The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​សម្រេច​រឿង​នេន​បាត់​ខ្លួន​ធ្វើ​ឲ្យ​មាន​មន្ទិល




តុលាការ​សម្រេច​រឿង​នេន​បាត់​ខ្លួន​ធ្វើ​ឲ្យ​មាន​មន្ទិល

តុលាការ​សម្រេច​រឿង​នេន​បាត់​ខ្លួន​ធ្វើ​ឲ្យ​មាន​មន្ទិល

Content image - Phnom Penh Post

កំពង់ចាមៈ រឿង​ក្តីក្តាំ​លោក​នេន​និង​ចៅ​អធិការ​វត្ត​ប៉ើស នៅ​ស្រុក​ក្រូច​ឆ្មារ ក្នុង​ខេត្ត​កំពង់​ចាម ទាក់​ទិន​ទៅ​នឹង​ការ​បាត់​ខ្លួន​នេន ហើយ​ចៅ​អធិការ​ជាប់​ចោទ​ថា​ធ្វើ​ទារុណ​កម្ម​បណ្តាល​ឲ្យ​នេន​នោះ​សុគត ឥឡូវ​ស្រាប់​តែ​តុលាការ​សម្រេច​ឲ្យ​ចៅ​អធិការ​នៅ​ក្រៅ​ឃុំ ដែល​ធ្វើ​ឲ្យ​កាន់​តែ​មាន​មន្ទិល​ជុំវិញ​ការ​សម្រេច​នេះ។

ចៅ​អធិការ​វត្ត​ប៉ើស​២ នៅ​ស្រុក​ក្រូច​ឆ្មារ ត្រូវ​សាលា​ដំបូង​ខេត្ត​ចេញ​ដីកា​សម្រេច​ពី​ថ្ងៃ​ទី១ ខែ​មករា ឲ្យ​និមន្ត​ទៅ​វត្ត​វិញ បន្ទាប់​ពី​កោះ​ហៅ​មក​សាក​សួរ​ពាក់​ព័ន្ធ​នឹង​ការ​បាត់​នេន​មួយ​អង្គ និង​ត្រូវ​វិន័យ​ធរ​ខេត្ត​កំពង់​ចាម និមន្ត​ឲ្យ​មក​គង់​នៅ​វត្ត​ជាមួយ រង់​ចាំ​ការ​ស៊ើប​អង្កេត​ពី​ថេរ​សភា​សង្ឃ។

ព្រះ​វិន័យ​ធម៌​ខេត្ត យិត សុខា មាន​សង្ឃ​ដីកា​ថា ៖ «តុលា​ការ​អះអាង​ថា រក​មិន​ឃើញ​ភស្តុ​តាង ពាក់​ព័ន្ធ​នឹង​ការ​ស្លាប់​របស់​នេន នាម ម៉ាន់ សុខ​ហេង ព្រះ​ជន្ម​២១​វស្សា​នោះ​ទេ ហើយ​ក៏​បាន​ចេញ​ដីកា​សម្រេច​ឲ្យ​ចៅ​អធិការ​វត្ត​ប៉ើស​នាម ស្រួយ គឹម​ហ៊ង ព្រះ​ជន្ម ៤៨ វស្សា និមន្ត​ទៅ​គ្រប់​គ្រង​វត្ត​នេះ​វិញ​បណ្តោះ​អាសន្ន»។

ព្រះអង្គ​មាន​ថេរ​ដីកា​បន្ត​ថា លោក​ចៅ​អធិការ​មាន​ខ្សែ​អាត់​វីដេអូ​និង​លិខិត​ផ្សេងៗ ជា​ភស្តុ​តាង​យក​ទៅ​បំភ្លឺ​តុលាការ​ជុំវិញ​រឿង​បាត់​នេន ខណៈ​ដែល​ដើម​បណ្តឹង​សង្ស័យ​ថា ចៅ​អធិការ​អង្គ​នេះ​ធ្វើ​ទារុណ​កម្ម​បណ្តាល​ឲ្យ​នេន​សុគត និង​បាន​យក​ទៅ​បង្ហាញ​ក្នុង​អង្គ​ប្រជុំ​ថេរសភា កាល​ពី​ថ្ងៃ​ទី​៣០ ខែ​ធ្នូ កន្លង​ទៅ​ផង​ដែរ។

ព្រះអង្គ​បញ្ជាក់​ថា៖​«តុលាការ​ចេញ​ដីកា​អនុញ្ញាត​ឲ្យ​ចៅ​អធិការ​វត្ត​ទៅ​គ្រប់​គ្រង​វត្ត​វិញ កាល​ពី​ថ្ងៃ​ទី​០១ ខែ​មករា​ពិត​មែន ប៉ុន្តែ​បាន​ហាម​មិន​ឲ្យ​លោក​និមន្ត​ចេញ​ពី​ខេត្ត​ទេ លើក​លែង​តែ​មាន​ការ​អនុញ្ញាត​ពី​តុលាការ​ជា​មុន»។

ព្រះ​អង្គ​មាន​ថេរ​ដីកា​ដែរ​ថា៖​«អាត្មា​មិន​សម​គំនិត​ជាមួយ​អ្នក​ប្រព្រឹត្ត​ខុស​ទេ ហើយ​បើ​ចៅ​អធិការ​វត្ត​ធ្វើ​ខុស​មែន​នោះ អាត្មា​នឹង​ចាប់​ផ្សឹក ប៉ុន្តែ ពុទ្ធ​បរិស័ទ​ចំណុះ​ជើង​វត្ត​ជា​ច្រើន​បាន​មក​ធ្វើ​សាក្សី​និង​យំ​ស្រែក​តវ៉ា​ថា ចៅ​អធិការ​វត្ត​ប៉ើស​គ្មាន​កំហុស​ទេ»។

ម្តាយ​មីង​នេន​បាត់​ខ្លួន អ្នក​ស្រី ជ្រង់ គ្រុយ ពី​ម្សិល​មិញ​ប្រាប់​ថា រឿង​នេះ​ខាង​ថេរសភា​សង្ឃ​ដែល​មាន​សម្តេច​ព្រះ​វនរ័តន៍ ណយ ច្រឹក សង្ឃ​នាយក​រង​ថ្នាក់​ទី៣ និង​ជា​អនុ​ប្រធាន​ទី២​ថេរសភា​សង្ឃ និង​សម្តេច​ឧត្តម​វង្សា មួង រ៉ា លេខា​ធិការ​ថេរសភា​សង្ឃ បាន​កោះ​ហៅ​ភាគី​ទាំង​សង​ខាង​ប្រជុំ​កាល​ពី​ថ្ងៃ​ទី​៣០ ខែ​ធ្នូ ហើយ​មែន ប៉ុន្តែ អង្គ​ប្រជុំ​មិន​ទាន់​សម្រេច​ថា​យ៉ាង​ម៉េច​ទេ? ក៏​ស្រាប់​តែ​តុលាការ​ចេញ​ដីកា​ឲ្យ​ចៅ​អធិការ​មាន​កំហុស​នៅ​ក្រៅ​ឃុំ​បណ្តោះ​អាសន្ន​ទៅ​វិញ។

អ្នកស្រី​បញ្ជាក់​ថា ៖ «រឿង​នេះ​ព្រះ​រាជ​អាជ្ញា​បាន​ដាក់​បន្ទុក​ទៅ​លើ​ចៅ​អធិការ​រួច​ហើយ រីឯ​ខាង​ក្រសួង​ធម្មការ​និង​ក្រសួង​យុត្តិធម៌ បាន​ចេញ​លិខិត​អន្តរាគមន៍​បន្ត​បន្ទាប់​ដែរ ក្នុង​ន័យ​បង្គាប់​ឲ្យ​អាជ្ញាធរ​ពាក់​ព័ន្ធ​ចាត់​ការ​រឿង​ក្តី​នេះ​ឲ្យ​បាន​ត្រឹម​ត្រូវ»។

អ្នកស្រី​និយាយ​ថា ៖ «ខ្ញុំ​មិន​ពេញ​ចិត្ត​នឹង​ការ​សម្រេច​របស់​តុលាការ​ទេ ខ្ញុំ​ចង់​ឲ្យ​លោក​ចៅ​អធិការ​គង់​ជាមួយ​នឹង​​ព្រះ​វិន័យ​ធរ​ខេត្ត​សិន ព្រោះថា វា​មាន​អន្តរាគមន៍​ពី​រដ្ឋ​មន្រ្តី​ក្រសួង​ធម្មការ​និង​សាសនា ពី​ក្រសួង​យុត្តិធម៌ និង​មាន​ចំណារ​ពី​សម្តេច​ព្រះ​សង្ឃ​រាជ ទេព វង្ស ថា​សូម​ទុក​ឲ្យ​ច្បាប់​គេ​ដោះ​ស្រាយ»។

130108_09a
ចៅអធិការវត្តប៉ើស នាម ស្រួយ គឹមហ៊ង តុលាការសម្រេចឲ្យនិមន្តទៅគ្រប់គ្រងវត្តវិញ សហការី

លោក ចាន់ ចេន មេធាវី​ការពារ​នេន​បាត់​ខ្លួន​ប្រាប់​ថា លោក​គិត​ថា​រាល់​ចំណាត់​ការ​របស់​តុលាការ​ខេត្ត ក៏​ដូច​ជា​អាជ្ញាធរ​ពាក់​ព័ន្ធ​មិន​ត្រឹម​ត្រូវ​និង​មិន​ផ្តល់​យុត្តិធម៌​ដល់​ជន​រង​គ្រោះ​ទេ​ក្នុង​រឿង​ក្តី​នេះ ព្រោះ​គេ​ចង់​បំបិទ​ដាន។

លោកលើក​ឡើង​ថា៖​«តាម​ការ​ស៊ើប​អង្កេត​យ៉ាង​ដិត​ដល់​របស់​ខ្ញុំ គឺ​បាន​រក​ឃើញ​កន្លែង​ដុត​សព​នេន​នេះ និង​រក​ឃើញ​តា​អាចារ្យ​ជា​អ្នក​ដុត​សព​នេន​នោះ​ផ្ទាល់​ផង ដូច្នេះ វាំង​នន​ខ្មៅ​បាន​លាត់​ឡើង​ទៅ​ហើយ»។

លោកប្រាប់ថា ពាក់ព័ន្ធ​នឹង​ចំណាត់​ការ​ក្នុង​រឿង​នេះ​វា​ហាក់​ដូច​ជា​អយុត្តិធម៌​ណាស់ ហើយ​ការ​សម្រេច​បែប​នេះ​អាច​ធ្វើ​ឲ្យ​អ្នក​ប្តឹង​ចៅ​អធិការ មាន​ទោស​ទៅ​វិញ​ផង។ លោក​ថា រឿង​នេះ​អាច​ជា​សំណុំ​រឿង​ឧក្រិដ្ឋ​ក្នុង​ជួរ​ព្រះ​សង្ឃ ទី១ ហើយ​នៅ​ស្រុក​ខ្មែរ។

លោក​ចៅ​អធិការ​វត្ត​ប៉ើស​នាម ស្រួយ គឹមហ៊ង មិន​អាច​ទាក់​ទង​បាន​ទេ ប៉ុន្តែ​លោក សុខ ជា ជា​មេធាវី​ការពារ​ក្តី​បាន​បញ្ជាក់​ប្រាប់​ពី​ម្សិល​មិញ​ថា បទ​ចោទ​ប្រកាន់​ចៅ​អធិការ​ថា នៅ​ថ្ងៃ​ទី​១៣ មេសា ឆ្នាំ​មុន​ថា មាន​វាយ​ដំ​និង​បំបាត់​សាក​សព​នេន​នោះ ទាំង​ប៉ូលិស ទាំង​ព្រះ​រាជ​អាជ្ញា​ទាំង​មន្ទីរ​ពេទ្យ បាន​ឆែក​ទៅ​គឺ​អត់​មាន​ទេ។ លោក​អះ​អាង​ថា ៖ «គេ​ថា​បាត់​ខ្លួន​នៅ​ថ្ងៃ​ទី​១៣ មេសា តែ​ធម្មតា​ពេល​ចូល​ឆ្នាំ ក្នុង​វត្ត​មាន​មនុស្ស​ច្រើន​ណាស់ ហេតុ​អី​គេ​មិន​ឃើញ​ឡាន​ពេទ្យ​ចូល​វត្ត ហើយ​មាន​គេ​ឃើញ​នេន​នោះ​ជួយ​ចង​ទង់​ក្នុង​វត្ត​ទៀត​ផង។ មួយ​ទៀត សាក្សី​ទាំង​កូន​កម្លោះ ទាំង​ម្តាយ​បាន​ទៅ បំភ្លឺ​នៅ​តុលាការ​ថា ក្នុង​ពិធី​រៀប​អាពាហ៍​ពិពាហ៍ នៅថ្ងៃ​ទី​២៨ ខែ​មេសា នេន​អង្គ​នេះ​បាន​និមន្ត​ទៅ​សូត្រ​មន្ត​ក្នុង​ពិធី​នោះ​ផង»។

លោក បញ្ជាក់ថា ៖ «ជា​ធម្មតា​សាក្សី​ឆ្លើយ​ប្រាប់​នគរបាល គឺជា​រឿង​របស់​គាត់ តែ​ការ​សម្រេច យ៉ាង​ម៉េច​នោះ ខាង​តុលាការ​ទេ​ជា​អ្នក​សម្រេច​ផ្អែក​លើ​ភស្តុ​តាង»។

ព្រះ​ចៅ​អធិការ​វត្ត​ប៉ើស​ត្រូវ​អនុគណ​ស្រុក​ក្រូច​ឆ្មារ​នាំ​ទៅ​មន្ទីរ​ធម្មការ​និង​សាសនា​ខេត្ត និង​មនុស្ស​២​នាក់ នាំ​ទៅ​ស្នង​ការ​ខេត្ត​កាល​ពី​​ថ្ងៃ​ទី២១ ខែ​វិច្ឆិកា ឆ្នាំ​មុន ក្នុង​ចំណោម​ជន​សង្ស័យ​បួន​នាក់ ពាក់​ព័ន្ធ​ករណី​ធ្វើ​ទារុណ​កម្ម​ជ្រុល​ដៃ​លើ​នេន​នាម ម៉ាន់ សុខ​ហេង រហូត​សុគត កាល​ពី​ជាង​៨ខែ​មុន នោះ បន្ទាប់​ពី​ពេទ្យ​មិន​អាច​ជួយ​បាន។ សំណុំ​រឿង​ស្តីពី​ការ​បាត់​នេន​មួយ​អង្គ​នេះ ក៏​បាន​ទៅ​ដល់​តុលាការ ហើយ​សាលា​ដំបូង​ខេត្ត​កំពង់​ចាម បាន​ចេញ​ដីកា​កោះ​ហៅ​សាក្សី​៤​នាក់​នោះ មក​សាកសួរ​មាន​បុគ្គលិក​ពេទ្យ​និង​អ្នក​បើកបរ​រថយន្ត​របស់​មន្ទីរ​ព្យាបាល​ស្រុក​ក្រូច​ឆ្មារ ប៉ុន្តែ​បាន​ដោះ​លែង​អ្នក​ដាំ​បាយ​ពីរ​នាក់​ប្តី​ប្រពន្ធ​ពី​ពន្ធនាគារ​វិញ។

បើទោះជាមាន​អំណះ​អំណាង​ខុសៗ​គ្នា​ក្តី ក៏​រហូត​មក​ដល់​ពេល​នេះ​គ្មាន​តម្រុយ​ណា​មួយ​ថា នេន​ដែល​បាត់​ខ្លួន​នោះ ស្នាក់​នៅ​ទីណា ឬ​ក៏​ពិត​ជា​សុគត​មែន​ឬ​យ៉ាង​ណា​ឡើយ។ ប៉ុន្តែ ញោម​លោក​ធ្លាប់​អះ​អាង​តាម​ចៅ​អធិការ​វត្ត​ទូរស័ព្ទ​ទៅ​ប្រាប់​ថា លោក​កូន​បាន​ដោះ​ស្បង់​ចីពរ​រត់​តាម​ស្រី​បាត់​ទៅ​ហើយ តែ​តាម​ប៉ូលិស​ស៊ើប​ថា មាន​ការ​សូក​លុយ​១ពាន់​ដុល្លារ​ឲ្យ​គ្រូ​ពេទ្យ​បំបាត់​សាក​សព​នេន​ដែល​សុគត​នោះ​ផង។ ពាក់​ព័ន្ធ​ការ​សម្រេច​នេះ មិន​អាច​ទាក់​ទង​រក​ការ​បញ្ជាក់​ពី​សមត្ថកិច្ច​មូល​ដ្ឋាន​បាន​ទេ កាល​ពី​ម្សិលមិញ។

ចំណែក​ព្រះ​រាជ​អាជ្ញា​និង​ចៅក្រម​ស៊ើប​អង្កេត នៃ​សាលា​ដំបូង​ខេត្ត​កំពង់​ចាម​ដែល​កាន់​រឿង​ក្តី​នេះ​មិន​អាច​ទាក់​ទង​បានទេ៕

អត្ថបទគួរចាប់អារម្មណ៍