រាប់បែកចូលក្នុងបរិវេណផ្ទះដោយប៉ុនប៉ងសម្លាប់កាលពីយប់ថ្ងៃទី២៧ខែកញ្ញា ឆ្នាំ២០១១កន្លងទៅ ខណៈដែលក្រុមគ្រួសាររបស់លោកកំពុងរីករាយក្នុងពិធីជប់លៀងនៅក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង ធ្វើឲ្យសមាជិកគ្រួសាររងរបួសធ្ងន់ និងស្រាលចំនួន៥នាក់និងស្លាប់(កូនប្រុសរបស់លោក) ប៉ុន្តែលោក ចូ វណ្ណា បានរួចផុតពីសេចក្តីស្លាប់។
ចំពោះមនុស្សចំនួន៥នាក់ដែលត្រូវបានគេសង្ស័យថា បានជាប់ពាក់ព័ន្ធទៅនឹងករណីគប់គ្រាប់បែកសម្លាប់ក្រុមគ្រួសារលោក ចូ វណ្ណា នោះរួមមានៈ ទី១ ឈ្មោះ យង់ សៅវុឌ្ឍី ភេទប្រុស អាយុ ៥០ឆ្នាំ មានឋានៈជាអនុប្រធានមន្ទីរសង្គមកិច្ច និងអតីតយុទ្ធជនខេត្តកំពង់ឆ្នាំង ទី២ ឈ្មោះ ឱម ប៊ុណ្ណា ភេទប្រុស អាយុ ៥៥ឆ្នាំ ជាប្រធានការិយាល័យ សង្គមកិច្ចនិងអតីតយុទ្ធជន ស្រុករលាប្អៀរ ទី៣ ឈ្មោះ ឈាង ចន្ធី ភេទប្រុស អាយុ ៤៣ឆ្នាំ ជាអនុប្រធានការិយាល័យសង្គមកិច្ច និងអតីតយុទ្ធជន ស្រុកជលគិរី ទី៤ ឈ្មោះ អ៊ុក សុភ័ក ភេទប្រុស អាយុ៤៣ឆ្នាំ ជាមន្ត្រីការិយាល័យអភិវឌ្ឍន៍អតីតយុទ្ធជន និងទី៥ ឈ្មោះ សាំង សារ៉ាវុធ ភេទប្រុស អាយុ ៤៦ឆ្នាំ ជាមន្ត្រីយោធា ក្រុងកំពង់ឆ្នាំង។
ប៉ុន្តែឈ្មោះ សាំង សារ៉ាវុធ មិនបានចូលខ្លួនទៅតាមដីកា កោះហៅរបស់ចៅក្រមតុលាការខេត្តឡើយ ៕
